អាមេរិកដាក់សម្ពាធឱ្យវៀតណាមកាត់បន្ថយការពឹងផ្អែកបច្ចេកវិទ្យាចិន បើមិនចង់ឱ្យអាមេរិកដំឡើងពន្ធទំនិញខ្ពស់

វៀតណាម ៖ រដ្ឋាភិបាលអាមេរិកបានដាក់សម្ពាធឱ្យវៀតណាមកាត់បន្ថយការពឹងផ្អែកលើបច្ចេកវិទ្យាចិនក្នុងឧបករណ៍ដំឡើងនៅវៀតណាមមុនពេលនាំចេញទៅអាមេរិក បើពុំដូច្នោះទេ អាមេរិកនឹងដំឡើងពន្ធទំនិញវៀតណាម រហូតដល់៤៦% ។ ការដាក់សម្ពាធពីអាមេរិកធ្វើឱ្យវៀតណាមប្រឈមនឹងបញ្ហារក្សាទំនាក់ទំនងជាមួយចិន ដែលជាវិនិយោគិនដ៏សំខាន់របស់វៀតណាម ។ នេះបើតាមការផ្សព្វផ្សាយរបស់សារព័ត៌មានបរទេស កាលពីថ្ងៃទី១៦ ខែមិថុនា ឆ្នាំ២០២៥ ។

សារព័ត៌មាន Reuters រាយការណ៍ថា អាមេរិកបានដាក់សម្ពាធវៀតណាម ដោយឱ្យវៀតណាមកាត់បន្ថយការប្រើប្រាស់បច្ចេកវិទ្យាចិនក្នុងឧបករណ៍ដំឡើងនៅវៀតណាម មុនពេលនាំចេញទៅអាមេរិក ។ វៀតណាមជាទីតាំងផលិតឧបករណ៍ដ៏សំខាន់របស់បណ្តាក្រុមហ៊ុនបច្ចេកវិទ្យា ដូចជា ៖ Apple និង Samsung ដែលពឹងផ្អែកលើបំណែកឧបករណ៍ផលិតនៅចិន ខណៈក្រុមហ៊ុន Meta និង Google ក៏មានបុគ្គលិកនៅវៀតណាមដែរ គឺក្រុមហ៊ុនទាំងពីរផលិតវ៉ែនតា VR និងទូរស័ព្ទស្មាតហ្វូន ។

រដ្ឋាភិបាលលោក Donald Trump នឹងដំឡើងពន្ធទំនិញវៀតណាមខ្ពស់រហូតដល់៤៦% បើវៀតណាមពឹងផ្អែកលើបច្ចេកវិទ្យាចិនក្នុងការផលិតឧបករណ៍ ។ ការដាក់សម្ពាធពីរដ្ឋាភិបាលអាមេរិកនឹងប៉ះពាល់ដល់ការរីកចម្រើនសេដ្ឋកិច្ចវៀតណាម ដែលផ្តោតសំខាន់លើការនាំចេញទំនិញ ។

កាលពីឆ្នាំ២០២៤ ចិនបាននាំចេញឧបករណ៍បច្ចេកវិទ្យា ដូចជា ៖ ឧបករណ៍អេឡិចត្រូនិក កុំព្យូទ័រ និងទូរស័ព្ទទៅវៀតណាម ស្មើទឹកប្រាក់៤៤,០០០លានដុល្លារ ខណៈវៀតណាមបាននាំចេញឧបករណ៍បច្ចេកវិទ្យាទៅអាមេរិក ស្មើទឹកប្រាក់៣៣,០០០លានដុល្លារ ។

ក្រៅពីនេះ អាមេរិកស្នើឱ្យវៀតណាមរឹតបន្តឹងការនាំចេញទំនិញពីចិនទៅអាមេរិក ប៉ុន្តែបិទស្លាកសញ្ញា «ផលិតនៅវៀតណាម» យ៉ាងខុសច្បាប់ដើម្បីចៀសវាងការដំឡើងពន្ធខ្ពស់ ។ បើតាមអ្នកជំនាញ គឺការដាក់សម្ពាធពីអាមេរិកភ្លាមៗអាចប៉ះពាល់ដល់ទំនាក់ទំនងផុយស្រួយរវាងវៀតណាម និងចិន ដែលចិនជាវិនិយោគិនដ៏ធំក្នុងតំបន់អាស៊ាន និងជាគូជម្លោះក្នុងការទាមទារកម្មសិទ្ធិនៅសមុទ្រចិនខាងត្បូង ៕