លោក Elon Musk នាយកប្រតិបត្តិក្រុមហ៊ុន SpaceX មានក្តីសុបិនចង់នាំមនុស្សទៅរស់នៅលើឋានព្រះច័ន្ទនាថ្ងៃអនាគត ដោយចាប់ផ្តើមសាងសង់ទីក្រុងលើឋានព្រះច័ន្ទក្នុងរយៈពេល១០ឆ្នាំខាងមុខ តាមរយៈការបញ្ជូនរ៉ុក្កែត Starship សម្រាប់សាងសង់ទីក្រុង ។ តើក្តីសុបិនដ៏ធំធេងនេះនឹងសម្រេចគោលដៅដែរឬទេ តើលោកអ្នកចាប់អារម្មណ៍ទៅរស់នៅទីនោះឬអត់?

ក្រុមហ៊ុន SpaceX របស់លោក Elon Musk បានផ្លាស់ប្តូរផែនការពីការសាងសង់ទីក្រុងលើភពអង្គារ ទៅសាងសង់ទីក្រុងលើឋានព្រះច័ន្ទក្នុងរយៈពេល១០ឆ្នាំខាងមុខ បច្ចុប្បន្ន ក្រុមហ៊ុនកំពុងអភិវឌ្ឍន៍រ៉ុក្កែត Starship សម្រាប់សាងសង់ទីក្រុង ។ ការផ្លាស់ប្តូរផែនការរទៅសាងសង់ទីក្រុងលើឋានព្រះច័ន្ទជំនួសភពអង្គារ ដោយសារការអភិវឌ្ឍរ៉ុក្កែត Starship យឺតយ៉ាវ និងអង្គការ NASA ត្រូវប្រើប្រាស់រ៉ុក្កែតនេះសាកល្បងនៅឋានព្រះច័ន្ទក្នុងភារកិច្ច Artemis III ។

ការសម្រេចចិត្តរបស់ក្រុមហ៊ុន SpaceX ផ្តោតលើផែនការសាងសង់ទីក្រុងលើឋានព្រះច័ន្ទមុនសាងសង់លើភពអង្គារ ត្រូវបានចាត់ទុកជាការផ្លាស់ប្តូរដ៏សំខាន់ក្នុងផែនការរុករកអវកាសរបស់លោក Elon Musk ។

កាលពីថ្ងៃទី៨ ខែកុម្ភៈ ឆ្នាំ២០២៦ លោក Elon Musk ស្ថាបនិក និងនាយកប្រតិបត្តិក្រុមហ៊ុន SpaceX និយាយថា ក្រុមហ៊ុនបច្ចេកវិទ្យាអវកាសរបស់ខ្លួនកំពុងផ្តោតលើការសាងសង់ទីក្រុងលើឋានព្រះច័ន្ទ ខណៈកន្លងមក លោកប្រកាសថា នឹងនាំមនុស្សទៅតាំងលំនៅលើភពអង្គារ ដោយប្រើប្រាស់រ៉ុក្កែត Starship ដ៏ធំក្នុងការសាងសង់ទីក្រុង ។

តាមការបង្ហោះសារក្នុងបណ្តាញសង្គម X របស់ស្ថាបនិករូបនេះ ទីក្រុងលើឋានព្រះច័ន្ទនឹងត្រូវសាងសង់ឡើងក្នុងរយៈពេល១០ឆ្នាំទៀត ប៉ុន្តែភារកិច្ចរបស់ក្រុមហ៊ុន SpaceX នៅដដែល គឺធ្វើឱ្យមនុស្សស្គាល់ពីផ្កាយ ។

នេះមិនមែនជាលើកដំបូងទេដែលលោក Elon Musk ផ្លាស់ប្តូរផែនការរបស់ខ្លួន កន្លងមក លោកបានផ្លាស់ប្តូរការកំណត់ពេលវេលាបំពេញបេសកកម្មធ្វើទៅភពអង្គារ គឺពីដំបូង មានគម្រោងទៅភពអង្គារនៅឆ្នាំ២០១៨ បានផ្លាស់ប្តូរមកឆ្នាំ២០២២ វិញ ។ បន្ទាប់មក លោកក៏ផ្លាស់ប្តូរផែនការបញ្ជូនរ៉ុក្កែត Starship គ្មានមនុស្សបើក ចំនួន៥គ្រឿង សម្រាប់ដឹកមនុស្សយន្តផលិតដោយក្រុមហ៊ុនរថយន្ត Tesla ទៅកាន់ភពអង្គារម កឆ្នាំ២០២៦ ។

ប៉ុន្តែការអភិវឌ្ឍរ៉ុក្កែត Starship បែរជាពិបាកជាងការរំពឹងទុករបស់លោក និងបរាជ័យពេលសាងល្បងបង្ហោះជាច្រើនលើកក្នុងរយៈពេលប៉ុន្មានឆ្នាំចុងក្រោយ ។ ក្រៅពីនេះ ក្រុមហ៊ុន SpaceX ត្រូវទទួលខុសត្រូវការចុះចតរបស់រ៉ុក្កែត Starship លើឋានព្រះច័ន្ទ ដែលសំខាន់សម្រាប់ភារកិច្ច Artemis III របស់អង្គការ NASA ក្នុងគោលដៅនាំមនុស្សទៅជាន់លើឋានព្រះច័ន្ទម្តងទៀត បន្ទាប់ពីមនុស្សជាន់ឋានព្រះច័ន្ទលើកដំបូងកាលពីឆ្នាំ១៩៧២ ។

ហេតុនេះ បញ្ហាកើតឡើងជាបន្តបន្ទាប់របស់រ៉ុក្កែត Starship នាពេលបច្ចុប្បន្ន គឺធ្វើឱ្យការបំពេញភារកិច្ច Artemis III ត្រូវពន្យារពេល ខណៈអង្គការ NASA ទើបតែប្រកាសថា នឹងពន្យារពេលភារកិច្ច Artemis III ទៅឆ្នាំ២០២៨ ៕

អាយុគ្រាន់តែជាតួលេខ! ទីភ្នាក់ងារស៊ើបការណ៍សម្ងាត់ជាតិកូរ៉េខាងត្បូង (NIS) បានបង្ហើបពីរបាយការណ៍មួយនៅថ្ងៃទី 12 ខែកុម្ភៈថា យុវតី គីម ជូអេ ដែលជាកូនស្រីរបស់មេដឹកនាំកូរ៉េខាងជើង គីម ជុងអ៊ុន ឥឡូវនេះបានចូលដល់ដំណាក់កាលនៃការក្លាយជា “អ្នកស្នងតំណែងដែលត្រូវបានតែងតាំង” ហើយ ក្រោយទទួលបានការបណ្តុះបណ្តាលយ៉ាងម៉ត់ចត់។ នេះបើតាមការចេញផ្សាយរបស់ BBC។

តាមប្រភពខាងលើ គីម ជូអេ ដែលក្មេងស្រីជំទង់មានវ័យទើបតែ 13 ឆ្នាំ នៅក្នុងរយៈពេលប៉ុន្មានខែថ្មីៗនេះ ត្រូវបានគេកត់សម្គាល់ឃើញថានៅក្បែរឪពុករបស់នាងជាប់ជានិច្ចនៅក្នុងព្រឹត្តិការណ៍សំខាន់ៗដូចជាទស្សនាវិមានព្រះអាទិត្យ Kumsusan, ចូលរួមក្នុងការពិភាក្សាគោលនយោបាយធំៗ និងការធ្វើដំណើរទស្សនកិច្ចទៅកាន់ទីក្រុងប៉េកាំងជាលើកដំបូងជាមួយឪពុកទៅកាលខែកញ្ញា ដែលធ្វើឲ្យទីភ្នាក់ងារ NIS ជឿជាក់ថា នាងកំពុងត្រៀមខ្លួនដើម្បីស្នងតំណែងរបស់ឪពុកនាងជាផ្លូវការ។

ក្រុមសមាជិកសភាកូរ៉េខាងត្បូងដែលទទួលបានការសង្ខេបព័ត៌មានចារកម្មនាថ្ងៃព្រហស្បតិ៍ទី 12 ខែកុម្ភៈ ឆ្នាំ2026 បានបង្ហើបថា យុវតីរូបនេះត្រូវបានគេចាត់ទុកថាជាមេដឹកនាំលំដាប់ទី២ជាក់ស្តែងនៅក្នុងប្រទេស ហើយថែមទាំងបានចាប់ផ្តើមផ្តល់យោបល់លើបញ្ហានយោបាយជាតិទៀតផង។ ឥឡូវនេះ ពិភពលោកកំពុងតាមដានយ៉ាងយកចិត្តទុកដាក់ចំពោះមហាសន្និបាតលើកទី៩ នៃគណបក្សពលករដែលនឹងប្រព្រឹត្តទៅនៅចុងខែកុម្ភៈ ដើម្បីមើលថាតើនាងនឹងត្រូវផ្តល់គោរម្យងារផ្លូវការណាមួយ ដែលនឹងបញ្ជាក់ពីស្ថានភាពរបស់នាងជាមេដឹកនាំជំនាន់ទី៤ នៃត្រកូលគីមដែរឬទេ។

គួរជម្រាបថា គីម ជូអេ គឺជាកូនស្រីតែមួយគត់ដែលគេស្គាល់របស់ Kim Jong Un និង ភរិយារបស់លោក គឺលោកស្រី Ri Sol Ju។ បើទោះជាមានរបាយការណ៍តិចតួចបំផុតអំពីជីវិតឯកជនរបស់គ្រួសារ គីម តែ NIS ជឿថា លោក Kim Jong Un នៅមានកូនប្រុសច្បងម្នាក់ទៀត ប៉ុន្តែកូនប្រុសនេះមិនដែលត្រូវបានទទួលស្គាល់ ឬបង្ហាញនៅលើប្រព័ន្ធផ្សព្វផ្សាយកូរ៉េខាងជើងឡើយ។

យ៉ាងណាមិញ បើទោះជាគេមិនទាន់ដឹងថាក្មេងជំទង់រូបនេះមានផែនការអ្វីសម្រាប់ដឹកនាំប្រទេសរបស់នាងក៏ដោយ ប៉ុន្តែនាងទំនងជាមានអំណាចខ្លាំងក្លាក្នុងការបង្កើតប្រព័ន្ធដឹកនាំថ្មីតាមរបៀបណាដែលនាងចូលចិត្ត។ ជាមួយគ្នានេះដែរ គេមិនច្បាស់ទេថាការស្នងតំណែងពីឪពុករបស់ គីម ជូអេ នឹងអាចនាំមកនូវការផ្លាស់ប្តូរអ្វីខ្លះដល់កូរ៉េខាងជើង៕

ជាច្រើនឆ្នាំនេះ ក្រុមហ៊ុននានាបានបញ្ឈប់បុគ្គលិកពីការងារដើម្បីប្រើប្រាស់បច្ចេកវិទ្យា AI ជំនួសវិញ ពីព្រោះមើលឃើញ AI អាចធ្វើការងារទាំងអស់ជំនួសមនុស្ស ថែមទាំងឆាប់រហ័ស និងមានប្រសិទ្ធភាព ។ ប៉ុន្តែ Gartner ជាក្រុមហ៊ុនស្រាវជ្រាវលំដាប់ពិភពលោក ថា AI មិនអាចធ្វើការទាំងអស់ជំនួសមនុស្សទេ ហើយក្រុមហ៊ុនដែលបញ្ឈប់បុគ្គលិកដោយសារ AI នឹងត្រូវហៅបុគ្គលិកចូលធ្វើការវិញនៅឆ្នាំ២០២៧ ពីព្រោះ AI ធ្វើការលឿនពេកក្នុងផ្នែកសេវាកម្មធ្វើឱ្យអតិថិជនមិនពេញចិត្ត ។

Gartner, Inc. គឺជាក្រុមហ៊ុនស្រាវជ្រាវ និងផ្តល់ការប្រឹក្សាលំដាប់ពិភពលោក បានដាស់តឿនទៅកាន់ក្រុមហ៊ុននានាដែលប្រញាប់បញ្ឈប់បុគ្គលិកពីការងារដើម្បីងាកទៅប្រើប្រាស់បច្ចេកវិទ្យា AI ថា នៅឆ្នាំ២០២៧ ក្រុមហ៊ុនរហូតដល់៥០% ដែលបញ្ឈប់បុគ្គលិករបស់ខ្លួនដោយសារ AI នឹងត្រូវហៅបុគ្គលិកចូលធ្វើការវិញដើម្បីបំពេញតួនាទីដូចមុន ពីព្រោះ AI មិនអាចធ្វើការងារទាំងអស់ជំនួសមនុស្សបានទេ ។

ក្រុមហ៊ុននេះបញ្ជាក់ថា ក្រុមហ៊ុនដែលធ្វើការផ្នែកសេវាកម្មបម្រើអតិថិជន គួរតែផ្តល់ភាពសំខាន់លើការរីកចម្រើនរបស់ក្រុមហ៊ុនរយៈពេលយូរអង្វែង ប្រសើរជាងក្រុមហ៊ុនផ្តោតតែលើការកាត់បន្ថយដើមទុនរយៈពេលខ្លី ពីព្រោះ AI មិនល្អឥតខ្ចោះ ឬអាចធ្វើការងារទាំងអស់ជំនួសមនុស្សទេ ។

អ្នកស្រី Kathy Ross នាយកជាន់ខ្ពស់ផ្នែកវិភាគការងារសេវាកម្មបម្រើអតិថិជនរបស់ក្រុមហ៊ុន Gartner ថា ក្រុមហ៊ុនដែលបញ្ឈប់បុគ្គលិកពីការងារដោយសារ AI កន្លងមក អាចបណ្តាលមកពីការខ្វះខាតថវិកា ប៉ុន្តែពេលនេះ ការប្រើប្រាស់ AI មានដែនកំណត់ ហើយក្រុមហ៊ុនទាំងនេះនឹងត្រូវហៅបុគ្គលិកចូលធ្វើការវិញដើម្បីឱ្យក្រុមហ៊ុនរីកចម្រើន និងរក្សាគុណភាពការងារសេវាកម្មអតិថិជន ។

ការលើកឡើងនេះ ស្របនឹងការលើកឡើងរបស់ Emily Potosky នាយកជាន់ខ្ពស់ផ្នែកស្រាវជ្រាវរបស់ក្រុមហ៊ុន Gartner ថា បច្ចេកវិទ្យា AI មិនល្អគ្រប់គ្រាន់សម្រាប់ធ្វើការងារជំនួសបុគ្គលិកមានជំនាញទេ គឺមនុស្សមានគុណសម្បត្តិល្អជាង AI ។ ការពឹងផ្អែកលើ AI តែម្យ៉ាងនាពេលនេះ វាឆាប់រហ័សខ្លាំងពេក និងប៉ះពាល់ដល់ការងារក្រុមហ៊ុន ។

លទ្ធផលការស្ទង់មតិរបស់ក្រុមហ៊ុន Gartner កាលពីខែតុលា ឆ្នាំ២០២៥ ដែលបានសាកសួរប្រធានផ្នែកការងារបម្រើសេវាកម្មអតិថិជន ចំនួន៣២១នាក់ និយាយថា AI ធ្វើការលឿនពេកក្នុងការងារសេវាកម្ម ដែលធ្វើឱ្យអតិថិជនមិនពេញចិត្ត ។

នេះបង្ហាញថា ទោះជាបច្ចេកវិទ្យា AI ត្រូវបានអភិវឌ្ឍន៍ខ្លាំងយ៉ាងណាក្តី ក៏ក្រុមហ៊ុនមិនអាចបង់បោះបុគ្គលិកចោលដែរ ពីព្រោះបុគ្គលិកមានបទពិសោធន៍ធ្វើការផ្នែកបម្រើសេវាកម្មល្អជាង AI ។ រីឯការប្រញាប់បញ្ឈប់បុគ្គលិកពីការងារដើម្បីប្រើប្រាស់ AI នោះ គឺជាការដោះស្រាយបញ្ហាដែលមានភាពស្មុគស្មាញ ៕

កងទ័ពថៃតែងតែប្រកាសពីការជាន់មីនពេលស្ថានការណ៍ព្រំដែនស្ងប់ស្ងាត់ដើម្បីយកលេសបង្កសង្គ្រា.មឈ្លានពា.នកម្ពុជាម្តងហើយម្តងទៀត! ពេលទឹកជំនន់នៅស្រុកហាតយៃ ខេត្តសុងក្លា ស្រកចុះភ្លាម កងទ័ពថៃក៏ប្រកាសជាន់មីនភ្លែត ដើម្បីយកលេសវាយប្រ.ហារកម្ពុជា កាលពីថ្ងៃទី៧ ខែធ្នូ ឆ្នាំ២០២៥ ។ ការចោទប្រកាន់កម្ពុជាបង្កប់មីន គឺជាល្បិចដដែលៗរបស់កងទ័ពថៃមុនពេលបើកឆាកសង្គ្រា.ម សូម្បីតែពលរដ្ឋថៃនៅព្រំដែន ក៏ដឹងពីល្បិចនេះដែរ ។

កាលពីថ្ងៃទី១១ ខែកុម្ភៈ ឆ្នាំ២០២៦ កងទ័ពថៃភូមិភាគទី២ ប្រកាសថា កងទ័ពថៃ៣នាក់ ដើរជាន់មីននៅព្រំដែនស្រុកកាន់ថាឡាក់ ខេត្តស៊ីសាកេត បណ្តាលឱ្យរងររបួសធ្ងន់ដាច់ជើងឆ្វេងម្នាក់ និងរបួសស្រាល២នាក់ ដោយដាក់ការចោទប្រកាន់ជាគ្រាប់មីនបន្សល់ពីសង្គ្រាមរវាងកម្ពុជា-ថៃកាលពីខែធ្នូ ឆ្នាំ២០២៥ ។ មុនពេលបោះឆ្នោត គណបក្សនយោបាយថៃនានា រួមទាំងគណបក្សភូមិចៃថៃរបស់លោក Anutin Charnvirakul រវល់ឃោសនាបោះឆ្នោត ពេលនេះ បោះឆ្នោតរួចភ្លាម ស្រាប់តែកងទ័ពថៃប្រកាសជាន់មីនភ្លែត ដែលធ្វើឱ្យពលរដ្ឋថៃនៅព្រំដែនបារម្ភពីកងទ័ពថៃយកលេសគ្រាប់មីនធ្វើសង្គ្រាមវាយកម្ពុជា លើកទី៣ ។

តាមការចុះផ្សាយរបស់សារព័ត៌មាន Thai Post នៅថ្ងៃទី១២ ខែកុម្ភៈ អាជីវករលក់ដូរនៅស្រុកបានក្រួត ខេត្តបុរីរាំ បារម្ភពីកងទ័ពថៃយកលេសផ្ទុះមីននៅព្រំដែនខេត្តស៊ីសាកេត វាយប្រហារកម្ពុជា លើកទី៣ ពីព្រោះកងទ័ពថៃធ្លាប់ប្រើល្បិចនេះដើម្បីឈ្លានពានកម្ពុជាកន្លងមក ។ ពួកគេសំណូមពរឱ្យរដ្ឋាភិបាល និងកងទ័ពថៃ បញ្ចប់ជម្លោះព្រំដែនឆាប់ៗ ដោយសារបាត់បង់ចំណូល ត្រូវជម្លៀសពីលំនៅឋាន ទោះជារដ្ឋាភិបាលចែកប្រាក់ឱ្យ ក៏មិនគ្រប់គ្រាន់ដែរ ។

ពលរដ្ឋស្រុកបានក្រួត ខេត្តបុរីរាំ បារម្ភយ៉ាងខ្លាំង ថាតើកងទ័ពថៃនឹងធ្វើសង្គ្រាមឈ្លានពានកម្ពុជាលើកទី៣ ដែរឬទេ ស្របពេលបញ្ចប់ការបោះឆ្នោតនៅថៃមិនទាន់បានប៉ុន្មានថ្ងៃផង ក៏មានព័ត៌មានកងទ័ពថៃ៣នាក់ ជាន់មីនរងរបួសធ្ងន់-ស្រាលនៅព្រំដែនខេត្តស៊ីសាកេត ។ ម្យ៉ាងទៀត កងទ័ពថៃព្យាយាមញុះញ៉ង់ និងល្មើសបទឈប់បាញ់ជាបន្តបន្ទាប់ធ្វើឱ្យស្ថានការណ៍ព្រំដែនតានតឹង ដោយការពង្រាយកុងទឺន័រព័ទ្ធយកទឹកដីកម្ពុជា ។

ពលរដ្ឋថៃ និងអាជីវករលក់ដូរ មិនចង់ឱ្យកងទ័ពថៃវាយប្រហារកម្ពុជាម្តងទៀតទេ ពីព្រោះពេលជម្លៀសប៉ះពាល់គ្រប់បែបយ៉ាង ទាំងការទុកផ្ទះសម្បែងចោល មិនអាចលក់ដូរបាន បាត់បង់ចំណូល ។ ពេលកងទ័ពវាយប្រហារកម្ពុជាលើកទី២ ធ្វើឱ្យកសិករ អាជីវករជាច្រើននាក់ជំពាក់បំណុលកើនឡើង រីឯប្រាក់សំណងទទួលបានពីរដ្ឋាភិបាល គឺតិចតួចបំផុត ។ ពួកគេសំណូមពរឱ្យរដ្ឋាភិបាល និងកងទ័ព ដោះស្រាយជម្លោះព្រំដែនជាមួយកម្ពុជាឆាប់ៗដើម្បីប្រកបមុខរបរដូចមុន ។

ក្រៅពីនេះ ពលរដ្ឋស្រុកបានក្រួត សំណូមពរឱ្យលោក Anutin Charnvirakil ប្រធានគណបក្សភូមិចៃថៃ ធ្វើតាមការសន្យាពេលរកសំឡេងឆ្នោត គឺបិទព្រំដែនកម្ពុជា-ថៃជារៀងរហូត ដោយសារខ្លាចមានការនាំចូលទិន្នផលកសិកម្មពីកម្ពុជា ដែលធ្វើឱ្យតម្លៃទិន្នផលកសិកម្មថៃធ្លាក់ចុះ ដូចជា ៖ អង្ករ ដំឡូងមី និងជ័រកៅស៊ូ ។

គួរបញ្ជាក់ថា ពលរដ្ឋថៃកើតការសង្ស័យអាច​មានសង្គ្រា.មជាមួយកម្ពុជាជាថ្មី បន្ទាប់ពីកងទ័ពថៃជាន់មីន​នេះ មិនមែនមានតែពលរដ្ឋខេត្តបុរីរាំទេដែលសង្ស័យ គឺពលរដ្ឋ​តាមបណ្តាខេត្តផ្សេងៗដែល​នៅជាប់ព្រំដែនកម្ពុជា​ ក៏សង្ស័យដែរ ពីព្រោះមុនពេលថៃឈ្លានពានកម្ពុជាម្តងៗ កងទ័ពថៃបានយកលេសចោទប្រកាន់ ទម្លាក់កំហុសលើកម្ពុជាទាំងគ្មានភស្តុតាង ។

កាលពីខែមករា លោក Anutin បញ្ជាក់ទៅកាន់ពលរដ្ឋថា នឹងគ្មានសង្គ្រាមលើកទី៣ ជាមួយកម្ពុជាទេ កងទ័ពកម្ពុជា-ថៃបាននិងកំពុងប្រាស្រ័យទាក់ទងគ្នាដើម្បីបង្ការរាល់ការយល់ច្រឡំផ្សេងៗ ប៉ុន្តែសម្តីរបស់មេដឹកនាំថៃរូបនេះមិនអាចយកជាការបានឡើយ ដោយសារលោកជាមនុស្សបាតដៃខ្នងដៃនិយាយឱ្យតែរួចពីមាត់ ស័ក្តិសមនឹងមានរហស្សនាមថា «សត្វកណ្តុរ» ។

ក្នុងឆ្នាំ២០២៥ ប្រទេសថៃបានបើកការឈ្លានពានកម្ពុជា ចំនួន២លើក គឺលើកទី១ នៅខែកក្កដា និងលើកទី២ នៅខែធ្នូ ដែលការឈ្លានពានរបស់ថៃនេះដោយសារបញ្ហានយោបាយក្នុងស្រុករបស់ខ្លួន និងជាឈ្នាន់នយោបាយរបស់លោក Anutin ដើម្បីប្រមូលសំឡេងឆ្នោត ទាញប្រជាប្រិយភាពសម្រាប់ការបោះឆ្នោតកាលពីថ្ងៃទី៨ ខែកុម្ភៈ ៕