អស់ទ្រាំ! តិចម៉េង ដាក់ចំៗមិត្តខ្លះខ្ចីលុយអត់ឱ្យបែរនិយាយថា លោកលែងដូចមុនព្រោះជាតារាល្បី

ចាប់តាំងពីក្លាយជាម្ចាស់ពានមកវាសនា លីម តិចម៉េង កាន់តែខ្ពស់ត្រដែតពីក្មេងគង្វាលគោក្លាយជាតារាចម្រៀងល្បីមានហ្វេនរាប់លាននាក់។ ទន្ទឹមនឹងកេរ្តិ៍ឈ្មោះល្បីសុះសាយ ស្រាប់តែពេលនេះតារាចម្រៀងរូបនេះបានបញ្ចេញអារម្មណ៍ចាក់ដោតយ៉ាងខ្លាំងដល់មិត្តភក្តិមួយចំនួន និងមនុស្សមួយចំនួនឆាតមកខ្ចីលុយលោកស្រស់ៗពេលប្រាប់ថាអត់មាននិងលើកហេតុផលផ្សេងៗបែរជានិយាយដាក់លោកថាមិនដូចមុនព្រោះគេជាតារាល្បីកំពុងឡើងកូដ។

តាមរយៈសារនៅថ្ងៃទី៥ ខែកក្កដា ឆ្នាំ២០២៣ លីម តិចម៉េង បានរៀបរាប់យ៉ាងដូច្នេះថា «
អធ្យាស្រ័យបងប្អូនទាំងអស់គ្នាសុំនិយាយត្រង់ៗហើយព្រោះច្រើនពេក កាលមិនទាន់ប្រលង ពេលមានទុក្ខគ្មានអ្នកណាខ្វល់ និយាយជាមួយគេ១០ម៉ាត់គេឆ្លើយតប១ម៉ាត់ ពេលខ្លះមិនទាំងនិយាយជាមួយផង។ មិត្តខ្លះនឹកឆាតទៅសួរសុខទុក្ខ មិនទាន់ទាំងនិយាយអីផង វាប្រាប់យើងមុនទៅហើយថា កុំខ្ចីលុយណាអញគ្មានលុយឱ្យខ្ចីទេ ដល់ពេលនេះ មិត្តខ្លះ មនុស្សខ្លះ ឆាតមក call មក និយាយមិនទាន់បានប៉ុន្មានផង សុំខ្ចី 100$ 200$ យើងអត់ យើងមិនឱ្យប្រាប់ហេតុផលបែរជាមកថាយើង (មិនដូចមុន គេតារា គេឡើងកូដ … )»។

តារាចម្រៀងក្រសោបពានកម្មវិធីលំដាប់ពិភពលោក Cambodian Idol រដូវកាលទី៤រូបនេះបានបន្តថា«

ចង់និយាយថា ខ្ញុំមិនមែនជាធនាគារទេ ការងារខ្ញុំខំណាស់ ហើយសូម្បីតែខ្លួនឯងផ្ទាល់មិនទាន់ទាំងសល់អ្វីផង គ្រួសារក៏មិនទាន់បានជួយអ្វីឱ្យបានសាកសមក្នុងនាមជាកូនផង សូមបងប្អូន មិត្តៗចាស់ទាំងអស់ដែលបានគិតអវិជ្ជមានលើខ្ញុំ យកទៅគិតឱ្យបានច្បាស់ ហើយចង់ប្រាប់ថាខ្ញុំ គឺខ្ញុំ ខ្ញុំគឺ លីម តិចម៉េង គឺជាអតីតក្មេងគង្វាលគោម្នាក់ មួយជីវិតនេះមិនផ្លាស់ប្តូរជារាងរហូត សូមអរគុណ សូមជម្រាបលា»។

តាមរយៈសារនេះដែរ អ្នកគាំទ្ររបស់ លីម តិចម៉េង បានចូលទៅខំមិនបញ្ចេញមតិយ៉ាងច្រើននិងបង្ហាញការយល់ស្របអ្វីដែលលោកលើកឡើងព្រោះបច្ចប្បន្នលុយពិបាករកណាស់ ហើយគេក៏ឃើញរូបលោកខំច្រៀងជាច្រើនកន្លែងក្នុងមួយថ្ងៃៗមិនបានសម្រាកលោកក៏ចង់ផ្គត់ផ្គង់គ្រួសារលោកឱ្យផុតពីភាពលំបាកដូចគ្នា។

គួរបញ្ជាក់ថាចាប់តាំងពីក្លាយជាម្ចាស់ពានមក លីម តិចម៉េង មានលទ្ធភាពទិញរថយន្តមួយផ្ទាល់ខ្លួនប៉ុណ្ណោះ ហើយគេសង្កេតឃើញថាលោកមិនបានចាយជីវិតហាយសូបង្ហាញនៅលើបណ្តាញសង្គមឡើយ៕