អ្នកគាំទ្រមានការភ្ញាក់ផ្អើលយ៉ាងខ្លាំងមិនដឹងថាតារាសម្តែង ឆឹម សក្កដា គូដណ្តឹងតារាចម្រៀង ពេជ្រ សោភា មានវិបត្តិអ្វីនោះទេស្រាប់តែបានបង្ហោះសារចង់ឱ្យខ្លួនឯងស្លា.ប់ទៅវិញ។ ក្រោយពេលមានការជីកសួរស្រាប់តែលោកពោលយ៉ាងខ្លីថា ព្រោះតែជីវិតរាល់ថ្ងៃគ្មានន័យ ខណៈជំទាវ ចន ច័ន្ទលក្ខណា ប្រធានសមាគមសិល្បករបានលួងលោម ឆឹម សក្កដា ឱ្យរំសាយអារម្មណ៍ទំលាក់រឿងមិនល្អចោល។
វេលាម៉ោងជិត១រំលងអធា្រត្រឈានចូលថ្ងៃទី៤ ខែមេសា នៅលើគណនីហ្វេកប៊ុកផ្ទាល់លោក ឆឹម សក្កដា បានបង្ហោះសារយ៉ាងគួរឱ្យភ្ញាក់ផ្អើលថា «មានអារម្មណ៍ថាចង់ឱ្យខ្លួនឯងស្លាប់»។ ក្រោយមានការបង្ហោះចង់ឱ្យខ្លួនឯងស្លាប់របស់តារាសម្តែងរូបនេះមានការជីកសួរទៅកាន់លោកពីមូលហេតុនៃការគិតបែបនេះដោយ ឆឹម សក្កដា បានតបវិញថា «ជីវិតគ្មានន័យ» ដោយលោកបន្ថែមថា «រាល់ថ្ងៃគឺបែបនឹង»។
ជាមួយសំណេរចង់ឱ្យខ្លួនឯងស្លាប់ គូដណ្តឹង ពេជ្រ សោភា បានបង្ហោះសំណេរមួយទៀតថា «អារម្មណ៍ខ្ញុំពេលនេះមិនដឹងនិយាយប្រាប់នរណាឱ្យយល់ ព្រោះគ្រប់គ្នាមើលឃើញតែស្នាមញញឹមរបស់ខ្ញុំតែប៉ុណ្ណោះ!»។
ការបង្ហោះសារប្លែកៗរបស់ ឆឹម សក្កដា មិនត្រឹមតែមានហ្វេនៗអ្នកស្គាល់លោកបានចូលទៅលើកទឹកចិត្តកុំឱ្យលោកគិតអ្វីមិនល្អ ជំទាវ ចន ច័ន្ទលក្ខណា ប្រធានសមាគមសិល្បករ ក៏ដូចជារៀមច្បងរបស់លោកផ្ទាល់បានព្យាយាមទាក់ទងទៅលោកដែរប៉ុន្តែទាក់ទងមិនចូល ព្រមទាំងបានផ្ញើសារលើកទឹកចិត្តដល់ ឆឹម សក្កដា ថា «ប្អូនប្រុសដ៏សែនល្អរបស់បង រំសាយអារម្មណ៍ ទំលាក់រឿងមិនល្អចោល ok»។
គេមិនទាន់ដឹងថា តារាសម្តែង ឆឹម សក្កដា មានវិបត្តិអ្វីនោះទេរហូតដល់ថ្នាក់ពោលចង់ឱ្យខ្លួនឯងស្លាប់បែបនេះ ស្របពេលដែលអាជីពសិល្បៈរបស់លោកក៏រវល់ជាប់ថតចុះខេត្តរហូតមិនសូវបានជួបគូដណ្តឹងរបស់ខ្លួនជាតារាចម្រៀង ពេជ្រ សោភា នោះទេ។ ចំណែកឯហ្វេនៗបានត្រឹមតែជួយលើកទឹកចិត្តពីចម្ងាយកុំឱ្យលោកគិតអ្វីផ្តេសផ្តាស៕