ក្រុមហ៊ុនមហាហង្សរបស់លោក អ៊ិន សុភិន បានប្រកាសជាផ្លូវការហើយថាការប្រកួតMiss Universe Cambodia ឆ្នាំនេះក្រុមហ៊ុនពុំមានឱកាសរៀបចំការប្រកួតនោះទេ។ ប្រការនេះបានធ្វើឱ្យ កញ្ញា ចន សុទីម៉ា ជាបវរកញ្ញាចក្រវាលកម្ពុជាមានវាសនាមិនខុសពី ហង្ស ម៉ានីតា ឡើយក្លាយជាបវរកញ្ញាកូនពៅក្នុងក្រុមហ៊ុនដែលត្រូវមានការផ្លាស់ប្តូរអ្នកគ្រប់គ្រងថ្មី។ ទោះយ៉ាងណា អ្នកគាំទ្រវិស័យបវរកញ្ញាសង្ឃឹមថាអ្នកគ្រប់គ្រងថ្មី នឹងមានអ្វីពិសេសជូនទៅកាន់ ចន សុទីម៉ា ជាបវរកញ្ញាចក្រវាលកម្ពុជាឆ្នាំចាស់។
តាមការជូនដំណឹងនៅលើផេក Miss Universe Cambodia កាលពីយប់ថ្ងៃទី៤ មេសា ឆ្នាំ២០២៤ បានឱ្យដឹងថា «ផលិតកម្ម មហាហង្ស មិនបានបន្តសិទ្ធិក្នុងការរៀបចំកម្មវិធីបវរកញ្ញាចក្រវាលកម្ពុជាទៀតនោះទេ។ នៅក្នុងឱកាសនេះផលិតកម្មមហាហង្សសូមថ្លែងអំណរអរគុណដល់ អ្នកគាំទ្រ FAN CLUB , SPONSOR ទាំងអស់សម្រាប់ការជួយគាំទ្រកន្លងមក ។ សូមជូនពរដល់អ្នកទាំងគ្នាជួបតែពុទ្ធិពរទាំង ៤ ប្រការ អាយុ សុខៈ ពលៈកុំបីឃ្លៀងឃ្លាឡើយ»។
ផលិតកម្ម មហាហង្ស របស់លោក អ៊ិន សុភិន ដែលមានសិទ្ធិរៀបចំកាលពីឆ្នាំទៅមានកញ្ញា ចន សុទីម៉ា ជាម្ចាស់មកុដដែលបានតំណាងកម្ពុជាចូលរួមប្រកួតនៅលើឆាកអន្តរជាតិ។ បវរកញ្ញារូបនេះទទួលបានការលើកទឹកចិត្តយ៉ាងច្រើនពីអ្នកគាំទ្រ តារាល្បីៗជាច្រើនរូបសម្រាប់ការប្រកួតរបស់នាង។
ទោះជាយ៉ាងណា សុទីម៉ា មានវាសនាមិនខុសគ្នាប៉ុន្មាននោះទេជាមួយនឹង ហង្ស ម៉ានីតា ដែលជាបវរកញ្ញាកូនពៅត្រូវមានអ្នកគ្រប់គ្រងថ្មី។ កាលពី ចន សុទីម៉ា បានឈ្នះការប្រកួតក្នុងប្រទេស ហង្ស ម៉ានីតា ដែលជាម្ចាស់ជ័យលាភីឆ្នាំចាស់ពុំបានបំពាក់មកុដឱ្យនាងនោះទេដោយសារតែក្រុមហ៊ុនរៀបចំខុសគ្នាដែលជំនួសដោយ ប៊ី សុធារី ជាបវរកញ្ញាចក្រវាលឆ្នាំ២០១៧ បំពាក់មកុដឱ្យ ចន សុទីម៉ា។
សម្រាប់អ្នកគ្រប់គ្រងថ្មីរបស់ Miss Universe Cambodia 2024 គឺបានទៅលើលោកឈួង ឆីវឆូយ ប៉ុន្តែគេមិនទាន់ដឹងថា ចន សុទីម៉ា អាចបង្ហាញខ្លួនជាមួយអ្នកគ្រប់គ្រងថ្មីឬយ៉ាងណានោះទេ។
អ្នកគាំទ្រវិស័យបវរកញ្ញាក៏បង្ហាញអារម្មណ៍សោកស្តាយដូចគ្នាទៅកាន់បវរកញ្ញាទាំងពីររូប ហង្ស ម៉ានីតា និង ចន សុទីម៉ា ដែលមានវាសនាស្រដៀងគ្នាក្លាយជាកូនពៅត្រូវមានការផ្លាស់ប្តូរអ្នកគ្រប់គ្រងថ្មី៕