ប្រទេសថៃ ៖ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ថ្លែងថា ប្រទេសកម្ពុជាបានទទួលស្វាគមន៍លោកស្រីយ៉ាងកក់ក្តៅ ពេលលោកស្រីមកកម្ពុជាក្នុងឋានៈជានាយករដ្ឋមន្ត្រី និងផ្តល់កិត្តិយសដល់ប្រទេសថៃយ៉ាងខ្លាំង ។ ពេលនាយករដ្ឋមន្ត្រីថៃមកដល់កម្ពុជា គឺមានរថយន្តមករង់ចាំទទួលរួចជាស្រេច ព្រមទាំងមានសន្តិសុខការពារសុវត្ថិភាព និងមានក្រុមអ្នកជិះម៉ូតូស្លៀកពាក់ឯកសណ្ឋានពណ៌ស នៅខាងមុខ ខាងក្រោយ និងចំហៀង ។

កម្ពុជាបានទទួលស្វាគមន៍នាយករដ្ឋមន្ត្រីថៃ ដូចគ្នានឹងការទទួលស្វាគមន៍ប្រធានាធិបតីចិន លោក ស៊ី ជិនពីង ដែលទើបមកបំពេញទស្សនកិច្ចនៅកម្ពុជាមុននេះ ។ លោកស្រី ផេថងថាន មានអារម្មណ៍ថា លោកស្រីបានទទួលកិត្តិយសយ៉ាងខ្លាំងដែលបានមកកម្ពុជា ខណៈឆ្នាំ២០២៥ គឺជាឆ្នាំគម្រប់៧៥ឆ្នាំ នៃទំនាក់ទំនងការទូតរវាងកម្ពុជា និងថៃ ។ ក្រៅពីកម្ពុជាផ្តល់កិត្តិយសខ្លាំងដល់ថៃហើយ លោកស្រីសូមបញ្ជាក់ថា ប្រទេសទាំងពីរមានទំនាក់ទំនងជាមួយគ្នាអស់រយៈពេលយូរអង្វែង ហើយថៃនឹងបង្កើនទំនាក់ទំនងជាមួយកម្ពុជាឱ្យកាន់តែយូរអង្វែងថែមទៀត ។

នាយករដ្ឋមន្ត្រីថៃបន្តថា នៅតាមផ្លូវដែលលោកស្រីធ្វើដំណើរ ក៏មានប្អូនៗសិស្សានុសិស្សឈរលើកដៃ និងកាន់ផ្កានៅសងខាងផ្លូវ ប្អូនៗគួរឱ្យស្រឡាញ់ខ្លាំងណាស់ ។ ការស្លៀកពាក់ឯកសណ្ឋានសិស្សរបស់ប្អូនៗពិតជាធ្វើឱ្យលោកស្រីប្លែកភ្នែក និងមានអារម្មណ៍ពេញចិត្តយ៉ាងខ្លាំង ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានរង់ចាំទទួលស្វាគមន៍លោកស្រី ផេថងថាន ខណៈលោកស្រីបានធ្វើដំណើរមកដល់កម្ពុជា ជាមួយស្វាមី ។

នេះជាការទទួលស្វាគមន៍ជាផ្លូវការចំពោះដំណើរទស្សនកិច្ចមកប្រទេសកម្ពុជា របស់នាយករដ្ឋមន្ត្រីថៃ និងស្វាមី ខណៈកម្ពុជាធ្លាប់ទទួលស្វាគមន៍ជាផ្លូវការបែបនេះទៅកាន់ប្រធានាធិបតីចិន លោក ស៊ី ជិនពីង ដែលបានបំពេញទស្សនកិច្ចមកកម្ពុជា នាពេលកន្លងមក ។ នេះបើតាមការលើកឡើងរបស់លោកស្រី ផេថងថាន ។

គួរបញ្ជាក់ថា នាយករដ្ឋមន្ត្រីថៃ និងស្វាមី បានបំពេញទស្សនកិច្ចនៅកម្ពុជា ចាប់ពីថ្ងៃទី២៣ ដល់ថ្ងៃទី២៤ ខែមេសា ឆ្នាំ២០២៥ តាមការអញ្ជើញជាផ្លូវការរបស់រដ្ឋាភិបាលកម្ពុជា ក្នុងឱកាសអបអរសាទរខួបលើកទី៧៥ឆ្នាំ នៃទំនាក់ទំនងការទូតរវាងកម្ពុជា-ថៃ ព្រមទាំងពង្រឹងទំនាក់ទំនង និងកិច្ចសហការរវាងប្រទេសទាំង២ ឱ្យកាន់តែជិតស្និទ្ធ ជាពិសេស កិច្ចសហការសន្តិសុខ, ដោះស្រាយបញ្ហាឆ្លងព្រំដែន សេដ្ឋកិច្ច, កិច្ចសហការដើម្បីអភិវឌ្ឍន៍, ទំនាក់ទំនងរវាងពលរដ្ឋខ្មែរ-ថៃ ក៏ដូចជាលើកកម្ពស់កិច្ចសហការក្នុងតំបន់ ៕

បរទេស ៖ មានការស្រាវជ្រាវមួយបង្ហាញថា ជំងឺដាច់សរសៃឈាមខួរក្បាលចូលរួមបង្ករឡើងដោយសារធាតុមីក្រូផ្លាស្ទិក បន្ទាប់ពីមានការសិក្សាឃើញថា អ្នកជំងឺរងគ្រោះជំងឺដាច់សរសៃឈាមភាគច្រើនមានផ្ទុកនូវសារធាតុមីក្រូផ្លាស្ទិកនេះនៅក្នុងឈាម ច្រើសជាងមនុស្សទូទៅចំនួន៥០ដង។

យោងតាមព័ត៌មានដែលចុះផ្សាយដោយគេហទំព័រ Business Insider បានឲ្យដឹងថា ៖ ជារៀងរាល់ឆ្នាំមានកាកសំណល់ថង់ផ្លាស្ទិកជាច្រើនលានតោន បានហូរចាក់ទៅក្នុងសមុទ្រ ដែលនាំឲ្យមានសំរាមទើរពាសពេញឆ្នេរសមុទ្រ គំរាមកំហែងដល់ជីវិតសត្វសមុទ្រ និងសត្វស្លាបរាប់មិនអស់ និងបំផ្លាញប្រព័ន្ធអេកូឡូស៊ីក្នុងទឹកសមុទ្រផងដែរ។ លើសពីនេះ សំណល់ផ្លាស្ទិកអាចបំបែកខ្លួនទៅជា “មីក្រូផ្លាស្ទិក” ដែលមាននៅគ្រប់ទីកន្លែងនៅលើផែនដី និងបង្ករហានិភ័យខ្ពស់សុខភាពសត្វ និងមនុស្ស។

គួរជម្រាបថា “មីក្រូផ្លាស្ទិក” គឺជាបំណែកភាគល្អិតតូចៗ មានទំហំតូចជាង៥មីលីម៉ែត្រ ឬតូចខ្លាំងជាងនេះ។ វាជាសារធាតុម្យ៉ាងដែលអាចបង្ករគ្រោះ.ថ្នា..ក់ដល់បរិស្ថាន ជាពិសេសសុខភាពមនុស្ស សត្វ ព្រោះវាងាយនឹងជ្រៀតចូលក្នុងខ្លួនរបស់ភាវៈមានជីវិតណាស់ ដូចជាចូលតាមរយៈអាហារ ទឹក ខ្យល់ ឬសូម្បីតែការប៉ះលើស្បែកក៏អាចអនុញ្ញាតឲ្យវាចូលក្នុងខ្លួនយើងបានផងដែរ។

នៅពេលសារធាតុ “មីក្រូផ្លាស្ទិក” ទាំងអស់នោះបានជ្រៀតចូលទៅក្នុងរាងកាយមនុស្សហើយនោះ វានឹងទៅកកស្ទះនៅក្នងជាលិកាមនុស្ស បង្ករឲ្យមានការរលាក ប្រឆាំងនឹងអុកស៊ីតកម្ម និងបង្ករឲ្យមានការខូចខាតកោសិកាផ្សេងៗ តាមរយៈការលេចធ្លាយសារធាតុគីមីពុលចូលទៅក្នុងរាងកាយ។

កាលពីខែមីនា ឆ្នាំ២០២៤ អ្នកស្រាវជ្រាវជាច្រើនរួមមាន ប្រធានដឹកនាំការស្រាវជ្រាវលោក Dr. Raffaele Marfella ជនជាតិអ៊ីតាលី និងក្រុមរបស់គាត់ ដែលបានសិក្សាឃើញនិងចេញផ្សាយដោយ The New England Journal of Medicine បានបង្ហាញថា អ្នកជំងឺជំងឺដាច់សរសៃឈាមខួរក្បាល ដាច់សរសៃឈាមខ្នាតតូច ឬការបាត់បង់ការមើលឃើញជាបណ្តោះអាសន្ន គឺកើតមានដោយសារតែការស្ទះសរសៃឈាមនៅចំណុចករបស់ពួកគេ ដែលមានកំហាប់មីក្រូប្លាស្ទិកខ្ពស់ជាងអ្នកដែលមានសុខភាពល្អ។ អ្នកជំងឺទាំងអស់នោះ នឹងប្រឈមជាមួយហានិភ័យខ្ពស់ពីការដាច់សរសៃឈាមខួរក្បាល ឬបេះដូង និងការគាំងបេះដូងជដើម។ ទាំងនេះបង្ហាញថា សារធាតុមីក្រូផ្លាស្ទិក បានធ្វើឲ្យមានការរលាកសរសៃឈាមយ៉ាងធ្ងន់ធ្ងរ។

យ៉ាងណាមិញ ចំពោះមូលហេតុលម្អិតជាងនេះត្រូវបានអ្នកជំនាញ កំពុងយកទៅសិក្សាបន្ថែមនៅក្នុងប្រព័ន្ធជីវសាស្រ្តសំខាន់ៗ ពាក់ព័ន្ធនឹងឥទ្ធិពលរបស់វាក្នុងការបង្ករជាជំងឺរ៉ាំរ៉ៃកាចសាហាវដូចជាជំងឺមហារីក និងការដាច់សរសៃឈាមនេះ ដើម្បីរកវិធីទប់ស្កាត់និងព្យាបាល។ ប៉ុន្តែអ្នកជំនាញក៏បានណែនាំផងដែរថា វិធីការពារខ្លួនពីការជ្រៀតចូលនៃសារធាតុមីក្រូផ្លាស្ទិកនេះគឺការបញ្ជប់ការប្រើប្រាស់ថង់ផ្លាស្ទិក ជាពិសេសយកទៅវេចខ្ចប់ម្ហូបអាហារ ផឹកទឹកស្អាតដែលមានការចម្រោះត្រឹមត្រូវ សម្អាតបរិវេណផ្ទះ ឬមជ្ឈដ្ឋានដែលអ្នករស់នៅជាប្រចាំ និងបោះចោលសម្ភារៈផ្ទះបាយណាដែលមានដាច់របកផ្នែកខ្មៅនៅបាតរបស់វា ជាពិសេសសម្រាប់ខ្ទះដែលចៀនមិនជាប់បាត៕

សហរដ្ឋអាមេរិក ៖ តើជ្រាបទេថា យន្តហោះសម្រាប់ឱ្យប្រធានាធិបតីអាមេរិកជិះទំនើបខ្លាំងប៉ុនណា? Air Force One គឺជាយន្តហោះសម្រាប់ប្រធានាធិបតីអាមេរិក ដែលមានទំហំធំបំផុត មានសុវត្ថិភាពបំផុត និងផ្តល់ភាពងាយស្រួលបំផុតលើពិភពលោក ។ វាមានកម្ពស់ស្មើអគារ៦ជាន់ ហោះក្នុងល្បឿន១ពាន់គីឡូម៉ែត្រក្នុង១ម៉ោង ហើយអាចចាក់ប្រេងឥន្ធនៈរហូត២សែនលីត្រ សម្រាប់ហោះហើរទៅប្រទេសនានាជុំវិញពិភពលោក និងពុំចាំបាច់ចុះចាក់ប្រេងឥន្ធនៈទៀតឡើយ ។

ប្រធានាធិបតីអាមេរិកនឹងមានបន្ទប់ពិសេសផ្ទាល់ខ្លួន ព្រមទាំងបន្ទប់សម្រាក បន្ទប់ទឹក បន្ទប់ហាត់ប្រាណ បន្ទប់ប្រជុំ បន្ទប់ទទួលទានអាហារ និងតុធ្វើការរបស់ប្រធានាធិបតី ។ រីឯបន្ទប់ចម្អិនអាហារនៅលើយន្តហោះ គឺមានចុងភៅធ្វើការចំនួន៣នាក់ ហើយពួកគេមានស្បៀងអាហារគ្រប់គ្រាន់អាចចម្អិនអាហារឱ្យមនុស្សប្រមាណ ១០០នាក់បរិភោគ ។

នៅផ្នែកខាងក្រោយនៃបន្ទប់ការិយាល័យរបស់ប្រធានាធិបតីអាមេរិក គឺមានបន្ទប់ពេទ្យជាច្រើនដែលមានឧបករណ៍សម្រាប់ព្យាបាលបេះដូង, មានឈាមបម្រុងទុក ហើយគ្រូពេទ្យអាចធ្វើការវះកាត់ក្នុងបន្ទប់ទាំងនេះបានក្នុងករណីបន្ទាន់ ។

គុណសម្បត្តិមួយរបស់យន្តហោះរបស់ប្រធានាធិបតីអាមេរិក គឺវាមានប្រព័ន្ធទំនាក់ទំនងដ៏ទំនើប ដោយសារបានបំពាក់បណ្តាញទំនាក់ទំនងជាច្រើន, មានទូរស័ព្ទ៨៥គ្រឿង និងទូរទស្សន៍២០គ្រឿង ។ បណ្តាញទំនាក់ទំនងនេះបានភ្ជាប់ប្រព័ន្ធរ៉េដា និងប្រព័ន្ធការពារសុវត្ថិភាព ដែលធ្វើឱ្យប្រធានាធិបតីអាមេរិក និងមន្ត្រីរដ្ឋាភិបាលអាចទាក់ទងជាមួយគ្រប់ប្រទេសទាំងអស់លើពិភពលោក ទោះជាយន្តហោះកំពុងហោះហើរខ្ពស់ជាច្រើនម៉ឺនគីឡូម៉ែត្រពីផែនដីក្តី ។

លើសពីនេះ យន្តហោះទាំងមូលបំពាក់ដោយប្រព័ន្ធការពារនៅផ្នែកខាងក្រៅ ដើម្បីទប់ទល់ជាមួយការផ្ទុះរបស់អាវុធនុយក្លេអ៊ែរដែលបាញ់ពីផែនដី ព្រមទាំងបំពាក់កញ្ចក់អាចការពារគ្រាប់បែកផ្ទុះ ។

សរុបមក យន្តហោះសម្រាប់ប្រធានាធិបតីអាមេរិក គឺត្រូវបានផលិតឡើងមានលក្ខណៈទំនើបបំផុត សុវត្ថិភាពបំផុត និងឧបករណ៍ជំនួយគ្រប់បែបយ៉ាង ។ វាថែមទាំងមានបណ្តាញសេវាដ៏ទំនើបសម្រាប់ឱ្យប្រធានាធិបតីអាមេរិកទំនាក់ទំនងទៅកាន់ប្រទេសណាក៏បាន ពេលយន្តហោះកំពុងហោះខ្ពស់ពីផែនដី ។

សេតវិមាន ដែលស្ថិតក្រោមការគ្រប់គ្រងរបស់ប្រធានាធិបតីអាមេរិក លោក Donald Trump ធ្លាប់មានគម្រោងផលិតយន្តហោះ Air Force One ថ្មីមួយទៀត ដោយចំណាយទឹកប្រាក់៤ពាន់លានដុល្លារ ប៉ុន្តែក៏បានផ្អាកវិញ ហើយមន្ត្រីសេតវិមាននឹងពិចារណាពីការផលិតយន្តហោះជាថ្មី ។ យើងឃើញថា យន្តហោះរបស់ប្រធានាធិបតីអាមេរិកប្រើប្រាស់បច្ចុប្បន្នមានលក្ខណៈទំនើបបំផុត ចុះទម្រាំយន្តហោះថ្មី តើទំនើបខ្លាំងប៉ុនណា? នេះអាចនិយាយបានវា វាស័ក្តិសមជាយន្តហោះរបស់មេដឹកនាំប្រទេសអំណាចមែន ៕

សហរដ្ឋអាមេរិក ៖ លោក Trump បានកាន់តំណែងជាប្រធានាធិបតីអាមេរិកម្តងទៀតក្រោយទទួលសំឡេងឆ្នោតច្រើនបំផុត ប៉ុន្តែតាមលទ្ធផលការស្ទង់មតិពលរដ្ឋអាមេរិកចំនួន១,៦៧៨នាក់ ចាប់ពីថ្ងៃទី១៧ ដល់ថ្ងៃទី២៤ ខែមេសា ឆ្នាំ២០២៥ ដោយ CNN សម្ភាសន៍តាមអនឡាញ និងទូរស័ព្ទបង្ហាញថា ប្រជាប្រិយភាពរបស់លោក Trump ធ្លាក់ចុះមុនកាន់តំណែងអាណត្តិទី២ បាន១០០ថ្ងៃ ។ លើសពីនេះ ពលរដ្ឋបានផ្តល់ពិន្ទុទាបសម្រាប់ការដោះស្រាយបញ្ហាផ្សេងៗដែលកើតឡើងនៅអាមេរិក ។

ការស្ទង់មតិរបស់ CNN ដែលធ្វើឡើងដោយអង្គការស្រាវជ្រាវ SSRS បានចុះផ្សាយកាលពីថ្ងៃទី២៧ ខែមេសា ឆ្នាំ២០២៥ គឺពលរដ្ឋអាមេរិកទទួលស្គាល់លទ្ធផលការងាររបស់លោក Trump ស្មើត្រឹម៤១% ប៉ុណ្ណោះ ។ វាជាអត្រាទាបបំផុតសម្រាប់ប្រធានាធិបតីអាមេរិកដែលទើបឈ្នះឆ្នោត និងកាន់តំណែងមិនដល់១០០ថ្ងៃ បើគិតចាប់ពីការកាន់តំណែងរបស់ប្រធានាធិបតីអាមេរិក លោក Dwight D. Eisenhower កាលពីជាង៧០ឆ្នាំមុន ។

ការទទួលស្គាល់លទ្ធផលការងាររបស់លោក Trump បានធ្លាក់ចុះ៤% ចាប់ពីខែមីនា ដល់ចុងខែមេសា ឆ្នាំ២០២៥ និងធ្លាក់ចុះ៧% បើគិតចាប់ពីចុងខែកុម្ភៈ កន្លងមក ។ ពលរដ្ឋស្មើត្រឹម២២% ប៉ុណ្ណោះ ដែលទទួលស្គាល់លទ្ធផលការងាររបស់លោក ដែលនេះជាអត្រាទាបបំផុត ខណៈពលរដ្ឋ៤៥% មិនទទួលស្គាល់លទ្ធផលការងារលោក ។

ពលរដ្ឋបានផ្តល់ពិន្ទុទាបសម្រាប់ការដោះស្រាយបញ្ហាផ្សេងៗរបស់លោក Trump ហើយទំនុកចិត្តរបស់ពលរដ្ឋទៅលើសមត្ថភាព និងការដោះស្រាយវិបត្តិសេដ្ឋកិច្ចរបស់លោកក៏ធ្លាក់ចុះដែរ ។ វិធានការដំឡើងពន្ធទំនិញរបស់លោកបណ្តាលឱ្យមានការលក់ចេញក្នុងទីផ្សារភាគហ៊ុន ហើយពលរដ្ឋបារម្ភពីតម្លៃទំនិញកើនឡើង ខណៈពលរដ្ឋត្រឹម៣៥% ទទួលស្គាល់ការដោះស្រាយអតិផរណា ធ្លាក់ចុះ៩% រីឯការទទួលស្គាល់វិធានការពន្ធធ្លាក់ចុះ៤% ។

ពលរដ្ឋឆ្លើយតបការស្ទង់មតិ ស្មើ៥២% មានទំនុកចិត្តលើសមត្ថភាពដោះស្រាយបញ្ហាសេដ្ឋកិច្ចរបស់លោក Trump ដែលធ្លាក់ចុះរហូតដល់១៣% ពីការស្ទង់មតិរបស់ CNN កាលពីខែធ្នូ ឆ្នាំ២០២៤ ។ ការផ្តល់ពិន្ទុរបស់ពលរដ្ឋទៅលើការគ្រប់គ្រងរដ្ឋាភិបាល ធ្លាក់ចុះ៦% នៅសល់ត្រឹម៤២% តាំងពីខែមីនា ឆ្នាំ២០២៥ ដោយសារលោក Trump ព្យាយាមកាត់បន្ថយមន្ត្រីរាជការយ៉ាងច្រើន ។ អ្នកឆ្លើយតបការស្ទង់មតិ៤៣% យល់ថា លោក Trump បានបំពេញការងារសម្រាប់ការផ្លាស់ប្តូររដ្ឋាភិបាល ខណៈអ្នកឆ្លើយ៥៧% យល់ថា លោកពុំចាំបាច់ធ្វើទេ ពីព្រោះនាំឱ្យប្រទេសធ្លាក់ក្នុងវិបត្តិ ។

ចំណែកគោលនយោបាយការបរទេសរបស់លោក Trump ដូចជា៖ អាមេរិកធ្វើជាមិត្តជាមួយរុស្ស៊ីក្នុងការធ្វើសង្គ្រាមនៅអ៊ុយក្រែន, ការឈប់ផ្តល់ជំនួយក្រៅប្រទេស គឺពលរដ្ឋត្រឹម៣៩% ប៉ុណ្ណោះដែលគាំទ្រលោក ខណៈពលរដ្ឋ៦០% ពុំគាំទ្រ ហើយពលរដ្ឋមួយចំនួនតូចមានទំនុកចិត្តលើការដោះស្រាយបញ្ហាការបរទេស ។

ការដោះស្រាយបញ្ហាជនភៀសខ្លួនរបស់លោក Trump ក៏ទទួលការគាំទ្រតិចពីពលរដ្ឋដែរ គឺពលរដ្ឋត្រឹម៤៥% ប៉ុណ្ណោះដែលគាំទ្រលោកឱ្យបណ្តេញជនភៀសខ្លួន ធ្លាក់ចុះ៦% បើធៀបនឹងខែមីនា ឆ្នាំ២០២៥ ។ ប៉ុន្តែលោក Trump ទទួលបានពិន្ទុខ្ពស់ពីពលរដ្ឋ គឺការដោះស្រាយបញ្ហាយេនឌ័រ និងមនុស្សកែភេទ ដែលពលរដ្ឋ៥១% គាំទ្រចំណាត់ការរបស់លោក ។

ពលរដ្ឋយល់ថា លោក Trump បានប្រើប្រាស់អំណាចប្រធានាធិបតីគ្មានការទទួលខុសត្រូវ ពីព្រោះលោកចេញបទបញ្ជាច្រើនដើម្បីផ្លាស់ប្តូររដ្ឋាភិបាល និងប្រឈមជាមួយការប្តឹងក្នុងតុលាការ ។ ពលរដ្ឋជាង៥២% ជឿថា ការកាន់តំណែងអាណត្តិទី២ របស់លោក Trump នឹងធ្វើឱ្យអាមេរិកឈានទៅរកការផ្លាស់ប្តូរយូរអង្វែង ខណៈពលរដ្ឋ៣៦% ជឿថា ការផ្លាស់ប្តូរនានានឹងបញ្ចប់ក្រោយលោក Trump អស់អាណត្តិ ហើយពលរដ្ឋ១២% ជឿថា លោកដឹកនាំប្រទេសពុំរីកចម្រើន ៕