ល្អហួស សម្រេចចិត្តមិនចូលរួមក្នុងការផ្ទេរមកុដដោយផ្ទាល់នៅឯប្រទេសថៃ

កាលពីឆ្នាំមុនបវរកញ្ញាវ័យក្មេង ល្អហួស បានប្រកួតឈ្នះនៅលើទឹកដីប្រទេសថៃក្លាយជា Miss Preteen Junior Idol World 2024 ក្រោមការអបអរសាទរយ៉ាងក្លៀវក្លាពីអ្នកគាំទ្រ។ ទោះយ៉ាងណា ល្អហួស សម្រេចចិត្តមិនបានចូលរួមកម្មវិធីដើម្បីផ្ទេរមកុដទៅកាន់ម្ចាស់ជ័យលាភីថ្មីក្នុងឆ្នាំនេះនោះទេ។ លើសពីនេះលោក អ៊ិន វិចិត្រ ក៏សម្រេចចិត្តមិនបញ្ជូនបេក្ខភាពរបស់ខ្លួនទៅកាន់ប្រទេសថៃដូចគ្នា។

បញ្ហាជម្លោះខ្សែបន្ទាត់ព្រំដែនខ្មែរនិងថៃបានអូសបន្លាយអស់រយៈពេលជិត១ខែមកហើយដែលស្ថានការណ៍រវាងប្រទេសទាំងពីរពុំទាន់បានល្អប្រសើរនៅឡើយទេខណៈរឿងនេះបានចាប់ផ្តើមដំបូងដោយសារតែយោធាថៃបានចូលមកលុកលុយយោធាកម្ពុជារហូតបណ្តាលឱ្យយោធាកម្ពុជាម្នាក់ពលី។ ភាគីថៃមិនត្រឹមតែបង្កហេតុមុនថែមទាំងធ្វើខ្លួនជាជនរងគ្រោះ និងគំរាមកំហែងជាច្រើនមកប្រទេសកម្ពុជារហូតកម្ពុជាបានឆ្លើយតបវិញដោយអង់អាចមិនចុះញមជាមួយថៃឡើយហើយរាជរដ្ឋភិបាលកម្ពុជានឹងកំដរថៃឱ្យដល់ទីបំផុត។

ស្របពេលបញ្ហាប្រទេសជិតខាងទាំងពីរមានភាពតានតឹងនេះ បវរកញ្ញាភេទទី៣ ហានី Miss Queen Cambodia 2024 បានសម្រេចចិត្តមិនទៅប្រកួតនៅឯប្រទេសថៃរហូតពេលនេះ ល្អហួស ក៏សម្រេចចិត្តមិនទៅចូលរួមផ្ទេរមកុដក្នុងនាមជា Miss Preteen Junior Idol World 2024 នៅឯប្រទេសថៃផងដែរ។

លោក អ៊ិន វិចិត្រ បានបង្ហោះនៅរសៀលថ្ងៃទី២៣ មិថុនា ថា «ខ្ញុំសម្រេចចិត្តមិនបញ្ជូនបវរកញ្ញាខ្ញុំទៅប្រកួតនៅប្រទេសថៃនោះទេ ក្នុងនោះមានកម្មវិធីមួយ ដែលប្រកួតនៅខែ៧។ Queen ល្អហួសក៏មិនបានចូលរួមក្នុងការផ្ទេរដំណែងដោយផ្ទាល់ផងដែរ»។ ជាមួយគ្នានេះដែរអ្នកនាង ដេននីក្វាន់ ម្តាយរបស់ ល្អហួស ក៏បានចែករំលែកបន្តថា «
កូនស្រីល្អហួស មិនបានទៅចូលរួមកម្មវិធី លា មកុដ នៅថៃទេ»។

គួរបញ្ជាក់ថា ល្អហួស បានគ្រងមកុដ Miss Preteen Junior Idol World 2024 នៅរាត្រីថ្ងៃទី៣១ ខែមីនា ឆ្នាំ២០២៤។ ក្រៅពីក្លាយជាម្ចាស់មកុដ ល្អហួស បានដណ្តើមជ័យលាភីឈ្នះឈុតតំណាងជាតិល្អផ្តាច់គេ ពានរង្វាន់ Vote បោះឆ្នោតច្រើនជាងគេ និងពានរង្វាន់ជាច្រើនទៀតសរុបទាំងអស់រហូតដល់ទៅ៨ពានរង្វាន់ក្នុងពេលតែមួយ៕