មតិនានា ពិសេសនៅលើបណ្តាញសង្គមហ្វេសប៊ុកនាំគ្នារិះគន់ករណីធើ្វជាមន្ត្រីនគរបាល គួរណាស់គោរពច្បាប់ តែបែរមកគំរាមសម្លាប់ ប៉ូលិសចរាចរណ៍ម្នាក់ទៅវិញ រហូតធ្វើអោយលោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ បានសម្រេចផ្អាកការងារលោក ចាន់ ពៅ អធិការរងនគរបាលខណ្ឌឫស្សីកែវ ជាបណ្តោះអាសន្នសិន ខុសគ្នាពីយុវជន២នាក់ គំរាមសម្លាប់អ្នកដទៃ ត្រូវប៉ូលិសខេត្តកោះកុង តាមចាប់វៃខ្នោះ បញ្ជូនទៅតុលាការ ចាត់ការតាមច្បាប់ ។
សូមរម្លឹកថា លោក ស ថេត ផ្អាកការងារលោក ចាន់ ពៅ បន្ទាប់ពីអធិការរងខណ្ឌឫស្សីកែវរូបនេះបានសារភាពថា លោកពិតជាបានផ្ញើសារសំឡេងទៅគំរាមលោកនាយផ្នែកពិតប្រាកដមែន ដោយសារមូលហេតុខឹងខ្លាំងពេក ។
ឆ្លងតាមចម្លើយសារភាព និងភស្តុតាងជាក់ស្តែង តាមរយៈសារជាសំឡេង ក្រុមប្រឹក្សាវិន័យនៃស្នងការដ្ឋាននគរបាលរាជធានីភ្នំពេញ បានសម្រេចដាក់វិន័យជាលើកទីមួយដល់លោកចាន់ ពៅ ដែលមានកំហុស ដោយការផ្អាកការងារបណ្តោះអាសន្ន អោយមកបង្ហាញខ្លួនជាប្រចាំនៅការិយាល័យបុគ្គលិក ជារៀងរាល់ម៉ោងការងារ ។ ជាជំហានបន្ទាប់ បើលោក ចាន់ ពៅ តែប្រព្រឹត្តកំហុសទៀត ស្នងការដ្ឋាននគរបាលរាជធានីភ្នំពេញ នឹងបន្តចាត់ការតាមនីតិវិធីច្បាប់ ។
ការសម្រេចត្រឹមផ្អាកការងារបណ្តោះអាសន្ន របស់លោកអធិការរងខណ្ឌឫស្សីកែវរូបនេះ ធ្វើអោយប្រជាពលរដ្ឋនឹកឃើញរឿង យុវជនជើងខ្លាំង គំរាមសម្លាប់អ្នកដទៃតាម ហ្វេសប៊ុករួចមក ត្រូវប៉ូលិសខេត្តកោះកុង តាមចាប់វៃខ្នោះមែន ហើយបញ្ជូនទៅតុលាការ ដើម្បីផ្តន្ទាទោសតាមច្បាប់ ។
ប្រិយមិត្តខ្លះប្រហែលជាចាំបាន និងធ្លាប់បានស្តាប់សម្លេង យុវជន០២នាក់ គម្រាមសម្លាប់អ្នកដទៃ តាមបណ្តាញសង្គមហ្វេសបុក គួររម្លឹកថា ដេកផ្ទះស្រួលមិនស្រណុក អផ្សុកចង់ដេកគុក ! ក្មេងទំនើងថតវីដេអូបង្អូតដាវសាមូរ៉ៃគំរាមផ្តាច់ជីវិតគូទំនាស់ បង្ហោះលើហ្វេសប៊ុក … ចុងក្រោយខ្នោះ(មានវីដេអូ)
នៅលើបណ្តាញសង្គមហ្វេសប៊ុកមហាជនលើកឡើងថា មនុស្សដូចគ្នា ខ្មែរដូចគ្នា គំរាមសម្លាប់ដូចគ្នា ប៉ុន្តែវាសនាខុសគ្នាទៅវិញ ចប់ ។ល។
ជាក់ស្តែងគណនីហ្វេសប៊ុកលោក ផែង វណ្ណៈ បានលើកឡើងថា «លោកវរៈសេនីយ៍ទោ ចាន់ ពៅ អធិការរងខណ្ឌឬស្សីកែវ ជាមន្ត្រីអនុវត្តន៍ច្បាប់ បានប្រព្រឹត្តល្មើសច្បាប់ គំរាមសម្លាប់មន្ត្រីក្រោមឱវាទរបស់ខ្លួន ថ្នាក់លើបានសម្រេចដកបញ្ឈរជើង ។ សំរាប់ខ្ញុំ ខ្ញុំយល់ឃើញថា បទល្មើសព្រហ្មទណ្ឌ មិនអាចដកបញ្ឈរជើងហើយរួចខ្លួនទេ ត្រូវអនុវត្តបណ្ដឹងអាជ្ញាទៀតទើបត្រឹមត្រូវ មានន័យថា ត្រូវរៀបចំសំណុំរឿងបញ្ជូនទៅតុលាការទៀតទើបសង្គមមានយុត្តិធម៌ ។ ជនរងគ្រោះមិនប្ដឹងមិនមែនមានន័យថា ជនបង្ករត្រូវរួចខ្លួននោះទេ ។ មន្ត្រីអនុវត្តន៍ច្បាប់ប្រព្រឹត្តខុសនឹងច្បាប់បែបនេះ ត្រូវមានទោសធ្ងន់ជាងរាស្ត្រប្រព្រឹត្តខុសផង ព្រោះខ្លួនជាអ្នកចេះច្បាប់ហើយមកបំពានច្បាប់ទៀត » ។
ទោះជាយ៉ាងនេះក្តី ក៏មានមតិមួយបានលើកឡើងដែរថា ករណីទំនាស់អធិការរងនគរបាលខណ្ឌឫស្សីកែវ និងប៉ូលិសចរាចរណ៍ខាងលើនោះ ត្រូវបានធ្វើការសម្របសម្រួលរវាងភាគីទាំងពីររួចហើយ នៅអធិការដ្ឋាននគរបាល ខណ្ឌឫស្សីកែវ ៕
