លោកជំទាវអ្នកឧកញ៉ា ម៉ៅ ចំណាន ភរិយាអ្នកឧកញ៉ា គិត ម៉េង បានជាប់ឆ្នោតក្លាយជាប្រធានសមាគមសិល្បករខ្មែរអាណត្តិទី៦ បន្ទាប់ពីជំទាវ ចន ច័ន្ទលក្ខិណា ដែលមានសិល្បករ សិល្បការិនី សរុបចំនួន៦០០នាក់បោះឆ្នោត ខណៈបេក្ខភាពមាន៣រូប គឺមានលោកជំទាវអ្នកឧកញ៉ា ម៉ៅ ចំណាន លោក ផាត់ តារារដ្ឋ និងលោក គួច ខេវិន។
នៅព្រឹកថ្ងៃទី២ ឧសភា នៅរាជបណ្ឌិតសភាកម្ពុជា តាមបណ្ដោយផ្លូវសហព័ន្ធរុស្ស៊ី ការបោះឆ្នោតជ្រើសរើសប្រធានសមាគមសិល្បករបានដល់វេលាកំណត់ ខណៈអាណត្តិថ្មីនេះគឺបានទៅលើលោកជំទាវអ្នកឧកញ៉ា ម៉ៅ ចំណាន ដែលសំឡេងការគាំទ្រពីសិល្បករ សិល្បការិនី ទទួលបានច្រើនជាងគេក្នុងចំណោមបេក្ខភាពផ្សេងទៀត។ នៅលើបណ្តាញសង្គមសិល្បករ សិល្បការិនី បានបង្ហោះអមអរសាទរទៅកាន់លោកជំទាវអ្នកឧកញ៉ា ម៉ៅ ចំណាន ក្នុងការក្លាយជាប្រធានសមាគមសិល្បករខ្មែរអាណត្តិទី៦ពីឆ្នាំ២០២៤ ដល់ឆ្នាំ២០២៩។
គួរបញ្ជាក់ផងដែរថា លោកជំទាវអ្នកឧកញ៉ា ម៉ៅ ចំណាន ជាអតីតតារាសម្តែងល្បីឈ្មោះ ស្រីតូច ចំណាន កើតនៅឆ្នាំ១៩៨៣ បច្ចុប្បន្នមានអាយុ៤១ឆ្នាំមានទីកន្លែងកំណើត នៅខេត្តស្វាយរៀង។ លោកជំទាវអ្នកឧកញ៉ា ម៉ៅ ចំណាន បានបោះជំហានចូលប្រឡូកក្នុងវិថីសិល្បៈ ក្នុងអំឡុងឆ្នាំ១៩៩៨ ដោយអាជីពដំបូងជាអ្នកចម្រៀងតាមភោជនីយដ្ឋាន បន្ទាប់មកអតីតអ្នកសិល្បៈរូបនេះមានឱកាសបានចូលសម្តែង ខារ៉ាអូខេ នៅក្នុងផលិតកម្មហង្សមាស ផលិតកម្ម យូធូ និងផលិត ស្ទឹងសង្កែ រហូតបានឡើងកូដក្លាយជាពិធីការិនី ប្រចាំស្ថានីយទូរទស្សន៍ ប៉ុស្តិ៍លេខ៥ផងដែរ ។.png)
ក្រោយពីផ្អាកពីអាជីពសិល្បៈដោយសារតែជួបឧបទ្ទរហេតុលើឆាក ភ័ព្ទព្រេងវាសនារបស់អតីតអ្នកសិល្បៈរូបនេះខ្ពស់ត្រដែង ក្លាយជាឧត្តមភរិយារបស់សេដ្ឋីស្រុកខ្មែរគឺអ្នកឧកញ៉ា គិត ម៉េង និងបានដឹកដៃគ្នា ចូលរោងការសំពះផ្ទឹម តាមប្រពៃណីខ្មែរ នៅថ្ងៃទី២០ ខែមីនា ឆ្នាំ២០១៥ បន្ទាប់ពីអ្នកទាំងពីរមានកូន៤នាក់( ប្រុសពីរ ស្រីពីរ) ជាមួយគ្នា៕
