តារាចម្រៀង អេនណា រិតា ប្រកាសដើរចេញពីផលិតកម្មសាស្រ្តាហ្វៀមបន្ទាប់ពីរួមដំណើរជាមួយគ្នាជាច្រើនឆ្នាំដោយបន្តធ្វើជាសិល្បការិនីឯករាជ្យ។ ទោះបីជាចាកចេញពិតមែន រិតា ក៏មិនភ្លេចអរគុណទៅកាន់លោកស្រី ប៊ុន ចាន់និមល ដែលជាអតីតនាយិការបស់ខ្លួនផងដែរ។
នៅថ្ងៃទី៣ មិថុនា ម្ចាស់បទ «ប្រហែលជាមេឃធ្លាក់ខ្យល់ខ្លាំងពេក» បានចេញមកប្រកាសថា « ជម្រាបសួរពុកម៉ែបងប្អូនទាំងអស់គ្នា ថ្ងៃនេះនាងខ្ញុំ អេនណា រិតា មានដំណឹងចង់ប្រាប់ទៅកាន់ពុកម៉ែបងប្អូនទាំងអស់គ្នាថា ថ្មីៗនេះនាងខ្ញុំទើបតែបញ្ចប់អាណត្តិកុងត្រាការងារ ពីផលិតកម្ម “សាស្រ្តាហ្វៀម” ហើយនាងខ្ញុំសម្រេចចិត្តថានឹងបន្តដំណើរលើវិថីសិល្បៈនេះម្នាក់ឯងវិញពោលគឺ ‘’សិល្បករឯករាជ្យ ’’ »។
នៅចុងបញ្ចប់នៃសំណេររបស់ខ្លួន អេនណា រិតា ក៏មិនភ្លេចថ្លែងអំណរគុណដល់ អតីតអគ្គនាយិការបស់នាងគឺលោកស្រី ‘’ប៊ុន ចាន់និមល’’ ដែលបានជួយជ្រោមជ្រែង បង្ហាត់បង្រៀន និង ផ្តល់ជម្រកឱ្យនាង រយៈពេលច្រើនឆ្នាំមកនេះ។ ក្នុងនោះ រិតា បានបញ្ជាក់ពាក្យយ៉ាងមានអត្ថន័យថា «មានថ្ងៃនេះដោយសារម្សិលមិញ» ដែលជាពាក្យមានន័យគ្រប់គ្រាន់នៃការដឹងគុណនៃទ្រនំចាស់របស់នាង។
ស្ថិតនៅក្នុងទ្រនំសាស្តា្រហ្វៀម តារាចម្រៀង អេនណា រិតា បានធ្វើឱ្យទស្សនិកជនស្គាល់តាមរយៈបទ «អ្នកក្រោយច្បាស់លាស់» ដែលមានការស្តាប់ ជាង១៧លានដង។ ក្រោយមក អេនណា រិតា បានសាងប្រជាប្រិយភាពបន្តជាមួយនឹងបទជាច្រើនទៀតដូចជា « «មនុស្សតែម្នាក់»«ប្រហែលជាមេឃធ្លាក់ខ្យល់ខ្លាំងពេក» «ឆាកចុងបញ្ចប់» ខណៈចុងក្រោយនេះបានសហការជាមួយនឹង ប៉ៃ ដាវីឌ លើបទ «ព្រមបែកហើយ»៕
