តារាសម្តែងជួរមុខ កញ្ញា ស៊ីន យូប៊ីន បានជួបតារាល្បីល្បាញមួយរូបទៀតហើយគឺ Jackson Wang សមាជិកនៃក្រុមចម្រៀង K-Pop Got7 ។ បានជួបតារាល្បីរូបនេះ ស៊ីន យូប៊ីន មិនឱ្យខាតនោះទេដោយនាងបានប្រាប់ពីប្រទេសកម្ពុជាដល់ Jackson Wang រហូតដល់តារាល្បីរូបនេះបង្ហើបថាចង់មកលេងកម្ពុជាទៀតផង។ លើសពីនេះ យូប៊ីន បានកោតសរសើរតារាប្រុសរូបនេះថាជាទេវបុត្រក្នុងព្រេងនិទានមិនស្មើរព្រោះបានជួបពិតលើសពីអ្វីបានដឹងឮនៅតាមបណ្តាញសង្គម។
អ្នកគាំទ្រមានការចាប់អារម្មណ៍ជាថ្មីទៅលើតារាសម្តែង ស៊ីន យូប៊ីន បន្ទាប់ពីរូបនាងបានបង្ហោះវីដេអូខ្លីមួយនៅលើបណ្តាញសង្គមបានជួបជាមួយតារាល្បីឈ្មោះ Jackson Wang នៅក្នុងហាងសាឡនមួយកន្លែង។ ជាមួយគ្នានេះ ស៊ីន យូប៊ីន បានភ្ជាប់មកជាមួយខ្លឹមសារថា «បានជួបរូបពិតគឺលើសពីអ្វីដែលបានឮនិងបានឃើញតាមsocial media បុរសម្នាក់នេះទេវបុត្រក្នុងព្រេងនិទានមិនស្មើរ(ខ្ញុំសំដៅលើអត្តចរិតគាត់)»។ តារាស្រីក្រសោបពានទាំងជាតិនិងអន្តរជាតិរូបនេះបានលើកឡើងទៀតថា «ខ្ញុំបានប្រាប់គាត់ពីកម្ពុជា ហើយគាត់បានឆ្លើយថាគាត់ពិតជាចង់មកកម្ពុជាណាស់ យើងសង្ឃឹមថានឹងបានទទួលស្វាគមន៍វត្តមាន jackson wang មកកាន់ទឹកដីកម្ពុជានៅថ្ងៃណាមួយ»។
នេះជាភាពវៃឆ្លាតមួយរបស់កញ្ញា ស៊ីន យូប៊ីន បានជួបជាមួយតារាល្បីមានឱកាសសំណេះសំណាលគ្នាហើយគឺមិនឱ្យខាតនោះទេឆ្លៀតជួយផ្សព្វផ្សាយពីប្រទេសកម្ពុជា ឱ្យកាន់តែទូលំទូលាយ។ អ្នកគាំទ្រក៏បានកោតសរសើរ ស៊ីន យូប៊ីន ថាជាតារាស្រីកំពូលសំណាងព្រោះនាងបានជួបតារាល្បីៗលំដាប់ពិភពលោកបានច្រើនណាស់។
គេចាំបានថា កាលពីពាក់កណា្តលខែមីនា ស៊ីន យូប៊ីន បានទៅចូលរួមកម្មវិធីម៉ាកយីហោល្បីមួយនៅប្រទេសកូរ៉េខាងត្បូង ដោយបានជួបជាមួយ Lisa សមាជិក BLACKPINK ផងដែរ។ តារាកម្ពុជារូបនេះនិង Lisa ក៏បានជជែកគ្នា ថតរូប ឱបគ្នាយ៉ាងគួរឱ្យស្រលាញ់ក្នុងមិត្តភាពជាអ្នកសិល្បៈដូចគ្នា។
កន្លងមក មិនត្រឹមតែបានជួប Lisa ប៉ុណ្ណោះទេ តែ ស៊ីន យូប៊ីន គឺជាតារាខ្មែរម្នាក់មានមុខមាត់នៅលើឆាកអន្តរជាតិចូលរួមកម្មវិធីធំៗហើយបានជួបតារាល្បីដូចជា Jennie សមាជិក BLACKPINK Jungkook សមាជិក BTS ជាដើម និងតារាល្បីៗជាច្រើនរូបទៀត។ ឃើញទិដ្ឋភាពបែបនេះហើយ អ្នកគាំទ្រតែងតែលើកសរសើរថា ស៊ីន យូប៊ីន ជាតារាស្រីកំពូលសំណាងប៉ះចំសុទ្ធតែតារាលំដាប់ៗ៕