សហគមន៍ទេសចរណ៍ធម្មជាតិកំពង់ភ្លុក កំពុងមានភាពទាក់ទាញភ្ញៀវទេសចរ ទៅលេងកម្សាន្តមិនចេះដាច់ មិនដារដូវវស្សា ឬរដូវប្រាំងនោះទេ ព្រោះនៅទីនោះមានទេសភាព ស្រស់ស្អាត និងមានផ្ទៃទឹកធំល្វឹងល្វើយមើលដាច់កន្ទុយភ្នែក។
កំពង់ភ្លុក បានត្រូវស្គាល់ និងក្លាយជាគោលដៅទេសចរណ៍មួយតាំងពីឆ្នាំ២០១៣មក ដោយសារទីនោះមានទេសភាពស្រស់ស្អាត លំនៅឋានប្រជាពលរដ្ឋខ្ពស់ៗផុតពីទឹក ព្រៃស្រោងមានទំហំជិត៥០ហិកតា ត្រូវបានថែរក្សាការពារយ៉ាងល្អប្រសើរ។
សម្រាប់ភ្ញៀវទេសចរណ៍ដែលចង់ទៅកម្សាន្តនៅកំពង់ភ្លុក ត្រូវធ្វើដំណើរដោយទូកឬកាណូតទើបអាចទៅដល់ភូមិបណ្តែតទឹកនេះ។ នៅតាមផ្លូវទឹកនេះភ្ញៀវទេសចរណ៍ អាចទស្សនាទេសភាពផ្ទៃបឹងទន្លេសាបធំ ល្វឹងល្វើយដាច់កន្ទុយភ្នែក និងអាចទស្សនាទិដ្ឋភាពថ្ងៃលិចកណ្តាលបឹងទន្លេសាបគួរជាទីគយគន់ទៀតផង។
គួរបញ្ជាក់ផងដែរថា សហគមន៍ទេសចរណ៍ធម្មជាតិកំពង់ភ្លុក ត្រូវបានបង្កើតឡើងក្នុងឆ្នាំ២០១៣ សហគមន៍នេះ ស្ថិតនៅជាប់មាត់បឹងទន្លេសាប។ កំពង់ភ្លុក មានភូមិចំនួន៣ ចូលគ្នាស្ថិតក្នុង បឹងទន្លេសាប ដែលមានចម្ងាយប្រហែល១៦ គីឡូម៉ែត្រ ពីទីរួមស្រុកប្រាសាទបាគង៕
រូបភាព៖ Angkor Aurora
