ភ្នំពេញ ៖ នៅទីបំផុត! ក្រោយបញ្ចប់ការស្រាវជ្រាវរឿងអាស្រូវពាក់ព័ន្ធករណីបង្ខាំងអ្នកជំងឺ ដើម្បីទារប្រាក់ ថ្លៃសេវាខ្ពស់កប់ពពក រួចមក នៅរសៀលថ្ងៃទី១៤ មករា ២០១៩នេះ លោកសាស្ដ្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានប្រកាសបិទមន្ទីរពេទ្យវ៉ិចតូរៀ ក្រោយចាប់បង្ខំនារីម្នាក់ឲ្យវះកាត់ និងបង្ខាំងម្ដាយនារីរងគ្រោះ ព្រោះគ្មានប្រាក់បង់ថ្លៃព្យាបាល ដែលធ្វើឲ្យមានការរិះគន់ ។
ការប្រកាសបិទមន្ទីរពេទ្យខាលើនេះ បន្ទាប់ពីរដ្ឋមន្ដ្រីក្រសួងសុខាភិបាល កាលពីព្រឹកមិញ បានចាត់ក្រុមការងារភ្លាមៗ ចុះទៅដោះស្រាយករណីនេះ នៅមន្ទីរពេទ្យវ៉ិចតូរៀ ព្រោះតែគណៈគ្រប់គ្រងមន្ទីរពេទ្យនេះ មានចេតនាគេចវេស មិនទទួលខុសត្រូវចំពោះកំហុស និងមិនសហការជាមួយមន្ត្រីជំនាញ ថែមទៀត ។
អស់រយៈពេលជិត៥ម៉ោង ដែលលោក ឯក ឃុនដឿន អភិបាលខណ្ឌទួលគោក និងមន្ត្រីជំនាញរបស់ក្រសួងសុខាភិបាល ចុះមកស្រាវជ្រាវ នៅមន្ទីរពេទ្យ វ៉ិចតូរៀ តាមការបញ្ជារបស់លោករដ្ឋមន្ត្រីក្រសួងសុខាភិបាល ម៉ម ប៊ុនហេង ។
ដំបូងឡើយ ប្រធានគ្រប់គ្រងមន្ទីរពេទ្យមួយនេះ គឺលោកស្រី សៀង សុគន្ធ មិនបានសហការជាមួយមន្ត្រីជំនាញ និងអាជ្ញាធរនោះទេ ដោយទុកឲ្យស្ត្រីជាបុគ្គលិកទទួលភ្ញៀវ២នាក់ ជាអ្នកជួបក្រុមមន្ត្រី ដោយលោកស្រី សៀង និយាយត្រឹមថា ពួកគេអត់ដឹងរឿងអ្វីទាំងអស់ ។
ដោយសារតែគណៈគ្រប់គ្រងមន្ទីរពេទ្យ មិនព្រមសហការជាមួយមន្ត្រីជំនាញបែបនេះ អាជ្ញាធរមូលដ្ឋាន បានត្រឹមតែធ្វើកំណត់ហេតុ សាកសួរបុគ្គលិកទទួលភ្ញៀវរបស់មន្ទីរពេទ្យប៉ុណ្ណោះ ។
ចំណែកឯ ក្រុមគ្រូពេទ្យរបស់មន្ទីរពេទ្យ វ៉ិចតូរៀ ត្រូវបានក្រុមសន្តិសុខប្រាប់ថា ពួកគេគេចខ្លួនតាមទ្វារក្រោយ និងទ្វាក្រោមអស់ទៅហើយ ដោយបន្សល់ទុកតែបុគ្គលិកនារីវ័យក្មេង២នាក់ ឲ្យទទួលខុសត្រូវជំនួស ។
ព្រឹកមិញនេះ លោករដ្ឋមន្ដ្រី ម៉ម ប៊ុនហេង បញ្ជាឲ្យក្រុមការងារចុះទៅមន្ទីរពេទ្យ វ៉ិចតូរៀ ព្រឹកនេះ នៅព្រឹកថ្ងៃទី១៤ ខែមករា ឆ្នាំ២០១៩ បានចាត់ក្រុមការងារអធិការកិច្ចក្រសួងសុខាភិបាល ដឹកនាំដោយឯកឧត្តម វិជ្ជបណ្ឌិត ងី មានហេង ប្រធានមន្ទីរសុខាភិបាល រាជធានីភ្នំពេញ និងក្រុមមន្ត្រីជាន់ខ្ពស់ របស់ក្រសួងសុខាភិបាល ដោយមានកិច្ចសហការជាមួយអាជ្ញាធរខណ្ឌទួលគោក និងលោក វង្ស ប៊ុនវិសុទ្ធ ព្រះរាជអាជ្ញារងអមសាលាដំបូង រាជធានីភ្នំពេញ បានចុះសាកសួរស្រាវជ្រាវ នៅមន្ទីរពេទ្យ វ៉ិចតូរៀ ដើម្បីរកឲ្យឃើញការពិត ។
បើតាមមន្ត្រីជំនាញប្រចាំខណ្ឌទួលគោកម្នាក់ បានលួចបង្ហើបឲ្យដឹងថា មន្ទីរពេទ្យនេះ មានរឿងច្រើនលើកមកហើយ រហូតក្រសួងសុខាភិបាលសម្រេចឲ្យបិទទ្វារម្តងរួចមកហើយ ប៉ុន្តែមិនដឹងយ៉ាងម៉េចមន្ទីរពេទ្យនេះ នៅតែដំណើរការដដែល និងបង្ករឿងដដែលៗ ធ្វើឲ្យមន្ត្រីដដែលៗ ចុះមកពិនិត្យស្រាវជ្រាវដដែលៗ បែបនេះទេ ។
សូមជម្រាបជូនថា មន្ទីរពេទ្យ វ៉ិចតូរៀ មានទីតាំងនៅផ្ទះលេខ៦១អា ផ្លូវ៥៩២ សង្កាត់បឹងកក់២ ខណ្ឌទួលគោក រាជធានីភ្នំពេញ ត្រូវគ្រួសារអ្នកជំងឺ ប្តឹងសមត្ថកិច្ច និងប្រាប់អ្នកសារព័ត៌មាន កាលពីយប់ថ្ងៃទី១៣ ខែមករា ឆ្នាំ២០១៩ម្សិលមិញ បន្ទាប់ពីគណៈគ្រប់គ្រងមន្ទីរពេទ្យនេះ បង្ខាំងអ្នកជំងឺ ទារប្រាក់សេវា ២០០០ដុល្លារ ដែលគ្រួសារអ្នកជំងឺយល់ថា ជាតម្លៃដែលមិនអាចទទួលយកបាន ៕
