រាជធានីភ្នំពេញ ៖ សេចក្តីរាយការណ៍ជាបឋម បានអោយដឹងថា នៅមុននេះបន្តិច កម្លាំងសមត្ថកិច្ចខណ្ឌទួលគោក បានឃាត់ខ្លួន ថៃ ស្រីនាង នាំមកសាកសួរ នាថ្ងៃទី១៩ ខែកុម្ភៈ ២០២០ នេះ ។
យ៉ាងណាគេនៅមិនទាន់ដឹងមូលហេតុនៃការឃាត់ខ្លួន ថៃ ស្រីនាង នៅឡើយទេ បើតាមលោក សុខ ហេង អធិការនគរបាលខណ្ឌទួលគោក ថ្លែងប្រាប់យ៉ាងខ្លីថា “សមត្ថកិច្ចកំពុងធ្វើការរឿងនេះហើយ” រួចចុចបិទទូរស័ព្ទតែម្តង ។
សូមជម្រាបថា កាលពីថ្ងៃទី១៨ ម្សិលមិញនេះ អ្នកលក់អនឡាញសិចស៊ី ថៃ ស្រីនាង សំណូមពរសម្ដេច ឲ្យជួយទិញរ៉ូបរបស់នាង ខណៈសម្ដេច បានប្រកាសឲ្យចាត់វិធានលើអ្នកលក់អនឡាញបញ្ចេញអស់កេរ្តិ៍ខ្មាសស្ដ្រី ។ នៅលើគណនីហ្វេសប៊ុកផ្ទាល់ខ្លួន ដែលមានឈ្មោះថា Thai SreyNeang បានសរសេរយ៉ាងដូច្នេះថា «ឈឺក្បាលណាស់ ចង់ផឹកកាត់សាញ តែមានតែគោកខ្វះទឹក គិតម៉េចឥឡូវ ស្តាប់ប្រសាសន៍ សម្តេចហើយ ចង់ខ្យល់ មើល៍ទៅ ត្រូវដូរមុខរបរទៀតហើយខ្ញុំ សម្តេចអើយសម្តេច ជួយសេង រ៉ូប ខ្ញុំខ្លះទៅ យកទៅទុកក៏បានដែរ បើសល់ច្រើនម្លឹងៗ បានលុយឯណាសងគេ លោកអើយលោក ឆ្កួតងាប់ឥឡូវហើយខ្ញុំ ពេលនេះមានតែស្រាទេ យល់ចិត្តខ្ញុំ» ។
យ៉ាងនេះក្តី សាររបស់ ថៃ ស្រីនាង សំណូមពរសម្ដេច ឲ្យជួយទិញរ៉ូបរបស់នាង ត្រូវបានលុបចេញពីហ្វេសប៊ុកវិញផងដែរ ។
គួរបញ្ជាក់ផងដែរថា ប្រមុខរាជរដ្ឋាភិបាល បានបញ្ជាទៅក្រសួងប្រៃសនីយ និងទូរគមនាគមន៍ ឱ្យបិទរាល់គណនី Facebook ផ្សាយលក់ផលិតផលដែលបញ្ចេញអស់កេរ្តិ៍ខ្មាស ។ បទបញ្ជារបស់សម្តេចតេជោ ហ៊ុន សែន បានធ្វើឡើងនៅក្នុងកិច្ចប្រជុំក្រុមប្រឹក្សាជាតិដើម្បីស្ត្រី នាព្រឹកថ្ងៃទី១៧ ខែកុម្ភៈ ឆ្នាំ២០២០ ម្សិលមិញនេះ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្តែងការមិនសប្បាយចិត្តនោះឡើយ ចំពោះការផ្សាយ «Live» លក់ផលិតផលតាម Facebook ដែលបញ្ចេញអស់កេរ្តិ៍ខ្មាស ។ ប៉ុន្តែអ្នកមិនបញ្ចេញកេរ្តិ៍ខ្មាស់ មិនអីនោះទេ ។
សម្តេចតេជោនាយករដ្ឋមន្ត្រី បានមានប្រសាសន៍បញ្ជាក់ថា ការ Live បែបនេះនាំឱ្យមានការបំពានផ្លូវភេទស្រីក្នុងសង្គមនាពេលបច្ចុប្បន្ន ហើយអាចនាំឱ្យកើតមានការណីចាប់រំលោភផងដែរ ។
ក្រោយពីសម្ដេចតេជោ បានប្រកាសឲ្យមានចំណាត់ការបែបនេះ នៅលើបញតាញសង្គម គេសង្កេតឃើញថា មានមហាជនជាច្រើនបានអបអរសាទរគាំទ្របទបញ្ជារបស់ប្រមុខរាជរដ្ឋាភិបាល ៕
