ជំងឺដាច់សរសៃឈាមខួរក្បាលគឺជាជំងឺសរសៃប្រសាទដ៏គ្រោះថ្នាក់ដែលកើតឡើងនៅពេលដែលសរសៃឈាមនៅក្នុងខួរក្បាលត្រូវបានស្ទះ ឬដាច់។ នៅពេលនោះ កោសិកាខួរក្បាលនឹងស្លាប់ ដោយសារតែខ្វះការផ្គត់ផ្គង់ឈាមដែលមានសារធាតុចិញ្ចឹម និងអុកស៊ីហ្សែន។ ដូច្នេះដើម្បីកាត់បន្ថយហានិភ័យនៃជំងឺដាច់សរសៃឈាមខួរក្បាល លោកវេជ្ជបណ្ឌិតនៃសហរដ្ឋអាមេរិក បានណែនាំភេសជ្ជៈមួយចំនួនដែលមានប្រសិទ្ធភាពបំផុតក្នុងការពារជំងឺដាច់សរសៃឈាមខួរក្បាល។
១.កាហ្វេ៖ ការផឹកកាហ្វេក្នុងបរិមាណគ្រប់គ្រាន់ មិនលើសពី ៤០០ មីលីក្រាមនៃជាតិកាហ្វេអ៊ីនក្នុងមួយថ្ងៃ គឺមានប្រយោជន៍ខ្លាំងណាស់សម្រាប់សុខភាពខួរក្បាល និងជួយការពារជំងឺដាច់សរសៃឈាមខួរក្បាល។ សារធាតុផ្សំក្នុងកាហ្វេផ្លាស់ប្តូរលំហូរឈាម ជួយការពារការកកឈាម ហើយអាស៊ីត Chlorogenic ក្នុងកាហ្វេក៏កាត់បន្ថយហានិភ័យនៃជំងឺទឹកនោមផ្អែម ដែលជាកត្តានាំឱ្យកើតជំងឺដាច់សរសៃឈាមខួរក្បាលផងដែរ។
២.ទឹកបន្លែ៖ បន្លែសម្បូរទៅដោយជាតិសរសៃ វីតាមីន និងសារធាតុរ៉ែ។ ដូច្នេះទឹកបន្លែដូចជា ទឹកស្ពៃខ្មៅ ត្រសក់ ខាត់ណា ស្ពៃក្តោប ជួយឱ្យរាងកាយបង្កើនភាពធន់ គ្រប់គ្រងសម្ពាធឈាម កាត់បន្ថយកូលេស្តេរ៉ុលក្នុងឈាម និងកម្រិតហានិភ័យនៃការកកឈាម។
៣.ទឹកផ្លែឈើគ្មានជាតិស្ករ៖ ផ្លែឈើមានបរិមាណវីតាមីន សារធាតុរ៉ែ និងសារធាតុប្រឆាំងអុកស៊ីតកម្មច្រើន។ សារធាតុចិញ្ចឹមទាំងនេះជួយការពារខួរក្បាល និងសរសៃឈាម កាត់បន្ថយហានិភ័យនៃជំងឺដាច់សរសៃឈាមខួរក្បាល ហើយវាក៏សម្បូរទៅដោយសារធាតុ quercetin ដែលអាចការពារការកកឈាម បន្ធូរសរសៃឈាម និងធ្វើឱ្យលំហូរឈាមប្រសើរឡើង។
៤.ទឹកចម្រោះ៖ មនុស្សពេញវ័យគួរផឹកទឹកចម្រោះជាមធ្យម ១.៨-២.២ លីត្រក្នុងមួយថ្ងៃ ដើម្បីជៀសវាងការខ្វះជាតិទឹក។ ការខ្វះជាតិទឹកធ្វើឱ្យឈាមកាន់តែក្រាស់ និងធ្វើឱ្យឈាមរត់ទៅខួរក្បាលកាន់តែពិបាក ងាយនឹងកក និងបង្កើនហានិភ័យនៃការស្ទះសរសៃឈាម។ ដូច្នេះការផឹកទឹកចម្រោះឱ្យបានគ្រប់គ្រាន់ជួយធ្វើឱ្យឈាមរត់បានប្រសើរឡើង។
៥.តែបៃតង៖ សារធាតុប្រឆាំងអុកស៊ីតកម្មដ៏រឹងមាំនៅក្នុងតែបៃតង រួមចំណែកការពារខួរក្បាលពីការខូចខាតដែលបណ្តាលមកពីរ៉ាឌីកាល់សេរី កាត់បន្ថយហានិភ័យនៃជំងឺដាច់សរសៃឈាមខួរក្បាល ដោយសារសារធាតុ Polyphenols រួមទាំង catechin និង epicatechin ប្រឆាំងនឹងការរលាក ក៏ដូចជាប្រឆាំងនឹងការកកឈាម និងការពារជំងឺសរសៃឈាម៕