រាជធានីភ្នំពេញ ៖ ស្នងការនគរបាលរាជធានីភ្នំពេញ ឧត្តមសេនីយ៍ឯក ស ថេត បានសម្រេចផ្អាកការងារ លោក ចាន់ ពៅ អធិការរង នគរបាលខណ្ឌឫស្សីកែវ ជាបណ្តោះអាសន្ន ពាក់ព័ន្ធរឿងគំរាមសម្លាប់ នាយផ្នែកចរាចរណ៍ម្នាក់ នៅខណ្ឌឫស្សីកែវ ។
លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានហៅលោក ចាន់ ពៅ ជាអធិការរងខណ្ឌឫស្សីកែវ ទទួលផ្នែកសេនាធិការ មកសាកសួរ អំពីករណីគំរាមសម្លាប់ នាយផ្នែកចរាចរណ៍ ខណ្ឌឫស្សីកែវ ដើម្បីដាក់ពិន័យខាងកងកម្លាំង និងការផ្អាកការងារ ពោលគឺបន្ទាប់ពីសួរនាំរួចមក ស្នងការដ្ឋាននគរបាលរាជធានីភ្នំពេញ បានសម្រេចផ្អាកការងារជាបណ្តោះអាសន្នរបស់លោក ចាន់ ពៅ អធិការរង នគរបាលខណ្ឌឫស្សីកែវ ។
យោងតាមទំព័រហ្វេសប៊ុក របស់ស្នងការដ្ឋាននគរបាល រាជធានីភ្នំពេញ បានបញ្ជាក់ថា ទាក់ទងទៅនឹងករណីជម្លោះ រវាងលោក ចាន់ ពៅ អធិការរង និងលោក លី រ៉ូហ្សាត នាយផ្នែកសណ្តាប់ធ្នាប់ នៃអធិការដ្ឋាននគរបាល ខណ្ឌឫស្សីកែវ គឺលោក ចាន់ ពៅ អធិការរងខណ្ឌឫស្សីកែវ ត្រូវបានផ្អាកពីការងារ ជាបណ្តោះអាសន្ន។
ករណីទំនាស់នេះ ត្រូវបានធ្វើការសម្របសម្រួល រវាងភាគីទាំងពីរ រួចហើយ នៅអធិការដ្ឋាននគរបាល ខណ្ឌឫស្សីកែវ ប៉ុន្តែទោះជាយ៉ាងណា ដោយទទួលបានបទបញ្ជា ដោយផ្ទាល់ពីលោក ស ថេត អគ្គស្នងការរង និងជាស្នងការនគរបាល រាជធានីភ្នំពេញ បានណែនាំអោយក្រុមប្រឹក្សាវិន័យ នៃស្នងការដ្ឋាននគរបាល រាជធានីភ្នំពេញ បានកោះហៅភាគីជម្លោះ ទាំងពីរ អោយចូលខ្លួនមកស្នងការដ្ឋាននគរបាល រាជធានីភ្នំពេញ ដើម្បីធ្វើការពន្យល់បកស្រាយ លើករណីដែលបានកើតឡើងនេះ ។
លោក ចាន់ ពៅ អធិការរងខណ្ឌឫស្សីកែវ បានសារភាពថា «លោកពិតជាបានផ្ញើសារជាសំឡេង ទៅគំរាមលោកនាយផ្នែក ពិតប្រាកដមែន ដោយសារមូលហេតុ ខឹងខ្លាំងពេក!» ។
ឆ្លងតាមចម្លើយសារភាព និងភស្តុតាងជាក់ស្តែង ក្រុមប្រឹក្សាវិន័យ នៃស្នងការដ្ឋាននគរបាល រាជធានីភ្នំពេញ បានសម្រេចដាក់វិន័យ ជាលើកទីមួយ ដល់លោកអធិការរង ដែលមានកំហុស ដោយការផ្អាកការងារ បណ្តោះអាសន្ន អោយមកបង្ហាញខ្លួនជាប្រចាំ នៅការិយាល័យបុគ្គលិក ជារៀងរាល់ម៉ោងការងារ។ ជាជំហ៊ានបន្ទាប់ បើនៅតែប្រព្រឹត្តិកំហុសទៀត ស្នងការដ្ឋាននគរបាល រាជធានីភ្នំពេញ និងបន្តចាត់ការតាមនីតិវិធីច្បាប់ ។
សូមរម្លឹកថា លោក ស ថេត ហៅអធិការរងខណ្ឌឫស្សីកែវ មកសួរនាំរឿងគំរាមសម្លាប់ប៉ូលិសចរាចរណ៍
