ប្រទេសកូរ៉េខាងត្បូង ៖ កូរ៉េខាងត្បូងបានបណ្តេញមន្ត្រីជាន់ខ្ពស់គណបក្សនយោបាយម្នាក់ចេញពីតំណែង ក្រោយស្នើឱ្យបុរសកូរ៉េខាងត្បូងរៀបការជាមួយនារីវៀតណាម ឬស្រីលង្ការ ដើម្បីដោះស្រាយបញ្ហាអត្រាកំណើតធ្លាក់ចុះខ្លាំងក្នុងរយៈពេលជាច្រើនឆ្នាំ ដែលធ្វើឱ្យស្ថានទូតវៀតណាមចេញលិខិតតវ៉ាប្រឆាំងនឹងការលើកឡើងបែបនេះថា មិនផ្តល់តម្លៃឱ្យនារីបរទេស ។

តាមការចុះផ្សាយរបស់សារព័ត៌មានបរទេសនៅថ្ងៃទី១០ ខែកុម្ភៈ ឆ្នាំ២០២៦ លោក Kim Hee Soo មន្ត្រីគណបក្សប្រជាធិបតេយ្យ និងជាប្រធានគណៈកម្មការគ្រប់គ្រងតំបន់ Jindo នៅភាគខាងត្បូងប្រទេសកូរ៉េខាងត្បូង ត្រូវបានបណ្តេញចេញពីគណបក្សប្រជាធិបតេយ្យ ក្រោយពីលោកស្នើក្នុងកិច្ចប្រជុំសភាឱ្យបុរសកូរ៉េខាងត្បូងនៅជនបទរៀបការជាមួយនារីវៀតណាម ឬស្រីលង្ការ ដើម្បីដោះស្រាយបញ្ហាអត្រាកំណើតធ្លាក់ចុះខ្លាំង ។

លោកនិយាយបែបនេះក្នុងកិច្ចប្រជុំពិភាក្សាស្តីពីការគ្រប់គ្រងតំបន់ Jindo និងទីក្រុងនៅក្បែរគ្នា ដែលសុទ្ធតែជាតំបន់មានចំនួនពលរដ្ឋធ្លាក់ចុះខ្លាំងបំផុត ស្របពេលកូរ៉េខាងត្បូងប្រឈមនឹងបញ្ហាអត្រាកំណើតធ្លាក់ចុះខ្លាំងលើពិភពលោក ដែលអាចធ្វើឱ្យពលរដ្ឋកូរ៉េខាងត្បូង ចំនួន៥០លាននាក់ ធ្លាក់ចុះពាក់កណ្តាលនារយៈពេល៦០ឆ្នាំទៀត ។

ប៉ុន្តែពាក្យសម្តីរបស់លោក Kim ធ្វើឱ្យមហាជនមិនពេញចិត្តយ៉ាងខ្លាំង ជាពិសេស មន្ត្រីស្ថានទូតវៀតណាមនៅទីក្រុងសេអ៊ូល បានចេញលិខិតតវ៉ាភ្លាមៗតាមហ្វេសប៊ុកផេក ដោយចាត់ទុកពាក្យសម្តីរនេះមិនត្រឹមតែជាការបញ្ចេញមតិប៉ុណ្ណោះទេ ប៉ុន្តែមិនផ្តល់តម្លៃដល់នារីអន្តោប្រវេសន៍ និងជនជាតិភាគតិចរស់នៅកូរ៉េខាងត្បូង ។ រីឯមន្ត្រីស្ថានទូតស្រីលង្ការ មិនបាននិយាយអ្វីទេពាក់ព័ន្ធនឹងពាក្យសម្តីនេះ ។

លោក Kim បានសូមទោស និងទទួលស្គាល់មិនបានផ្តល់តម្លៃនារីបរទេស ប៉ុន្តែនិយាយក្នុងបំណងដោះស្រាយបញ្ហាពលរដ្ឋកូរ៉េខាងត្បូងធ្លាក់ចុះនៅជនបទ ។ លោកព្យាយាមសូមទោសដើម្បីកាត់បន្ថយកំហឹងរបស់មហាជន ខណៈមន្ត្រីថ្នាក់ខេត្ត Jeolla បានចេញលិខិតសូមទោសជាផ្លូវការចំពោះពាក្យសម្តីមិនសមរម្យរបស់លោក Kim ធ្វើឱ្យប៉ះពាល់ដល់នារីវៀតណាម ប៉ុន្តែមហាជននៅតែខឹងសម្បារ ។

ក្រុមមន្ត្រីជាន់ខ្ពស់គណបក្សប្រជាធិបតេយ្យបានសម្រេចចិត្តបណ្តេញលោក Kim ឱ្យចេញពីគណបក្សប្រជាធិបតេយ្យ ។ បើតាមសេចក្តីរាយការណ៍ ក្រុមសកម្មជនសិទ្ធិស្ត្រី និងជនអន្តោប្រវេសន៍បានប្រមូលគ្នាធ្វើបាតុកម្មនៅតំបន់ Jindo នាថ្ងៃទី១០ ខែកុម្ភៈ ដើម្បីប្រឆាំងនឹងពាក្យសម្តីរបស់មន្ត្រីគណបក្សនយោបាយរូបនេះ ៕

ប្រទេសថៃ ៖ ពលរដ្ឋថៃនៅខេត្តព្រំដែនជាប់កម្ពុជា ដូចជា ខេត្តបុរីរាំ និងខេត្តត្រាត ទាមទារឱ្យលោក Anutin Charnvirakul ដែលពលរដ្ឋនៅទូទាំងប្រទេសបោះឆ្នោតគាំទ្រ ត្រូវធ្វើរបងព្រំដែនកម្ពុជា-ថៃឱ្យបានឆាប់បំផុតតាមការសន្យាពេលរកសំឡេងឆ្នោត និងផ្តោតលើបញ្ហាព្រំដែនខ្លាំងជាងការអភិវឌ្ឍសេដ្ឋកិច្ច ។ ក្រៅពីនេះ ពួកគេបារម្ភពីកងទ័ពថៃបើកការវាយប្រ.ហារធ្វើសង្គ្រា.មឈ្លាមពានកម្ពុជា ជាលើកទី៣ ដោយសារការប្រមូលផលដំណាំមិនទាន់រួចរាល់ ។

ពលរដ្ឋស្រុកបានក្រួត ខេត្តបុរីរាំ (អតីតខេត្តរបស់កម្ពុជា) បានទាមទារឱ្យប្រធានគណបក្សភូមិចៃថៃ លោក Anutin ដែលទើបទទួលជ័យជម្នះក្នុងការបោះឆ្នោត ត្រូវធ្វើរបងព្រំដែនកម្ពុជា-ថៃឱ្យបានឆាប់បំផុត ពីព្រោះប្រធានគណបក្សនេះបានយកបញ្ហាជម្លោះព្រំដែនជាមួយកម្ពុជា មកធ្វើជាគោលនយោបាយកេងចំណេញផលប្រយោជន៍ ផ្សព្វផ្សាយឱ្យពលរដ្ឋបោះឆ្នោតគាំទ្រ រួមមាន ៖ ធ្វើរបងព្រំដែនកម្ពុជា-ថៃ និងបិទព្រំដែនជារៀងរហូត ។ អ្វីដែលពលរដ្ឋខេត្តបុរីរាំចង់ឃើញបំផុតពេលនេះ គឺលោក Anutin ត្រូវធ្វើរបងព្រំដែនតាមការសន្យា និងផ្តោតលើបញ្ហាព្រំដែនខ្លាំងជាងសេដ្ឋកិច្ច ។

ក្រៅពីនេះ ពលរដ្ឋខេត្តបុរីរាំ សុំប្រាក់ឧបត្ថម្ភបន្ថែមទៀតពីរដ្ឋាភិបាល ពីព្រោះទើបតែទទួលបានប្រាក់ត្រឹមតែ៥,០០០បាតប៉ុណ្ណោះ (ស្មើ១៦១ដុល្លារ) មិនគ្រប់គ្រាន់សម្រាប់ការចំណាយទេ ។ ពួកគេថា ប្រសិនបើកងទ័ពថៃធ្វើសង្គ្រាមឈ្លានពានកម្ពុជា ជាលើកទី៣ កងទ័ពថៃត្រូវឈ្លានពានទឹកដីកម្ពុជាឱ្យខ្លាំងជាងពេលកន្លងមក ឬវាយប្រហារដណ្តើមយកខេត្តនានារបស់កម្ពុជា ។

ចំណែកពលរដ្ឋនៅស្រុកមឿង ខេត្តត្រាត បានសំណូមពរឱ្យរដ្ឋាភិបាលបិទព្រំដែនកម្ពុជា-ថៃជារៀងរហូតតាមការសន្យាពេលរកសំឡេងឆ្នោត និងបារម្ភពីកងទ័ពថៃវាយប្រហារកម្ពុជាជាលើកទី៣ ពីព្រោះការប្រមូលផលផ្លែទុរេន សាវម៉ាវ និងមង្ឃុត មិនទាន់រួចរាល់ ។

លទ្ធផលការបោះឆ្នោតនៅប្រទេសថៃបង្ហាញថា ពលរដ្ឋថៃភាគច្រើនគាំទ្រឱ្យកងទ័ពធ្វើសង្គ្រាមឈ្លានពានដណ្តើមទឹកដីកម្ពុជា ពលរដ្ឋថៃមិនចង់បានសន្តិភាពឡើយ ថែមទាំងសំណូមពរឱ្យរដ្ឋាភិបាលផ្តោតលើការវាតទីទឹកដី ខ្លាំងជាងផ្តោតលើការអភិវឌ្ឍសេដ្ឋកិច្ច ។

គួរបញ្ជាក់ថា លោក Anutin បានបើកដៃឱ្យកងទ័ពធ្វើសង្គ្រាមជាលើកទី២ ដណ្តើមទឹកដីកម្ពុជា ដើម្បីឈ្នះឆ្នោតកាលពីថ្ងៃទី៨ ខែកុម្ភៈ ឆ្នាំ២០២៦ ហើយយកបញ្ហាជម្លោះព្រំដែនមកឃោសនាឱ្យពលរដ្ឋបោះឆ្នោតគាំទ្រ ដោយជំរុញឱ្យពលរដ្ឋមានគំនិតជាតិនិយមជ្រុល ។

លទ្ធផលរាប់សន្លឹកឆ្នោតបណ្តោះអាសន្នប្រកាសដោយគណៈកម្មាធិការជាតិរៀបចំការបោះឆ្នោតថៃ កាលពីថ្ងៃទី៩ ខែកុម្ភៈ បង្ហាញថា គណបក្សភូមិចៃថៃ របស់លោក Anutin ទទួលបានអាសនៈជិត២០០នៅរដ្ឋសភា រីឯគណបក្សប្រជាជន ទទួលបាន១១៦អាសនៈ, គណបក្សភឿថៃ ៧៦អាសនៈ, គណបក្សក្លាថាំ ៥៧អាសនៈ និងគណបក្សប្រាឆ៉ាធិប៉ាត់ ២២អាសនៈ ។

ការទទួលបានអាសនៈនៅរដ្ឋសភាដ៏ច្រើនលើសលប់របស់គណបក្សភូមិចៃថៃ បន្ទាប់ពីលោក Anutin ព្យាយាមញុះញង់ ចោទប្រកាន់ ដើម្បីធ្វើសង្គ្រាមឈ្លានពានកម្ពុជាជាលើកទី២ កាលពីថ្ងៃទី៧ ខែធ្នូ ឆ្នាំ២០២៥ ហើយពេលនេះ សម្រេចបំណងហើយ ។ លោកនឹងកាន់តំណែងជានាយករដ្ឋមន្ត្រី ទី៣៣ បន្តពីតំណែងនាយករដ្ឋមន្ត្រី ទី៣២ ដែលមានរយៈពេលមិនដល់៤ខែ ៕

ពីមុនធ្លាប់មានតែឯង ពេលនេះចាប់ផ្ដើមព្រួយបារម្ភ! ប្រទេសថៃបានដាក់កងកម្លាំងសន្តិសុខរបស់ខ្លួនឱ្យស្ថិតក្នុងការប្រុងប្រយ័ត្នខ្ពស់បំផុត ដោយព្រ.មានថាភាពតានតឹងតាមបណ្តោយព្រំដែនជាមួយកម្ពុជាអាចនឹងផ្ទុះឡើងម្តងទៀត បន្ទាប់ពីស្ថានការណ៍ថ្មីៗនេះបានបង្ហាញថា កម្ពុជាអាចនឹងធ្វើទំនើបកម្មសព្វាវុ.ធទំនើបៗជាងមុន និងភាពរីកចម្រើនដែលអាចកើតមាននៅក្នុងប្រព័ន្ធការពារដែនអាកាសនៅខាងកម្ពុជា។

យោងតាមសារព័ត៌មាន The Nation នៅថ្ងៃទី៩ ខែកុម្ភៈបានឲ្យដឹងថា មន្ត្រីយោធាជាន់ខ្ពស់ និងសន្តិសុខបានព្រ.មានថាភាពតានតឹងតាមបណ្តោយព្រំដែនថៃ-កម្ពុជាអាចកើនឡើងម្តងទៀត បន្ទាប់ពីមើលឃើញថាស្ថានភាពហាក់មិនសូវស្រួល ជាពិសេសអំពីការផ្លាស់ប្តូរថ្មីៗនៅក្នុងតុល្យភាពយោធារបស់កម្ពុជានៅក្នុងតំបន់។ ការណ៍នេះបង្កឱ្យមានការព្រួយបារម្ភថាជម្លោះព្រំដែនយូរអង្វែងអាចរីករាលដាលទៅជាការប្រឈមមុខដាក់គ្នាឡើងវិញ។

ទន្ទឹមនឹងនេះ ការដកចេញពីបញ្ជីខ្មៅរបស់សហរដ្ឋអាមេរិកទៅលើកម្ពុជាចំពោះការទិញសព្វាវុ.ធ បានបើកទ្វារឱ្យទីក្រុងភ្នំពេញអាចទិញអាវុធទំនើបៗដែលផលិតដោយអាមេរិក ដែលជាការវិវឌ្ឍធំមួយ ធ្វើឲ្យអ្នករៀបចំផែនការសន្តិសុខថៃកំពុងតាមដានយ៉ាងដិតដល់។

ប្រភពពីមន្ត្រីសន្តិសុខថៃបានគូសបញ្ជាក់ថា ការប្រឈមមុខដាក់គ្នាដែលអាចកើតមាននាពេលខាងមុខ នឹងមិនមែនជាការប្រើប្រាស់ត្រឹមតែប្រព័ន្ធរ៉ុក្កែត BM-21 ដូចកាលពីអតីតកាលនោះទេ។ អ្វីដែលជាក្តីបារម្ភចម្បងសម្រាប់កងកម្លាំងប្រដាប់អាវុធភូមិន្ទថៃ (RTARF) នៅពេលនេះ គឺវត្តមាននៃ ប្រព័ន្ធការពារដែនអាកាសកម្រិតខ្ពស់ ដែលកម្ពុជាទើបនឹងទទួលបាន។

អ្នកវិភាគយោធាជឿជាក់ថា ការបំពាក់គ្រឿងយុទ្ធោបករណ៍ថ្មីៗទាំងនេះ គឺជាយុទ្ធសាស្ត្រ “បន្សាបឧត្តមភាព” ដើម្បីទប់ទល់នឹងកម្លាំងទ័ពអាកាសរបស់ថៃ ដែលជានិច្ចកាលតែងតែមានប្រៀបជាងក្នុងការគ្រប់គ្រងស្ថានការណ៍ព្រំដែន តាមរយៈយន្តហោះចម្បាំង និងបច្ចេកវិទ្យាវាយប្រហារចំគោលដៅ។

តាមរយៈប្រព័ន្ធផ្សព្វផ្សាយ បច្ចុប្បន្នរដ្ឋាភិបាល និងកងកម្លាំងសន្តិសុខថៃបានបង្កើនប្រតិបត្តិការឃ្លាំមើលតាមព្រំដែនយ៉ាងតឹងរ៉ឹងបំផុត ដើម្បីតាមដានសញ្ញាណាមួយដែលនាំទៅរក “ជុំទីបី” នៃជម្លោះប្រដាប់អាវុធ។ តំបន់ព្រំដែនដែលធ្លាប់មានជម្លោះ ត្រូវបានកំណត់ជាផ្លូវការថាជា “តំបន់ងាយរងគ្រោះបំផុត” ក្នុងស្ថានភាពនយោបាយក្រោយការបោះឆ្នោតនេះ។ តែទោះជាយ៉ាងណា រហូតមកដល់ពេលនេះ មិនទាន់មានការឆ្លើយតបផ្លូវការណាមួយពីភាគីរដ្ឋាភិបាលកម្ពុជាជុំវិញការចោទប្រកាន់ និងរបាយការណ៍ស៊ើបការណ៍សម្ងាត់របស់ថៃនេះនៅឡើយទេ ៕