ថ្មីៗនេះក្នុងអំឡុងពេលផ្សាយផ្ទាល់របស់ Huang Zitao ក្លាយជាប្រធានបទដ៏ក្តៅគគុកមួយនៅទូទាំងប្រព័ន្ធផ្សព្វផ្សាយសង្គមបន្ទាប់ពី Xu Yiyang ជាភរិយាបានស្រែកដាក់ស្វាមី ដោយសារហេតុផលទាក់ទងនឹងសុខភាព។ ខណៈពេលកំពុងជជែកជាមួយអ្នកគាំទ្រយ៉ាងសប្បាយរីករាយ អ្នកនិយមលេងអ៊ីនធឺណិតជាច្រើនដែលមានភ្នែកមុតស្រួចបានកត់សម្គាល់ឃើញអ្វីមួយមិនធម្មតានៅលើមុខរបស់ Huang Zitao។
បបូរមាត់របស់អតីតសមាជិក EXO រូបនេះស្រាប់តែប្រែជាពណ៌ស្វាយយ៉ាងច្បាស់ ដែលជាសញ្ញាមួយដែលយោងទៅតាមចំណេះដឹងផ្នែកវេជ្ជសាស្ត្រទូទៅ អាចទាក់ទងនឹងបញ្ហាឈាមរត់ ឬសរសៃឈាមបេះដូង។ ភ្លាមៗនោះ មតិយោបល់ដ៏គួរឱ្យព្រួយបារម្ភជាច្រើនបានលេចចេញឡើងដែលជំរុញឱ្យតារាចម្រៀងរូបនេះឈប់ធ្វើការជាបណ្តោះអាសន្ន ហើយទៅពិនិត្យសុខភាពជាបន្ទាន់។ ដំបូងឡើយ Zitao បានឆ្លើយតបដោយលេងសើចស្រាលៗថា «តើអ្នកនិយាយពិតមែនទេ?»ដែលហាក់ដូចជាតារាប្រុសរូបនេះមិនសូវខ្វល់ខ្វាយពីការផ្លាស់ប្តូររាងកាយរបស់ខ្លួន។ ទោះជាយ៉ាងណាក៏ដោយ ផ្ទុយពីអាកប្បកិរិយាព្រងើយកន្តើយរបស់ស្វាមី Xu Yiyang បាននិយាយដោយសង្កត់ធ្ងន់យ៉ាងខ្លាំងថា «កុំនិយាយបែបនោះអី អ្នកពិតជាត្រូវទៅពិនិត្យសុខភាពមែន»!។
ដោយប្រឈមមុខនឹងការទទូចរបស់ប្រពន្ធខ្លួន និងការជំរុញរបស់អ្នកប្រើប្រាស់អ៊ីនធឺណិត Huang Zitao ទីបំផុតបានចុះចាញ់និងបានផ្តល់ការពន្យល់អំពីស្ថានភាពរបស់លោក។
Zitao បាននិយាយថាលោកទើបតែបញ្ចប់ការហាត់ប្រាណដ៏ខ្លាំងក្លាមួយ ហើយបន្ទាប់មកបានត្រាំខ្លួនក្នុងអាងងូតទឹកដែលមានកញ្ចប់ទឹកកកចំនួន៥នៅលើពោះទទេ។ ការប្រែប្រួលសីតុណ្ហភាពភ្លាមៗ និងកង្វះថាមពលបានធ្វើឱ្យបបូរមាត់របស់លោកប្រែជាពណ៌ស្វាយជាបណ្តោះអាសន្ន។
ឧប្បត្តិហេតុដែលបបូរមាត់របស់ Huang Zitao ប្រែជាពណ៌ស្វាយអាចជាករណីកម្រមួយដោយសារទម្លាប់រស់នៅរបស់លោក ប៉ុន្តែការដោះស្រាយរបស់ Xu Yiyang បានបន្សល់ទុកនូវចំណាប់អារម្មណ៍យ៉ាងជ្រាលជ្រៅចំពោះសាធារណជន។ វាបង្ហាញថានៅពីក្រោយភាពទាក់ទាញរបស់តារាល្បីម្នាក់ Huang Zitao នៅតែជាបុរសម្នាក់ដែលត្រូវបានស្រឡាញ់និងការពារដោយស្ត្រីនៃជីវិតរបស់លោក។ បន្ទាប់ពីឧប្បត្តិហេតុនេះ ទស្សនិកជនសង្ឃឹមថា Zitao នឹងយកចិត្តទុកដាក់បន្ថែមទៀតចំពោះការធ្វើឱ្យមានតុល្យភាពនៃការហាត់ប្រាណ និងអាហារូបត្ថម្ភ ដើម្បីឱ្យអ្នកគាំទ្រ និងជាពិសេសភរិយារបស់ខ្លួនគឺ Xu Yiyang អាចមានសន្តិភាពផ្លូវចិត្តទាំងស្រុង៕
