យោងតាមរបាយការណ៍ផ្តាច់មុខពី Xportnews ដែលបានចេញផ្សាយនៅថ្ងៃទី២ មករា នេះ Jisoo សមាជិកក្រុម BLACKPINK នឹងចូលរួមជាមួយក្រុមហ៊ុនរបស់បងប្រុសរបស់នាងដែលជាក្រុមហ៊ុនអាជីវកម្មខាងអាហារសុខភាពសម្រាប់សកម្មភាពទោលរបស់ខ្លួនបន្ទាប់ពីចុះកុងត្រាបន្តជាមួយផលិតកម្ម YG តែលើសកម្មភាពក្រុម។ ទោះយ៉ាងណា ដំណឹងនេះមិនទាន់មានការបញ្ជាក់ពី Jisoo នោះទេ ខណៈដែលអ្នកតំណាងពីក្រុមហ៊ុនរបស់បងប្រុស Jisoo បានបញ្ជាក់ថាគេមិនដឹងពីទំនាក់ទំនងគ្រួសាររបស់ CEO ឡើយ។
តាមប្រភពព័ត៌មានបានរាយការណ៍ថា Jisoo សមាជិកក្រុម BLACKPINK នឹងចូលរួមជាមួយក្រុមហ៊ុនរបស់បងប្រុសរបស់នាងគឺ Biomom សម្រាប់សកម្មភាពទោល ខណៈពេលដែល Biomom គឺជាម៉ាកអាហារសុខភាពដែលគ្រប់គ្រងដោយបងប្រុសរបស់ Jisoo គឺ Kim Jung Hun ថ្មីៗនេះពួកគេបានទាក់ទាញការចាប់អារម្មណ៍ដោយប្រកាសពីផែនការអាជីវកម្មថ្មីរបស់ពួកគេ ដោយពង្រីកចូលទៅក្នុងឧស្សាហកម្មកម្សាន្ត និងជ្រើសរើសបុគ្គលិក។ ឈ្មោះបណ្តោះអាសន្នសម្រាប់ផ្នែកកម្សាន្តនៃក្រុមហ៊ុនរបស់ពួកគេគឺ Blissoo ដែលបន្ថែមពាក្យចចាមអារ៉ាមថា Jisoo នឹងចូលរួមជាមួយក្រុមហ៊ុនរបស់បងប្រុសនាង។
ផ្នែកមួយនៃការជ្រើសរើសបុគ្គលិករបស់ពួកគេក៏បានបង្ហាញពីរូបភាពរបស់ Jisoo និងបាននិយាយថាពួកគេកំពុងស្វែងរកពង្រីកអាជីវកម្មកម្សាន្តរបស់ពួកគេទាំងក្នុង និងក្រៅប្រទេសដើម្បីឱ្យសិល្បកររបស់ពួកគេត្រូវបានអ្នកគាំទ្រជុំវិញពិភពលោកស្រលាញ់។
ទោះបីជាយ៉ាងណាក៏ដោយ អ្នកតំណាងម្នាក់មកពី Biomom បានប្រាប់ Xportnews ថាពួកគេមិនបានដឹងអំពីរបាយការណ៍នេះទេ។ អ្នកតំណាងបាននិយាយថា វាពិបាកក្នុងការពន្យល់ពីទំនាក់ទំនងរបស់ក្រុមហ៊ុនជាមួយ Blissoo ។យើងមិនដឹងពីទំនាក់ទំនងគ្រួសាររបស់ CEO ទេ។
គួរបញ្ជាក់ផងដែរថា កាលពីថ្ងៃទី២៩ ធ្នូ ២០២៣ ផលិតកម្ម YG បានបញ្ចេញព័ត៌មានផ្លូវការថា សមាជិកទាំង៤របស់ BLACKPINK មិនបន្តកុងត្រាជាមួយក្រុមហ៊ុនសម្រាប់សកម្មភាពបុគ្គលរបស់ពួកគេឡើយ ដោយពួកគេបន្តកុងត្រាជាមួយក្រុមហ៊ុនតែសកម្មភាពក្រុមប៉ុណ្ណោះ។ លើសពីនេះ សមាជិក Jennie ក៏បានផលិតកម្មមួយផ្ទាល់ខ្លួនហើយនឹងមានសកម្មភាពផ្សេងៗជូនអ្នកគាំទ្រសម្រាប់ឆ្នាំ២០២៤ផងដែរ៕
