ភ្នំពេញ ៖ នៅព្រឹកថ្ងៃទី៤ ខែកញ្ញា នេះលោក ស ថេត ស្នងការនគរបាលរាជធានីភ្នំពេញ បានហៅលោក ចាន់ ពៅ ជាអធិការរង ខណ្ឌឫស្សីកែវ ទទួលផ្នែកសេនាធិការ មកសាកសួរ ករណីគំរាមសម្លាប់នាយផ្នែកចរាចរណ៍ម្នាក់ នៅខណ្ឌឫស្សីកែវ ។
លោក ចាន់ ពៅ អធិការរងខណ្ឌឫស្សីកែវ អាចត្រូវរងនូវពិន័យខាងកងកម្លាំង និងអាចប្រឈមការផ្អាកការងារផងដែរ បើសិនរកឃើញកំហុស ។
សូមជម្រាបថា ករណីគំរាមសម្លាប់ខាងលើ លោក ចាន់ ពៅ បានផ្ញើសារជាសំឡេង គំរាមសម្លាប់ឈ្មោះ លី រ៉ូហ្សាត នាយផ្នែកចរាចរណ៍ ខណ្ឌឫស្សីកែវ ដោយសារតែរឿងមិនព្រមដោះលែងបក្ខពួករបស់ខ្លួនដែលស្រវឹង ហើយត្រូវចាប់វាស់ជាតិអាល់កុល កាលពីយប់ថ្ងៃទី២ ខែកញ្ញា ឆ្នាំ២០១៩ កម្លាំងអធិការដ្ឋាននគរបាល ខណ្ឌឫស្សីកែវ បានដាក់គោលដៅត្រួតពិនិត្យ អាវុធជាតិផ្ទុះ និងជាតិស្រវឹង នៅតាមបណ្ដោយផ្លូវជាតិលេខ៥ មុខវិទ្យាល័យឫស្សីកែវ ស្ថិតក្នុងភូមិសាមគ្គី សង្កាត់ឫស្សីកែវ ខណ្ឌឫស្សីកែវ ។
ឧត្តមសេនីយ៍ឯក ស ថេត បានមានប្រសាសន៍ថា «ខ្ញុំពិនិត្យមើលហើយ ខ្ញុំកំពុងតែហៅមក ដើម្បីដាក់ពិន័យ ខាងកងកម្លាំង ហើយបើរកឃើញថា ពិតជាមានការគំរាមមែន យើងពិនិត្យមើលតាមនឹងទៅ អាចផ្អាកការងារ មួយរយៈសិន ហើយកំពុងតែហៅមកធ្វើការ» ។
សូមបញ្ជាក់ថា កាលពីយប់ថ្ងៃទី២ កញ្ញា កម្លាំងអធិការដ្ឋាននគរបាល ខណ្ឌឫស្សីកែវ បានដាក់គោលដៅត្រួតពិនិត្យអាវុធជាតិផ្ទុះ និងជាតិស្រវឹង នៅចំណុចដូចខាងលើ បន្ទាប់ពីអនុវត្ដន៍ បានប្រហែលជាកន្លះម៉ោង កម្លាំងសមត្ថកិច្ច ខណ្ឌឫស្សីកែវ បានពិនិត្យឃើញ អ្នកមានជាតិស្រវឹង លើសកម្រិត ចំនួន៣នាក់ ដែលជាអ្នកបើកម៉ូតូ ក្នុងនោះមានម្នាក់ មិនបានសហការផ្លុំទេ បន្ទាប់មក កម្លាំងសមត្ថកិច្ច ក៏បានបញ្ជូនទៅស្នងការដ្ឋាន ដើម្បីចាត់ការតាមផ្លូវច្បាប់ ។
ស្រាប់តែលោក ចាន់ ពៅ អធិការរង រូបនោះ បានទូរស័ព្ទមកលោកនាយផ្នែកចរាចរណ៍ ដោយបញ្ជាអោយដោះលែងមនុស្សម្នាក់ ដែលមានជាតិស្រវឹង លើសកម្រិត ក៏ប៉ុន្ដែលោកនាយផ្នែកបានប្រាប់ទៅវិញថា គាត់គ្មានសិទ្ធិដោះលែងទេ គាត់គ្រាន់តែជានាយផ្នែក ហើយក៏អោយលោកអធិការរង រូបនោះ ទូរស័ព្ទ ទៅលោកអធិការង ទទួលផ្នែកចរាចរណ៍ ដែលកំពុងដឹកនាំទៅ ។
មួយសន្ទុះក្រោយមក ស្រាប់តែឃើញបុរសម្នាក់ដែលលើសជាតិស្រវឹងម្នាក់នោះ ត្រូវបានដោះលែង ។ មិនយូរប៉ុន្មានលោកអធិការរងរូបនោះ បានផ្ញើសារសំឡេងគំរាមសម្លាប់ជាច្រើន មកកាន់លោកនាយផ្នែក ធ្វើអោយលោកនាយផ្នែកមានការភិតភ័យយ៉ាងខ្លាំង ។
មហាជនកំពុងរង់ចាំមើល ចំណាត់ការរបស់លោក ស ថេត លើលោក ចាន់ ពៅ អធិការរងខណ្ឌឫស្សីកែវ ទៅជាយ៉ាងណាវិញ ខណៈលោកនាយផ្នែក ដែលជាជនរងគ្រោះសំណូមពរអោយថ្នាក់ដឹកនាំ ជួយរកយុត្តិធម៌ អោយរូបគាត់ផង ព្រោះអធិការរងទំនើងរូបនេះ គំរាមសម្លាប់រូបគាត់ អោយស្លាប់ចោលប្រពន្ធនិងកូន ៕
