ប្រធានពន្ធនាគារព្រៃស លោក នុត សវនា បានធ្វើការច្រានចោលទាំងស្រុងនូវលិខិតក្លែងក្លាយដែលត្រូវបានគេចែកចាយនៅលើបណ្ដាញសង្គម ដោយប្រឌិតរឿងថាមានការឯកភាពអនុញ្ញាតឱ្យទណ្ឌិត ស្រី ស៊ីណា ចេញទៅសម្រាកព្យាបាលជំងឺមហារី.កថ្លើមនៅក្រៅឃុំ។ ព្រឹត្តិការណ៍នេះត្រូវបានប្រមុខពន្ធនាគារបញ្ជាក់យ៉ាងម៉ឺងម៉ាត់ថា ជាព័ត៌មានប្រឌិតដែលធ្វើឡើងក្នុងចេតនាបំភាន់ភ្នែកមហាជន និងបំផ្លាញទំនុកចិត្តលើប្រព័ន្ធយុត្តិធម៌កម្ពុជា។
យោងតាមការផ្ដល់បទសម្ភាសន៍ផ្ទាល់ជាមួយបណ្ដាញព័ត៌មាន លោកឧត្តមអគ្គានុរក្សថ្នាក់លេខ១ នុត សវនា អគ្គនាយករង និងជាប្រធានមណ្ឌលអប់រំកែប្រែទី១ បានអះអាងយ៉ាងច្បាស់ថា គិតត្រឹមថ្ងៃទី៦ ខែសីហា ឆ្នាំ២០២៦ នេះ ឯកសារដែលត្រូវបានចែកចាយនៅលើបណ្ដាញសង្គមនោះ គឺគ្រាន់តែជាលិខិតក្លែងក្លាយដែលត្រូវបានគេបង្កើតឡើងតែប៉ុណ្ណោះ។ លោកប្រធានពន្ធនាគារបានសង្កត់ធ្ងន់ថា ទណ្ឌិត ស្រី ស៊ីណា មិនដែលត្រូវបានអនុញ្ញាត ឬបញ្ជូនទៅសម្រាកព្យាបាលជំងឺនៅមន្ទីរពេទ្យក្រៅពន្ធនាគារនោះឡើយ ហើយក៏មិនដែលធ្លាប់ត្រូវបានបញ្ជូនទៅពិនិត្យព្យាបាលនៅមន្ទីរពេទ្យរុស្ស៊ីនោះដែរ ពោលគឺរូបលោកកំពុងតែទទួលរងការឃុំខ្លួន និងអនុវត្តទោសយ៉ាងតឹងរ៉ឹងនៅក្នុងពន្ធនាគារព្រៃសទៅតាមនីតិវិធីច្បាប់ជាធរមាន ដោយគ្មានការលើកលែង ឬផ្ដល់បុព្វសិទ្ធិពិសេសណាមួយដូចពាក្យចចាមអារ៉ាមនោះទេ។
គួររំលឹកផងដែរថា ទណ្ឌិត ស្រី ស៊ីណា គឺជាអតីតឧកញ៉ាម្នាក់ ដែលត្រូវបានមហាជនស្គាល់យ៉ាងច្បាស់តាមរយៈសកម្មភាពបាញ់ប្រហារយ៉ាងសាហាវឃោរឃៅ បណ្ដាលឱ្យមនុស្សពីរនាក់ស្លាប់ និងម្នាក់ទៀតរងរបួសធ្ងន់ នៅក្នុងបុរីប៉េងហួតបឹងស្នោ កាលពីខែមិថុនា ឆ្នាំ២០២៤ កន្លងទៅ។ នៅក្នុងសំណុំរឿងព្រហ្មទណ្ឌដ៏ក្តៅគគុកនេះ សាលាដំបូងរាជធានីភ្នំពេញ កាលពីថ្ងៃទី២៣ ខែធ្នូ ឆ្នាំ២០២៤ បានប្រកាសសាលក្រមផ្ដន្ទាទោសជនជាប់ចោទរូបនេះ ដាក់ពន្ធនាគារកំណត់សរុបចំនួន ២៧ឆ្នាំ ពីបទឃាតកម្ម និងបទរំលោភលើលំនៅដ្ឋាន ព្រមទាំងបង្គាប់ឱ្យសងសំណងជំងឺចិត្តរាប់លានដុល្លារទៅខាងភាគីគ្រួសារជនរងគ្រោះថែមទៀតផង។
.jpg)
ជារួមមក ការចេញមុខបកស្រាយយ៉ាងរហ័សរបស់ប្រមុខពន្ធនាគារព្រៃស បានជួយជម្រះមន្ទិលសង្ស័យ និងស្ដារទំនុកចិត្តរបស់មហាជនមកលើប្រព័ន្ធច្បាប់កម្ពុជាឡើងវិញ។ ទណ្ឌិត ស្រី ស៊ីណា នៅតែបន្តទទួលទោសកំហុសរបស់ខ្លួននៅក្នុងគុកដដែល ដោយគ្មានការលួចលាក់ដោះលែង ឬបញ្ជូនទៅក្រៅឃុំក្រោមលេសជំងឺមហារីកនោះឡើយ។ ព្រឹត្តិការណ៍នេះ ក៏ជាសារដាស់តឿនដល់អ្នកលេងបណ្ដាញសង្គម ឱ្យមានការប្រុងប្រយ័ត្នខ្ពស់ចំពោះការចែកចាយលិខិតរដ្ឋបាលក្លែងក្លាយ ដែលបង្កឱ្យមានភាពវឹកវរ និងប៉ះពាល់ដល់សន្តិសុខសង្គម៕
