ឧកញ៉ា ព្រាប សុវត្ថិ ប៉ះរាជនីសំឡេង ម៉េង កែវពេជ្ជតា សាជាថ្មី

បន្ទាប់ពីរយៈពេលជាង២០ឆ្នាំបានជួបជាមួយគ្នានៅលើឆាកប្រគំតន្រ្តីម្តងក្នុងឆ្នាំ២០២៣ ពេលនេះតារាចម្រៀងឧកញ៉ា ព្រាប សុវត្ថិ និងអ្នកនាង ម៉េង កែវពេជ្ជតា បានជួបគ្នាម្តងទៀតនៅក្នុងផាប់មួយកន្លែង។មុននឹងឡើងឆាកជាមួយគ្នា ឧកញ៉ា ព្រាប សុវត្ថិ ក៏បានផ្តល់ភាពភ្ញាក់ផ្អើលដល់អ្នកនាង ពេជ្ជតា ដោយជូនផ្កាកុលាបមួយទងផងដែរ។

កាលពីយប់ថ្ងៃទី១០ ខែមេសា អ្នកគាំទ្រយូរអង្វែងរបស់ឧកញ៉ា ព្រាប សុវត្ថិ និងរាជនីសំឡេង ម៉េង កែវពេជ្ជតា រំភើបចិត្តយ៉ាងខ្លាំងបន្ទាប់ពីរៀមច្បងកំពូលទាំងពីររូបបានឡើងឆាកបំពេអារម្មណ៍ទស្សនិកជន។ តាមការចែករំលែកវីដេអូរបស់អ្នកគាំទ្រនៅលើបណ្តាញសង្គមតារាចម្រៀងទាំងពីរដួងបានជ្រើសរើសបទ «ជួបគ្នានៅ New Zealand » «ភ្លៀងធ្លាក់ក្នុងបេះដូង» និងបទ «ខ្មៅអើយខ្មៅ» រួមទាំងបទទោលមួយចំនួន។

នៅក្នុងបរិយាកាសដែលកំពូលតារាចម្រៀងទាំងពីរដួងប៉ះគ្នានៅលើឆាកតន្រ្តីនេះបានធ្វើឱ្យអ្នកគាំទ្រជាច្រើនរំភើបចិត្តយ៉ាងខ្លាំងពីព្រោះនេះគឺជាទិដ្ឋភាពដ៏កម្រសម្រាប់តារាចម្រៀងជើងចាស់ឡើងឆាកជាមួយគ្នា។ តាមរយៈវីដេអូគេក៏បានឃើញឧកញ៉ា ព្រាប សុវត្ថិ បានបង្ហាញការគោរពស្រលាញ់ដោយឱបអ្នកនាង ម៉េង កែវពេជ្ជតា ដូចគ្នា។ ចំណែកឯសំឡេងរបស់តារាចម្រៀងទាំងពីររូបវិញទោះបីវ័យកើនឡើងពីមួយឆ្នាំទៅមួយឆ្នាំក្តី ទឹកដមសំឡេងរបស់អ្នកទាំងពីរនៅតែពីរោះរណ្តំ។

អ្នកលេងបណ្តាញសង្គមជាច្រើនបានបង្ហាញការស្រលាញ់ចូលចិត្តតារាចម្រៀង ឧកញ៉ា ព្រាប សុវត្ថិ ចាប់ដៃគូជាមួយនឹងអ្នកនាង ម៉េង កែវពេជ្ជតា ព្រមទាំងសរសើរថាអ្នកទាំងពីរនៅតែខ្លាំងដូចដើម។ នាពេលបច្ចុប្បន្ននេះមានសិល្បករជំនាន់ក្រោយរីកដុះដាលយ៉ាងខ្លាំងប៉ុន្តែយ៉ាងណាមិញសម្រាប់តារាចម្រៀងទាំងពីររូបនេះនៅតែជាអាយដលក្នុងដួងចិត្តរបស់មហាជនជាយូរមកហើយ។

គួរបញ្ជាក់ផងដែរថា កាលពីចុងឆ្នាំ២០២៣ ទស្សនិកជនមានការភ្ញាក់ផ្អើលយ៉ាងខ្លាំងបន្ទាប់ពីឧកញ៉ា ព្រាប សុវត្ថិ និង អ្នកនាង ម៉េង កែវពេជ្ជតា ឡើងឆាកបកស្រាយបទចម្រៀងជាមួយគ្នាបន្ទាប់ពីរយៈពេលជាង២០ឆ្នាំ៕