រដ្ឋាភិបាលហ្វីលីពីន បានបញ្ជាក់ថា យ៉ាងហោចណាស់មនុស្ស ៦៧នាក់បានស្លាប់ ដោយសារជំងឺអាសន្នរោគ ដែលជាជំងឺរាគរូស ចាប់តាំងពីខែមករា ដើមឆ្នាំ២០២២ ខណៈដែលករណីកើតជំងឺនេះកើនឡើង ២៨២ភាគរយ បើធៀបនឹងឆ្នាំមុន ។
នាយកដ្ឋានសុខាភិបាលហ្វីលីពីន បានរកឃើញករណីកើតជំងឺអាសន្នរោគចំនួន ៥,៨៦០ករណី គិតចាប់ពីខែមករា ដល់ថ្ងៃទី២៦ ខែវិច្ឆិកា ឆ្នាំ២០២២នេះ។ នាយកដ្ឋាននេះបានសន្មត់ថា ការកើនឡើងនៃករណីកើតជំងឺនេះ មានជាប់ពាក់ព័ន្ធនឹងគ្រោះមហន្តរាយធម្មជាតិដែលបានវាយលុកប្រទេសអាស៊ីអាគ្នេយ៍មួយនេះ ។
នាយកដ្ឋានបានបន្ថែមថា មនុស្សស្លាប់ដោយសារជំងឺអាសន្នរោគមានចំនួន ៦៧នាក់ដែលបានកត់ត្រាចាប់តាំងពីខែមករា ដើមឆ្នាំ២០២២នេះ កើនឡើង ០.៨ភាគរយខ្ពស់ជាងឆ្នាំមុន។
ជំងឺអាសន្នរោគ គឺជាជំងឺដែលបណ្តាលមកពីការទទួលទានអាហារ ឬទឹកដែលមានមេរោគ។ ព្យុះទីហ្វុង និងគ្រោះមហន្តរាយធម្មជាតិផ្សេងទៀត ដូចជាការរញ្ជួយដី ទឹកជំនន់ និងការបាក់ដី ជារឿយៗបានបំផ្លាញប្រភពទឹករបស់ភូមិ។
ក្នុងនាមជាប្រទេសមួយ ក្នុងចំណោមប្រទេសដែលរងផលប៉ះពាល់ខ្លាំងបំផុត ដោយសារតែវិបត្តិអាកាសធាតុនោះ ធនាគារពិភពលោកបាននិយាយថា ហ្វីលីពីនបានជួបប្រទះព្យុះទីហ្វុង ដែលមានការបំផ្លិចបំផ្លាញយ៉ាងខ្លាំងស្ទើរតែរៀងរាល់ឆ្នាំ ក្នុងរយៈពេល ១០ឆ្នាំកន្លងមកនេះ ៕ 
ប្រភព៖ China.Org
