ខុសហើយចង់ឲ្យគេកាន់ជើងទៀត? នាយករដ្ឋមន្រ្តីថៃ អនុទីន ឆាន់វីរ៉ាគុល បានធ្វើការលើកឡើងដែលហាក់ចង់ចង្អុលទៅកាន់អង្គការ UNESCO ថា មានភាពលម្អៀងទៅខាងកម្ពុជាក្នុងដំណើរការចុះត្រួតពិនិត្យទីតាំងប្រាសាទដែលរងការខូចខាតបន្ទាប់ពីសង្រ្គាមជាមួយថៃ។ អនុទីន បានអះអាងថា ថៃក៏ចង់ឲ្យមានការចុះពិនិត្យនៅខាងទឹកដីថៃដែរ ដើម្បីបង្ហាញថាថៃក៏រងគ្រោះដែរនៅក្នុងជម្លោះនេះ។

ថ្លែងទៅកាន់ប្រធានាធិបតីបារាំង នៅថ្ងៃអង្គារ ទី២៦ ខែឧសភា ឆ្នាំ២០២៦នេះ នាយករដ្ឋមន្ត្រីថៃ អនុទីន ឆាន់វីរ៉ាគុល បានបង្ហាញជំហរអាក់អន់ស្រពន់ចិត្តជាសាធារណៈចំពោះចំណាត់ការរបស់អង្គការ UNESCO ព្រមទាំងបានព្យាយាមបំភ្លឺទៅកាន់ប្រធានាធិបតីបារាំង និងសហគមន៍អន្តរជាតិថា ប្រទេសថៃគ្រាន់តែធ្វើសកម្មភាពដើម្បីការពារខ្លួនតែប៉ុណ្ណោះ។

នាយករដ្ឋមន្ត្រីថៃ លោក អនុទីន បានទម្លាយឲ្យដឹងថា នៅក្នុងដំណើរទស្សនកិច្ចផ្លូវការទៅមកកាន់ប្រទេសបារាំងនេះលោកក៏បានឆ្លៀតឱកាសជួបពិភាក្សាជាមួយតំណាងអង្គការ UNESCO បន្ទាប់ពីទទួលបានព័ត៌មានថា ភាគីកម្ពុជាបានដាក់ពាក្យស្នើសុំជាផ្លូវការ ឲ្យអង្គការអន្តរជាតិមួយនេះ ចុះមកធ្វើការអង្កេត និងវាយតម្លៃលើការខូចខាតនៃប្រាសាទបុរាណដែលជាមរដកពិភពលោក ដែលរងផលប៉ះពាល់ពីការវាយប្រហារខាងយោធាកាលពីពេលកន្លងទៅ។

ប្រមុខរដ្ឋាភិបាលថៃរូបនេះ បានបង្ហាញនូវប្រតិកម្មហាក់មិនសូវពេញចិត្ត ចំពោះចំណាត់ការឯកតោភាគី ដោយបានសង្កត់ធ្ងន់ថា អង្គការសហប្រជាជាតិ មិនគួរលំអៀងទៅរកការរៀបរាប់របស់ភាគីណាមួយនោះឡើយ។ លោក អនុទីន បានថ្លែងថា៖ «ខ្ញុំបានប្រាប់ទៅ UNESCO វិញថា វាជារឿងល្អដែលគ្រប់ប្រទេសអាចដាក់សំណើផ្សេងៗទៅកាន់អង្គការអន្តរជាតិបាន ប៉ុន្តែប្រសិនបើ អង្គការយូណេស្កូ (UNESCO) ចុះទៅពិនិត្យមើលប្រាសាទព្រះវិហាររបស់កម្ពុជា ដែលខ្ទេចខ្ទីដោយសារយោធាថៃ បានបំផ្លិចបំផ្លាញក៏ចុះទៅមើលចុះ ប៉ុន្តែសូមមេត្តាចុះមកមើលព្រំដែនខាងថៃផង កុំចុះទៅមើលតែខាងកម្ពុជាតែម្ខាងពេក»។

ទន្ទឹមនឹងការសម្តែងការមិនពេញចិត្តចំពោះយន្តការរបស់ UNESCO លោក អានុទិន ក៏បានប្រើប្រាស់ជំនួបកម្រិតកំពូលជាមួយប្រធានាធិបតីបារាំង ដើម្បីធ្វើការដោះស្រាយរូបភាពការទូតរបស់ខ្លួននៅលើឆាកអន្តរជាតិ ដោយលោកបានអះអាងប្រាប់មេដឹកនាំបារាំង និងប្រាប់ពិភពលោកថា ថៃមិនមែនជាអ្នកបង្កសង្គ្រាម ឬជាអ្នកបើកការវាយប្រហារមុននោះឡើយ។ ផ្ទុយទៅវិញ យោធាថៃបាននិងកំពុងបំពេញតួនាទីក្នុងការ «ការពារអធិបតេយ្យភាព» និងការពារខ្លួនតែប៉ុណ្ណោះ។

អ្នកវិភាគការបរទេសយល់ឃើញថា ការអះអាងរបស់ អនុទីន ដូចខាងលើនេះ គឺជាការស្ទាក់ចាប់ការទូតរបស់កម្ពុជានៅ UNESCO ព្រោះ អនុទីន បានដឹងថា កម្ពុជាបានស្នើឱ្យអង្គការយូណេស្កូ ចុះមកពិនិត្យការខូចខាតប្រាសាទមរដកពិភពលោក (សំដៅលើប្រាសាទព្រះវិហារ) ដែលរងគ្រោះដោយសារការបាញ់បោះក្នុងជម្លោះយោធាកន្លងមក។ វោហាសាស្រ្តរបស់ អនុទីន ក៏ត្រូវបានគេមើលឃើញផងដែរថា គឺជាការប៉ុនប៉ងទប់ស្កាត់ឥទ្ធិពលការទូតរបស់កម្ពុជា ដែលកំពុងនាំយកបញ្ហាជម្លោះព្រំដែន និងការការពារសម្បត្តិវប្បធម៌ទៅជជែកនៅលើវេទិកាពហុភាគីធំៗ ដូចជាអង្គការសហប្រជាជាតិ (UN) និងអង្គការ UNESCO ជាដើម ខណៈដែលភាគីថៃតែងតែចង់ដោះស្រាយបញ្ហានេះជាលក្ខណៈទ្វេភាគីដាច់ដោយឡែក៕

រដ្ឋាភិបាលអនុទីនលេងមួយក្បាច់ទម្លាក់សេដ្ឋកិច្ចថៃឲ្យស្រុតចុះមួយទំហឹង! យោងតាមរបាយការណ៍ដែលចេញផ្សាយដោយសារព័ត៌មានក្នុងស្រុករបស់ថៃថ្មីៗនេះបានបង្ហាញថា ប្រទេសថៃកំពុងប្រឈមមុខនឹងស្ថានភាពសេដ្ឋកិច្ចដ៏ចម្លែកមួយ ពោលគឺអត្រាពលរដ្ឋក្នុងស្រុកអត់ការងារធ្វើមានការកើនឡើង ចំពេលដែលវិស័យឧស្សាហកម្មសំខាន់ៗជាច្រើនទៀត បែរជាជួបវិបត្តិខ្វះខាតកម្លាំងពលកម្មយ៉ាងធ្ងន់ធ្ងរទៅវិញ។

យោងតាមការចុះផ្សាយចុងក្រោយរបស់សារព័ត៌មានថៃ The Thaiger បានបង្ហាញថា អត្រាអ្នកអត់ការងារធ្វើនៅក្នុងប្រទេសថៃបានហក់ឡើងដល់ ០,៩១% នៅក្នុងត្រីមាសទីមួយនៃឆ្នាំ២០២៦ នេះ ដែលស្មើនឹងប្រជាជនជិត ៤០០,០០០ នាក់ គ្មានការងារធ្វើ។ កំណើននៃភាពគ្មានការងារធ្វើនេះ ត្រូវបានគេមើលឃើញថាបណ្តាលមកពីការរៀបចំរចនាសម្ព័ន្ធសេដ្ឋកិច្ចឡើងវិញ សម្ពាធថ្លៃដើម និងការជ្រៀតជ្រែកនៃបច្ចេកវិទ្យាទំនើប ដូចជាបញ្ញាសិប្បនិម្មិត (AI) និងការផ្លាស់ប្តូរទៅរកយានយន្តអគ្គិសនី (EV) ជាដើម ដែលធ្វើឱ្យកាត់បន្ថយតម្រូវការបុគ្គលិកក្នុងវិស័យផលិតកម្ម ភស្តុភារកម្ម និងការលក់រាយ។

របាយការណ៍ដដែលបានគូសបញ្ជាក់ថា និស្សិតដែលទើបបញ្ចប់ការសិក្សាថ្មីៗ និងអ្នកអត់ការងារធ្វើរយៈពេលវែង កំពុងជួបការលំបាកយ៉ាងខ្លាំងក្នុងការស្វែងរកការងារដែលស្របនឹងជំនាញរបស់ខ្លួន រហូតដល់ពលរដ្ឋខ្លះបង្ខំចិត្តដកខ្លួនទៅធ្វើការក្នុងវិស័យសេដ្ឋកិច្ចក្រៅប្រព័ន្ធ ដែលគ្មានសន្តិសុខហិរញ្ញវត្ថុ។

ទោះជាយ៉ាងណាក៏ដោយ អ្វីដែលជាភាពផ្ទុយគ្នានៃទីផ្សារពលកម្មថៃនោះគឺ ខណៈពេលដែលពលរដ្ឋថៃខ្លួនឯងអត់ការងារធ្វើ វិស័យស្នូលមួយចំនួនទៀតដូចជា វិស័យសំណង់ កសិកម្ម និងនេសាទ បែរជាកំពុងស្រែកឃ្លានកម្លាំងពលកម្មយ៉ាងខ្លាំង។ កង្វះខាតនេះ កើតឡើងបន្ទាប់ពីមានការធ្លាក់ចុះយ៉ាងគំហើញនៃពលករចំណាកស្រុក ពិសេសពលករកម្ពុជាស្របច្បាប់ ដែលបានដាំក្បាលចុះពីប្រមាណ ៥៥០,០០០ នាក់ មកសល់ត្រឹមតែ ១៩៤,០០០ នាក់ប៉ុណ្ណោះ ដោយសារតែរងផលប៉ះពាល់ពីជម្លោះការទូត និងបញ្ហាព្រំដែនកាលពីពេលកន្លងទៅ។

អ្នកវិភាគសេដ្ឋកិច្ចបានលើកឡើងថា ប្រទេសថៃកំពុងស្ថិតក្នុងស្ថានភាពគាបសង្កត់ពីរផ្លូវ ពោលគឺពលរដ្ឋក្នុងស្រុកដែលគ្មានការងារធ្វើ មិនអាច ឬមិនព្រមទៅបំពេញកន្លែងទំនេរក្នុងវិស័យពលកម្មធ្ងន់ៗទាំងនោះឡើយ ខណៈដែលវិស័យឧស្សាហកម្មបែបប្រពៃណីក៏មិនអាចដំណើរការទៅមុខរួច បើគ្មានពលករចំណាកស្រុក។ វិបត្តិនេះកំពុងជម្រុញឱ្យសមាគមធុរកិច្ចថៃ ដាក់សម្ពាធលើរដ្ឋាភិបាលឱ្យពន្លឿនការសម្រួលនីតិវិធីច្បាប់ ដើម្បីទាក់ទាញពលករពីប្រទេសជិតខាងឱ្យត្រឡប់ទៅធ្វើការវិញ ដើម្បីសង្គ្រោះសេដ្ឋកិច្ចជាតិ៕

សន្ដានមនុស្សភូតភរ ទៅទីណាក៏មិនចោលទម្លាប់និយាយយកល្អខ្លួនឯងលាបពណ៌អ្នកដទៃ។ លោក Anutin Charnvirakul នាយករដ្ឋមន្ត្រីថៃ បានបញ្ជាក់ប្រាប់ប្រធានាធិបតីបារាំងលោក Emmanuel Macron នៅប្រទេសបារាំងថា ប្រទេសថៃតែងឲ្យតម្លៃលើសន្តិភាពនិងគោរពច្បាប់អន្តរជាតិជានិច្ច ប៉ុន្តែប្រទេសថៃចាំបាច់ត្រូវ «វាយតម្លៃលើភាពស្មោះត្រង់របស់កម្ពុជា» ដើម្បីឈានដល់ការចរចាលើបញ្ហាផ្សេងៗ។
 
យោងតាមការចុះផ្សាយរបស់សារព័ត៌មានថៃ កាលពីថ្ងៃចន្ទ ទី២៥ ខែឧសភា ឆ្នាំ២០២៦ ប្រធានាធិបតីបារាំងលោក Emmanuel Macron បានរៀបចំពិធីលៀងសាយភោជន៍ផ្លូវការមួយដើម្បីទទួលស្វាគមន៍ នាយករដ្ឋមន្ត្រីថៃលោក Anutin Charnvirakul នៅឯវិមានលីហ្សេ (Palais de l’Élysée) ក្នុងទីក្រុងប៉ារីស ដោយមេដឹកនាំទាំងពីរបានជជែកពិភាក្សាយ៉ាងស៊ីជម្រៅអំពីកិច្ចព្រមព្រៀងផ្នែកពាណិជ្ជកម្ម កិច្ចសហប្រតិបត្តិការសន្តិសុខ ស្ថានការណ៍ក្នុងតំបន់អាស៊ាន និងបញ្ហាព្រំដែនរបស់ប្រទេស​ថៃជាមួយប្រទេសជិតខាងរួមទាំងកម្ពុជា។
 
នៅក្នុងឱកាសនោះ លោក អានុទីណ បានបញ្ជាក់ប្រាប់ប្រធានាធិបតីបារាំងយ៉ាងដូច្នេះថា៖ «ពាក់ព័ន្ធនឹងជម្លោះព្រំដែនកម្ពុជា-ថៃ ប្រទេសថៃ​មានការឱ្យតម្លៃយ៉ាងខ្ពស់លើសន្តិភាព និងគោរពច្បាប់អន្តរជាតិ។ ស្របពេលជាមួយគ្នានោះ ចំពោះការសម្រេចចិត្តលុបចោល (MoU) ឆ្នាំ២០០១ ជាឯកតោភាគី នាយករដ្ឋមន្រ្តីថៃរូបនេះបានពន្យល់ទៅកាន់លោក Macron ថាគឺដោយសារតែវាពុំបានផ្តល់នូវវឌ្ឍនភាពណាមួយដល់ប្រទេសថៃទាល់តែសោះ ក្នុងរយៈពេលជិត ២៥ឆ្នាំកន្លងមកនេះ។
 
លោកបន្ថែមទៀតថា៖ «ដូច្នេះ ប្រទេសថៃនឹងជ្រើសរើសការប្រើប្រាស់យន្តការច្បាប់សមុទ្រអន្តរជាតិ (UNCLOS) ដើម្បីដោះស្រាយបញ្ហាព្រំដែនសមុទ្ររួមគ្នាជាមួយនឹងកម្ពុជានៅលើវេទិកាអន្តរជាតិ»។ ដោយឡែកពាក់ព័ន្ធនឹងបញ្ហាព្រំដែនគោកវិញ លោក អានុទីន បានសង្កត់ធ្ងន់ថា «ប្រទេសថៃនឹងប្រកាន់ខ្ជាប់ ក៏ដូចជាអនុវត្តតាមសេចក្តីថ្លែងការណ៍រួម ដែលបានចុះហត្ថលេខារួមគ្នា កាលពីចុងឆ្នាំ២០២៥ ក៏ប៉ុន្តែក្នុងពេលជាមួយគ្នានេះ ភាគីកម្ពុជាក៏ត្រូវតែបង្ហាញភាពស្មោះត្រង់របស់ខ្លួនវិញផងដែរ»។
 
តាមការកត់សម្គាល់ ការលើកឡើងរបស់នាយករដ្ឋមន្ត្រីថៃអំពីការរង់ចាំ «វាយតម្លៃលើភាពស្មោះត្រង់របស់កម្ពុជា» នៅចំពោះមុខប្រធានាធិបតីបារាំងដូចខាងលើនេះ មិនមែនជាការនិយាយដោយចៃដន្យនោះទេ ប៉ុន្តែវាគឺជាយុទ្ធសាស្ត្រ​នយោបាយ និងជាល្បែងការទូតដ៏ឆ្លាតវៃ ប៉ុន្តែបង្កប់ដោយភាពអាត្មានិយមរបស់ថៃ ដែលព្យាយាម «ដើរតួជាជនរងគ្រោះ និងជាអ្នកត្រឹមត្រូវ» នៅចំពោះមុខមហាអំណាចលោកខាងលិច ដើម្បីទាញយកប្រៀបលើកម្ពុជាទាំងផ្នែកនយោបាយ និងយុទ្ធសាស្ត្រព្រំដែន។
​
ទោះជាយ៉ាងណាក៏ដោយ អ្នកវិភាគនយោបាយតំបន់បានកត់សម្គាល់ថា ការដែលថៃប្រកាសចង់វាយតម្លៃលើ «ភាពស្មោះត្រង់» របស់កម្ពុជា ស្របពេលដែលខ្លួនឯងជាអ្នកលុបចោលកិច្ចព្រមព្រៀងចាស់ MOU 44 គឺជាការបង្ហាញនូវអត្តចរិតការទូតបែបដាក់សម្ពាធ និងចង់ទាញយកចំណេញខាងនយោបាយតែម្នាក់ឯង។ ដូចគ្នានេះដែរ ការយកបញ្ហាព្រំដែនកម្ពុជា-ថៃ ទៅជជែកវែកញែកនៅលើទឹកដីបារាំងនៅពេលនេះ ត្រូវបានគេមើលឃើញថាជាយុទ្ធសាស្ត្រការទូតមួយ បន្ទាប់ពីមេដឹកនាំបក្សប្រឆាំងថៃ លោក Natthaphong Ruengpanyawut បានដាស់តឿនឱ្យរដ្ឋាភិបាលថៃ ប្រើប្រាស់ឥទ្ធិពលរបស់លោក Emmanuel Macron ឱ្យជួយអន្តរាគមន៍លើរឿង​នេះផងដែរ៕

គួរឲ្យកោតសរសើរ! ប្រទេសជប៉ុនបានប្រកាសពីការបញ្ចេញកញ្ចប់ថវិកាជាតិជាង ៣ ពាន់ពាន់លានយ៉េន (ប្រហែល ១៩ ពាន់លានដុល្លារអាមេរិក) ដើម្បីបើកយុទ្ធនាការកាត់បន្ថយសម្ពាធថ្លៃជីវភាពពលរដ្ឋភ្លាមៗ។ វិធានការដកប្រាក់រដ្ឋរាប់ពាន់លាននេះ ធ្វើឡើងក្នុងគោលបំណងពង្រឹងស្ថិរភាពសង្គមជាបន្ទាន់ និងធានាដាច់ខាតថាមិន​មានឧបសគ្គណាមួយមករំខានដល់ចរន្តសេដ្ឋកិច្ច ឬខ្សែចង្វាក់ជីវិតរស់នៅរបស់ប្រជាពលរដ្ឋឡើយ ចំពេលដែលតម្លៃថាមពលសកលកំពុងឡើងថ្លៃ។
 
ថ្លែងនៅក្នុងសេចក្តីថ្លែងការណ៍បកស្រាយពីយុទ្ធសាស្ត្រនេះ លោកស្រី Sanae Takaichi នាយករដ្ឋមន្ត្រីបានសង្កត់ធ្ងន់ថា ភាពតានតឹងភូមិសាស្ត្រនយោបាយនៅមជ្ឈិមបូព៌ា បានរុញច្រានឱ្យតម្លៃប្រេងឆៅ និងហ្គាសធម្មជាតិហក់ឡើងខ្ពស់ ដែលវាបានជះឥទ្ធិពលអាក្រក់ដោយផ្ទាល់ដល់ថ្លៃដើមនាំចូលរបស់ជប៉ុន។ ក្នុងស្ថានភាពដ៍មុតស្រួចនេះ ភារកិច្ចចម្បង និងបន្ទាន់បំផុតរបស់រដ្ឋាភិបាល គឺត្រូវធ្វើយ៉ាងណាកាត់បន្ថយហានិភ័យសេដ្ឋកិច្ចឱ្យនៅកម្រិតទាបបំផុត ដើម្បីការពារប្រជាពលរដ្ឋពីការរ៉ាប់រងបន្ទុកចំណាយដ៏ធ្ងន់ធ្ងរនេះតែម្នាក់ឯង។
 
ផ្អែកតាមផែនការជាក់ស្តែង រដ្ឋាភិបាលនឹងដកប្រាក់ចំនួន ៥០០ ពាន់លានយ៉េនចេញពីមូលនិធិបម្រុងភ្លាមៗ ដើម្បីយកទៅជួយចេញថ្លៃទឹក ភ្លើង និងហ្គាស ជូនដល់គ្រប់គ្រួសារជប៉ុនទាំងអស់។ ការឧបត្ថម្ភធននេះនឹងផ្តោតលើរយៈពេល ៣ ខែ គឺចាប់ពីខែកក្កដា ដល់ខែកញ្ញា ដែលជាអំឡុងពេលរដូវក្ដៅខ្លាំង ហើយប្រជាជនមានតម្រូវការប្រើប្រាស់ម៉ាស៊ីនត្រជាក់ខ្ពស់ ដោយរំពឹងថានឹងជួយឱ្យគ្រប់ក្រុមគ្រួសារសន្សំសំចៃថវិកាបានជាមធ្យម ៥,០០០ យ៉េន ក្នុងមួយខែ។
 
ដើម្បីធានាដល់ប្រភពទុនដ៏មហិមានេះ រដ្ឋាភិបាលគ្រោងនឹងបោះផ្សាយសញ្ញាប័ណ្ណទូទាត់ឱនភាពរដ្ឋ  ប៉ុន្តែលោកស្រី Sanae Takaichi បានធានាចំពោះមុខទីផ្សារហិរញ្ញវត្ថុថា វានឹងមិនប៉ះពាល់ដល់ស្ថិរភាពសេដ្ឋកិច្ចរយៈពេលវែងនោះទេ ដោយសាររដ្ឋភិបាលទទួលបានចំណូលពន្ធបន្ថែមខ្ពស់មកប៉ះប៉ូវឡើងវិញ។ សេចក្តីព្រាងច្បាប់នៃកញ្ចប់ថវិកាសង្គ្រោះបន្ទាន់នេះ នឹងត្រូវដាក់ជូនសភាជាតិជប៉ុនអនុម័តជាផ្លូវការនៅក្នុងសប្តាហ៍ខាងមុខ ដើម្បីឱ្យទាន់ពេលវេលាមុនពេលរដូវក្ដៅឈានចូលមកដល់។

បាងកក៖ គណៈកម្មការរួមនៃស្ថាប័នឯកជនថៃ បានដាក់លិខិតផ្លូវការមួយទៅកាន់ក្រសួងការងារ កាលពីថ្ងៃទី២៥ ខែឧសភា ឆ្នាំ២០២៦ ដើម្បីស្នើឱ្យពន្លឿនការបន្តសុពលភាពប័ណ្ណការងារដល់ពលករមកពីប្រទេសកម្ពុជា ឡាវ មីយ៉ាន់ម៉ា និងវៀតណាម ជាបន្ទាន់។ ការសុំអន្តរាគមន៍នេះ ធ្វើឡើងបន្ទាប់ពីវិស័យឯកជនរកឃើញថា ប្រទេសថៃកំពុងខ្វះខាតកម្លាំងពលកម្មរហូតដល់ ៥សែននាក់ ដែលកំពុងជះឥទ្ធិពលអាក្រក់យ៉ាងធ្ងន់ធ្ងរដល់វិស័យផលិតកម្ម កសិកម្ម និងការនាំចេញ ។

លោក Poj Aramwattananon ប្រធានសភាពាណិជ្ជកម្មថៃ បានដឹកនាំគណៈប្រតិភូស្ថាប័នឯកជន ចូលជួបប្រគល់លិខិតផ្ទាល់ជូនលោក Julapun Amornvivat រដ្ឋមន្ត្រីក្រសួងការងារ។ លោក Poj បានគូសបញ្ជាក់ថា វិស័យកសិកម្ម ឧស្សាហកម្ម និងសេវាកម្ម កំពុងខ្វះខាតពលករកម្ពុជាយ៉ាងខ្លាំង ដោយសារស្ថានការណ៍តានតឹងនៅតាមព្រំដែន រួមផ្សំនឹងការធ្លាក់ចុះនៃចំនួនពលករមីយ៉ាន់ម៉ា និងការថយចុះនៃកម្លាំងពលកម្មវ័យក្មេងរបស់ថៃផ្ទាល់។ ដើម្បីទប់ស្កាត់វិបត្តិសេដ្ឋកិច្ច លោកបានស្នើឱ្យក្រសួងប្រញាប់បន្តប័ណ្ណការងារដល់ពលករនៃប្រទេសទាំង៤ ព្រមទាំងពិចារណានាំចូលពលករបន្ថែមពីប្រទេសស្រីលង្កា បង់ក្លាដែស ហ្វីលីពីន និងឥណ្ឌូណេស៊ី ផងដែរ ។

ជាការឆ្លើយតប លោក Julapun Amornvivat រដ្ឋមន្ត្រីក្រសួងការងារ បានសន្យាថានឹងពិនិត្យ និងពន្លឿននីតិវិធីបន្តប័ណ្ណការងារនេះ ដើម្បីធានាថាខ្សែសង្វាក់ផលិតកម្ម និងការនាំចេញមិនត្រូវរាំងស្ទះ។ លោកទទួលស្គាល់ថា ថៃពិតជាកំពុងប្រឈមនឹងឱនភាពពលករចំនួន ៥សែននាក់ពិតមែន ហើយក្រសួងនឹងប្រញាប់បញ្ជូនសំណើនេះទៅកាន់កិច្ចប្រជុំគណៈរដ្ឋមន្ត្រីដើម្បីពិនិត្យ និងសម្រេច។ ទោះជាយ៉ាងណា ចំពោះការនាំចូលពលករថ្មីបន្ថែមទៀត គឺត្រូវអាស្រ័យលើគោលនយោបាយរួមរបស់រដ្ឋាភិបាល។
ទោះបីជាមានការទទូចពីវិស័យឯកជនយ៉ាងណាក៏ដោយ ក្រសួងការងារថៃនៅតែប្រកាន់ជំហររឹងមាំ ដោយសម្រេចពិចារណាបន្តសុពលភាពជូនតែពលករដែលមានស្រាប់នៅក្នុងប្រទេសប៉ុណ្ណោះ។ គិតមកទល់ពេលនេះ ថៃមិនទាន់មានគោលនយោបាយបើកផ្លូវទទួលយកពលករកម្ពុជា ឬពលករបរទេសថ្មីៗបន្ថែមទៀតឡើយ ដោយសារហេតុផលសន្តិសុខជាតិ ។

គួររំឭកថា បច្ចុប្បន្ន ប្រទេសថៃកំពុងខ្វះខាតពលករបរទេសយ៉ាងខ្លាំងក្នុងផ្នែកសំណង់ និងកសិកម្ម ដែលជាប្រភេទការងារធ្ងន់ៗ និងប្រើប្រាស់កម្លាំងបាយ ខណៈពលរដ្ឋថៃមិនសូវនិយមធ្វើ ឬទាមទារប្រាក់ឈ្នួលខ្ពស់ពេក ដែលធ្វើឱ្យម្ចាស់អាជីវកម្មរំពឹងលើពលករបរទេសច្រើនជាង។ កង្វះខាតកម្លាំងពលកម្មនេះ បានបង្កជាផលប៉ះពាល់ជាខ្សែសង្វាក់ដល់សេដ្ឋកិច្ចថៃ រួមមាន ការយឺតយ៉ាវក្នុងការនាំចេញអាហារដោយសារផលិតមិនទាន់, ផលដំណាំត្រូវខូចខាតបាត់បង់គុណភាពព្រោះប្រមូលផលមិនទាន់ពេល និងគម្រោងសំណង់ជាច្រើនត្រូវជាប់គាំង ដែលបណ្តាលឱ្យខាតបង់ថវិកាយ៉ាងសន្ធឹកសន្ធាប់ ៕