បច្ចុប្បន្ន បច្ចេកវិទ្យា AI បានរីកចម្រើនយ៉ាងខ្លាំង និងអាចជួយការងាររបស់មនុស្សជាច្រើនផ្នែក ។ អ្នកវិទ្យាសាស្ត្របានប្រើប្រាស់បច្ចេកវិទ្យា AI ឱ្យទស្សន៍ទាយពីការផ្លាស់ប្តូរមុខមាត់ និងរូបរាងមនុស្សនៅឆ្នាំ៣០២៥ ឃើញថា មុខមាត់ និងរូបរាងមនុស្សនាថ្ងៃអនាគតនឹងប្រែប្រួលទៅជាបែបនេះ ហើយអ្នកវិទ្យាសាស្ត្រជឿថា វាអាចទស្សន៍ទាយពីមនុស្សបានត្រឹមត្រូវឥតខ្ចោះ ។

តើរូបរាងមនុស្សនឹងផ្លាស់ប្តូរទៅជាបែបណានៅឆ្នាំ៣០២៥?

១-កម្ពស់ទាបជាងមុន ៖ អ្នកវិទ្យាសាស្ត្រសន្និដ្ឋានថា នាថ្ងៃអនាគត មនុស្សនឹងមានកម្ពស់ទាបជាងមុន ដោយសារមនុស្សឆាប់ធំពេញវ័យ និងមានកូនច្រើន ។

២-កាន់តែឆ្លាតឈ្លាសវៃ ៖ នឹងមានកការផ្លាស់ប្តូរជាច្រើនក្នុងសង្គម ជាពិសេស ស្ត្រីមានសិទ្ធិជ្រើសរើសគូស្រករ ហើយស្ត្រីនឹងកាន់តែឆ្លាតឈ្លាសវៃ, ទទួលបានជោគជ័យ និងមានរាងកាយរឹងមាំ ។

៣-មានពណ៌ស្បែកស្រដៀងគ្នា ៖ កាលពីមុន មនុស្សរស់នៅក្នុងប្រទេសនីមួយៗមានពណ៌ស្បែកខុសគ្នាយ៉ាងខ្លាំង ប៉ុន្តែការធ្វើដំណើរ និងផ្លាស់ប្តូរវប្បធម៌នាថ្ងៃអនាគត នឹងធ្វើឱ្យមនុស្សរៀបការជាមួយជាតិសាសន៍ផ្សេងកាន់តែច្រើន ។ អ្នកវិទ្យាសាស្ត្ររំពឹងថា ថ្ងៃអនាគត មនុស្សនឹងមានស្បែកពណ៌ត្នោត និងមានរូបរាងខាងក្រៅស្រដៀងគ្នាកាន់តែខ្លាំង មិនថាពួកគេរស់នៅប្រទេសណាទេ ឬមានពណ៌ស្បែកដូចពលរដ្ឋនៅប្រេស៊ីល និងម៉ូរីស (ប្រទេសនៅអាហ្វ្រិកខាងកើត) ។

៤-ខួរក្បាលតូច ៖ អ្នកវិទ្យាសាស្ត្រជឿថា នាថ្ងៃអនាគត មនុស្សនឹងមានខួរក្បាលតូចជាងពេលបច្ចុប្បន្ន ដោយសារបច្ចេកវិទ្យា AI បំពេញតួនាទីក្នុងការគិត វិភាគ និងសម្រេចចិត្តជំនួសមនុស្សកាន់តែខ្លាំង ។ វាអាចធ្វើឱ្យមនុស្សពុំចាំបាច់មានខួរក្បាលធំដូចមុនទេ ។

៥-អាចជ្រើសរើសលក្ខណៈរាងកាយដោយខ្លួនឯង ៖ បច្ចេកវិទ្យាហ្សែន ដូចជា ៖ CRISPR-Cas9 នឹងធ្វើឱ្យមនុស្សអាចកែប្រែហ្សែនរបស់ខ្លួន ហើយវាមិនត្រឹមតែការពារមេរោគប៉ុណ្ណោះទេ ប៉ុន្តែមនុស្សនឹងអាចជ្រើសរើសលក្ខណៈរាងកាយ ដូចជា ៖ កម្ពស់, ពណ៌ស្បែក និងកម្រិតប្រាជ្ញា ។ បច្ចេកវិទ្យានឹងធ្វើឱ្យមនុស្សអភិវឌ្ឍន៍លក្ខណៈរាងកាយឱ្យស្របតាមបរិស្ថានជុំវិញដែលខុសៗគ្នា ។

សរុបមក នៅឆ្នាំ៣០២៥ មនុស្សនឹងមានកម្ពស់ទាប មុខមាត់ស្អាត ពណ៌ស្បែកងងឹត និងខួរក្បាលតូច ។ ក្រៅពីនេះ ការរីកចម្រើនផ្នែកវិទ្យាសាស្ត្រ និងបច្ចេកវិទ្យានឹងបើកឱកាសឱ្យមនុស្សអាចជ្រើសរើស និងកំណត់លក្ខណៈសម្បត្តិរបស់ខ្លួន ៕

ប្រទេសថៃ ៖ កាលពីថ្ងៃទី១០ ខែកុម្ភៈ ឆ្នាំ២០២៥ កងកម្លាំងសមត្ថកិច្ចថៃ ភ្នាក់ងារទូរគមនាគមន៍ជាតិ និងក្រុមហ៊ុនផ្តល់សេវាកម្មអ៊ីនធើរណេត បានសហការគ្នាត្រួតពិនិត្យសេវាអ៊ីនធើរណេតនៅបរិវេណស្ថានីយរថភ្លើងព្រំដែនបានឃ្លងលឹក-ប៉ោយប៉ែត ក្រោយទទួលដំណឹងថា បរិវេណនេះមានការលួ.ច ភ្ជាប់សេវាអ៊ីនធើរណេតទៅឱ្យក្រុមឆបោកអនឡាញនៅទីក្រុងប៉ោយប៉ែត ។

បើអាជ្ញាធររកឃើញថា បណ្តាញអ៊ីនធើរណេតណាមួយពុំបានសុំច្បាប់អនុញ្ញាតត្រឹមត្រូវ អាជ្ញាធរនឹងកាត់ផ្តាច់បណ្តាញនោះភ្លាម ដែលលនេះជាការអនុវត្តវិធានការក្តៅរបស់រដ្ឋាភិបាលក្រោមការដឹកនាំរបស់លោកស្រី ផេថងថាន ស៊ីណាវ៉ាត់ ដើម្បីដោះស្រាយបញ្ហាក្រុមឆបោកអនឡាញបង្កើតទីតាំងនៅប្រទេសជិតខាង និងបោកប្រាស់ពលរដ្ឋថៃ ។ សមត្ថកិច្ច និងភ្នាក់ងារទូរគមនាគមន៍ជាតិបានកាច់បណ្តាញអ៊ីនធើរណេលើបង្គោលសេវាទូរស័ព្ទខ្នាតធំនៅក្រោយផ្សារបេនចាវ៉ាន់ ជាប់ផ្សាររុងក្លឿ ព្រមទាំងរុះរើខ្សែបណ្តាញចុះពីបង្គោលទាំងអស់ និងរុះរើប្រព័ន្ធអ៊ីនធើរណេតបែរមុខទៅប្រទេសកម្ពុជា ។

ការកាត់បណ្តាញអ៊ីនធើរណេត និងសេវាទូរស័ព្ទ ក្រោយពីសមត្ថកិច្ចទទួលដំណឹងថា ក្រុមឆបោកអនឡាញមានទីតាំងនៅទីក្រុងប៉ោយប៉ែត ប្រើប្រាស់អ៊ីនធើរណេត និងសេវាទូរស័ព្ទរបស់ថៃដើម្បីបោកប្រាស់ពលរដ្ឋថៃ ។ ពួកគេប្រើប្រាស់ Sim Box នៅតាមព្រំដែនជាច្រើនកន្លែងជាប់កម្ពុជា ហើយសមត្ថកិច្ចជឿថា ក្រោយការអនុវត្តវិធានការរឹតបន្តឹង នឹងអាចកាត់បន្ថយការប្រើប្រាស់ Sim Box សម្រាប់ការហៅទូរស័ព្ទបោកប្រាស់ ពីព្រោះទីតាំងរបស់ក្រុមឆបោកអនឡាញនៅកម្ពុជា អាចប្រើប្រាស់សេវារហូតដល់១០០មេហ្គាបៃក្នុង១ខែ ហើយបណ្តាញអ៊ីនធើរណេតខ្លះបញ្ជូនពីថៃ ។

ភ្នាក់ងារទូរគមនាគមន៍ជាតិឱ្យដឹងថា បានកាត់បណ្តាញអ៊ីនធើរណេត និងសេវាទូរស័ព្ទនៅតាមបរិវេណព្រំដែនខេត្តស្រះកែវ ដែលពុំបានសុំការអនុញ្ញាតត្រឹមត្រូវតាមច្បាប់ ឬគ្មានម្ចាស់ច្បាស់លាស់ ដើម្បីទប់ស្កាត់ក្រុមឆបោកអនឡាញ ខណៈបច្ចុប្បន្ន ពលរដ្ឋថៃចាញ់បោកតាមអនឡាញកាន់តែខ្លាំង ។

តាំងពីថ្ងៃលោកស្រី ផេថងថាន ស៊ីណាវ៉ាត់ កាន់តំណែងជានាយករដ្ឋមន្ត្រី ថៃមានករណីបោកប្រាស់តាមអនឡាញ រហូតដល់៥៥៧,៥០០ករណី និងខាតបង់ប្រាក់ចំនួន៨៦,០០០លានបាត ។ ហេតុនេះ រដ្ឋាភិបាលថៃបានដោះស្រាយបញ្ហានេះជាបន្ទាន់ ដោយសារវាមិនត្រឹមជាការបោកប្រាស់ឱ្យផ្ទេរប្រាក់ប៉ុណ្ណោះទេ ប៉ុន្តែបានបង្កអសន្តិសុខក្នុងសង្គម ។

លោកស្រី ផេថងថាន បានបញ្ជាឱ្យស្ថាប័នពាក់ព័ន្ធចាត់វិធានការក្តៅចាប់ពីថ្ងៃទី៥ ខែកុម្ភៈ ដោយកាត់ភ្លើង, អ៊ីនធើរណេត និងប្រេងឥន្ធនៈរបស់ក្រុមឆបោកអនឡាញ នៅតំបន់៥ ព្រំដែនជាប់មីយ៉ាន់ម៉ា ព្រមទាំងប្រកាសស្រុកជាប់ព្រំដែន៥ របស់ខេត្តតាក គឺជាតំបន់គ្រប់គ្រងពិសេស ។ ប៉ុន្តែក្រោយពីថៃកាត់បណ្តាញអ៊ីនធើរណេតក្រុមឆបោកអនឡាញនៅព្រំដែនមីយ៉ាន់ម៉ា ក្រុមឆបោកទាំងនេះបានប្តូរទីតាំងមកកម្ពុជា ៕

ប្រទេសអូស្ត្រាលី ៖ កាលពីដើមខែកុម្ភៈ ឆ្នាំ២០២៥ ពលរដ្ឋនៅទីក្រុងខេនបឺរ៉ា ប្រទេសអូស្ត្រាលី បានឈរតម្រង់ជួររង់ចាំមើលផ្កាសាកស.ព រីកជាលើកទី៣ ដែលផ្កានេះមានកម្ពស់ស្មើមនុស្ស និងក្លិនស្អុយខ្លាំងដូចសាកស.ព រលួយ ។ វាពុំរីកញឹកញាប់ទេ ហើយរយៈពេលជាច្រើនឆ្នាំ ទើបវារីកម្តង ព្រោះតែលក្ខណៈប្លែករបស់ផ្កាធ្វើឱ្យពលរដ្ឋអូស្ត្រាលី និងភ្ញៀវទេសចរមកប្រមូលផ្តុំគ្នាស្រង់ក្លិន និងថតរូបផ្កាដ៏កម្រនេះ ។

អ្នកជំនាញរុក្ខជាតិអូស្ត្រាលីនិយាយថា ផ្កាប្រភេទនេះអាចធ្វើឱ្យខ្លួនវាកាន់តែក្តៅខ្លាំង ហើយពេលផ្កាញីត្រៀមខ្លួនបង្កាត់ពូជ វានឹងបញ្ចេញក្លិនស្អុយដើម្បីទាក់ទាញសត្វល្អិតយកកេសរ ឬលម្អងផ្កាទៅផ្សំជាមួយផ្កាឈ្មោល ។ ជាទូទៅ ផ្កានេះនឹងរីកចាប់ពីរយៈពេល៧ឆ្នាំ ទៅ១០ឆ្នាំ ហើយពេលរីកម្តង គឺចាប់ពី២៤ម៉ោង ទៅ៧២ម៉ោង (ឬចាប់ពី១ថ្ងៃ ទៅ៣ថ្ងៃប៉ុណ្ណោះ) វានឹងស្វិតស្រពោនតាមធម្មជាតិ ។

ការរីករបស់ផ្កាធ្វើឱ្យមនុស្សម្នាភ្ញាក់ផ្អើលយ៉ាងខ្លាំង ពីព្រោះពួកគេកម្រមានឱកាសឃើញវារីកណាស់ ។ វាជាប្រភេទផ្កាជិតផុតពូជ ហើយគេសន្និដ្ឋានថា ផ្កានេះបានដុះនៅតាមព្រៃធម្មជាតិត្រឹមតែ១ពាន់ដើមប៉ុណ្ណោះ ។ បច្ចុប្បន្ន ផ្កាសាកសព ត្រូវបានប្រទេសផ្សេងៗយកទៅបង្ហាញនៅតាមទីកន្លែងនានា ។

ក្រៅពីនេះ ក៏មានភ្ញៀវទេសចរចូលមើលផ្កាសាកសពផងដែរ អ្នកខ្លះឈរតម្រង់ជួររហូតដល់២ម៉ោង ដើម្បីថតរូបសែលហ្វី និងស្រង់ក្លិនផ្កា ។ មនុស្សជាច្រើនទទួលស្គាល់ថា ក្លិនរបស់ផ្កាស័ក្តិសមនឹងឈ្មោះពិតមែន គឺមានក្លិនដូចស្រោមជើងចាស់ៗ ឬខ្មោចជ្រូក ឬក្លិនអាហារផ្អូម ។ ផ្កាសាកសពមានត្របកធំបំផុតលើពិភពលោក វាព្យាយាមបញ្ចេញក្លិនស្អុយចេញក្រៅដើម្បីឱ្យសត្វល្អិតមកយកលម្អងរបស់វាទៅផ្សំជាមួយផ្កាផ្សេង ។

គួរបញ្ជាក់ថា ផ្កាសាកសពមានកម្ពស់ជាង៣ម៉ែត្រ ហើយត្រូវបានគេរកឃើញលើកដំបូងនៅឆ្នាំ១៨៧៨ នៅបរិវេណព្រៃត្រូពិកកោះស៊ូម៉ាត្រា ប្រទេសឥណ្ឌូណេស៊ី ។ ផ្កានេះនឹងចំណាយពេលយ៉ាងហោចណាស់ ចាប់ពី៥ឆ្នាំ ទៅ១០ឆ្នាំ ដើម្បីលូតលាស់ និងរីកលើកដំបូង ហើយផ្ការីកអាស្រ័យលើបរិស្ថានជុំវិញ ។ រីឯផ្កាខ្លះទៀតរីករយៈពេល២ឆ្នាំ ឬ៣ឆ្នាំម្តង ៕