អប្បិយជំនឿ តែងផ្សារភ្ជាប់ជាមួយនឹងជីវិតរស់នៅប្រចាំថ្ងៃរបស់ប្រជាជនកម្ពុជា តាំងពីបុរាណកាលរហូតមកដល់បច្ចុប្បន្ន ជាពិសេសគឺជំនឿដែលថាមានខ្មោចព្រាយបិសាចលងបន្លាចជាដើម។ ដូច្នេះហើយខាងក្រោមនេះ KBN News សូមរៀបរាប់អំពីប្រវត្តិភូមិមួយនៅរតនះគិរីដែលគេល្បីតៗគ្នាថា ជាកន្លែងដែលមានខ្មោចលងសាហាវជាងគេបំផុតលើលោក ដែលភូមិខ្មោចនោះមានឈ្មោះថា “ភូមិខ្មោចជនជាតិកាចក់”។
ភូមិខ្មោចជនជាតិកាចក់ ស្ថិតនៅភូមិកោះពាក្យ ឃុំកោះពាក្យ ស្រុកវើនសៃ ខេត្តរតនៈគិរី បានបង្កប់នូវរឿងអាថ៌កំបាំងជាច្រើនដែលរន្ធត់ព្រឺព្រួច សូម្បីតែម៉ោង ១២ ថ្ងៃត្រង់ក៏គ្មាននរណាហ៊ានចូលទៅភូមិនោះដែរ ព្រោះគេជឿតៗគ្នាថា នៅក្នុងភូមិនេះខ្មោចមានឥទ្ធិពលកាចសាហាវខ្លាំងណាស់។ អ្នកនាំភ្ញៀវទេសចរ នៅខេត្តរតនគិរី ដែលបានរួមដំណើរចូលក្នុងភូមិព្រៃខ្មោច បានឱ្យដឹងថា កាចក់ ជាជនជាតិភាគតិចមួយ ក្នុងចំណោមជនជាតិភាគតិចទាំង៦ នៅខេត្តរតនគិរី ហើយបច្ចុប្បន្នជនជាតិនេះ នៅសល់តិចជាងគេបំផុត។
ពួកគេមានភូមិ២ គឺភូមិមួយសម្រាប់ពួកគេរស់នៅ និងភូមិមួយទៀត ជាភូមិខ្មោច ដែលមានផ្ទៃដីរាប់សិបហិកតា សម្រាប់កប់ខ្មោច តាំងពីដូនតារបស់ពួកគេមក។ ទោះជាយ៉ាងណាក៏ដោយ សម្រាប់អ្នកភូមិជនជាតិកាចក់ ដែលស្ថិតជាប់ភូមិខ្មោច ក្បែរគ្នានោះ ក៏ពួកគេខ្លាចញញើតនឹងភូមិព្រៃខ្មោចនេះដែរ សូម្បីតែជិះទូកនៅលើទន្លេចតក្បែរព្រៃខ្មោចនោះ ក៏មិនហ៊ានផង។ ដូច្នេះហើយសម្រាប់ភ្ញៀវទេសចរណាដែលចង់ដើរទស្សនានូវទីនោះសូមកុំទៅតែម្នាក់ឯងព្រោះវាអាចនឹងមានគ្រោះថ្នាក់ផ្សេងៗកើតឡើង ដែលធ្វើឱ្យប៉ះពាល់ដល់អាយុជីវិតរបស់យើង ឬអាចនឹងមានខ្មោចតាមជាដើម៕
