តើជា ធឿន ធារ៉ា ឬយ៉ាងណា? លោកគ្រូ អេ ភូថង ថាមានអ្នកស៊ីញ៉េឱ្យសិស្សលោកចុះកុងត្រាជាមួយក្លិបផ្សេងហើយជាអ្នកធំទៀត

អ្នកស្នេហាវិស័យគុនខ្មែរ មានការភ្ញាក់ផ្អើលយ៉ាងខ្លាំងកាលពីយប់មិញនេះ បន្ទាប់ពីលោកគ្រូ អេ ភូថង បាននិយាយថាមានអ្នកស៊ីញ៉េកុងត្រាឱ្យសិស្សរបស់លោកទៅក្លិបដទៃដោយមិនបានសួរនាំលោកមួយម៉ាត់។ មុនពេលសិស្សលោកមិនទាន់ល្បីល្បាញ មិនបានមើលថែរក្សាឡើយ ដល់ពេលចាប់ផ្តើមល្បីមកដណ្តើមសិស្សលោកទៅចុះកុងត្រាជាមួយក្លិបផ្សេងទៅវិញ។

លោកគ្រូ អេ ភូថង ដែលជាអតីតស្តេចប្រដាល់ស្រុកខ្មែរ និងជាម្ចាស់ក្លិបប្រដាល់គុនខ្មែរ អេ ភូថង បានដាច់ចិត្តបង្ហោះសារទាំងយប់ថ្ងៃទី១ ខែមិថុនា នេះព្រោះតែបុគ្គលនោះជាអ្នកធំ តែលោកត្រូវតែដាច់ចិត្តនិយាយហើយក៏មិនឱ្យចប់ស្រួលៗដែរ។ លោក អេ ភូថង បានរៀបរាប់យ់ាងដូច្នេះថា «ថ្ងៃនេះផុសរាងយប់បន្តិចហើយទម្រាំដាច់ចិត្តហ៊ានផុស ព្រោះគេធំ ខ្ញុំ អេ ភូថង មិនដឹងអីផងហេតុអ្វីបានជាទៅស៊ីញ៉េកុងត្រាសិស្សរបស់ខ្ញុំឱ្យទៅអ្នកដទៃដោយមិនបានសួរខ្ញុំមួយមាត់? ចុះកាលពេល ៥ ទៅ ៦ ឆ្នាំមុនសិស្សខ្ញុំមិនទាន់ល្បីហេតុអីអ្នកមិនដណ្ដើមយកសិស្សខ្ញុំទៅ? ហើយអ្នកដែលទៅចុះកុងត្រាឱ្យគេនឹងកាលពីសិស្សធ្លាក់ខ្លួនមិនទាន់ល្បីហេតុអ្វីមិនមើលថែគាត់ផង? ដល់ពេលខ្ញុំសាងកេរ្តិ៍ឈ្មោះឱ្យគាត់បានល្បីហេតុអ្វីអ្នកឯងទៅស៊ីញ៉េកុងត្រាដោយមិនបានប្រាប់ខ្ញុំអីមួយមាត់ចឹង?»។

លោក បន្តទៀតថា «ឃើញខ្ញុំតូចទាបជាងអ្នក គិតថាខ្ញុំមិនដល់មែនទេឃើញខ្ញុំមិនមាត់កុំថាខ្ញុំភ្លើឱ្យសោះ!ខ្ញុំត្រឹមតែអតីតកីឡាករជើងចាស់មួយរូបតែប៉ុណ្ណោះគ្មានខ្សែហោដូចអ្នកទេ តែសូមចេះឱ្យតម្លៃខ្ញុំផង!មិនចប់ដោយស្រួលៗនោះទេ?»។

បន្ទាប់ពីលោកគ្រូ អេភូថង បង្ហោះសារដូចនេះ អ្នកស្នេហាគុនខ្មែរ បានចូលទៅខំមិនសួរនាំព្រាតនិងចង់ដឹងកាន់តែច្បាស់ពីបញ្ហាទាំងនេះ ដោយអ្នកខ្លះក៏បានលើកឡើងថា សិស្សដែលលោកគ្រូអេ និយាយនេះ អាចសម្តៅដល់ ធឿន ធារ៉ា ព្រោះកីឡាកររូបនេះកំពុងមានឈ្មោះបោះសំឡេងលើវិស័យនេះថែមទាំងបានចូលហាត់ក្នុងក្លិបប្រដាល់គ្រូ អេ ភូថង ខ្ទង់៥ឆ្នាំហើយដែរ។ យ៉ាងណាមិញ រឿងនេះលោកគ្រូ អេ មិនទាន់បានបកស្រាយលម្អិតឡើយ ហើយអ្នកស្នេហាគុនខ្មែរកំពុងរង់ចាំការបកស្រាយបន្ថែមទៀតដូចគ្នា។

គួរបញ្ជាក់ផងដែរថា កន្លងមកថ្មីៗនេះ ភរិយាលោកគ្រូ អេ ភូថង អ្នកស្រី ស សុម៉ាលី បានបង្ហាញក្តីបារម្ភដល់ធឿន ធារ៉ា អាចធ្លាក់កម្លាំងស៊ូស បន្ទាប់ពីកីឡាកររូបនេះឃ្លាតឆ្ងាយពីសង្វៀនហ្វឹកហាត់ ដោយជាប់រវល់នឹងការងារសិល្បៈ៕