ស្របពេលពិភពលោកកំពុងខ្វះខាតប្រេងឥន្ធនៈសម្រាប់ផលិតអគ្គិសនីដោយសារសង្គ្រា.មនៅមជ្ឈិមបូព៌ាអូសបន្លាយ ឥណ្ឌូណេស៊ី នៅខែមីនា ឆ្នាំ២០២៦ បានពន្លឿនការអនុវត្តគម្រោងបំលែងកាកសំណល់ទៅជាអគ្គិសនី (Waste-to-Energy: WTE) ដើម្បីកាត់បន្ថយការកប់កាកសំណល់ក្នុងដី, កាត់បន្ថយបរិមាណកាកសំណល់ និងជាការប្រើប្រាស់ប្រភពថាមពលថ្មីជំនួសថាមពលចាស់ដែលខ្វះខាត ។

ប្រធានាធិបតីឥណ្ឌូណេស៊ី លោក Prabowo Subianto បន្ទាប់ពីកិច្ចប្រជុំគណៈរដ្ឋមន្ត្រី បានបញ្ជាឱ្យពន្លឿនការផលិតអគ្គិសនីពីកាកសំណល់ ដោយផ្តោតលើការផ្លាស់ប្តូរកាកសំណល់នៅតាមទីក្រុងធំៗមុនគេ ដើម្បីដោះស្រាយបញ្ហាកាកសំណល់ដ៏ច្រើន ។ គណៈរដ្ឋមន្ត្រីឥណ្ឌូណេស៊ីបានប្រជុំពិភាក្សាជំរុញការអនុវត្តគម្រោងបំលែងកាកសំណល់ទៅជាអគ្គិសនី ចំនួន៣៤កន្លែង ជាពិសេស នៅទីប្រជុំជនមានមនុស្សរស់នៅច្រើន ។

តាមការចុះផ្សាយរបស់សារព័ត៌មានបរទេស គម្រោងផលិតអគ្គិសនីពីកាកសំណល់ (Waste-to-Energy: WTE) គឺជាផ្នែកមួយនៃយុទ្ធសាស្ត្រជាតិដើម្បីដោះស្រាយបញ្ហាបរិមាណសំរាមក្នុងទីក្រុងកើនឡើងជាបន្តបន្ទាប់ និងកាត់បន្ថយការកប់កាកសំណល់ក្នុងដី ។

សេចក្តីថ្លែងការណ៍របស់រដ្ឋាភិបាលឥណ្ឌូណេស៊ីផ្សព្វផ្សាយកាលពីថ្ងៃទី២៥ ខែមីនា ប្រធានាធិបតីឥណ្ឌូណេស៊ី លោក Subianto បានលើកឡើងពីភាពចាំបាច់ដែលរដ្ឋាភិបាលត្រូវចាត់វិធានការយ៉ាងឆាប់រហ័សក្នុងការគ្រប់គ្រងកាកសំណល់ជាច្រើនកន្លែង ព្រមទាំងពង្រីកការផលិតអគ្គិសនីក្នុងប្រទេស ។ ឥណ្ឌូណេស៊ីកំពុងអភិវឌ្ឍន៍គម្រោងបំលែងកាកសំណល់ជាអគ្គិសនីនៅតាមទីក្រុងធំៗដែលមានមនុស្សរស់នៅកកកុញ ដូចជា ៖ ទីក្រុងហ្សាកាតា បាឌុង និងសេម៉ារាំង ។

ទោះយ៉ាងណា ការអនុវត្តគម្រោងនេះប្រឈមនឹងបញ្ហាមួយចំនួន រួមមាន ៖ ការចំណាយថវិកាច្រើន, បញ្ហាបរិស្ថាន (ឧស្ម័នពុល ប្រសិនបើគ្រប់គ្រងមិនល្អ) និងតម្រូវឱ្យមានការបែងចែកកាកសំណល់តាមប្រភេទ ។

បច្ចុប្បន្ន បរិមាណកាកសំណល់នៅឥណ្ឌូណេស៊ី ស្មើប្រមាណ៣៥លានតោនក្នុង១ឆ្នាំ ហើយឥណ្ឌូណេស៊ីបានចាត់ការកាកសំណល់ត្រឹមតែ៦០% ប៉ុណ្ណោះ ប្រសិនបើគម្រោងទទួលបានជោគជ័យ នឹងជួយកាត់បន្ថយការប្រើប្រាស់ដីសម្រាប់កប់កាកសំណល់ រហូតដល់៩០%, កាត់បន្ថយការបំភាយឧស្ម័នផ្ទះកញ្ចក់ក្នុងប្រទេស ស្មើ៨០%, អាចផលិតអគ្គិសនីដល់១៥មេហ្គាវ៉ាត់សម្រាប់រោងចក្រនីមួយៗ និងកាត់បន្ថយការពឹងផ្អែកលើឧស្ម័ន LPG (ហ្គាស) ៕

លោក Anutin Charnvirakul ត្រូវបានព្រះរាជក្រឹត្យប្រកាសតែងតាំងឱ្យកាន់តំណែងជានាយករដ្ឋមន្ត្រីថៃអាណត្តិទី២ និងជារដ្ឋមន្ត្រីក្រសួងមហាផ្ទៃ នៅថ្ងៃទី៦ ខែមេសា ឆ្នាំ២០២៦ និងត្រៀមខ្លួនចូលរួមក្នុងពិធីស្បថមុនពេលឡើងកាន់តំណែង ។ ទន្ទឹមនឹងនេះ មានរដ្ឋមន្ត្រីចំនួន១៣រូបនៅតែរក្សាតំណែងចាស់ ព្រមទាំងមានរដ្ឋមន្ត្រីថ្មីចំនួន១៤រូប ។

នៅថ្ងៃទី៣១ ខែមីនា ឆ្នាំ២០២៦ ព្រះមហាក្សត្រថៃ Maha Vajiralongkorn បានចេញព្រះរាជក្រឹត្យតែងតាំងលោក Anutin ជានាយករដ្ឋមន្ត្រីថៃទី៣២ អាណត្តិទី២ ជាផ្លូវការ ដោយយោងតាមសេចក្តីប្រកាសចុះថ្ងៃទី១៩ ខែមីនា ។ គណៈរដ្ឋមន្ត្រីថៃបានជូនដំណឹងទៅលោក Anutin ឱ្យត្រៀមខ្លួនចូលគាល់ព្រះមហាក្សត្រដើម្បីស្បថមុនឡើងកាន់តំណែងនៅថ្ងៃទី៦ ខែមេសា ខាងមុខ ។

ចំណែករដ្ឋមន្ត្រីសំខាន់ៗក្នុងរដ្ឋាភិបាលថ្មីអាណត្តិថ្មី រួមមាន ៖

១-លោក ផិផាត់ រ៉ាឆាកិច្ចប្រាកាន ឧបនាយករដ្ឋមន្ត្រី និងរដ្ឋមន្ត្រីក្រសួងគមនាគមន៍
២-លោក ស៊ុងសាក់ ថងស៊ី ឧបនាយករដ្ឋមន្ត្រី
៣-លោក អេកនិទិ និទិថាន់ប្រាកាត ឧបនាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុ
៤-លោក ស៊ីហាសាក់ ពុងកេតកែវ ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេស
៥-អ្នកស្រី ស៊ុផាជី សុថាំផាន់ ឧបនាយករដ្ឋមន្ត្រី និងរដ្ឋមន្ត្រីក្រសួងពាណិជ្ជកម្ម

ទោះជារដ្ឋាភិបាលចម្រុះរបស់ថៃមានការចូលរួមពីគណបក្សចំនួន១៦ ស្មើនឹង២៩២សំឡេង ប៉ុន្តែមានគណបក្សធំៗតែ២ប៉ុណ្ណោះដឹកនាំរដ្ឋាភិបាល គឺគណបក្សភូមិចៃថៃ និងគណបក្សភឿថៃ ។ លោក Anutin បានឡើងកាន់តំណែងជានាយករដ្ឋមន្ត្រីរយៈពេល៦ខែក្នុងអាណត្តិដំបូង គិតចាប់ពីខែកញ្ញា ឆ្នាំ២០២៥ ដែលពេលនោះ រដ្ឋាភិបាលគណបក្សភូមិចៃរបស់លោកមានសំឡេងតិចត្រឹមតែ១៤៦សំឡេង បន្ទាប់មក គណបក្សភូមិចៃថៃ ក៏ទទួលជ័យជម្នះក្នុងការបោះឆ្នោតកាលពីថ្ងៃទី៨ ខែកុម្ភៈ ឆ្នាំ២០២៦ ដែលជាការឈ្នះលើកដំបូងតាំងពីថ្ងៃបង្កើតគណបក្ស ។

ក្រោយមានព្រះរាជក្រឹត្យតែងតាំងឱ្យឡើងកាន់តំណែង លោក Anutin និយាយថា នេះជាក្តីមេត្តារបស់ព្រះមហាក្សត្រ ពួកយើងគ្រប់គ្នានឹងប្រឹងប្រែងបំពេញការងារឱ្យអស់ពីសមត្ថភាពដើម្បីបម្រើពលរដ្ឋ ហើយបន្ទាប់ពីបញ្ចប់ពិធីស្បថឡើងកាន់តំណែង លោកនឹងកោះប្រជុំគណៈរដ្ឋមន្ត្រីជាបន្ទាន់ ។ រួចហើយ លោកនឹងថ្លែងគោលនយោបាយរដ្ឋាភិបាលទៅកាន់រដ្ឋសភា ដែលគោលនយោបាយនេះបានមកពីការប្រមូលមតិយោបល់ពីគ្រប់វិស័យ និងពិភាក្សាជាមួយគណបក្សរដ្ឋាភិបាលចម្រុះ ។

នេះជាការឆ្លុះបញ្ចាំងពីការផ្លាស់ប្តូរនយោបាយនៅប្រទេសថៃទាំងស្រុងទៅកាន់រដ្ឋាភិបាលដឹកនាំដោយគណបក្សភូមិចៃថៃ ដែលមានលោក Anutin កាន់តំណែងជានាយករដ្ឋមន្ត្រីផង និងជារដ្ឋមន្ត្រីក្រសួងមហាផ្ទៃផង ព្រមទាំងមានរដ្ឋមន្ត្រី១៣រូបនៅតែរក្សាតំណែងចាស់របស់ខ្លួន ជាពិសេស រដ្ឋមន្ត្រីមកពីគណបក្សភូមិចៃថៃកាន់តំណែងជារដ្ឋមន្ត្រីក្រសួងមហាផ្ទៃ និងក្រសួងគមនាគមន៍ ៕

ខណៈដែលប្រទេសជាច្រើនកំពុងតម្រង់ជួរចាំទិញប្រេងយ៉ាងអន្ទះសារ ប្រទេសរុស្ស៊ីដែលជាអ្នកលក់ដ៏សំខាន់បន្ទាប់ពីច្រកហ័រមូសត្រូវបានរាំងស្ទះ បែរជាប្រកាសបិទការនាំចេញរបស់ខ្លួនជាបណ្ដោះអាសន្នទៅវិញ ដោយមានគោលបំណងរក្សាស្ថិរភាពទីផ្សារប្រេងឥន្ធនៈក្នុងស្រុក ចំពេលមានការប្រែប្រួលថាមពលជាសកល។ នេះបើយោងតាមការចេញផ្សាយដោយសារព័ត៌មាន The MES Times។

យោងតាមសេចក្តីថ្លែងការណ៍របស់រដ្ឋាភិបាល ឧបនាយករដ្ឋមន្ត្រីរុស្ស៊ី លោក Alexander Novak បានណែនាំដល់ក្រសួងថាមពលរបស់ប្រទេសនេះ ឲ្យរៀបចំសេចក្តីសម្រេចមួយស្តីពីការផ្អាកការនាំចេញសាំងជាបណ្តោះអាសន្ន ដែលគ្រោងនឹងចូលជាធរមាននៅថ្ងៃទី 1 ខែមេសា ឆ្នាំ 2026 នេះតទៅ។

តាមរបាយការណ៍ពីទីភ្នាក់ងារសារព័ត៌មាន TASS ការរឹតបន្តឹងការនាំចេញប្រេងឥន្ធនៈរបស់រុស្ស៊ីនៅពេលនេះ ទំនងជានឹងបន្តមានរហូតដល់ថ្ងៃទី 31 ខែកក្កដា ឆ្នាំ 2026។ នេះមិនមែនជាលើកទីមួយទេដែលទីក្រុងមូស្គូបានប្រើប្រាស់ឧបករណ៍នេះដើម្បីទប់ស្កាត់ការកើនឡើងនៃតម្លៃប្រេងឥន្ធនៈក្នុងស្រុក និងដោះស្រាយបញ្ហាកង្វះខាតការផ្គត់ផ្គង់ក្នុងស្រុករបស់ខ្លួន។

គួរជម្រាបថា ប្រទេសរុស្ស៊ីបាននាំចេញប្រេងសាំងជិត 5 លានតោនកាលពីឆ្នាំមុន ដែលមានមធ្យមភាគប្រហែល 117,000 បារ៉ែលក្នុងមួយថ្ងៃ។ ការហាមឃាត់នេះមានគោលបំណងគ្រប់គ្រងការផ្គត់ផ្គង់ប្រេងឥន្ធនៈ ទប់ស្កាត់ការប្រែប្រួលតម្លៃ និងដោះស្រាយការខ្វះខាតនៅក្នុងតំបន់មួយចំនួន។ អាជ្ញាធរបានសង្កត់ធ្ងន់ថា ទីផ្សារក្នុងស្រុកនឹងនៅតែផ្គត់ផ្គង់ក្នុងអំឡុងពេលរឹតបន្តឹងការនាំចេញ។

កន្លងមក ប្រទេសរុស្ស៊ីធ្លាប់បានដាក់កម្រិតស្រដៀងគ្នាលើការនាំចេញប្រេងឥន្ធនៈ ដើម្បីគ្រប់គ្រងការកើនឡើងនៃតម្លៃ និងការពារការរំខានដល់ការផ្គត់ផ្គង់។ អ្នកវិភាគនិយាយថា ចលនាចុងក្រោយនេះឆ្លុះបញ្ចាំងពីការព្រួយបារម្ភជាបន្តបន្ទាប់អំពីសន្តិសុខថាមពល និងស្ថិរភាពទីផ្សារ ខណៈដែលភាពតានតឹងភូមិសាស្ត្រនយោបាយនៅតែបន្តប៉ះពាល់ដល់លំហូរប្រេងសកល៕

មេដឹកនាំកំពូលកូរ៉េខាងជើង លោក Kim Jong Un កាលពីថ្ងៃទី២៩ ខែមីនា ឆ្នាំ២០២៦ បានត្រួតពិនិត្យមើលការសាកល្បងកម្លាំងមីស៊ីលប្រភេទថ្មីមានសមត្ថភាពបា.ញ់ឆ្ងាយរហូតដល់ទឹកដីអាមេរិក ដែលនេះជាផែនការពង្រឹងយុទ្ធសាស្ត្ររយៈពេល៥ឆ្នាំរបស់ប្រទេសកូរ៉េខាងជើង និងត្រូវបានចាត់ទុកជាការធ្វើឱ្យប្រសើរឡើងនូវសមត្ថភាពការវាយប្រ.ហារ ។ ប៉ុន្តែគ្មានសេចក្តីរាយការណ៍ពីពេលវេលា និងទីតាំងច្បាស់លាស់នៃការសាកល្បងកម្លាំងមីស៊ីលថ្មីទេ ។

សារព័ត៌មានកណ្តាលកូរ៉េ (KCNA) រាយការណ៍ថា មេដឹកនាំកំពូលកូរ៉េខាងជើង លោក Kim Jong Un បានចុះពិនិត្យមើលការសាកល្បងកម្លាំងមីស៊ីលថ្មីមានកម្លាំងខ្លាំងបង្កើតឡើងដោយសម្ភារៈកាបូន ។ មីស៊ីលថ្មីនេះត្រូវបានផលិតឡើងសម្រាប់ប្រើប្រាស់ជាមួយការបាញ់មីស៊ីលឆ្លងទ្វីប (Hwasong-20) ដែលកូរ៉េខាងជើងកំពុងតែអភិវឌ្ឍន៍ ។

ជាមួយគ្នានេះ មេដឹកនាំកូរ៉េខាងជើង ក៏បានចុះពិនិត្យមើលការសាកល្បងប្រព័ន្ធការពាររថក្រោះផងដែរ ដែលអាចស្ទាក់ចាប់អាវុធបាញ់រថក្រោះពីទិសដៅផ្សេងគ្នា ហើយការសាកល្បងប្រព័ន្ធការពាររថក្រោះសម្រេចបានជោគជ័យ១០០% ។

ការសាកល្បងកម្លាំងមីស៊ីលថ្មី គឺជាផ្នែកមួយនៃផែនការអភិវឌ្ឍវិស័យការពារជាតិរយៈពេល៥ឆ្នាំ ក្នុងគោលបំណងពង្រឹងសមត្ថភាពជាបន្តបន្ទាប់នៃការវាយប្រហារជាយុទ្ធសាស្ត្រ ខណៈលោក Kim Jong Un ថា សមត្ថភាពកងទ័ពកូរ៉េខាងជើងពេលនេះ បានឈានដល់ការផ្លាស់ប្តូរដ៏សំខាន់មួយក្នុងការបង្កើតកម្លាំងយុទ្ធសាស្ត្រ ។ មីស៊ីលថ្មីអាចបង្កើតកម្លាំងរុញច្រានអតិបរមាបាន២,៥០០គីឡូញូតុន (Kilonewtons) និងជាការសាកល្បងលើកដំបូង បើគិតតាំងពីខែកញ្ញា ឆ្នាំ២០២៥ ដែលពេលនោះ សមត្ថភាពបាញ់ម៉ាស៊ីនមានចម្ងាយត្រឹមតែ១,៩៧១គីឡូញូតុន ។

ទោះយ៉ាងណា អ្នកជំនាញបរទេសថា កូរ៉េខាងខាងជើងនៅតែប្រឈមនឹងឧបសគ្គផ្នែកបច្ចេកវិទ្យាក្នុងការផលិតមីស៊ីលបាញ់ចម្ងាយឆ្ងាយពិតប្រាកដ ដូចជា ៖ ធ្វើឱ្យក្បាលមីស៊ីលធន់នឹងស្ថានភាពដ៏អាក្រក់ពេលស្ថិតនៅលើអាកាស ខណៈអ្នកជំនាញខ្លះជំទាស់នឹងការលើកឡើងនេះថា កូរ៉េខាងជើងបានអភិវឌ្ឍន៍កម្មវិធីនុយក្លេអ៊ែរ និងមីស៊ីលជាច្រើនឆ្នាំមកហើយ ។

គួរបញ្ជាក់ថា ការសាកល្បងកម្លាំងមីស៊ីលបានកើតឡើងមិនប៉ុន្មានថ្ងៃ បន្ទាប់ពីមេដឹកនាំកំពូលកូរ៉េខាងជើងថ្លែងសុន្ទរកថាទៅកាន់រដ្ឋសភា ដោយសន្យាធ្វើឱ្យកូរ៉េខាងជើងក្លាយជាប្រទេសមហាអំណាចនុយក្លេអ៊ែរលើពិភពលោក និងចោទប្រកាន់អាមេរិកកំពុងតែឈ្លានពានប្រទេសដទៃ (​ប្រទេសនៅមជ្ឈិមបូព៌ា) ៕