យោងការតាមការស្រាវជ្រាវរបស់ទស្សនាវដ្តីឈ្មោះ Chronobiology International បានផ្សព្វផ្សាយអត្ថបទមួយដែលធ្វើឱ្យអ្នកផ្លាស់ប្តូរពេលវេលាធ្វើការ ជាពិសេស អ្នកធ្វើការពេលយប់ និងសម្រាកពេលថ្ងៃ ព្រួយបារម្ភយ៉ាងខ្លាំង ក្រោយពីទស្សនាវដ្តីនេះសរសេរថា អ្នកធ្វើការនៅពេលយប់ប្រឈមនឹងផលប៉ះពាល់សុខភាពធ្ងន់ធ្ងរ ។
បើតាមការស្រាវជ្រាវបង្ហាញថា អ្នកដែលចូលសម្រាកពេលយប់ជ្រៅបំផុត ពួកគេប្រឈមនឹងផលប៉ះពាល់សុខភាពធ្ងន់ធ្ងរ ដូចជា ៖ ប្រឈមនឹងការស្លាប់ កើនឡើង១០%, ជំងឺផ្លូវចិត្ត កើនឡើង៩៤%, ជំងឺទឹកនោមផ្អែម កើនឡើង៣០%, ជំងឺក្រពះ និងបំពង់រំលាយអាហារ កើនឡើង ២៣% ព្រមទាំងជំងឺពាក់ព័ន្ធនឹងជំងឺផ្លូវដង្ហើម កើនឡើង ២២% ។
ចំណែកលទ្ធផលស្រាវជ្រាវរបស់សាកលវិទ្យាល័យ King’s College នៅប្រទេសអង់គ្លេស កាលពីឆ្នាំ២០២៣ បង្ហាញថា ការសម្រាកតិចតួចពេក ឬសម្រាកតិចជាងរយៈពេល៥ម៉ោងកន្លះក្នុង១យប់ វានឹងប៉ះពាល់ដល់អរម៉ូនផ្សេងៗក្នុងរាងកាយ ហើយធ្វើឱ្យពួកគេបរិភោគអាហារច្រើនជាងមុនដើម្បីឱ្យខ្លួនឯងឆ្អែត ។ ហេតុនេះ បើពួកគេមានទម្លាប់បែបនេះយូរទៅ វានឹងធ្វើឱ្យឆាប់ឡើងទម្ងន់ ។ ក្រៅពីនេះ អរម៉ូនផ្សេងៗនឹងធ្វើឱ្យប៉ះពាល់ដល់ប្រព័ន្ធខួរក្បាល និងរាងកាយទៀតផង ។
ជាទូទៅ អ្នកធ្វើការពេលយប់មានទម្លាប់ចូលសម្រាកយប់ជ្រៅ ឬចេញពីធ្វើការពេលជិតភ្លឺ បន្ទាប់មក ពួកគេចាប់ផ្តើមចូលសម្រាកនៅពេលព្រឹក ។ ការស្រាវជ្រាវបង្ហាញថា អ្នកមានទម្លាប់បែបនេះតែងប្រឈមមុខនឹងជំងឺកាចសាហាវកាន់តែខ្លាំង និងឆាប់ស្លាប់ទៀតផង បើទោះជាពួកគេមានអាយុតិចក្តី ។ អ្នកធ្វើការពេលយប់តែងកើតជំងឺដាច់សរសៃឈាមខួរក្បាល, គាំងបេះដូង និងខ្សោយតម្រងនោម ។ នេះមិនទាន់រាប់បញ្ចូលកត្តាផ្សេងៗ ដូចជា ៖ តំណពូជ, ការបរិភោគអាហារ, ការរស់នៅប្រចាំថ្ងៃ, គុណភាពអាកាសធាតុ និងបរិស្ថានជុំវិញ ។
ដូច្នេះហើយ អ្នកធ្វើការងារពេលយប់ទាំងឡាយ ចាំបាច់ត្រូវយកចិត្តទុកដាក់ និងថែទាំសុខភាពរបស់ខ្លួនឱ្យបានខ្លាំង ហើយគួរតែជ្រើសរើសបរិភោគអាហារឱ្យបានសមរម្យផងដែរ ពីព្រោះសុខភាព គឺជាបញ្ហាសំខាន់បំផុតសម្រាប់ជីវិតមនុស្សម្នាក់ៗ ៕