ប្រទេសអូស្ត្រាលី ៖ កាលពីថ្ងៃទី៩ ខែមីនា ឆ្នាំ២០២៥ សារព័ត៌មានបរទេសរាយការណ៍ថា ខ្យល់ព្យុះត្រូពិច Alfred បានបោកបក់គ្របដណ្តប់លើឆ្នេរសមុទ្រភាគខាងកើតប្រទេសអូស្ត្រាលី ដែលបណ្តាលឱ្យតំបន់ឆ្នេរសមុទ្រមានភ្លៀងធ្លាក់ខ្លាំង និងទឹកជំនន់ ។ ពលរដ្ឋម្នាក់បានស្លា.ប់ ដោយសារទឹកជំនន់ និងពលរដ្ឋជាច្រើននាក់ទៀតរងរបួស ហើយនេះចាត់ទុកថា ជាខ្យល់ព្យុះដំបូងដែលបោកបក់មកលើអូស្ត្រាលីខ្លាំងបំផុតក្នុងរយៈពេល៥១ឆ្នាំ ។

ការិយាល័យឧតុនិយមប្រកាសថា ខ្យល់ព្យុះបានបក់មកលើឆ្នេរសមុទ្រ នាល្ងាចថ្ងៃទី៨ ខែមីនា ដែលនៅឆ្ងាយពីទីក្រុងប្រ៊ីសបាន ប្រមាណ៥៥គីឡូម៉ែត្រ ហើយខ្យល់ព្យុះក៏បម្លាស់ទីទៅភាគខាងលិច ព្រមទាំងមានភ្លៀងធ្លាក់ខ្លាំងផងដែរ ។ ហេតុនេះ វាបណ្តាលឱ្យមានទឹកជំនន់ភ្លាមៗ និងកម្ពស់ទឹកទន្លេកើនឡើង ។

កាលពីថ្ងៃទី៨ ខែមីនា សមត្ថកិច្ចបានប្រទះឃើញសាកសពបុរសម្នាក់អាយុ៦១ឆ្នាំ ដែលបាត់ខ្លួនក្នុងទន្លេក្បែរទីក្រុងដារីកូ រដ្ឋញូវសៅវែល ដោយសារបុរសរូបនេះព្យាយាមបើករថយន្តឆ្លងកាត់ទឹកជំនន់ ។ រីឯស្ត្រីម្នាក់ទៀតបានរងរបួសដោយសារការបាក់ដំបូលអាផាតមិន នៅទីក្រុងហ្គលខូស ហើយនាងជាពលរដ្ឋម្នាក់ក្នុងចំណោមពលរដ្ឋ២១នាក់ ដែលអាជ្ញាធរជម្លៀសចេញពីអគារ ។ នេះបើតាមការបញ្ជាក់របស់សមត្ថកិច្ច ។

ខ្យល់ព្យុះបានបណ្តាលឱ្យលំនៅឋានពលរដ្ឋ និងអគារអាជីវកម្ម ជាង៣៣ម៉ឺនកន្លែង នៅរដ្ឋឃ្វីនឡែន ដាច់ចរន្តអគ្គិសនី ហើយវាជាការដាច់ចរន្តអគ្គិសនីទ្រង់ទ្រាយបំផុតក្នុងប្រវត្តិសាស្ត្រអូស្ត្រាលី ។ រីឯរដ្ឋញូវសៅវែល មានអគាររហូតដល់៤ម៉ឺន៥ពាន់កន្លែង គ្មានអគ្គិសនីប្រើប្រាស់កាលពីថ្ងៃទី៨ ខែមីនា ។

ទឹកទន្លេជាច្រើននៅរដ្ឋឃ្វីនឡែន និងរដ្ឋញូវសៅវែល បានហក់ឡើងខ្ពស់ក្រោយភ្លៀងធ្លាក់ខ្លាំងជាប់ៗគ្នាជាច្រើនថ្ងៃ ដែលធ្វើឱ្យអាជ្ញាធរដាស់តឿនឱ្យពលរដ្ឋនៅតែក្នុងលំនៅឋាន និងប្រុងប្រយ័ត្នគ្រោះថ្នាក់ដោយសារខ្យល់ព្យុះ ។ លើសពីនេះ ឥទ្ធិពលខ្យល់ព្យុះបានធ្វើឱ្យមានខ្យល់កន្ត្រាក់ខ្លាំង បាក់បង្គោលភ្លើង និងលិចផ្លូវជាច្រើនកន្លែង ។

នាយករដ្ឋមន្ត្រីអូស្ត្រាលី លោក Anthony Albanese ថ្លែងថា រថយន្តកងទ័ព២គ្រឿង ដែលទៅត្រួតពិនិត្យនៅតំបន់រងគ្រោះដោយសារទឹកជំនន់ បានក្រឡាប់ធ្លាក់ពីផ្លូវនៅទីក្រុងទ្រីហ្គេហ្កល រដ្ឋញូវសៅវែល កាលពីថ្ងៃទី៨ ខែមីនា ដែលបណ្តាលឱ្យកងទ័ពរងរបួស១៣នាក់ ៕

ប្រទេសថៃ ៖ ក្រោយពីមានបញ្ហាមួយចំនួននៅតំបន់ព្រំដែនកម្ពុជា-ថៃ បានធ្វើឱ្យពលរដ្ឋថៃកាត់តវីដេអូជាច្រើនបង្ហោះក្នុងបណ្តាញសង្គម ដើម្បីញុះញ.ង់ បង្កជម្លោះ និងការស្អ.ប់ ជាតិសាសន៍ ។ ហេតុនេះ រដ្ឋមន្ត្រីក្រសួងការពារជាតិថៃ លោក Phumtham Wechayachai បានសំណូមពរទៅកាន់ពលរដ្ឋថៃ និងខ្មែរ សូមកុំចែកចាយវីដេអូទាំងនេះ ពីព្រោះនាំឱ្យពលរដ្ឋទាំងពីរស្អ.ប់ គ្នាទៅវិញទៅមក ហើយវាគ្មានប្រយោជន៍សម្រាប់ប្រទេសទាំងពីរទេ ។

កាលពីថ្ងៃទី៧ ខែមីនា ឆ្នាំ២០២៥ សារព័ត៌មានថៃរាយការណ៍ថា ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃ លោក Phumtham បានលើកឡើងពីស្ថានការណ៍សន្តិសុខរវាងកម្ពុជា និងថៃ នៅប្រាសាទតាមាន់ធំ ថា មេបញ្ជាការកងទ័ពជើងគោកថៃបានរាយការណ៍ស្ថានការណ៍ឱ្យលោកជ្រាបហើយ ។ ថៃពុំបានបង្កើនកម្លាំងទ័ពនៅប្រាសាទតាមាន់ធំទេ គឺថៃគ្រាន់តែត្រៀមកម្លាំងទ័ពដើម្បីការពារអធិបតេយ្យភាពរបស់ខ្លួនប៉ុណ្ណោះ ។ ប៉ុន្តែសូមពលរដ្ឋថៃបញ្ឈប់ទង្វើញុះញង់ក្នុងបណ្តាញសង្គមនាំឱ្យមានការស្អ.ប់ខ្ពើ.មជាតិសាសន៍ ។

លោក Phumtham រដ្ឋមន្ត្រីក្រសួងការពារជាតិនិយាយថា មន្ត្រីកម្ពុជា និងថៃ បានជជែកគ្នាពីបញ្ហាព្រំដែនជានិច្ច បច្ចុប្បន្ន នៅតំបន់ព្រំដែនប្រទេសពីរគ្មានបញ្ហាអ្វីទេ ។ ថៃបានបញ្ឈប់សកម្មភាពនៅតំបន់មានបញ្ហាជាមួយកម្ពុជា ដើម្បីការពារកុំឱ្យបញ្ហារាលដាលកាន់តែខ្លាំងឈានទៅកើតជម្លោះ ។

ចំណែកការបង្ហោះវីដេអូក្នុងបណ្តាញសង្គមរបស់ពលរដ្ឋថៃ ដើម្បីឱ្យមានការស្អប់ខ្ពើមពលរដ្ឋប្រទេសជិតខាង គឺលោក Phumtham បានស្នើទៅកាន់សារព័ត៌មានថៃទាំងអស់ជួយសហការកុំផ្សព្វផ្សាយ ឬចែកចាយវីដេអូក្នុងបណ្តាញសង្គមទាំងនេះ ពីព្រោះប្រទេសកម្ពុជា និងថៃ នៅតែមានទំនាក់ទំនងល្អជាមួយគ្នា ។ ទង្វើណាមួយដែលធ្វើឱ្យកើតបញ្ហា និងប៉ះពាល់ដល់ទំនាក់ទំនងរវាងប្រទេសទាំងពីរ សូមឱ្យកម្ពុជា និងថៃ ជួយគ្នាទប់ស្កាត់ទង្វើទាំងនោះ ដើម្បីកុំឱ្យបញ្ហារាលដាលកាន់តែខ្លាំង ។

គួរបញ្ជាក់ថា តាំងពីហេតុការណ៍កងទ័ពថៃហាមឃាត់ពលរដ្ឋខ្មែរ មិនឱ្យច្រៀងចម្រៀងជាតិនៅប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ បានធ្វើឱ្យអ្នកប្រើប្រាស់បណ្តាញសង្គមថៃកាត់តវីដេអូជាច្រើនបង្ហោះក្នុងបណ្តាញសង្គម ជាពិសេស TikTok ដើម្បីញុះញង់ឱ្យពលរដ្ឋថៃស្អប់ពលរដ្ឋប្រទេសជិតខាង ។ ជាក់ស្តែង វីដេអូក្នុង TikTok ថៃខ្លះបង្ហោះតែរឿងអវិជ្ជមានថា ពុំរាប់ញាតិជាមួយកម្ពុជា ហើយសូម្បីតែថៃគ្នាឯង ក៏ពុំគាំទ្រវីដេអូទាំងនេះដែរ ៕

កងទ័ពរំដោះប្រជាជនចិន បានចេញសេចក្តីព្រមានភ្លាមៗ លើការប្រឆាំងនឹងការបំបែកខ្លួនរបស់តៃវ៉ាន់ ពីប្រទេសចិន។

បើតាមអ្នកនាំពាក្យយោធាចិនលោក Wu Qian បានព្រមានថា៖”ចិន នឹងធ្វើសកម្មភាពលឿនបំផុត ប្រសិនបើកោះតៃវ៉ាន់ប្រកាសឯករាជ្យ ហើយប្រទេសដែលគាំទ្រតៃវ៉ាន់ត្រូវតែដកខ្លួនចេញ បើមិនដូចច្នេះភ្លើងសង្គ្រាមអាចនឹងកើតមានឡើង”។

យ៉ាងណាមិញ នេះមិនមែនជាលើកទីមួយទេ ដែលចិនព្រមានតៃវ៉ាន់ ព្រោះកន្លងមក ចិនតែងតែព្រមាននឹងប្រើកម្លាំងយោធា ដើម្បីទាមទារកោះនេះមកគ្រប់គ្រងវិញ។

នាប៉ុន្មានឆ្នាំចុងក្រោយនេះ តៃវ៉ាន់ បានសម្ងំស្វែងរកប្រទេសគាំទ្រ ដើម្បីឱ្យខ្លួនប្រកាសឯករាជ្យ និងក្លាយជាប្រទេសពេញសិទ្ធមានការទទួលស្គាល់ពីអង្គការសហប្រជាជាតិ។

គួរបញ្ជាក់ថា តៃវ៉ាន់ មិនត្រូវបានគេចាត់ទុកជាប្រទេសពេញលេញនោះទេ ក្រោយមានតែ១២ប្រទេសប៉ុណ្ណោះ នៃសមាជិកអង្គការសហប្រជាជាតិចំនួន១៩៨ ទទួលស្គាល់ប្រទេសនេះជារដ្ឋឯករាជ្យ៕

ប្រទេសចិន ៖ រោងចក្រមួយកន្លែងទីក្រុងឆុងឈីង ប្រទេសចិន បានប្រើប្រាស់ឧបករណ៍បំពាក់បច្ចេកវិទ្យាទំនើប ដោយការប្រមូលសំរាមនៅតាមផ្ទះពលរដ្ឋមកដុត ដើម្បីផលិតជាអគ្គិសនីពុំប៉ះពាល់បរិស្ថាន ។ ក្រោយពីបញ្ជូនសំរាមតូច-ធំចូលក្នុងឧបករណ៍រួច វានឹងដុតសំរាមទាំងអស់នៅសល់តែកំទេច រួចហើយ ក្រុមហ៊ុនក៏ប្រមូលកំទេចសំរាមទុកសាងសង់ផ្លូវថ្នល់ ដែលនេះជាការជួយកាត់បន្ថយការចំណាយប្រាក់យ៉ាងច្រើនរបស់រដ្ឋាភិបាលក្នុងការកម្ចា.ត់សំរាម ។

ក្រុមហ៊ុនដែលមានជំនាញផ្នែកដុតសំរាមផលិតជាអគ្គិសនីនេះ ឈ្មោះ Chongqing Sanfeng Environmental Industrial Group Co., Ltd បានប្រមូលសំរាមតាមផ្ទះពលរដ្ឋនៅភាគឦសានទីក្រុងឆុងឈីង មកដុតផលិតជាអគ្គិសនី ហើយក្រុមហ៊ុនអាចកម្ចាត់សំរាមរហូតដល់៣ពាន់តោនក្នុង១ថ្ងៃ ។ កំដៅដែលកើតឡើងដោយសារការដុតសំរាមនឹងត្រូវយកមកផលិតជាប្រភពថាមពលអគ្គិសនី រីឯទឹកបង្ហូរពីឧបករណ៍ដុតសំរាម ក្រុមហ៊ុនយកមកចម្រាញ់ជាទឹកបរិសុទ្ធ និងស្រោចដំណាំ ខណៈកំទេចសំរាមនឹងប្រមូលទុកសាងសង់ផ្លូវ ។

ប៉ុន្តែសំរាមភាគច្រើននៅទីក្រុងឆុងឈីង គឺជាសំរាមសើម ដូចជា ៖ កាកសំណល់បន្លែ-អាហារ សំបកផ្លែឈើ ស្មៅ និងស្លឹកឈើ ដែលធ្វើឱ្យក្រុមហ៊ុនពិបាកដុតវាឱ្យក្តៅដើម្បីផលិតអគ្គិសនី ទើបធ្វើឱ្យការផលិតអគ្គិសនីពីសំរាមនៅទីក្រុងនេះ បានតិចជាងទីក្រុងផ្សេងៗ ។ ប៉ុន្តែការកម្ចាត់សំរាមរបស់ក្រុមហ៊ុនអាចជួយឱ្យរដ្ឋាភិបាលកាត់បន្ថយការចំណាយប្រាក់យ៉ាងច្រើនក្នុងការកម្ចាត់សំរាម ។

ក្រៅពីនេះ ក្រុមហ៊ុនបានប្រើប្រាស់កម្លាំងកម្មករតិចធ្វើការក្នុងរោងចក្រដុតសំរាម ដើម្បីកាត់បន្ថយគ្រោះថ្នាក់នៅកន្លែងការងារ ។ ទោះជាការកម្ចាត់សំរាមរបស់ក្រុមហ៊ុនចិនប្រើប្រាស់បច្ចេកវិទ្យាថ្មីក្តី ប៉ុន្តែវានឹងទទួលបានការពេញនិយមកាន់តែខ្លាំងនៅតាមប្រទេសនានា ។ បច្ចុប្បន្ន ក្រុមហ៊ុនបានលក់បច្ចេកវិទ្យាកម្ចាត់សំរាមទៅឱ្យប្រទេសជាច្រើន ដូចជា ៖ អូស្ត្រាលី ដាណឺម៉ាក និងថៃ ។

ប្រទេសថៃបានទិញបច្ចេកវិទ្យាកម្ចាត់សំរាមផលិតជាអគ្គិសនីពីក្រុមហ៊ុនចិន អស់រយៈពេល១០ឆ្នាំហើយ គឺរោងចក្រជាច្រើននៅថៃបានប្រើប្រាស់បច្ចេកវិទ្យាដុតសំរាមរបស់ចិន ដូចជា ៖ រោងចក្រនៅភូកេត ណាខនប៉ាធុម ស្រះបុរី និងណាខនរ៉ាជសីម៉ា ។

ការកម្ចាត់សំរាមផលិតជាអគ្គិសនីតាមរយៈឧបករណ៍ទំនើប គឺបង្ហាញពីជម្រើសថ្មីក្នុងការវិនិយោគ ដោយសារបច្ចុប្បន្ន អគ្គិសនីនៅថៃមានតម្លៃខ្ពស់ ។ នាយកក្រុមហ៊ុនចិននិយាយថា ការផលិតអគ្គិសនីពីការដុតសំរាម ពិតជាមានប្រយោជន៍ដល់សង្គម ច្រើនជាងការទទួលបានចំណូលតែម្យ៉ាង ហើយអគ្គិសនីដែលផលិតបាននឹងអាចជួយជំរុញសេដ្ឋកិច្ច ៕

ការតវ៉ារបស់បងប្អូនប្រជាពលរដ្ឋខ្មែរទាំងក្នុងស្រុក និងបរទេស ចាប់ផ្តើមទទួលបានលទ្ធផលបណ្តើរៗហើយខ្មែរយើង! ថៃបានប្រាប់ពលរដ្ឋខ្លួនកុំឱ្យគិតច្រើន «ករណីពលរដ្ឋខ្មែរនៅក្រៅប្រទេសទាមទារយកកោះគុត» ព្រោះពួកគេមានសិទ្ធិក្នុងការតវ៉ា ។ មិនតែប៉ុណ្ណោះ អតីតនាយករដ្ឋមន្ត្រីថៃ លោក Srettha Thavisin បាននិយាយមកកាន់សារព័ត៌មានថា ៖ «ក្រៅពីបញ្ហាកោះគុត ថៃគួរបែងចែកផលប្រយោជន៍ឧស្ម័នធម្មជាតិនៅបាតសមុទ្រជាមួយកម្ពុជា ព្រោះវាពុំមែនជារបស់ថៃតែមួយទេ វាជារបស់កម្ពុជាដែរ ។ បើថៃរវល់តែតវ៉ាជាមួយកម្ពុជា ថៃនឹងពុំទទួលបានប្រយោជន៍ពីឧស្ម័ននេះ ពីព្រោះតម្លៃឧស្ម័ននឹងធ្លាក់ចុះជាបន្តបន្ទាប់ ចាប់ពី៥ឆ្នាំ ទៅ១០ឆ្នាំខាងមុខ» ។

កាលពីដើមខែមីនា ឆ្នាំ២០២៥ សារព័ត៌មានថៃរាយការណ៍ថា ពលរដ្ឋខ្មែររស់នៅក្រៅប្រទេសចាប់ផ្តើមប្រមូលផ្តុំគ្នាតវ៉ាទាមទារយកកោះគុតពីថៃ ដូចជា នៅជប៉ុន និងកូរ៉េខាងត្បូង ។ នាពេលថ្មីៗនេះ ពលរដ្ឋខ្មែរបានប្រមូលផ្តុំគ្នាជាច្រើនកន្លែងនៅទីក្រុងសេអ៊ូល ប្រទេសកូរ៉េខាងត្បូង ដើម្បីទាមទារកោះគុតពីថៃមកវិញ ទើបសារព័ត៌មានថៃសុំសម្ភាសន៍ជាមួយរដ្ឋមន្ត្រីក្រសួងការពារជាតិថៃ ហើយរដ្ឋមន្ត្រីក្រសួងការពារជាតិថៃប្រាប់ថា ការតវ៉ានៅទីក្រុងសេអ៊ូល គឺជាសិទ្ធិរបស់ពលរដ្ឋខ្មែរ ។

លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិនិយាយថា សូមពលដ្ឋថៃកុំគិតច្រើន ពីព្រោះតាមលទ្ធិប្រជាធិបតេយ្យ គឺពលរដ្ឋប្រទេសនីមួយៗមានសិទ្ធិបញ្ចេញមតិដូចគ្នា ឬខុសគ្នា ។ ហេតុនេះ ការតវ៉ាទាមទារកោះគុតរបស់ពលរដ្ឋខ្មែរនៅកូរ៉េខាងត្បូង គឺជាសិទ្ធិរបស់ពួកគេ ហើយការតវ៉ានេះកើតឡើងនៅកូរ៉េខាងត្បូង វាជារឿងរបស់កូរ៉េខាងត្បូង ប៉ុន្តែសូមកុំឱ្យប៉ះពាល់ដល់អធិបតេយ្យភាពថៃ ។ យើងគ្មានបញ្ហាអ្វីទេ ពីព្រោះមនុស្សគ្រប់រូបមានសិទ្ធិនិយាយស្តី ។

ប៉ុន្តែពលរដ្ឋថៃបានបង្ហាញក្តីបារម្ភយ៉ាងខ្លាំង ក្រោយពីពលរដ្ឋខ្មែររស់នៅប្រទេសជប៉ុន និងកូរ៉េខាងត្បូង ប្រមូលផ្តុំគ្នាតវ៉ាទាមទារកោះគុតពីថៃ ព្រមទាំងបារម្ភថា តើនៅថ្ងៃខាងមុខ ពលរដ្ឋខ្មែររស់នៅប្រទេសផ្សេងទៀត នឹងនាំគ្នាតវ៉ាទាមទារកោះគុត ដូចពលរដ្ឋខ្មែរនៅកូរ៉េខាងត្បូងដែរឬទេ?

គួរបញ្ជាក់ថា ពលរដ្ឋខ្មែររស់នៅ និងធ្វើការនៅប្រទេសកូរ៉េខាងត្បូង ប្រមាណជាង២ពាន់នាក់ បាននាំគ្នាតវ៉ានៅទីក្រុងសេអ៊ូល ដើម្បីទាមទារឱ្យរដ្ឋាភិបាលខ្មែរបញ្ចប់ការចរចាទ្វេភាគីជាមួយរដ្ឋាភិបាលថៃ ហើយប្តឹងរឿងកោះគុតទៅតុលាការអន្តរជាតិ (ICJ) ដោយសារបច្ចុប្បន្ន ថៃបានគ្រប់គ្រងកោះនេះ ។

ដោយឡែក អតីតនាយករដ្ឋមន្ត្រីថៃ លោក Srettha Thavisin បាននិយាយមកកាន់សារព័ត៌មានថា ក្រៅពីបញ្ហាកោះគុត ថៃគួរបែងចែកផលប្រយោជន៍ឧស្ម័នធម្មជាតិនៅបាតសមុទ្រជាមួយកម្ពុជា បើទោះជាមន្ត្រីគណបក្សប្រឆាំងថៃពុំព្រមចរចាជាមួយកម្ពុជា និងអះអាងថា ឧស្ម័នធម្មជាតិជារបស់ថៃ ១០០% ។ លោកថា ៖ «ថៃគួរបែងចែកផលប្រយោជន៍ឧស្ម័នធម្មជាតិជាមួយកម្ពុជា ពីព្រោះវាពុំមែនជារបស់ថៃតែមួយទេ វាជារបស់កម្ពុជាដែរ ។ បើថៃរវល់តែតវ៉ាជាមួយកម្ពុជា ថៃនឹងពុំទទួលបានប្រយោជន៍ពីឧស្ម័ននេះ ពីព្រោះតម្លៃឧស្ម័ននឹងធ្លាក់ចុះជាបន្តបន្ទាប់ ចាប់ពី៥ឆ្នាំ ទៅ១០ឆ្នាំខាងមុខ» ។

ហេតុនេះ ថៃគួរតែសុំបែងចែកឧស្ម័នធម្មជាតិនៅបាតសមុទ្រពាក់កណ្តាលជាមួយកម្ពុជា ហើយក្រុមហ៊ុននានានឹងដាក់ទីតាំងយកឧស្ម័នធម្មជាតិនៅខាងថៃ គឺនឹងធ្វើឱ្យថៃទទួលបានប្រយោជន៍ច្រើនជាង៥០% ដោយសារថៃមានឧបករណ៍ច្រើនសម្រាប់យកឧស្ម័ន ។

បើទោះជាយ៉ាងណាក្តី ព័ត៌មានខាងលើគ្រាន់តែជាការបកប្រែក្រៅផ្លូវការ និងចុះផ្សាយលើបណ្តាញសង្គមពីភាគីថៃតែម្ខាងប៉ុណ្ណោះ ។ លទ្ធផល និងព័ត៌មានលម្អិតពីបញ្ហា «ករណីពលរដ្ឋខ្មែរនៅក្រៅប្រទេសទាមទារយកកោះគុត» ឱ្យរញ្ជួយដល់ប្រទេសថៃ សារព័ត៌មាន KBN News យើងខ្ញុំនឹងផ្សាយជូនបន្ថែមទៀត ៕