កម្ពុជាមានឈ្មោះក្នុងតារាងនៃប្រទេសទាំង១០ ដែលល្អបំផុតសម្រាប់បុគ្គលិកជាជនបរទេស

ប្រទេសកម្ពុជា បានជាប់ក្នុងចំណាត់ថ្នាក់ប្រទេសទាំង១០ ជាជម្រើសប្រទេសល្អបំផុតសម្រាប់ជនបរទេសក្នុងការស្វែងរកការងារធ្វើនៅក្រៅប្រទេស។ នេះបើយោងតាមគេហទំព័រ GoOverseas ដែលជាមាតិការអនឡាញដ៏ល្បីមួយលំដាប់អន្តរជាតិ បានចុះផ្សាយកាលពីថ្មីៗនេះ។

គេហទំព័រ GoOverseas គឺជាវេទិការអនឡាញ ដែលតែងផ្ដល់យោបល់ប្រឹក្សា ការណែនាំ និងចែករំលែកបទពិសោធន៍ អំពីការស្វែងរកការងារធ្វើនៅក្រៅប្រទេស ការបន្តការសិក្សានៅបរទេស ការចូលរួមការងារស្ម័គ្រចិត្ត និងចំណេះដឹងផ្សេងៗជាច្រើនទៀត ដែលមាននៅក្នុងប្រទេសនីមួយៗនៅលើពិភពលោក។

ដោយឡែក ការចាត់ថ្នាក់ខាងលើរបស់ GoOverseas បានបង្ហាញថាកម្ពុជាស្ថិតនៅលេខរៀងទី១០ ក្នុងចំណោមប្រទេសផ្សេងៗជាច្រើននៅលើពិភពលោក។ ចំណែកឯចំណាត់ថ្នាក់ទាំង១០ ដែលរាប់ចាប់ពីលេខ១ទៅមានដូចជា ៖ 1. នូវែលសេឡង់ 2. ប្រទេសហូឡង់ 3. កូរ៉េខាងត្បូង ៤.អូស្ត្រាលី 5. ប្រទេសអាល្លឺម៉ង់ ៦.ប្រេស៊ីល 7. ដាណឺម៉ាក 8. បូតស្វាណា 9. ប្រទេសកាណាដា 10. កម្ពុជា។ ការចាត់ថ្នាក់នេះផងដែរក៏បានបង្ហាញថា កម្ពុជាគឺជាប្រទេសតែមួយគត់នៅក្នុងអាស៊ាន ដែលមានវត្តមាននៅលើតារាងមួយនេះ។

ចំពោះមូលហេតុ ឬកត្តាជំរុញក្នុងការដែលគេអាចធ្វើការចាត់ចំណាត់ថ្នាក់បាន គឺតាមរយៈតុល្យភាពការងារ ជីវិត និងចំណាត់ថ្នាក់សុភមង្គល (ក្នុងចំណោម 143 ប្រទេស) តម្លៃនៃការរស់នៅ ភាពងាយស្រួលនៃការទទួលបានទិដ្ឋាការការងារ និងឱកាសការងារនៅក្នុងប្រទេសទាំងនោះ។

GoOverseas បានលើកឡើងថា ប្រទេសកម្ពុជាគឺជាមជ្ឈមណ្ឌលដ៏សំខាន់មួយសម្រាប់សហគមន៍ជនបរទេសក្នុងការស្វែងរកការងារធ្វើនៅក្រៅប្រទេស។ ហើយថ្មីៗនេះ កម្ពុជាបានទាក់ទាញចំណាប់អារម្មណ៍របស់នយោជិកជាជនបរទេសពីចម្ងាយជាច្រើន ដែលកំពុងស្វែងរកទីកន្លែងធ្វើការ ដែលមានការចំណាយទាបលើការរស់នៅ មានវប្បធម៌ដ៏ស្រស់ស្អាត អាកាសធាតុត្រូពិចដ៏អំណោយផល និងមុខម្ហូបអាហារដ៏សម្បូរបែបមានទាំងអាហារតាមតំបន់ និងលំដាប់ពិភពលោក។

គេហទំព័រខាងលើបានបន្តទៀតថា ចាប់ពីរាជធានីដ៏រស់រវើកនៃទីក្រុងភ្នំពេញ ដល់ទីក្រុងប្រវត្តិសាស្រ្តដ៏ស្ងប់ស្ងាត់នៃខេត្តសៀមរាប ពលករអន្តរជាតិអាចជួលកន្លែងស្នាក់បានជាមធ្យមត្រឹមតែ 300 ដុល្លារប៉ុណ្ណោះក្នុងមួយខែ ហើយអាចរកកន្លែងធ្វើការដែលនៅក្បែរនោះបានយ៉ាងងាយ។ ក្រៅពីធ្វើការក្នុងOffice ឬនៅក្រុមហ៊ុន យើងក៏អាចចូលហាងកាហ្វេធ្វើការដោយមានFree Wi-Fi និងទទួលបានការស្វាគមន៍យ៉ាងរាក់ទាក់ផងដែរ។ សម្រាប់ការចំណាយលើម្ហូបអាហារហូបចុកប្រចាំថ្ងៃ គេប៉ាន់ប្រមាណថាអាចអស់ត្រឹម 5ដុល្លារប៉ុណ្ណោះក្នុងមួយថ្ងៃសម្រាប់បុគ្គលដែលរស់នៅម្នាក់ឯង។

កត្តាដែលបានរៀបរាប់ខាងលើរួមមាន ការចំណាយទាបក្នុងការរស់នៅ ភាពងាយស្រួលក្នុងការស្វែងរកការងារសម្រាប់ជនបរទេស លក្ខខណ្ឌអាកាសធាតុ ម្ហូបអាហារ ប្រជាជនមានភាពរួសរាយ ការកម្សាន្តសប្បាយដែលមានទាំងទីកន្លែងបែបធម្មជាតិ ប្រវត្តិសាស្រ្ត និងវប្បធម៌ដ៏សម្បូរបែប នឹងបង្កើតបរិយាកាសរីករាយ ល្អបំផុតសម្រាប់ជនបរទេសក្នុងការផ្លាស់ប្ដូរមកធ្វើការ និងរស់នៅក្នុងប្រទេសនេះ៕