ប្រឡូកនៅក្នុងអាជីពសិល្បៈអស់រយៈពេលជាច្រើនឆ្នាំតារាសម្តែង ទេព រិនដារ៉ូ នៅតែសិល្បករមួយរូបដែលទទួលបានការគាំទ្រពីទស្សនិកជនទាំងក្មេងទាំងចាស់។ ជាមួយនឹងស្នាដៃចុងក្រោយនេះទៀតសោតយុវវ័យកាន់តែជ្រួលជ្រាបពីការសម្តែងរបស់លោក ខណៈតារាសម្តែងជើងចាស់រូបនេះបាននិយាយយ៉ាងចាស់ដោតទៅកាន់កូនៗភាគច្រើនដែលមើលរំលងការសួរសុខទុក្ខឪពុក។

«ចាស់កំព្រា» បានបន្សល់ទុកនៅចំណាប់អារម្មណ៍យ៉ាងច្រើនក្រោយពេលចាក់បញ្ចាំងក្នុងរោងកុនដែលទទួលបានការគាំទ្រភ្លូកទឹកភ្លូកដីដោយសារតែសាច់រឿងបង្កប់អត្ថន័យយ៉ាងជ្រាលជ្រៅ។ ក្នុងនាមជាតួអង្គសំខាន់នៅក្នុងខ្សែភាពយន្តនេះលោក ទេព រិនដារ៉ូ ក៏បានចូលរួមក្នុងកម្មវិធីកិច្ចសម្ភាសន៍ 3fun ព្រមទាំងបានចែករំលែករឿងរ៉ាវមួយចំនួនទាក់ទងនឹងការសម្តែងរបស់ខ្លួន។

ដ្បិតតែការសម្តែងរបស់លោកអាចឱ្យអ្នកទស្សនាយំខ្សោះទឹកភ្នែកក្តី ប៉ុន្តែលោក ទេព រិនដារ៉ូ បានបង្ហាញថាចំណុចខ្លះក៏ធ្វើឱ្យលោកចាក់ដោតដូចគ្នាជាពិសេសគឺពាក្យ «ប៉ាឯងកុំគិតពីពួកខ្ញុំច្រើនពេកមើល…»។ ចំពោះការថតនៅក្នុងមឈូស វិញលោក ទេព រិនដារ៉ូ ថាការសម្តែងក្នុងភាពយន្តគឺជាអ្វីដែលលោកស្រលាញ់ដូច្នេះគេឱ្យលោកសម្តែងអ្វីតារាសម្តែងជើងចាស់រូបនេះមិនប្រកែកនោះទេ។

ជាមួយនឹងការចែករំលែកនូវអារម្មណ៍ក្តុកក្តួលទាក់ទងនឹងឪពុកបង្កើតដែលបានចែកឋានទៅ លោក ទេព រិនដារ៉ូ ក៏បានលើកឡើងថាកូនៗភាគច្រើនមើលរំលងការសួរសុខទុក្ខឪពុក។ លោកបាននិយាយថា កូនៗមួយចំនួនគឺមិនដែលសួរសុខទុក្ខឪពុកថាគាត់សុខសប្បាយឬទេ មានឈឺអីឬអត់។ តារាជើងចាស់រូបនេះថា ក្នុងនាមជាឪពុកប្រសិនជាបានឮពាក្យសុខទុក្ខពីកូនគាត់នឹងសប្បាយចិត្ត ពីព្រោះបានដឹងថា កូនបានគិតពីឪពុកដែរ។

គួរបញ្ជាក់ផងដែរថា «ចាស់កំព្រា» គឺជាវណ្ណកម្មថ្មីរបស់ផលិតកម្ម LD ដែលជាភាពយន្តខ្មែរទទួលបានការគាំទ្រច្រើននៅដើមឆ្នាំ២០២៦ នេះ។ មិនត្រឹមតែទទួលបានលទ្ធផលល្អភាពយន្តមួយនេះបានឆ្លុះបញ្ចាំងអំពីតថភាពជាក់ស្តែងនៅក្នុងសង្គមខ្មែរ និងដាស់តឿនកុលបុត្រ កុលធីតា យកចិត្តទុកដាក់ចំពោះឪពុកម្តាយ៕

កម្មវិធីប្រលងចម្រៀងរ៉េបដែលផលិតដោយផលិតកម្មបារមីនិងភ្លើងគប់បានធ្វើឱ្យទស្សនិកជនកោតសរសើរយ៉ាងខ្លាំងពីទស្សនិកជនពីមួយវគ្គទៅវគ្គកាន់តែជក់ចិត្តជាពិសេសគឺវគ្គប្រកួតដែលចាក់ផ្សាយថ្មីៗនេះដោយបាននាំយករៀមច្បងចំនួន៣រូបមកអង្រួនកម្មវិធី។ ជួបជាមួយនឹងលោក ណូយ វ៉ាន់ណេត លោក ហួរ ឡាវី និងអ្នកនាង ខាត់ សុឃីម បានធ្វើឱ្យ វណ្ណដា និយាយាថាសិល្បៈពិតជាគ្មានព្រំដែន។

នៅក្នុងវគ្គ Legend ដែលចាក់ផ្សាយកាលពីយប់ថ្ងៃទី៣ ខែមេសា បេក្ខជននៅក្នុងកម្មវិធីប្រកួតមានឱកាសដ៏ពិសេសមួយដោយបានឡើងសម្តែងជាមួយនឹងរៀមច្បងចំនួន៣រូបគឺ លោក ណូយ វ៉ាន់ណេត លោក ហួរ ឡាវី និងអ្នកនាង ខាត់ សុឃីម។ បេក្ខជននិង Legend បានបញ្ជូលរួមគ្នាទាំងប្រភេទសម័យនិងបុរាណ លាយជាមួយនឹងការរ៉េបទៅតាមការច្នៃប្រឌិតរៀងៗខ្លួន ដោយរួមផ្សំជាមួយនឹងការសម្តែងយ៉ាងពិសេស។ ទិដ្ឋភាពបែបនេះគឺជាលើកទី១ហើយដែលទស្សនិកជនបានឃើញការប្រកួតចម្រៀងរ៉េបដែលរួមបញ្ជូលរៀមច្បងជាន់ខ្ពស់និងអ្នករ៉េបជំនាន់ក្រោយ។

វត្តមានរបស់សិល្បកររៀមច្បងទាំង៣រូបនៅក្នុងកម្មវិធីនេះបានធ្វើឱ្យ វណ្ណដា ដែលជាគណៈកម្មការមួយរូបនៅក្នុងកម្មវិធីបានបង្ហាញអារម្មណ៍មានមោទនភាពជំនួសបេក្ខភាព។ តារារ៉េបរូបនេះបានសរសេរនៅលើបណ្តាញសង្គមថា «សិល្បៈគឺពិតជាគ្មានព្រំដែន ក្នុងវគ្គ Legend! ទោះសិល្បៈវិវត្តទៅតាមសម័យកាល តែតម្លៃនៃចំណេះដឹងនៅតែជាគ្រឹះដ៏សំខាន់បំផុត។ ខ្ញុំពិតជាមានមោទនភាពជំនួសបេក្ខជន បេក្ខនារីគ្រប់រូប ដែលបានរៀនសូត្រ និងសហការជាមួយកំពូលរាមច្បងក្នុងវគ្គដ៏ពិសេសនេះ»។

គួរបញ្ជាក់ផងដែរថា កន្លងមក វណ្ណដា និងរៀមច្បង ណូយ វ៉ាន់ណេត បានធ្វើឱ្យអ្នកគាំទ្រជាច្រើនរំពឹងថាសិល្បករទាំងពីររូបមានឱកាសចាប់ដៃគ្នានោះនឹងធ្វើឱ្យមានភាពជក់ចិត្តជាមិនខាន។ វណ្ណដា ក៏មានក្តីសុបិនមួយអាចបកស្រាយបទជាមួយនឹងរៀមច្បងរូបនេះដូចគ្នា។ ងាកមកកាន់ អ្នកនាង ខាត់ សុឃីម វិញទស្សនិកជនធ្លាប់បានឃើញតារាពហុជំនាញរូបនេះបានផ្តល់កិត្តិយសចូលរួមការប្រគំតន្រ្តីរបស់ វណ្ណដា និងបង្ហាញការគាំទ្រដល់សិស្សប្អូនដោយបានចូលរួមកម្មវិធីមួយចំនួនរបស់ វណ្ណដា ដូចគ្នា។

ចំណែកឯ Legend ហួរ ឡាវី ដែលបច្ចុប្បន្នមានអាយុ៨១ឆ្នាំរូបនេះនៅតែធ្វើឱ្យទស្សនិកជនសរសើរនិងគោរពលោកដែលជាសិល្បៈជើងចាស់មួយរូបមិនប្រកាន់ខ្លួនតែងតែផ្សារភ្ជាប់ទំនាក់ទំនងល្អជាមួយនឹងសិល្បៈជំនាន់ក្រោយ៕

ស៊ូទ្រាំនឹងអាកាសធាតុក្តៅអមដោយមកុដអប្សរាដែលមានទម្ងន់ធ្ងន់ជាមួយនឹងរូបរាងដ៏តូចច្រឡឹង ល្អហួស បានចូលរួមផ្សព្វផ្សាយវប្បធម៌ខ្មែរតាមរយៈកេរ្តិ៍ឈ្មោះរបស់ខ្លួនដោយមិនខ្លាចពីភាពនឿយហត់និងការលំបាកឡើយ។ កន្លងមក ល្អហួស បានស៊ូទ្រាំនឹងអាកាសធាតុត្រជាក់នៅប្រទេសចិនដើម្បីបង្ហាញរបាំអប្សរាផងដែរ។

ថ្មីៗនេះទស្សនិកជនមួយចំនួនបានឃើញមកហើយថា ល្អហួស បានគ្រងឈុតមានរូបប្រាសាទអង្គរវត្តដ៏ស្រស់ស្អាតជាមួយនឹងមកដុអប្សរាដើម្បីផ្សព្វផ្សាយវប្បធម៌ខ្មែរឱ្យពិភពលោកបានដឹងថានេះជាសម្បត្តិរបស់ដូនតា« ខ្មែរ » មានតែមួយគ្មានពីរនៅលើលោកនេះ ។ មិនត្រឹមតែប៉ុណ្ណោះ ល្អហួស បានបន្ថែមមថាកូនខ្មែរគ្រប់ៗរូបចូរនាំគ្នាថែរក្សាសម្បត្តិមួយនេះឱ្យគង់វង្សតរៀងទៅ។

ក្រៅពីចូលរួមផ្សព្វផ្សាយវប្បធម៌ខ្មែរនៅប្រាសាទអង្គរវត្តដែលជាសម្បត្តិបេតិកភណ្ឌពិភពលោក ល្អហួស បានចូលរួមថតបទ «ពង្សាវតារខ្មែរ» ឡើងវិញដែលជាស្នាដៃនិពន្ធដោយ សាស្ត្រាចារ្យ « នួន កន»។ នេះក៏ជាបទចម្រៀងដែលដាស់ស្មារតីកូនខ្មែរថា ខ្មែរមានអរិយធម៌ មានពូជពង្សល្អប៉ុណ្ណា ដែលកូនខ្មែរគ្រប់ជំនាន់ត្រូវចូលរួមថែរក្សាការពារទាំងអស់គ្នា។

សកម្មភាពរបស់ ល្អហួស បានជំរុញឱ្យមហាជនកោតសរសើរនាងយ៉ាងខ្លាំងមិនត្រឹមតែល្អតែឈ្មោះប៉ុន្តែសកម្មភាពរបស់នាងក៏ល្អដូចឈ្មោះទៅទៀតពោលគឺបានមួយចប់តែម្តង។
ជាមួយនឹងសកម្មភាពចូលរួមផ្សព្វផ្សាយវប្បធម៌ខ្មែរទៅកាន់ពិភពលោក ល្អហួស បានបង្ហាញពីសកម្មភាពក្រៅឆាកដែលស៊ូទ្រាំនឹងអាកាសធាតុក្តៅ និងគ្រឿងអប្សរាដែលពាក់នៅលើក្បាលដែលមានទម្ងន់ធ្ងន់ ហើយវាពុំមែនជារឿងងាយស្រួលនោះទេទម្រាំនឹងបានចេញជាលទ្ធផលផ្លែផ្កាឱ្យទស្សនិកជនបានទស្សនា។ យ៉ាងណាមិញ ដ្បិតតែមានការលំបាកបន្តិចក្តី ប៉ុន្តែ ល្អហួស មិនចុះចាញ់នោះទេដើម្បីចូលរួមផ្សព្វផ្សាយវប្បធម៌ជាតិខ្លួនក្នុងនាមជាកូនខ្មែរមួយរូប។

កន្លងមកនេះ ល្អហួស ក៏មានសកម្មភាពជាច្រើនចូលរួមផ្សព្វផ្សាយពីវប្បធម៌ខ្មែរ តួយ៉ាងកាលពីដើមឆ្នាំ២០២៥ ល្អហួស បានអត់ធ្មត់ ពុះពារនឹងអាកាសធាតុត្រជាក់ក្នុងការរាំរបាំអប្សរាពីមុខផ្ទាំងទឹកកកនៅប្រទេសចិន។ វីដេអូរបស់ ល្អហួស មានការទស្សនារាប់លាននិងល្បីរន្ទឺយ៉ាងខ្លាំង។

នាពេលខាងមុខនេះក្នុងនាមជាម្ចាស់មកុដ Miss Teen Cambodia 2025 ល្អហួស ក៏ត្រៀមតំណាងប្រទេសកម្ពុជាប្រកួតនៅលើឆាកអន្តរជាតិដោយត្រៀមលក្ខណៈជាច្រើនក្នុងការឈរតំណាងជាតិខ្មែរ៕

លោក ម៉ុង វិមាន អតីតបេក្ខជន The Voice Cambodia រដូវកាលទី១ បានចេញមុខរិះគ.ន់បទ «កាឌិនហយ» របស់តារាចម្រៀង សុគន្ធ និសា និង រ៉ូលីន ដោយលើកឡើងថាព្រោះតែបែបនេះទើបសិល្បៈខ្មែរមិនអាចរីកដុះដាលទៅកាន់ឆាកអន្តរជាតិបាន។ ការរិះគន់របស់លោក ម៉ុង វិមាន ត្រូវបានអ្នកនិពន្ធ សោម ដូរ៉េ ដែលជាអ្នកនិពន្ធបទនេះផ្ទាល់ចេញមកឆ្លើយតប។

ការលើកឡើងរបស់លោក វិមាន ដែលថាបទ «កាឌិនហយ» ជាប្រភេទបទឆ្កួតលីលា លោក ដូរ៉េ បាននិយាយថាលោកមិនអាចទទួលយកពាក្យនេះបានទេ។ អ្នកនិពន្ធរូបនេះបានបញ្ជាក់ថាការនិពន្ធបទនេះគឺលោកបានឆ្លងកាត់ការត្រួតពិនិត្យត្រឹមត្រូវពីរៀមច្បង និងសាស្រ្តាចារ្យដែលធ្វើការនៅក្រសួង។ លោកបញ្ជាក់ថាស្នាដៃរបស់ខ្លួនគឺតែងតែថ្មី ប្លែកត្រចៀក ហើយពាក្យ «កាឌិនហយ» គឺជាពាក្យប្រជាប្រិយគ្រាមភាសាប្រើទៅលើមនុស្សស្រីដែលខឹងចំអន់គ្នា។

លោក សោម ដូរ៉េ ក៏បានច្រានចោលដោយអះអាងថាការប្រើពាក្យ «កន្ធីង» ពុំមែនជាភាសាស្រើបស្រាល ភាសាអាក្រក់នោះទេ ហើយពាក្យខ្លះមានពាក្យ «ព្រះ» ពីមុខ ពុំមែនជាភាសារាជសព្ទទាំងអស់នោះទេ ប៉ុន្តែគឺជាភាសានិយាយដូចជាពាក្យ «ព្រះអើយ» ជាដើម។ ចំណុចទី២ ដែល ម៉ុង វិមាន បាននិយាយថាអ្នកនិពន្ធខ្មែរទាំងអស់ Copy ពីស្រុកគេហើយនៅពេលចាប់ផ្តើមធ្វើ Original គ្មានការគាំទ្រក៏បញ្ឈប់សកម្មភាពនោះ លោកបានឆ្លើយតបថា អាជីពសិល្បៈរយៈពេល២០ឆ្នាំមកនេះលោកបានបង្ហាញស្នាដៃជាច្រើនដែលសុទ្ធសឹងមានការទទួលស្គាល់ ហើយបទល្បីៗមួយចំនួនគឺសុទ្ធសឹងតែជាស្នាដៃថ្មី ខណៈលោកបានប្រកាសថាឈប់និពន្ធបទចម្លងកាលពីឆ្នាំ២០១៣។ អ្នកនិពន្ធរូបនេះបន្តទៀតថា បច្ចុប្បន្ននេះលោកនៅតែបន្តអាជីពតែងនិពន្ធសម្រាប់ឆ្នាំងបាយរបស់ខ្លួន ដូច្នេះពាក្យសម្តីរបស់លោក ម៉ុង វិមាន គឺយល់ខុសចំពោះលោកហើយ។

ចំណុចទី៣ ដែលលោក ម៉ុងវិមាន ថាប្រទេសជាតិមិនរីកចម្រើន លោក សោម ដូរ៉េ បានឆ្លើយតបថា ធាតុផ្សំនៃការរីកចម្រើនគឺមានការចូលរួមជាច្រើនវិស័យ ខណៈលោកបានឱ្យអ្នករិះគន់រូបនេះកែសំណេររបស់ខ្លួនដែលសរសេរខុសមុននឹងទៅរិះគន់អ្នកដទៃ ពីព្រោះការរីកចម្រើនក្នុងសង្គមគឺចាប់ផ្តើមដំបូងពីខ្លួនឯង។ អ្នកនិពន្ធ សោម ដូរ៉េ ទទួលស្គាល់ថាការរិះគន់គឺមិនខុសនោះទេដោយចង់ឱ្យល្អ ប៉ុន្តែការរិះគន់គឺបង្ហាញពីឆន្ទៈនិងមនសិការ តែគំនិតនិងបញ្ញាគឺបង្ហាញពីតម្លៃ ដូច្នេះគិតឱ្យបានគ្រប់ជ្រុងជ្រោយមុននឹងរិះគន់។

លោក សោម ដូរ៉េ បានបញ្ជាក់ថាលោកមិនខឹងចំពោះការរិះគន់បែបស្ថាបនានោះទេហើយលោកតែងតែធ្វើការឆ្លើយតបទៅនឹងការរិះគន់ដោយមិនឱ្យគេបន្ទាបតម្លៃអ្នកនិពន្ធឬភាន់ច្រឡំនោះទេ ពីព្រោះលោកច្បាស់ខ្លួនឯងរាល់ការងារនីមួយៗគឺដឹងថាលោកកំពុងធ្វើអ្វី៕

ពិតជាគួរឲ្យរំភើបរកពាក្យថ្លែងពុំបាន! ដោយក្ដីស្រឡាញ់ដ៏ជ្រាលជ្រៅចំពោះប្រទេសកម្ពុជា និងប្រជាជនខ្មែរ, តារាហូលីវូដដ៏ល្បីលំដាប់ពិភពលោក លោកស្រី Angelina Jolie ប្តេជ្ញាចូលរួមផ្សព្វផ្សាយសក្តានុពលទេសចរណ៍ដ៏អស្ចារ្យរបស់ព្រះរាជាណាចក្រកម្ពុជា ទៅកាន់ពិភពលោក ស្របតាមទិសស្លោក ម្នាក់ៗជាផ្សព្វផ្សាយទេសចរណ៍កម្ពុជាម្នាក់!

យោងតាមទំព័រផ្លូវការក្រសួងទេសចរណ៍ នៅថ្ងៃទី៣ ខែមេសា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានទទួលជួបពិភាក្សាការងារជាមួយលោកស្រី Angelina Jolie តារាភាពយន្តហូលីវូដដ៏ល្បីល្បាញ និងជាប្រធានមូលនិធិ MJP ដែលបានបំពេញបេសកកម្មមនុស្សធម៌នៅប្រទេសកម្ពុជា និងនៅតាមបណ្តាប្រទេសជាច្រើននៅលើពិភពលោក។ កិច្ចពិភាក្សានេះ បានផ្តោតលើការពង្រឹងកិច្ចសហការក្នុងការផ្សព្វផ្សាយវិស័យទេសចរណ៍, ការការពារបេតិកភណ្ឌវប្បធម៌ និងធម្មជាតិនៅកម្ពុជា។

ក្នុងជំនួបនេះ ភាគីទាំងពីរបានផ្លាស់ប្តូរយោបល់អំពីការលើកកម្ពស់កិត្តិនាមកម្ពុជាលើឆាកអន្តរជាតិ តាមរយៈសកម្មភាពនានាដូចជាការផ្សព្វផ្សាយគោលដៅទេសចរណ៍កម្ពុជា, សកម្មភាពការងារគាំទ្រសហគមន៍, សកម្មភាពគាំទ្រវិស័យវប្បធម៌ សិល្បៈ និងសង្គម ក៏ដូចការងារអភិរក្សធនធានធម្មជាតិ ។

គួរបញ្ជាក់ជូនថា ដោយការស្រឡាញ់ប្រទេសកម្ពុជា និងប្រជាជនខ្មែរ លោកស្រី Angelina Jolie បាននិងកំពុងបំពេញការងារមនុស្សធម៌ជាច្រើននៅកម្ពុជា ជាពិសេស ការអភិរក្សធនធានធម្មជាតិ និងវប្បធម៌, សិល្បៈភាពយន្ត, អប់រំ, សុខាភិបាល, ការគាំទ្រដល់គម្រោងសហគមន៍ និងទេសចរណ៍ប្រកបដោយចីរភាព, ព្រមទាំងការជួយផ្សព្វផ្សាយគោលដៅទេសចរណ៍កម្ពុជា តាមរយៈខ្សែភាពយន្ត First They Killed My Father និង Tomb Raider ជាដើម។

គួររំលឹកផងដែរថា កន្លងមក លោកស្រី Angelina Jolie ធ្លាប់បានលើកឡើងថា លោកស្រីចាត់ទុកកម្ពុជាថាជា “ផ្ទះទីពីរ” របស់លោកស្រី ដោយសារវាជាទឹកដីកំណើតរបស់ Maddox (កូនប្រុសច្បង) និងជាកន្លែងដែលផ្លាស់ប្តូរជីវិតរបស់លោកស្រី។ ជាងនេះទៅទៀត នៅក្នុងបទសម្ភាសន៍ជាមួយសារព័ត៌មានមួយចំនួន លោកស្រីថែមទាំងធ្លាប់បានបង្ហើបពីគម្រោងផ្លាស់ប្ដូរទីលំនៅពីសហរដ្ឋអាមេរិកទៅនៅក្រៅប្រទេសផងដែរ ដោយក្នុងនោះលោកស្រីបានចង្អុលបង្ហាញមកកាន់ប្រទេសកម្ពុជា ថាជាជម្រើសដ៏លេចធ្លោមួយនៅក្នុងការពិចារណារបស់លោកស្រី។

ការណ៍នេះបានឆ្លុះបញ្ចាំងពីទឹកចិត្តស្រលាញ់ និងការផ្ដល់តម្លៃពីសំណាក់តារាហូលីវូដដ៏ល្បីរូបនេះមកលើប្រទេសកម្ពុជាជាខ្លាំង ដ្បិតទីនេះគឺជាទឹកដីនៃភាពស្ងប់សុខ ដែលផ្ដល់ឲ្យគាត់នូវសន្តិភាពផ្លូវចិត្តអស់រយៈពេលជាង២០ឆ្នាំមកហើយ ចាប់តាំងពីការមកដល់ដំបូងក្នុងឆ្នាំ២០០១៕