ក្រោយបញ្ចាំងជាង១០ថ្ងៃ នៅតាមរោងកុននានាជុំវិញពិភពលោកភាពយន្តដែលចាយខ្ទង់ផលិតមហាសាលរបស់Disney and 20th Century ភាពយន្ត Avatar: The Way of Water បានក្លាយជាភាពយន្តខ្នាតធំដែលរកចំណូលបានខ្ពស់បំផុតរហូតដល់ជាង៩០០លានដុល្លារ គិតត្រឹមថ្ងៃទី២៨ខែធ្នូឆ្នាំ២០២២។
ភាពយន្តរបស់អ្នកដឹកនាំរឿងលោក James Cameron ដែលចាយពេលជាង១៣ឆ្នាំ ទម្រាំបញ្ចេញវគ្គបន្តរកបានចំណូលជាង២៥៣លានដុល្លារនៅក្នុងរោងកុនក្នុងស្រុក និង៦០០លានដុល្លារនៅទូទាំងពិភពលោក។
គេរំពឹងថានៅចុងឆ្នាំ២០២២នេះ ភាពយន្ត Avatar2 នឹងរកចំណូលបានគ្រប់១ពាន់លានដុល្លារឯ។ សម្រាប់ឆ្នាំ២០២២នេះមានតែភាពយន្តពីរប៉ុណ្ណោះអាចរកចំណូលបានដល់១ពាន់លានគឺរឿង “Top Gun: Maverick” និង “Jurassic World Dominion”។
ភាពយន្តនៅក្នុងត្រកូល Avatar គឺជាស្នាដៃផលិតនិងដឹកនាំដោយលោក James Cameron បុរសជនជាតិកាណាដា ដែលនៅពីក្រោយជោគជ័យដ៏អស្ចារ្យរបស់ភាពយន្តមនោសញ្ចេតនាស្នេហា Titanic កាលពីឆ្នាំ១៩៩៧៕
ប្រភព៖ Collider
