កូរ៉េខាងជើង៖ ទីបំផុតកូរ៉េខាងជើងនឹងបើកព្រំដែនរបស់ខ្លួនឡើងវិញជាលើកដំបូង ជាមួយនឹងករណីលើកលែងតិចតួច បន្ទាប់ពីបិទព្រំដែនអស់រយៈពេលជាង ៣ ឆ្នាំដោយសារជំងឺរាតត្បាត COVID-១៩។
កូរ៉េខាងជើង គឺជាប្រទេសមួយក្នុងចំណោមប្រទេសដែលអនុវត្តការបិទព្រំដែនដ៏តឹងរ៉ឹងបំផុតក្នុងពិភពលោក ដើម្បីឆ្លើយតបទៅនឹងការរីករាលដាលនៃមេរោគ COVID-១៩ នៅដើមឆ្នាំ ២០២០។
យោងតាមសេចក្តីប្រកាសចុងក្រោយនៃទីភ្នាក់ងារទេសចរណ៍ បានឱ្យដឹងថា ប្រទេសកូរ៉េខាងជើងត្រូវបានគេរំពឹងថានឹងបើកព្រំដែនរបស់ខ្លួនឡើងវិញជាផ្លូវការក្នុងពេលឆាប់ៗនេះ។ ទោះបីជាយ៉ាងណាក៏ដោយ នៅដើមដំបូង ប្រទេសនេះនឹងអនុវត្តចំពោះតែពលរដ្ឋកូរ៉េខាងជើងប៉ុណ្ណោះ។ ដូច្នេះ ប្រជាជនកូរ៉េខាងជើងនឹងអាចធ្វើដំណើរទៅផ្ទះដោយរថភ្លើង ឬអាចហោះហើរទៅក្រៅប្រទេសបាន។
កន្លងមកថ្មីៗនេះ អត្តពលិកកូរ៉េខាងជើងក៏បានចូលរួមក្នុងការប្រកួតកីឡាតេក្វាន់ដូអន្តរជាតិនៅប្រទេសកាហ្សាក់ស្ថាន។ នេះអាចជាលើកទីមួយហើយ ដែលប្រទេសនេះបានបញ្ជូនក្រុមកីឡាក្នុងស្រុកទៅក្រៅប្រទេស ចាប់តាំងពីការបិទព្រំដែនរបស់ខ្លួន ដោយសារតែជំងឺរាតត្បាត COVID-១៩ ក្នុងឆ្នាំ ២០២០។
បច្ចុប្បន្ន កូរ៉េខាងជើងកំពុងលើកកម្ពស់វិស័យទេសចរណ៍សម្រាប់ប្រជាជនរបស់ខ្លួន។ ប្រទេសនេះក៏បានទាក់ទាញភ្ញៀវអន្តរជាតិយ៉ាងច្រើនផងដែរ។ យោងតាមរបាយការណ៍របស់ទីភ្នាក់ងារទេសចរណ៍កូរ៉េខាងជើង ក្នុងឆ្នាំ ២០១៨ ចំនួនភ្ញៀវអន្តរជាតិទៅកាន់ប្រទេសកូរ៉េខាងជើងបានឈានដល់កម្រិតមួយ ដែលមានចំនួនដល់ទៅ ២០០,០០០ នាក់។ នៅឆ្នាំ ២០១៩ យោងតាមសារព័ត៌មាន NK News បាននិយាយថា យ៉ាងហោចណាស់មានអ្នកទេសចរចិនប្រមាណ ៣៥០,០០០ នាក់បានមកទស្សនាប្រទេសនេះ ដែលបង្កើតប្រាក់ចំណូលបានប្រហែល ១៧៥ លានដុល្លារ៕ ប្រភព៖cafef.com
