តារាចម្រៀងរ៉េបម្នាក់ចេញមកបដិសេធរឿង Justin Bieber និង Usher មានជម្លោះនឹងគ្នា

នៅក្នុងពិធីជប់លៀងបន្ទាប់ពីពានរង្វាន់អូស្ការដែលរៀបចំដោយ Jay-Z និង Beyoncéបានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងចំពោះរូបភាពមួយសន្លឹករវាង Usher និង Justin Bieber ដែលនាំឱ្យមានការសង្ស័យអំពីការប៉ះទង្គិចគ្នា។ របាយការណ៍ដំបូងៗពី TMZ បានអះអាងថា Usher ហាក់ដូចជាមិនសប្បាយចិត្ត ហើយបានស្វែងរក Justin Bieber យ៉ាងសកម្មនៅក្នុងពិធីជប់លៀង។ អ្នកខ្លះថែមទាំងបានស្មានថាការសន្ទនារវាងអ្នកទាំងពីរអាចបានក្លាយជាជម្លោះ។

នៅក្នុងកម្មវិធី The Rickey Smiley Show តារាចម្រៀងរ៉េប Da Brat ដែលជាមិត្តភក្តិយូរអង្វែងរបស់ Usher បានបដិសេធដោយផ្ទាល់ចំពោះពាក្យចចាមអារ៉ាមនេះ។ នាងបាននិយាយថា នាងបាននិយាយជាមួយ Usher ហើយបានទទួលការឆ្លើយតបថា មានរឿងជាច្រើនត្រូវបានគេយល់ច្រឡំ។ យោងតាមតារាចម្រៀងរ៉េបរូបនេះទំនាក់ទំនងរវាងសិល្បករទាំងពីរនៅតែល្អ ហើយពួកគេបានរក្សាការគោរព និងការគាំទ្រគ្នាទៅវិញទៅមកអស់រយៈពេលជាច្រើនឆ្នាំ។

តារាចម្រៀងរ៉េប Da Brat បាននិយាយថា «Justin Bieber កំពុងដើរលើផ្លូវផ្ទាល់ខ្លួនរបស់គាត់ ហើយកំពុងប្រឈមមុខនឹងជម្រើសផ្ទាល់ខ្លួនរបស់គាត់។ Usher តែងតែជូនពរគាត់ឱ្យជួបតែសំណាងល្អ។ មិនមានអរិភាពរវាងពួកគេទេ»។ តារាចម្រៀងរូបនេះក៏បានសង្កត់ធ្ងន់ផងដែរថា សាធារណជនអាចយល់ច្រឡំស្ថានភាពមួយចំនួន ហើយដោយអចេតនាអាចយករឿងនេះទៅឆ្ងាយជាងការពិត។

គួរឱ្យដឹងថា Usher និង Justin Bieber មានទំនាក់ទំនងជិតស្និទ្ធតាំងពីក្មេងមកម្ល៉េះ។ នៅពេលដែល Justin មានអាយុត្រឹមតែ ១៣ ឆ្នាំ Usher និងអ្នកគ្រប់គ្រងរបស់លោកScooter ដែលបានរកឃើញ និងចុះហត្ថលេខាជាមួយ Justin ដែលបានបើកផ្លូវឱ្យរូបគេក្លាយជាតារាល្បីលំដាប់ពិភពលោក។ ពេញមួយដំណើរនោះ Usher មិនត្រឹមតែណែនាំ Justin ប៉ុណ្ណោះទេ ថែមទាំងបានដើរតួជារៀមច្បងនៅក្នុងអាជីពរបស់ Justin Bieber ទៀតផង។

ក្នុងរយៈពេលប៉ុន្មានឆ្នាំចុងក្រោយនេះ Justin Bieber បានជ្រើសរើសផ្លូវផ្ទាល់ខ្លួនរបស់លោកបន្តិចម្តងៗ ដោយបង្ហាញខ្លួនតិចជាងមុននៅក្នុងគម្រោងសហការ។ ប្រភពមួយក្នុងឧស្សាហកម្មនេះធ្លាប់បានបង្ហាញថា Usher បានអញ្ជើញ Justin ឱ្យសម្តែងនៅ Super Bowl ប៉ុន្តែតារាចម្រៀងរូបនេះបានបដិសេធ។ ការសម្រេចចិត្តនេះត្រូវបានគេជឿថាជារឿងផ្ទាល់ខ្លួនទាំងស្រុង ហើយមិនមែនបណ្តាលមកពីជម្លោះណាមួយឡើយ។ ចំពោះ Justin Bieber តារាចម្រៀងរូបនេះបានចែករំលែកដោយបើកចំហអំពីសម្ពាធដែលលោកបានជួបប្រទះក្នុងវ័យកុមារភាពនៅក្នុងឧស្សាហកម្មកម្សាន្តដ៏លំបាក។

លោកបានទទួលស្គាល់ថាមានអារម្មណ៍ថាត្រូវបានគ្រប់គ្រង រូបភាពរបស់លោកត្រូវបានបង្កើតឡើង និងកំពុងរងទុក្ខវេទនាផ្លូវចិត្តយ៉ាងធ្ងន់ធ្ងរ។ ទោះជាយ៉ាងណាក៏ដោយ Justin បាននិយាយថាលោកកំពុងជាសះស្បើយបន្តិចម្តងៗ និងឆ្ពោះទៅរកជីវិតវិជ្ជមានជាងមុន លែងមានការអាក់អន់ចិត្តទៀតហើយ៕