រាជធានីភ្នំពេញ ៖ មានការភ្ញាក់ផ្អើលមួយ ដោយសារតែមានបុរសម្នាក់បានធ្វើអត្តឃាតដោយប្រើប្រាស់កាំភ្លើងខ្លីបាញ់សម្លាប់ខ្លួន នៅក្នុងរថយន្ដសារ៉ែន១គ្រឿង របស់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ។
ហេតុការណ៍នេះបានកើតឡើងកាលពីវេលាម៉ោង១៧និង០០នាទីរសៀល ថ្ងៃទី២៣ កញ្ញា ២០១៩ នៅចំណុចមុខផ្ទះ១១A ផ្លូវP០៣ ស្ថិតក្នុងបុរីប៉េងហួត ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ។
សមត្ថកិច្ចមូលដ្ឋាន បានឲ្យដឹងថា បុរសដែលបាញ់សម្លាប់ខ្លួនឯងនោះ ឈ្មោះ សេង សុវណ្ណ អាយុ៣៧ឆ្នាំ មុខរបរជំនួយការប្រធាននាយកដ្ឋានព្រហ្មទណ្ឌក្រសួងមហាផ្ទៃ និងជាមន្ដ្រីនគរបាលជាតិ មានឋានន្ទរស័ក្ដិថ្នាក់វរសេនីយ៍ទោ(ស័ក្តិ៤កន្លះ) និងបម្រើការងារនៅនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ដែលមានតួនាទីជានាយរងការិយាល័យគ្រប់គ្រងមុខសញ្ញា និងតាមចាប់ នៃនាយកដ្ឋាននគរបាលព្រហ្មទណ្ឌ ។
ចំពោះមូលហេតុដែលនគរបាលព្រហ្មទណ្ឌក្រសួងមហាផ្ទៃបាញ់សម្លាប់ខ្លួនឯង យោងតាមប្រភពច្បាស់ការណ៍ ពីមន្ត្រីនគរបាលគឺលោកវរសេនីយ៍ទោម៉ៅ សឿត អធិការរងខណ្ឌច្បារអំពៅទទួលបន្ទុកយុត្តិធម៌ បានអះអាងថា ករណីធ្វើអត្តឃាតដែលបណ្តាលឲ្យនគរបាលក្រសួងមហាផ្ទៃម្នាក់ បានស្លាប់នោះ គឺដោយសារតែមានជំងឺប្រចាំកាយអស់រយៈពេលជាងមួយឆ្នាំមកហើយ ។
លោកវរសេនីយ៍ទោម៉ៅ សឿត បានបញ្ជាក់ពីមូលហេតុដែលនាំឲ្យជនរងគ្រោះដែលបាញ់សម្លាប់ខ្លួនឯងបែបនេះបើយោងតាមការបំភ្លឺពីបងប្រុសបង្កើតរបស់ជនរងគ្រោះ ដែលមានឈ្មោះសេង សាវឿន បានអះអាងប្រាប់សមត្ថកិច្ច ដែលចុះទៅដល់ចំណុចកើតហេតុថា មុនកើតហេតុ ប្អូនប្រុសរបស់គាត់ឈ្មោះសេង សុវណ្ណ បានប្រាប់គាត់តាមរយៈទូរស័ព្ទ ហៅរូបគាត់ឲ្យមកយកខ្លួន នៅផ្ទះក្នុងបុរីប៉េងហួត ដែលជាផ្ទះរបស់ជនរងគ្រោះ ស្ថិតនៅសង្កាត់និរោធ ខណ្ឌច្បារអំពៅ រាជធានីភ្នំពេញ ។ លុះពេលមកដល់ផ្ទះ ជនរងគ្រោះបងប្រុស បានឃើញរថយន្តបញ្ឆេះចោល តែមិនចាប់អារម្មណ៍ ក៏បានដើរចូលទៅក្នុងផ្ទះ ដើម្បីរកជនរងគ្រោះ តែរកមិនឃើញ រួចក៏ចេញមកអើតមើលក្នុងរថយន្តស្រាប់ឃើញ ជនរងគ្រោះអង្គុយនៅបាំងខាងក្រោយរថយន្ត និងមានឈាមហូរចេញមកប្រឡាក់ពូករថយន្ត ថែមទាំងហូរចេញមកតាមទ្វារមកលើផ្លូវ ខណៈដែលជនរងគ្រោះបានដាច់ខ្យល់ស្លាប់ទៅហើយ ។
បងប្រុសជនរងគ្រោះបញ្ជាក់ដូច្នេះថា «កន្លងមកជនរងគ្រោះ មានជំងឺប្រចាំកាយ គឺចំហក្រពះ អស់រយៈពេលជាងមួយឆ្នាំមកហើយ ហើយក៏ធ្លាប់ទៅព្យាបាលនៅមន្ទីរពេទ្យប្រទេសថៃ និងវៀតណាមទៀតផង ប៉ុន្តែមិនបានធូរស្បើយ ហើយជានិច្ចកាល ជនរងគ្រោះតែងតែពោលពាក្យថា មិនអាចរស់បានទៀតទេ ! ។
ដោយឡែកបើតាមការបញ្ជាក់ពីលោកនង សុវណ្ណារត្ន័ គ្រូពេទ្យកោសល្យវិច័យរាជធានីភ្នំពេញ និងនគរបាលនាយកដ្ឋានបច្ចេកវិជ្ជាសាស្ត្រ ក្រសួងមហាផ្ទៃបានអះអាងថា ជនរងគ្រោះបានស្លាប់ដោយសារបាញ់ខ្លួនឯង ដោយអាវុធខ្លីម៉ាក GLock19AUSTRIA លេខ LLT659 ផលិតនៅប្រទេសអូស្ត្រាលី ។
លោកបញ្ជាក់ថា ការធ្វើអត្តឃាតរបស់ជនរងគ្រោះ គឺដោយសារមានជំងឺប្រចាំកាយ ហើយព្យាបាលមិនទាន់ជា ។ យ៉ាងណាក៏ដោយ ក្រោយពិនិត្យសាកសពរួចរាល់ សមត្ថកិច្ចជំនាញបានប្រគល់សពជូនក្រុមគ្រួសារ ដើម្បីធ្វើបុណ្យតាមប្រពៃណី ៕
អត្ថបទពាក់ព័ន្ធ គិតខ្លីម៉្លេះ ព្រះអើយ ! មន្ត្រីនគរបាលស័ក្តិ៤កន្លះ យកកាំភ្លើងបាញ់សម្លាប់ខ្លួនក្នុងរថយន្តស៊ីរ៉ែន
