ម្តងជាពីរដងស្ទើរតែខ្លាចជារឿងដដែលៗជុំវិញការស្លៀកពាក់របស់លោក ឯម រៀម ដែលរៀនចប់ថ្នាក់បណ្ឌិតច្នៃម៉ូតត្រូវរងនូវការរិះគន់ពីអ្នកលេងបណ្តាញសង្គម។ ជាក់ស្តែងថ្មីៗនេះនៅក្នុងការលេងទឹករដូវកាលបុណ្យចូលឆ្នាំខ្មែររូបលោកបង្កឱ្យមានមតិប្រតិកម្មម្តងទៀត ជាពិសេសគឺត្រូវមនុស្សជាច្រើនចាត់ទុកលោកញាំញីកិត្តិយសស្រីៗ។

និយមតុបតែងខ្លួនជាមនុស្សស្រី ពាក់ស្បែកជើងកែង លោក ឯម រៀម បានធ្វើឱ្យអ្នកលេងបណ្តាញសង្គមបញ្ចេញមតិរិះគន់ថា ចេញមកមិនច្រឡំគេ បន្ទាប់ពីលោកដើរកម្សាន្តក្នុងព្រឹត្តិការនគរសង្ក្រាន្តនិងមានការលេងទឹកជាមួយនឹងពលរដ្ឋដទៃទៀត។ ការរិះគន់បានចាប់ផ្តើមនៅពេលលោក ឯម រៀម ស្លៀកពាក់លេងស្ទាយ៍ដាក់ដើមទ្រូងក្លែងក្លាយនៅលើអាវរបស់ខ្លួនខណៈអ្នកមួយចំនួនដែលជួបលោកបានលេងច្របាច់ដើមទ្រូងនោះផងដែរ។

សកម្មភាពទាំងនេះត្រូវបានអ្នកលេងបណ្តាញសង្គមជាច្រើនបញ្ចេញមតិរិះគន់បណ្ឌិតច្នៃម៉ូតរូបនេះម្តងទៀតជុំវិញសំលៀកបំពាក់របស់លោកដែលជារឿយៗច្នៃម៉ូតខ្លាំងពេកមហាជនទទួលយកមិនបាន។ មិនត្រឹមតែប៉ុណ្ណោះពួកគេចាត់ទុកថាការធ្វើបែបនេះហាក់ដូចជាញាំញីកិត្តិយសស្រីៗពេកដោយសារតែលោក ឯម រៀម តុបតែងខ្លួនជាមនុស្សស្រីដែលបង្កឱ្យប៉ះពាល់ដល់មនុស្សស្រីពិតប្រាកដ។

អ្នកលេងបណ្តាញសង្គមហ្វេកប៊ុកបានបញ្ចេញមតិថា «ល្មមៗសារ៉េចេញខ្លះហើយ មនុស្សថោកធុននឹងទុកក៏មិនចំនេញ ដកចេញក៏មិនខាតដែរ, ក្រសួងល្មមយកទៅដាក់គុកហើយ ដដែលៗពេកហើយ ឆ្នៃម៉ូតបែបល្ងិតល្ងង់ ។, ក្នុងនាមជាកូនខ្មែរមួយរូប ខ្ញុំមិនគាំទ្រលើការច្នៃសម្លៀកបំពាក់បែបនេះ មិនថាក្នុងហេតុផលបែបណាក៏ដោយ ឈប់បានឈប់ទៅ សុំអង្វរ ឈប់ធ្វើសកម្មភាពអ្វីធ្វើឱ្យចោរសៀម ជាន់ឈ្លី កិត្តិយស របស់ខ្មែរទៀតទៅ, ប្រទេសកម្ពុជាត្រូវអាប់អោនកេរ្ដិ៍ឈ្មោះដោយសារបុរសម្នាក់នេះហើយឯណាទៅតម្លៃស្រ្ដីខ្មែរមិចធ្វើចឹង….»។

ការរិះគន់ចុងក្រោយនេះលោក ឯម រៀម ពុំទាត់បានចេញមុខឆ្លើយតបនៅឡើយទេគិតត្រឹមរសៀលថ្ងៃទី២០ ខែមេសា ដោយលោកបានបង្ហោះរឿងរ៉ាវផ្សេងជំនួសវិញ។
កន្លងមកបន្ទាប់ពីមហាជនរិះគន់យ៉ាងដំណំ លោក ឯម រៀម ធ្លាប់បានចូលជួបជាមួយនឹងប្រធានសមាគមសិល្បករខ្មែរលោកជំទាវអ្នកឧកញ៉ា ម៉ៅ ចំណាន ម្តងរួចមកហើយ។ ទោះបីជាធ្លាប់អង្គុយតុមូលម្តងរួចមកហើយក្តីលោកឯម រៀម នៅបន្តច្នៃម៉ូតប្លែកៗរបស់ខ្លួនដដែល។ លោកក៏ធ្លាប់និយាយនៅលើបណ្តាញសង្គមកន្លងមកដែរថាការច្នៃម៉ូតរបស់ខ្លួនមិនបានបំផ្លាញវប្បធម៌ខ្មែរនោះទេផ្ទុយទៅវិញការយល់ដឹងរបស់ប្រជាជនខ្មែរនៅមានកម្រិតប៉ុណ្ណោះ៕

ទោះថ្ងៃសមឆាកតារាចម្រៀង ជី ដេវីត និង ទេព បូព្រឹក្ស ត្រូវរងនូវការរិះគន់ពីសំណាកអ្នកលេងបណ្តាញសង្គមមួយចំនួនប៉ុន្តែនៅពេលសម្តែងពិតប្រាកដតារាចម្រៀងទាំងពីររូបបានធ្វើឱ្យអ្នកគាំទ្រមានភាពស្ងប់ស្ញែងនិងទទួលបានការលើកទឹកចិត្តពីមហាជននិងអ្នកនៅក្នុងចង្កោមសិល្បៈជាច្រើន។ អ្វីដែលកាន់តែពិសេស អ្នកអង្គម្ចាស់ក្សត្រិយ៍ ចេណ្ណា ក៏បានពោលពាក្យសរសើរប្តីប្រពន្ធមួយគូនេះដូចគ្នា។

នៅលើបណ្តាញសង្គមអ្នកអង្គម្ចាស់ក្សត្រិយ៍ ចេណ្ណា បានចែករំលែកកម្មវិធី ROUND Festival ដោយភ្ជាប់មកជាមួយនឹងពាក្យពេចន៍ថា «ខ្ញុំពិតជារំភើប និងមានមោទកភាពណាស់ ចំពោះការសម្ដែងដ៏អស្ចារ្យរបស់បងទាំងពីរ G-Devith Tep Boprek ពិតជាសិល្បករ សិល្បការិនីកំពូលនៃកម្ពុជា ដែលបាននាំយកព្រលឹងវប្បធម៌ខ្មែរ ទៅរះយ៉ាងចិញ្ចាំងចិញ្ចាចលើឆាកអន្ដរជាតិ ASEAN-Korea Music Festival 2026 ROUNDក្នុងប្រទេសហ្វីលីពីន»។

អ្នកអង្គម្ចាស់ក្សត្រិយ៍ បានលើកឡើងទៀតថា ជី ដេវីត និង ទេព បូព្រឹក្ស មិនថានៅក្នុងស្រុក ឬនៅក្រៅប្រទេសតែងតែរំលេច និងលើកបង្ហាញពីសិល្បៈខ្មែរជានិច្ចលើការសម្ដែង ជាពិសេសនៅលើម៉ូតសម្លៀកបំពាក់នីមួយៗ។ ក្រៅពីមានមោទនភាពចំពោះប្តីប្រពន្ធមួយគូនេះ អ្នកអង្គម្ចាស់ក្សត្រិយ៍ ចេណ្ណា ក៏សង្ឃឹមដែរថា ជី ដេវីត និង ទេព បូព្រឹក្ស នឹងមានឱកាសកាន់តែច្រើនបន្តទៀតក្នុងការផ្សព្វផ្សាយពីវប្បធម៌ជាតិទៅកាន់បរទេស។

ក្រៅពីការាសម្តែងនៅក្នុងប្រទេសហ្វីលីពីន ទេព បូព្រឹក្ស ក៏បានបង្ហើបដំរួយអាចនឹងមានការសម្តែងនៅលើឆាកអន្តរជាតិបន្តទៀត។ នៅក្នុងកម្មវិធី ASEAN-Korea Music Festival 2026 តារាចម្រៀងទាំងពីររូបបាននាំយកសិល្បៈវប្បធម៌ខ្មែរទៅបង្ហាញ ដោយលើកយកបទចម្រៀងល្បីៗនិងមានអត្ថន័យជាច្រើនរួមទាំងបទមួយដែលទះកំផ្លៀងថៃផងដែរ។ ការសសម្តែងបែបសហសម័យនេះ ជី ដេវីត និងទេព បូព្រឹក្ស បានចំណាយលុយផ្ទាល់ខ្លួនរាប់ម៉ឺនដុល្លារ។

គួរបញ្ជាក់ផងដែរថា កន្លងមក ទេព បូព្រឹក្ស ធ្លាប់បានតំណាងកម្ពុជាចូលរួមសម្តែងកម្មវិធីខាងលើនេះក្នុងអំឡុងពេលរៀបចំឡើងនៅប្រទេសម៉ាឡេស៊ី។ រាល់ពេលដែលមានឱកាសសម្តែងនៅលើឆាកអន្តរជាតិតារាចម្រៀងរូបនេះតែងតែបង្ហាញអ្វីដែលជាខ្មែរនិងមិនឱ្យអ្នកគាំទ្រខកចិត្តឡើយ៕

ជុំវិញកូនបំណុលមានលុយសម្រាប់មេធាវីចេញលិខិតជូនដំណឹងទៅកាន់ម្ចាស់បំណុលរឿងជំពាក់ប្រាក់៦០០០ដុល្លារបានបណ្តាលឱ្យមានការពិភាក្សាយ៉ាងច្រើននៅលើបណ្តាញសង្គមនិងបង្កឱ្យមានមតិរិះគន់ផងដែរ។ ជាមួយគ្នានេះតារាសម្តែងនិងពិធីការិនី ញឹម ច័ន្ទថន បានចេញមុខបកស្រាយទាក់ទិននឹងបញ្ហានេះប៉ុន្តែការរិះគន់នៅតែមានដដែលចំពោះរូបនាង។

កាលពីថ្ងៃទី១៨ ខែមេសា កញ្ញា ញឹម ច័ន្ទថន បានចេញលិខិតជូនដំណឹងពីមេធាវីរបស់ខ្លួនទុកពេលឱ្យ២៤ម៉ោងទៅកាន់គណនីហ្វេកប៊ុក Neang SK ដែលជាម្ចាស់បំណុលបន្ទាប់ពីគណនីនេះបានបង្ហោះរូបភាពរបស់ខ្លួនក្នុងចេតនា បរិហាកេរ្តិ៍ ជេរប្រមាថ និងញុះញង់ឱ្យមានការរើសអើង។ ក្នុងលិខិតមេធាវីបានបញ្ជាក់ថាតារាសម្តែង ញឹម ច័ន្ទថត បានខ្ចីប្រាក់ចំនួន៦០០០ដុល្លារក្នុងអំឡុងឆ្នាំ២០២៤ ជាមួយនឹងការប្រាក់៥%ក្នុងមួយខែ ដែលជាអត្រាការប្រាក់លើសច្បាប់កំណត់ ខណៈក្នុងរយៈពេល២៤ខែមកនេះកូនក្តី ញឹម ច័ន្ទថនក៏បានធ្វើការទូទាត់ជូនជាបន្តបន្ទាប់ដែរ។

ក្រុមមេធាវី ហនុមាន បានបញ្ជាក់ទៀតថា កាលពីថ្ងៃទី១៦ ខែមេសា ឆ្នាំ២០២៦ គណនីហ្វេកប៊ុក Neang SK បានផ្ញើសារមកកូនក្ដីរបស់ខ្លួនដើម្បីទារប្រាក់ជំពាក់ដោយធ្វើការគំរាមគំហែងក្នុងខ្លឹមសារថា បើមិនសង លុយទេ ខ្លួននឹងធ្វើការបង្ហោះរូប ដោយភ្ជាប់នឹងសំណេរ ក្នុងចេតនាធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូរ។ បន្ទាប់ពីបង្ហោះលិខិតមេធាវីនេះរួចតារាសម្តែង ញឹម ច័ន្ទថន បានបង្កឱ្យមានការជជែកវែកយ៉ាងច្រើនពីអ្នកបណ្តាញសង្គម។

ក្រោយពីមហាជនរិះគន់ថាគ្មានលុយសងគេតែមានលុយជួលមេធាវីចេញលិខិតជូនដំណឹងកញ្ញា ញឹម ច័ន្ទថន បានចេញវីដេអូបកស្រាយដោយភ្ជាប់មកជាមួយនឹងចំណងជើងថា «ជំពាក់លុយសងលុយគឺចប់ តែចប់តែរឿងជំពាក់លុយ ចុះរឿងគំរាម និងបង្ហោះរូបខ្ញុំ កិត្តិយសខ្ញុំនរណាជាអ្នកទទួលខុសត្រូវ?»។ ក្នុងរយៈពេលជិត៩នាទីនៃវីដេអូដែលបានបង្ហោះតារាសម្តែងនិងជាពិធីការិនីរូបនេះបានពន្យល់ថា ការចេញលិខិតនោះគ្រាន់តែការជូនដំណឹងទៅកាន់ម្ចាស់បំណុលមិនមែនជាការប្តឹងនោះទេ ខណៈសារឆ្លើយឆ្លងរូបនាងពុំបានគេចវេសពីបំណុលឡើយដោយរង់ចាំកូនបំណុលរបស់ខ្លួនសងលុយទើបយកទៅសងបន្ត។

តារាសម្តែងរូបនេះបន្តទៀតថាបើសិនជានាងជំពាក់លុយគឺត្រូវសងលុយបើសិនជាមានការគេចវេសគឺអាចដាក់ពាក្យបណ្តឹងទៅកាន់តុលាការបានមិនមែនបង្ហោះរូបនាងនោះទេព្រោះវាធ្វើឱ្យប៉ះពាល់ដល់កិត្តិយស ហើយការដែលយកកូនបំណុលទៅបង្ហោះគឺជាច្បាប់ព្រហ្មទណ្ឌ។ ទោះជាយ៉ាងណា ការបកស្រាយរបស់តារាសម្តែង ញឹម ច័ន្ទថន ជុំវិញបញ្ហាខាងលើនេះបានបង្កឱ្យសាធារណជនវែកញែកដដែល៕