ថ្ងៃ១៧ មេសា ១៩៧៥ ៤៩ឆ្នាំមុននេះ របបកម្ពុជាប្រជាធិបតេយ្យខ្មែរក្រហម បានប្រើអំពើហិង្សាចូលកាន់កាប់ប្រទេសនិងបានធ្វើឱ្យមនុស្សស្លាប់អស់ជិត២លាននាក់ ក្នុងរយៈពេលដឹកនាំប្រទេសជាង៣ឆ្នាំ ៨ខែ ២០ថ្ងៃ។
នាគ្រានោះ នៅថ្ងៃទី១៧មេសា កងទាហានស្លៀកខោអាវខ្មៅ បានចូលមកទីក្រុងភ្នំពេញ ខណៈក្រុមទាហានរបបសាធារណរដ្ឋខ្មែរលោក លន់ នល់ បានលើកទង់ជ័យសនៅគ្រប់កន្លែង។
ក្រោយមកទាហានឈុតខ្មៅទាំងនោះបានប្រកាសដាក់មេក្រូ សុំឱ្យពលរដ្ឋដកថយចេញពីភ្នំពេញក្នុងរយៈពេល៣ថ្ងៃ ដោយខ្លាចអាមេរិកាំងទម្លាក់គ្រាប់បែក។
បន្ទាប់ពីជម្លៀសមនុស្សចេញពីក្រុង ខ្មែរក្រហមបានលុបចោលនូវរាល់កម្មសិទ្ធិឯកជន ហើយរូបីយវត្ថុជាតិត្រូវគេបោះបង់ ធនាគារជាតិរងការបំផ្លិចបំផ្លាញ។ រីឯវត្តអារ៉ាមដែលធ្លាប់ជាកន្លែងសក្ការៈបូជាតាមបែបព្រះពុទ្ធសាសនានោះត្រលប់ទៅកន្លែងចិញ្ចឹមជ្រូក ហើយព្រះសង្ឃត្រូវខ្មែរក្រហមចាប់ផ្សឹក។
ក្នុងរយៈពេល៣ឆ្នាំ ៨ខែ ២០ថ្ងៃនេះ ពលរដ្ឋកម្ពុជា រស់នៅដូចធ្លាក់នរក ដោយមិនមានសិទ្ធគ្រប់គ្រាន់ក្នុងការរស់នៅ ដោយតែងតែទទួលទារុណកម្ម និងការសម្លាប់គ្នារវាងខ្មែរនិងខ្មែរតែប៉ុណ្ណោះ។
លុះដល់ថ្ងៃរំដោះ ៧ មករា ១៩៧៩ កងទ័ពវៀតណាមចូលមកដល់រដ្ឋធានីភ្នំពេញ ដើម្បីរំដោះរដ្ឋធានីភ្នំពេញពីពួកខ្មែរក្រហមដែលបានកាន់កាប់ពីឆ្នាំ១៩៧៥-១៩៧៩៕
