Taylor Swift ត្រូវបានគេដាក់ឈ្មោះជាផ្លូវការជាសមាជិកនៃក្លិបបីសញ្ញាក្បៀសនៅថ្ងៃទី២ មេសា ឆ្នាំ២០២៤ ខណៈដែលទស្សនាវដ្ដី Forbes បានបញ្ជាក់ពីពាក្យចចាមអារ៉ាមដែលប៉ាន់ប្រមាណទ្រព្យសម្បត្តិរបស់តារាចម្រៀងរូបនេះលើសពីមួយពាន់លានដុល្លារ។
យោងតាមការចុះផ្សាយរបស់សារព័ត៌មាន CNA តារាចម្រៀង Taylor Swift បានរៀបចំដំណើរទេសចរណ៍ដែលមានតម្លៃរាប់ពាន់លានដុល្លារជាលើកដំបូងដែលមិនធ្លាប់មាន The Eras Tour ដែលកំពុងដំណើរការបានជំរុញសេដ្ឋកិច្ច និងធ្វើឱ្យអ្នកគាំទ្ររីករាយជុំវិញពិភពលោក។ តារាស្រីវ័យ៣៤ឆ្នាំរូបនេះក៏មានអចលនទ្រព្យដ៏សំខាន់ផងដែរជាមួយនឹងផ្ទះនៅទីក្រុង New York, Beverly Hills, Nashville និងផ្ទះនៅមាត់សមុទ្រនៅកោះ Rhode ។
ព្រឹត្តិការណ៍ទេសចរណ៍របស់នាងគឺជាកំណត់ត្រាមួយក្នុងចំណោមកំណត់ត្រាជាច្រើនដែល Taylor Swift បានបំបែកកាលពីឆ្នាំមុន រួមទាំងការឈ្នះពានរង្វាន់ Grammy ទីបួនសម្រាប់អាល់ប៊ុមប្រចាំឆ្នាំ ដែលជាតារាចម្រៀងស្រីឈ្នះច្រើនបំផុត។ នាងទទួលបានការចាប់អារម្មណ៍យ៉ាងខ្លាំងនៅក្នុងឆ្នាំ២០២៣ ជាមួយនឹងទស្សនាវដ្តី Time ផ្តល់កិត្តិយសដល់តារាចម្រៀងរូបនេះថាជាបុគ្គលឆ្នើមប្រចាំឆ្នាំ។
Taylor Swift បានក្លាយជាមហាសេដ្ឋីកាលពីចុងឆ្នាំ២០២៣ ត្រូវបានដាក់បញ្ចូលក្នុងបញ្ជីមហាសេដ្ឋីប្រចាំឆ្នាំរបស់ Forbes ជាលើកដំបូងនៅថ្ងៃអង្គារ ទី២ ខែមេសា នេះ ដោយចូលរួមជាមួយតារាល្បីៗចំនួន ១៣ នាក់ផ្សេងទៀតដែលមានទ្រព្យសម្បត្តិសរុបប្រមាណ ៣១ពាន់លានដុល្លារ៕