មហាសេដ្ឋី Bill Gates នឹងចូលរួមកម្មវិធីកម្សាន្តរបស់ Yoo Jae Suk

នៅថ្ងៃទី ១៨ ខែសីហា tvN បានបញ្ជាក់ថា លោក Bill Gates ដែលជាពាណិជ្ជករដ៏ល្បីល្បាញលើពិភពលោក និងជាសប្បុរសជននឹងបង្ហាញខ្លួនក្នុងកម្មវិធីដែលរៀបចំដោយ Yoo Jae Suk កំឡុងពេលលោកទៅប្រទេសកូរ៉េខែសីហានេះ។ កាលបរិច្ឆេទចាក់ផ្សាយពិតប្រាកដមិនទាន់ត្រូវបានប្រកាសនៅឡើយទេ ប៉ុន្តែត្រូវបានគេរំពឹងថានឹងចេញផ្សាយនៅចុងខែសីហា។

លោក Nam Seung Yong នាយកប្រតិបត្តិសំខាន់នៅ CJ ENM បានចែករំលែកអំពីការបង្ហាញខ្លួនដ៏គួរឱ្យភ្ញាក់ផ្អើលថា «You Quiz on the Block គឺជាកម្មវិធីដែលស្រលាញ់គ្រប់ទម្រង់នៃជីវិត ហើយបង្ហាញពីសេចក្តីថ្លៃថ្នូររបស់មនុស្ស និងការយោគយល់គ្នាតាមរយៈរឿងផ្ទាល់ខ្លួនប្លែកៗ។ នេះតម្រឹមយ៉ាងជិតស្និទ្ធជាមួយនឹងជំនឿស្នូលរបស់មូលនិធិ Gates ដែលថា ជីវិតទាំងអស់មានតម្លៃស្មើគ្នា។ លោកបាននិយាយថា យើងមានកិត្តិយសក្នុងការស្វាគមន៍លោក Bill Gates ដែលជាឥស្សរជនដែលភ្ជាប់ពិភពលោកតាមរយៈបច្ចេកវិទ្យា និងផ្លាស់ប្តូរពិភពលោកតាមរយៈមនុស្សធម៌។

មហាសេដ្ឋី Bill Gates ដែលត្រូវបានគេស្គាល់ថាជាអ្នកត្រួសត្រាយផ្លូវរបស់លោកក្នុងយុគសម័យកុំព្យូទ័រផ្ទាល់ខ្លួន ឥឡូវនេះត្រូវបានឧទ្ទិសដល់គំនិតផ្តួចផ្តើមក្នុងវិស័យសុខភាពពិភពលោក ការអប់រំ ការកាត់បន្ថយភាពក្រីក្រ និងការប្រែប្រួលអាកាសធាតុតាមរយៈមូលនិធិ Bill & Melinda Gates (Gates Foundation)។

សហស្ថាបនិក ក្រុមហ៊ុន Microsoft ថ្មីៗនេះ បានសន្យាថានឹងបរិច្ចាគ ៩៩% នៃទ្រព្យសម្បត្តិផ្ទាល់ខ្លួនរបស់លោកដែលជាទឹកប្រាក់ប៉ាន់ស្មាន ២០០ ពាន់លានដុល្លារដល់មូលនិធិ Gates មុនពេលបិទមូលនិធិនៅថ្ងៃទី ៣១ ខែធ្នូ ឆ្នាំ២០៤៥។ លោកទុកតែ ១% សម្រាប់ខ្លួនលោកនិងកូនបីនាក់របស់ខ្លួនគឺ Jennifer, Rory និង Phoebe Gates ។

ការបង្ហាញខ្លួនដ៏កម្ររបស់មហាសេដ្ឋីដែលមានជាងគេបំផុតលើពិភពលោកនៅលើកញ្ចក់ទូរទស្សន៍កូរ៉េបានទទួលការចាប់អារម្មណ៍យ៉ាងខ្លាំង។ អ្នកទស្សនាមានការចង់ដឹងយ៉ាងខ្លាំងអំពីការសន្ទនាដែលនឹងកើតឡើងរវាង Bill Gates និង Yoo Jae Suk ដែលជាពិធីករជនជាតិកូរ៉េ៕