ភ្នំពេញ ៖ នៅទីបំផុត! ក្រោយបញ្ចប់ការស្រាវជ្រាវរួចមក នៅរសៀលថ្ងៃទី១៤ ខែមករា ឆ្នាំ២០១៩នេះ មន្ត្រីសមត្ថកិច្ចផ្នែកអនុវត្តច្បាប់ បានឃាត់ខ្លួនមនុស្សយ៉ាងណាស់៨នាក់ នៅមន្ទីរពេទ្យវ៉ិចតូរៀ ដើម្បីសាកសួរពាក់ព័ន្ធករណីបង្ខាំងអ្នកជំងឺ ដើម្បីជម្រិតយកប្រាក់ថ្លៃសេវាខ្ពស់កប់ពពក ។
ការឃាត់ខ្លួនមនុស្សប្រុសស្រីចំនួន៨នាក់ រួមមានលោកស្រីវេជ្ជបណ្ឌិត សៀង សុគន្ធ ដែលជាប្រធានមន្ទីរពេទ្យ វ៉ិចតូរៀ និងមនុស្ស៧នាក់ទៀត ជាគ្រូពេទ្យ និងបុគ្គលិកនៅមន្ទីរពេទ្យនោះ បន្ទាប់ពីលោកសាស្ដ្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានចេញលិខិតប្រកាសបិទមន្ទីរពេទ្យវ៉ិចតូរៀ ជាផ្លូវការរួចមក នៅថ្ងៃទី១៤ មករា ២០១៩ នេះ ។
ប្រភពបានបង្ហើបថា យ៉ាងណា អាជ្ញាធរខណ្ឌទួលគោក មន្ត្រីក្រសួងសុខាភិបាល កងកម្លាំងចម្រុះដឹកនាំ និងសម្របសម្រួលដោយលោក វង្ស ប៊ុនវិសុទ្ធ ព្រះរាជអាជ្ញារងអមសាលាដំបូងរាជធានីភ្នំពេញ កំពុងតែមានវត្តមាននៅទីតាំងមន្ទីរពេទ្យ វ៉ិចតូរៀ ដើម្បីចុះស៊ើបអង្កេត និងស្រាវជ្រាវពាក់ព័ន្ធករណីបង្ខាំងអ្នកជំងឺទារប្រាក់២,០០០ដុល្លារ ដែលជាតម្លៃសេវា វះកាត់ដុំគីស ក្នុងស្បូតរបស់ស្ត្រីអ្នកជំងឺម្នាក់ ។
បើតាមលិខិតលោករដ្ឋមន្ដ្រីក្រសួងសុខាភិបាល ចុះថ្ងៃទី១៤ មករា ២០១៩ បានសម្រេចបិទទ្វារ មន្ទីរពេទ្យ វ៉ិចតូរៀ ដែលមានលោកស្រីវេជ្ជបណ្ឌិត សៀង សុគន្ធ ជាអ្នកទទួលខុសត្រូវ ព្រោះតែមន្ទីរពេទ្យនេះ មិនគោរពតាមលិខិតបទដ្ឋានរបស់ក្រសួងសុខាភិបាល ។
សូមជម្រាបជូនថា ដំបូងឡើយ ប្រធានគ្រប់គ្រងមន្ទីរពេទ្យមួយនេះ គឺលោកស្រី សៀង សុគន្ធ មិនបានសហការជាមួយមន្ត្រីជំនាញ និងអាជ្ញាធរនោះទេ ដោយទុកឲ្យស្ត្រីជាបុគ្គលិកទទួលភ្ញៀវ២នាក់ ជាអ្នកជួបក្រុមមន្ត្រី ដោយលោកស្រី សៀង និយាយត្រឹមថា ពួកគេអត់ដឹងរឿងអ្វីទាំងអស់ ។ អស់រយៈពេលជិត៥ម៉ោង ដែលលោក ឯក ឃុនដឿន អភិបាលខណ្ឌទួលគោក និងមន្ត្រីជំនាញរបស់ក្រសួងសុខាភិបាល ចុះមកស្រាវជ្រាវ នៅមន្ទីរពេទ្យ វ៉ិចតូរៀ តាមការបញ្ជារបស់លោករដ្ឋមន្ត្រីក្រសួងសុខាភិបាល ម៉ម ប៊ុនហេង ។
សូមបញ្ជាក់ថា មន្ទីរពេទ្យ វ៉ិចតូរៀ មានទីតាំងនៅផ្ទះលេខ៦១អា ផ្លូវ៥៩២ សង្កាត់បឹងកក់២ ខណ្ឌទួលគោក រាជធានីភ្នំពេញ ត្រូវគ្រួសារអ្នកជំងឺធ្វើសន្និសីទ កាលពីយប់ថ្ងៃទី១៣ ខែមករា ឆ្នាំ២០១៩ម្សិលមិញ បន្ទាប់ពីគណៈគ្រប់គ្រងមន្ទីរពេទ្យនេះ បង្ខាំងអ្នកជំងឺ ទារប្រាក់សេវា ២០០០ដុល្លារ ដែលគ្រួសារអ្នកជំងឺយល់ថា ជាតម្លៃដែលមិនអាចទទួលយកបាន ។
អត្ថបទពាក់ព័ន្ធ ៖ សម្រេចបិទមន្ទីរពេទ្យវ៉ិចតូរៀ អ្នកគ្រប់គ្រងឆ្លើយថាអត់ដឹង! ក្រុមគ្រូពេទ្យគេចខ្លួនអស់ និង លោករដ្ឋមន្ដ្រី ម៉ម ប៊ុនហេង បញ្ជាឲ្យក្រុមការងារចុះទៅមន្ទីរពេទ្យ វ៉ិចតូរៀ ព្រឹកនេះ ។
