តាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២៩ ខែមីនា បានឱ្យដឹងថា ករណីមានការចុះផ្សាយព័ត៌មាន «បទល្មើស នេសាទកំពុងកើនឡើងខ្លាំងនៅតំបន់ទន្លេសាបខេត្តសៀមរាប ដោយពុំមានអាជ្ញាធរណាចុះបង្ក្រាបនៅឡើយ» រដ្ឋបាលជនផលថាគឺជារឿងបំផ្លើសដែលអ្នកអនុវត្តច្បាប់មិនអាចទទួលយកបាន។
នៅក្នុងសេចក្តីប្រកាសដដែល បានឱ្យដឹងថាអាជ្ញាធរមានសមត្ថកិច្ចបានអនុវត្តបេសកម្មបង្ក្រាបបទល្មើសនានានៅក្នុងបឹងទន្លេសាប មិនដូចអ្វីដែលបានចុះផ្សាយឡើយ។ ជាក់ស្តែង ៣ខែចុងក្រោយនេះ ការទប់ស្កាត់ និងបង្ក្រាបបទល្មើសនេសាទក្នុងបឹងទន្លេសាប បានរឹបអូសនិងបំផ្លាញឧបករណ៍នេសាទខុសច្បាប់មានដូចជា៖ អួនអូសទឹកសាប, ឧបករណ៍ឆក់ក្តៅនិងត្រជាក់ , ឈិបយន្ត ,របាំងស្បៃមុងនិងសាច់អួន , លូនិងលប ,បង្គោលចម្រឹង ,កាណូត,ម៉ាស៊ីនកាណូត និងបានបញ្ជូនសំណុំរឿងទៅតុលាការ ៣ករណី ចេញដីកាកោះហៅជនសង្ស័យចំនួនម្នាក់ និងមានជនល្មើសជាប់ ពន្ធនាគារដោយសារបទល្មើសនេសាទចំនួន ៥នាក់។
ការចុះបង្ក្រាបខាងលើនេះ រដ្ឋបាលជលផលបានបង្ហាញទ័ន្នន័យរបស់ខ្លួនថា ផលនេសាទទឹកសាប មានការកើនឡើងគួរឱ្យកត់សម្គាល់ ពិសេសនៅ តំបន់បឹងទន្លេសាប ដងស្ទឹងនានាជុំវិញបឹងទន្លេសាប និងតាមដងទន្លេសាប។ ក្នុងឆ្នាំ២០២១ ផលនេសាទទឹកសាប មានចំនួន ៣៨៣ ០៥០តោន ខណៈឆ្នាំ២០២២ កើនដល់ ៤០៦ ៤០០តោន។
ដោយឡែក ចំពោះការរាយការណ៍នានាពីអ្នកនេសាទ អាជ្ញាធរឃុំតែងបានសហការជាមួយសមត្ថកិច្ចជលផលទៅពិនិត្យដល់ទីកន្លែងជាក់ស្តែងដែលបានរាយការណ៍ ហើយក៏ធ្លាប់ឃើញមានការប្រើអួនហ៊ុម និងប្រើកម្លាំងម៉ាស៊ីនរួម ផ្សំ ដោយសមត្ថកិច្ចជលផលបានធ្វើការណែនាំផងដែរ៕
