មន្ត្រីយោធា វរសេនីយ៍ត្រី ផាត ផានណូ ភេទប្រុស អាយុ៣៦ឆ្នាំ នៃនាយកដ្ឋានបញ្ជូនសារក្រសួងការពារជាតិ ស្នាក់នៅចំណុចផ្ទះលេខ367DE0 ស្ថិតនៅតាមបណ្ដោយផ្លូវ២៣៨ ភូមិ០១ សង្កាត់បឹងព្រលឹត ខណ្ឌ៧មករា រាជធានីភ្នំពេញ ត្រូវបានសមត្ថកិច្ចឃាត់ខ្លួនក្រោយបាញ់កាំភ្លើង៥គ្រាប់ នៅក្នុងទំនាស់ជាមួយក្រុមក្មេងទំនើង។
ជុំវិញករណីនេះ ជនបង្ក បានលើកឡើងថា៖”គាត់ជាអ្នកបម្រើការផ្នែកសន្តិសុខនៅកន្លែងកម្សាន្ត នឹកX នៅវេនយប់ ដោយថ្ងៃកើតហេតុ វេលាម៉ោង ៣:៤០នាទីនាទីទៀបភ្លឺ ពេលចេញពីធ្វើការជិះម៉ូតូដល់មុខផ្ទះ ស្រាប់តែឃើញក្រុមក្មេងស្ទាវ ៤នាក់ រត់ចេញពីផ្លូតូច សំដៅមក មិនដឹងជាមានបំណងអ្វី ក៏ដកអាវុធខ្លីពីចង្កេះបាញ់ឡើងលើចំនួន ៥គ្រាប់ តែមិនបណ្តាលឱ្យមានរបួសអ្នកណាម្នាក់ឡើយ ពេលនោះក្រុមក្មេងបានរត់បាត់អស់ រួចចាក់សោទ្វារចូលផ្ទះសំរាក”។
បច្ចុប្បន្ន កម្លាំងនគរបាលនៃអធិការដ្ឋាននគរបាលខណ្ឌ៧មករា ឃាត់ខ្លួនបានហើយ រួចប្រគល់ជូនកម្លាំងកងរាជអាវុធហត្ថខណ្ឌ ចាត់ការបន្ត៕
