ភ្នំពេញ ៖ នេះជាករណីមួយដែលស្ទើរតែមិនដែលកើតមាន ដោយសារកម្លាំងតម្រួតបទបញ្ជា បានចាប់ឃាត់ខ្លួនមន្ត្រីនគរបាលពាក់ផ្កាយមួយម្នាក់ និងមន្ត្រីនគរបាលប្រមាណ៥នាក់ទៀតក្នុងឯកសណ្ឋាន នៅថ្ងៃទី១០ ខែមករា ឆ្នាំ២០១៩នេះ ស្ថិតនៅផ្លូវ១០១៩ សង្កាត់ទឹកថ្លា ខណ្ឌសែនសខ រាជធានីភ្នំពេញ ។
បើតាមប្រភពព័ត៌មាន បានឱ្យដឹងថា នៅប្រហែលម៉ោង១២ និង៣០នាទីថ្ងៃត្រង់ ថ្ងៃទី១០ មករា ២០១៩ មន្ត្រីនគរបាលដែលនៅគណៈកម្មការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ ចុះត្រួតពិនិត្យឃ្លាំងមួយកន្លែងនៅតាមផ្លូវភ្នំពេញហាណូយ ដែលមានការសង្ស័យថា ដឹកបារីក្លែងក្លាយ ខណៈពេលដែលកម្លាំងនគរបាលនៅឈរត្រៀបត្រានៅពីមុខទីតាំង ឃ្លាំងនោះ ក៏មានកម្លាំងតម្រួតបទបញ្ជាសហការជាមួយនគបាលខណ្ឌសែនសុខ ធ្វើការឃាត់ខ្លួនឡើងរថយន្តនាំយកទៅសាកសួរ ប៉ុន្តែក្រោយមក ត្រូវបានដោះលែងឱ្យមានសេរីភាពឡើងវិញ ។
ប្រភពដដែលបញ្ជាក់ថា មន្ត្រីនគរបាលដែលសមត្ថកិច្ចឃាត់ខ្លួននោះ មានឧត្តមសេនីយ៍ត្រី ផូ សុផល រួមទាំងមន្ត្រីនគរបាលចំនួន៥នាក់ទៀត ដែលសរុបទាំងអស់៦នាក់ ។
ជុំវិញករណីឃាត់ខ្លួនមន្ត្រីនគរបាលខាងលើនេះ បើតាមលោកឧត្តមសេនីយ៍ទោ ទូច យុទ្ធា អនុប្រធានលេខាធិការដ្ឋាន នៃគណៈកម្មការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ បានប្រាប់ភ្នាក់ងារអ្នកសារព័ត៌មានតាមរយៈទូរស័ព្ទ អោយដឹងថា ករណីនេះជាការយល់ច្រឡំគ្នាទេ ដោយនៅមុនពេលកើតហេតុ កម្លាំងរបស់លោកទទួលបានព័ត៌មានថា មានរថយន្តដឹកបារីក្លែងក្លាយ១គ្រឿង ចូលក្នុងឃ្លាំងខាងលើ ហើយសមត្ថកិច្ចក៏មានការស្ទាក់ត្រួតពិនិត្យ ស្រាប់តែខាងម្ចាស់បារីនោះ មិនសហការជាមួយកម្លាំងសមត្ថកិច្ច គឺមិនឱ្យមានការត្រួតពិនិត្យទេ ហើយថែមទាំងរាយការណ៍ទៅខាងលើ ទើបមន្ត្រីនគរបាលទាំង៦នាក់ ដែលមានទាំងលោកផ្កាយ១នោះចុះទៅដោយមិនបានសហការជាមួយស្នងការនគរបាលរាជធានីភ្នំពេញ ស្រាប់តែមានកម្លាំងតម្រួតបទបញ្ជា សហការជាមួយកម្លាំងអាជ្ញាធរខណ្ឌសែនសុខ ចុះឃាត់ខ្លួនកូនចៅគាត់តែម្តង ។
ទោះជាយ៉ាងណា នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បាលថ្លែងប្រាប់បណ្ដាញសារព័ត៌មានក្នុងស្រុកមួយថា ការឃាត់ខ្លួនពួកគេ(ប៉ូលិសផ្នែកខាងប្រឆាំងទំនិញក្លែងក្លាយ) ដោយសារមុនដំបូង ពេលដែលពួកគេចុះទៅនោះ មិនបានសហការជាមួយខាងស្នងការដ្ឋាននគរបាលរាជធានីភ្នំពេញ ក៏បានឲ្យខាងតម្រួតបទបញ្ជា ចុះទៅឃាត់ខ្លួនតែម្តង ប៉ុន្តែក្រោយការសួរនាំ ក៏បានឲ្យត្រឡប់ទៅវិញភ្លាមៗផងដែរ មិនមានរឿងអ្វីនោះឡើយ ។
មន្ត្រីនគរបាលខណ្ឌសែនសុខ បានឲ្យដឹងថា ពិតជាមានការឃាត់ខ្លួនមន្ត្រីនគរបាលទាំងនេះមែន ដោយចាប់ក្រៀកបញ្ជូនឡើងរថយន្តតែម្តង ពីសំណាក់តម្រួតបទបញ្ជានៃអគ្គស្នងការនគរបាលជាតិ ។
ទាក់ទិននឹងករណីនេះដែរ មជ្ឈដ្ឋានជាច្រើន សម្តែងការងឿងឆ្ងល់ថា តើមានរឿងអ្វីនៅពីក្រោយខ្នង នៃការឃាត់ខ្លួនមន្ត្រីប៉ូលិសទាំង៦នាក់នេះ ផ្អើលស្ទើរពេញរាជធានីភ្នំពេញ បែបនេះ ?
មុននេះបន្តិច ប៉ូលិសចាប់ប៉ូលិស ឃាត់ខ្លួនទាំងលោកម្នាក់ពាក់ផ្កាយ១ (វីដេអូ)
