ដំណឹងចំណងអាពាហ៍ពិពាហ៍២ឆ្នាំរបស់តារាចម្រៀងអាម៉េរិក Ariana Grande កំពុងប្រេះឆាឈានដល់ផ្លូវលែងលះទោះព្យាយាមផ្សះផ្សាជាច្រើនដងក៏ដោយ បានធ្វើឱ្យមានការភ្ញាក់ផ្អើលយ៉ាងខ្លាំងខណៈមូលហេតុនៃការប្រេះឆាគូស្វាមីភរិយាមួយគូនេះកំពុងក្លាយជាប្រធានបទក្តៅលើបណ្តាញសង្គម។ តើមានកត្តាអ្វីដែលស្នេហាធ្លាប់តែផ្អែមល្ហែមរបស់ Ariana និងស្វាមី Dalton Gomez ជាភ្នាក់ងារអចលនទ្រព្យ ត្រូវមកបែកគ្នាយ៉ាងឆាប់រហ័សបែបនេះ?
តាមប្រភពមួយបានប្រាប់ទស្សវដ្តី PEOPLE ដែលបានចុះផ្សាយនៅថ្ងៃទី១៧ កក្កដា បានឱ្យដឹងថា តារាចម្រៀង និងតារាសម្តែង Ariana Grande វ័យ ៣០ ឆ្នាំ ថតរឿង Wicked នៅចក្រភពអង់គ្លេសអស់រយៈពេលជាច្រើនឆ្នាំ ខណៈមិនមានវត្តមានស្វាមីនៅជិតឡើយ។
ចំណែកឯលោក Dalton Gomez ជាភ្នាក់ងារអចលនៈទ្រព្យដ៏ប្រណីតមួយរូបបានកត់សម្គាល់ថា លោកផ្តោតសំខាន់លើអាជីពខ្លួនយ៉ាងខ្លាំង ហើយត្រូវការរស់នៅក្នុងទីក្រុង Los Angeles សហរដ្ឋអាម៉េរិក ហើយវាពិតជាបញ្ហាសម្រាប់ពួកគេ។ ប្រភពដដែលបានបន្ថែមទៀតថា អាជីពរបស់ស្វាមី Ariana ទាមទារឱ្យគេមិនអាចចាកចេញពីទីក្រុង Los Angeles ញឹកញាប់ទេ។ ដូច្នេះនៅពេលដែល Ariana Grande ចាប់ផ្តើមថតរឿង Wicked នៅប្រទេសអង់គ្លេស ពួកគេបានរៀបការហើយប៉ុន្តែត្រូវរស់នៅឆ្ងាយគ្នា។
តាមប្រភពផ្សេងគ្នាបានឱ្យដឹងថា Ariana និងស្វាមីបានបែកគ្នាកាលពីដើមឆ្នាំ២០២៣នេះ ដោយស្ងៀមស្ងាត់ ខណៈព្យាយាមផ្សះផ្សាជាច្រើនដងប៉ុន្តែនៅតែមិនអាចជានាគ្នាបានហើយទំនាក់ទំនងបានល្អក់កករតាំងពី Ariana ចេញទៅសម្តែងរឿងម្ល៉េះ។ ទោះបីជាយ៉ាងនេះក្តីប្រភពមួយបានឱ្យដឹងថា តារាចម្រៀងរូបនេះ និងស្វាមី ពួកគេនៅតែជាមិត្តនឹងគ្នា ហើយនៅតែនិយាយទូរស័ព្ទជាមួយគ្នាប្រចាំ ប៉ុន្តែសម្រាប់ចំណងអាពាហ៍ពិពាហ៍នោះឈានដល់ផ្លូវបំបែកហើយ។
ជាមួយគ្នានេះដែរ តារាស្រីម្នាក់ដែលកំពុងនៅទីក្រុងឡុងដ៍ ហើយកំពុងថតខ្សែភាពយន្តរឿង Wicked ត្រូវបានប្រទះឃើញថា Ariana មិនបានពាក់ចិញ្ចៀនរៀបការនោះទេ។ រឿងចិញ្ចៀននេះទៀតសោត កាលពីខែសីហា ឆ្នាំ២០២២ Ariana Grande បានចែករំលែកការបង្រៀនតុបតែងមុខនៅលើបណ្តាញសង្គម TikTok តែត្រូវអ្នកគាំទ្រចាប់បានថានាងមិនពាក់ចិញ្ចៀនឡើយ។ ប៉ុន្តែពាក្យចចាមអារ៉ាមនោះត្រូវបញ្ចប់វិញ ដោយសារនាងបានថា មូលហេតុនាងមិនបានពាក់ចិញ្ចៀនរៀបការដោយសារតែ ចិញ្ចៀនកំពុងត្រូវបានសម្អាត។
គួរបញ្ជាក់ថា Ariana Grande និង Dalton Gomez វ័យ២៧ ឆ្នាំបានចាប់ផ្តើមទាក់ទងគ្នានៅខែមករា ឆ្នាំ ២០២០ ហើយពួកគេបានប្រកាសពីការភ្ជាប់ពាក្យ១១ខែក្រោយពេលគេទាក់ទងគ្នា។ នៅថ្ងៃទី១៥ ខែឧសភា ឆ្នាំ២០២១ ពួកគេរៀបការលក្ខណៈឯកជននៅផ្ទះខាងស្រីដោយមានអ្នកចូលរួមមិនដល់២០ឡើយ នៅក្នុងទីក្រុង Montecito រដ្ឋកាលីហ្វ័រញ៉ា៕
