នាយកដ្ឋានបង្ការ និងកាត់បន្ថយគ្រោះមហន្តរា.យថៃបានប្រកាសអាសន្នទៅកាន់ពលរដ្ឋនៅទូទាំងប្រទេស ជាពិសេស អ្នករស់នៅក្នុងខេត្តចំនួន៧១ (ភាគខាងជើង ខាងត្បូង ឦសាន កណ្តាល និងទីក្រុងបាងកក) ឱ្យបង្កើនការប្រុងប្រយ័ត្នខ្ពស់ដើម្បីចៀសវាងគ្រោះថ្នា.ក់ដោយសារភ្លៀងធ្លាក់ខ្លាំង ទឹកហូរពីព្រៃភ្នំ ទឹកជំនន់ភ្លាមៗ បាក់ដី និងខ្យល់កន្ត្រាក់ ចាប់ពីថ្ងៃទី២៨ ខែឧសភា ដល់ថ្ងៃទី១ ខែមិថុនា ឆ្នាំ២០២៦ ។ គ្រោះធម្មជាតិនេះកើតឡើងដោយសារឥទ្ធិពលខ្យល់មូសុងនិរតីបក់បោកយ៉ាងខ្លាំងគ្របដណ្តប់លើសមុទ្រអាន់ដាម៉ាន់ ឈូងសមុទ្រថៃ និងសម្ពាធទាប ។

នាយកដ្ឋានបង្ការ និងកាត់បន្ថយគ្រោះមហន្តរាយបានតាមដានអាកាសធាតុ និងគ្រោះថ្នាក់ដែលនឹងកើតឡើងនៅប្រទេសថៃ ស្របពេលនាយកដ្ឋានឧតុនិយមប្រកាសពីភ្លៀងធ្លាក់ខ្លាំង និងខ្យល់កន្ត្រាក់ ចំនួន៥ថ្ងៃ (ចាប់ពីថ្ងៃទី២៨ ខែឧសភា ដល់ថ្ងៃទី១ ខែមិថុនា) ថា ភាគខាងជើង ខាងត្បូង ឦសាន កណ្តាល និងទីក្រុងបាងកក នឹងមានភ្លៀងធ្លាក់ខ្លាំងនាំឱ្យមានទឹកជំនន់ភ្លាមៗ ទឹកហូរពីព្រៃភ្នំ បាក់ដី និងខ្យល់កន្ត្រាក់ ។

អាជ្ញាធរទាំង៧១ខេត្ត មានតួនាទីតាមដានអាកាសធាតុ បរិមាណទឹកភ្លៀង និងស្ថានការណ៍ទឹកជំនន់ ២៤ម៉ោងលើ២៤ម៉ោង រួមទាំងត្រៀមក្រុមជួយសង្គ្រោះ ឧបករណ៍សង្គ្រោះ និងទូក នៅតំបន់រងផលប៉ះពាល់ ឬតំបន់មានទឹកជំនន់ញឹកញាប់ ដោយជម្លៀសពលរដ្ឋទៅទួលសុវត្ថិភាព ។ រីឯតំបន់ទេសចរណ៍ទឹកជ្រោះ ឬល្អាង ប្រសិនបើមានគ្រោះធម្មជាតិកើតឡើង ត្រូវជូនដំណឹង និងបិទច្រកចូលបណ្តោះអាសន្ន ។ អំឡុងពេលនេះដែរ ក៏មានរលកសមុទ្រធំៗនៅតំបន់ឆ្នេរ ដោយហាមឃាត់ភ្ញៀវទេសចរកុំឱ្យលេងទឹក និងហាមការនេសាទតាមទូកតូចៗ ។

គ្រោះធម្មជាតិនៅប្រទេសថៃនឹងជះឥទ្ធិពលដល់ប្រទេសជិតខាងផងដែរ ដែលពលរដ្ឋប្រទេសជិតខាងគួរតែបង្កើនការប្រុងប្រយ័ត្នឱ្យបានខ្ពស់ក្នុងអំឡុងពេលថៃប្រកាសអាសន្នរយៈពេល៥ថ្ងៃនេះ ។

គួរបញ្ជាក់ថា ប្រទេសថៃតែងតែជួបប្រទះគ្រោះមហន្តរាយធម្មជាតិញឹកញាប់ដោយសារកត្តាភូមិសាស្ត្រ និងបម្រែបម្រួលអាកាសធាតុ ខណៈការកាប់ព្រៃឈើធ្វើឱ្យដីបាត់បង់សមត្ថភាពស្រូបទឹក ដូច្នេះ ពេលមានភ្លៀងធ្លាក់ខ្លាំងបណ្តាលឱ្យទឹកហូរពីតំបន់ព្រៃភ្នំ និងបាក់ដី ។ ក្រៅពីគ្រោះធម្មជាតិ ប្រទេសថៃបានរងឥទ្ធិពលគ្រោះរញ្ជួយដីដែលកើតឡើងជាបន្តបន្ទាប់នៅប្រទេសមីយ៉ាន់យ៉ា ៕

លេងក្បាច់ធ្វើល្ងង់ទៀតហើយ! នាយករដ្ឋមន្ត្រី អានុទីន ឆាន់វីរ៉ាគុល របស់ថៃបាននិយាយច្បាស់ៗនៅចំពោះមុខអ្នកកាសែតថា ផែនទីខ្នាត ១:២០០,០០០ ដែលមានច្បាប់អន្តរជាតិ និងតុលាការពិភពលោកទទួលស្គាល់ត្រឹមត្រូវ​ លែងមានអត្ថិភាពសម្រាប់ថៃហើយ! ដោយថៃកំពុងដុតដៃដុតជើងរត់ទៅរកបារាំង និង UNESCO ដើម្បីស្វែងរកមធ្យោបាយប្រើប្រាស់ប្រព័ន្ធបច្ចេកទេស និងផែនទីផ្ទាល់ខ្លួនវិញ។ នេះបើយោងតាមការចុះផ្សាយផ្សាយរបស់កាសែត​The Nation Thailand របស់ថៃ។
 
នៅក្នុងកិច្ចសម្ភាសន៍ដ៏គួរឱ្យចាប់អារម្មណ៍មួយ ក្នុងអំឡុងពេលបំពេញទស្សនកិច្ចនៅពិព័រណ៍ Thaifex Anuga Asia 2026 កាលពីយប់ថ្ងៃទី២៧ ខែឧសភា ឆ្នាំ២០២៦ ប្រមុខរដ្ឋាភិបាលថៃរូបនេះ បានទម្លាយពីលទ្ធផលនៃបេសកកម្មការទូតរបស់លោកទៅកាន់ប្រទេសបារាំង និងទីស្នាក់ការកណ្តាលរបស់អង្គការ UNESCO នាទីក្រុងប៉ារីស ដើម្បីបំភ្លឺនូវអ្វីដែលលោកហៅថាជាការយល់ច្រឡំជាអន្តរជាតិជុំវិញខ្សែបន្ទាត់ព្រំដែន។
 
នៅក្នុងជំនួបកម្រិតកំពូលនោះ លោក អានុទិន បានបង្ហាញជំហររឹងត្អូសដោយបដិសេធមិនយកខ្សែបន្ទាត់ខណ្ឌសីមាដែលគូរដោយបារាំងកាលពីអតីតកាល មកធ្វើជាបន្ទាត់គោលក្នុងការចរចាជាមួយកម្ពុជានោះឡើយ ទោះបីជាផែនទីខ្នាត ១:២០០,០០០ នេះ ធ្លាប់ជាអាវុធផ្លូវច្បាប់ដ៏សំខាន់ជួយឱ្យកម្ពុជាឈ្នះក្តីប្រាសាទព្រះវិហារនៅលើឆាកអន្តរជាតិក៏ដោយ។
 
អ្វីដែលធ្វើឱ្យសហគមន៍អន្តរជាតិស្រឡាំងកាំងនោះគឺ ​នាយករដ្ឋមន្ត្រីថៃបានថ្លែងសង្កត់ធ្ងន់ចំៗថា៖ «សម្រាប់ប្រទេសថៃ ខ្នាត ១:២០០,០០០ គឺលែងមានទៀតហើយ។ ប្រសិនបើមាននរណាម្នាក់ចង់មកបង្ខំឱ្យប្រើខ្នាតមួយនោះ គឺពួកគេកំពុងតែមើលទៅរកប្រទេសផ្សេងស្រឡះទៅហើយ»។ ផ្ទុយទៅវិញ លោក អានុទីន បានទទូច និងបង្ហាញមហិច្ឆតាយ៉ាងច្បាស់ក្នុងការបង្ខំឱ្យមានការប្រើប្រាស់ប្រព័ន្ធបច្ចេកទេសវាស់វែងផ្ទាល់ខ្លួនរបស់រដ្ឋាភិបាលថៃ គឺផែនទីខ្នាត ១:៥០,០០០ ដែលថៃខ្លួនឯងជាអ្នកគូរឡើងវិញ ដែលប្រព័ន្ធថ្មីនេះត្រូវបានគេមើលឃើញថា អាចនឹងផ្តល់ផលចំណេញផ្នែកទឹកដីទៅខាងភាគីថៃយ៉ាងច្រើនក្នុងការចរចាព្រំដែនដីគោក និងតំបន់សមុទ្រត្រួតស៊ីគ្នា (OCA)។
 
សូមជម្រាបថា តាមទំព័រប្រវត្តិសាស្ត្រ ផែនទីខ្នាត ១:២០០,០០០ នេះ ត្រូវបានគូរឡើងដោយគណៈកម្មការចម្រុះបារាំង-សៀម ចន្លោះឆ្នាំ១៩០៤ ដល់ឆ្នាំ១៩០៧ យោងតាមសន្ធិសញ្ញាព្រំដែនផ្លូវការរវាងប្រទេសទាំងពីរ ហើយផែនទីឧបសម្ព័ន្ធទី១ នៃឯកសារនេះហើយ ដែលជាភស្តុតាងច្បាប់ដ៏រឹងមាំបំផុតជួយឱ្យកម្ពុជាឈ្នះក្តីវិវាទប្រាសាទព្រះវិហារ នៅតុលាការយុត្តិធម៌អន្តរជាតិ (ICJ) ទាំងនៅក្នុងឆ្នាំ១៩៦២ និងការបកស្រាយដីកាឡើងវិញក្នុងឆ្នាំ២០១៣។

ដូច្នេះការចេញមកប្រកាសមិនទទួលស្គាល់ផែនទីអន្តរជាតិពីសំណាក់មេដឹកនាំថៃនាពេលនេះ​ អ្នកវិភាគការបរទេសបានយល់ឃើញថា គឺជាយុទ្ធសាស្ត្រការទូតវាយលុកមួយ ដើម្បីដកហូតអាវុធផ្លូវច្បាប់ក្នុងដៃរបស់កម្ពុជា និងព្យាយាមលុបបំបាត់ឥទ្ធិពលនៃសាលដីកាប្រវត្តិសាស្ត្រ។ ទោះជាយ៉ាងណាក៏ដោយ ការព្យាយាមទាត់ចោលឯកសារច្បាប់អន្តរជាតិ ហើយងាកមកបង្ខំឱ្យប្រើប្រាស់ប្រព័ន្ធផ្ទាល់ខ្លួនរបស់ថៃបែបនេះ អាចនឹងធ្វើឱ្យការចរចាព្រំដែនរវាងប្រទេសជិតខាងទាំងពីរជួបភាពទាល់ច្រក និងបង្កជាភាពតានតឹងផ្នែកយោធាជាថ្មីនៅតាមបណ្តោយព្រំដែន៕

រដ្ឋាភិបាលវៀតណាមបានកំណត់គោលដៅដ៏ធំធេងអភិវឌ្ឍន៍ហូជីមិញឱ្យក្លាយជាទីក្រុងឆ្លាតវៃ ទំនើបទាន់សម័យ ស៊ីវិល័យ និងជាមជ្ឈមណ្ឌលសេដ្ឋកិច្ច-ហិរញ្ញវត្ថុលំដាប់ពិភពលោកនាឆ្នាំ២០៧៥ ដោយផ្តោតសំខាន់លើការកែលម្អហេដ្ឋារចនាសម្ព័ន្ធ និងប្រើប្រាស់បច្ចេកវិទ្យាគ្រប់វិស័យ ដើម្បីលើកកម្ពស់ជីវភាពរស់នៅរបស់ពលរដ្ឋឱ្យកាន់តែល្អប្រសើរ ។

កាលពីថ្ងៃទី២៦ ខែឧសភា ឆ្នាំ២០២៦ សារព័ត៌មានវៀតណាមរាយការណ៍ថា ទីក្រុងហូជីមិញ ដែលជាមជ្ឈមណ្ឌលសេដ្ឋកិច្ចនៅភាគខាងត្បូងប្រទេសវៀតណាម នឹងត្រូវអភិវឌ្ឍន៍គ្រប់វិស័យឱ្យក្លាយជាទីក្រុងឆ្លាតវៃ និងទាន់សម័យលំដាប់ពិភពលោកនាឆ្នាំ២០២៧ ដូចគ្នានៅទីក្រុងធំៗនៅបណ្តាប្រទេសអភិវឌ្ឍន៍ ។ រដ្ឋាភិបាលរំពឹងថា ទីក្រុងនេះនឹងនៅតែរក្សាកំណើនផលិតផលក្នុងស្រុកសរុប (GDP) មិនក្រោម៦% ជារៀងរាល់ឆ្នាំ (ចាប់ពីឆ្នាំ២០៤៦ ដល់ឆ្នាំ២០៧៥) ។

ការកំណត់គោលដៅដ៏ធំធេងនេះ ត្រូវបានផ្សព្វផ្សាយដោយការិយាល័យបក្សកុម្មុយនិស្តវៀតណាមកាលពីពេលកន្លងមក និងបញ្ជាក់ថា វាជាការសម្រេចចិត្តកសាង និងអភិវឌ្ឍន៍ទីក្រុងហូជីមិញឱ្យទាន់សម័យបំផុត មិនចាញ់បណ្តាទីក្រុងធំៗក្នុងតំបន់ និងពិភពលោក ។

គោលដៅរយៈពេលវែង មិនត្រឹមតែផ្លាស់ប្តូរមុខមាត់ទីក្រុងហូជីមិញប៉ុណ្ណោះទេ វាក៏ជួយពន្លឿនកំណើនសេដ្ឋកិច្ចរបស់ប្រទេសវៀតណាមផងដែរ ក្នុងការប្រកួតប្រជែងជាមួយទីក្រុងផ្សេងទៀត ។ បច្ចុប្បន្ន ទីក្រុងដែលមានពលរដ្ឋរស់នៅកកកុញរាប់លាននាក់នេះ គឺជាមជ្ឈមណ្ឌលសេដ្ឋកិច្ច ហិរញ្ញវត្ថុ និងវប្បធម៌ដ៏ល្បីល្បាញនៅក្នុងប្រទេស ។

គួរបញ្ជាក់ថា នៅឆ្នាំ២០៧៥ គឺជាគម្រប់ខួប១០០ឆ្នាំ នៃការបង្រួបបង្រួមជាតិវៀតណាម ហើយរដ្ឋាភិបាលវៀតណាមប្តេជ្ញាចិត្តសម្រេចឱ្យបាននូវការអភិវឌ្ឍទីក្រុងនេះឱ្យរីកចម្រើនជឿនលឿនប្រកបដោយនិរន្តរភាព ក៏ដូចជាបង្កើនសមត្ថភាពក្នុងការទប់ទល់ជាមួយបម្រែបម្រួលអាកាសធាតុផងដែរ ៕

របត់ការទូតថ្មីចុងក្រោយបង្អស់របស់ប្រទេសថៃត្រូវបានគេសង្កេតឃើញថា កំពុងចូលទៅកៀកបារាំងយ៉ាងចម្លែក ទាំងដែលនៅក្នុងប្រវត្តិសាស្រ្តយើងបានដឹងយ៉ាងច្បាស់ថា ថៃនិងបារាំងមិនសូវមានទំនាក់ទំនងល្អនឹងគ្នាប៉ុន្មានឡើយ។ ការណ៍នេះកើតឡើងដោយសារតែបារាំងធ្លាប់កាត់ទឹកដីនៃខេត្តចំនួន ៣ ដែលថៃខំដណ្ដើមពីខ្មែរ ប្រគល់មកឲ្យខ្មែរវិញ ដែលធ្វើឲ្យជនជាតិថៃចាប់តាំងពីរាស្រ្តសាមញ្ញ រហូតដល់សែរាជវង្សមានការឈឺចាប់ និងចងកំហឹ.ងជាមួយបារាំងជាខ្លាំង។ តើហេតុអ្វីពេលនេះថៃបែរទៅចងមិត្តជិតស្និទ្ធជាមួយបារាំងទៅវិញ?

តាមពិតទៅ នៅក្នុងឆាកនយោបាយអន្តរជាតិ «គ្មានមិត្តអចិន្ត្រៃយ៍ ហើយក៏គ្មានសត្រូវអចិន្ត្រៃយ៍ដែរ មានតែផលប្រយោជន៍ជាតិប៉ុណ្ណោះដែលអមតៈ»។ ការរត់ទៅរកការចងសម្ព័ន្ធមិត្តយ៉ាងជិតស្និទ្ធជាមួយប្រទេសបារាំង គឺជាភស្តុតាងជាក់ស្តែងដែលកំពុងបង្កើតឲ្យមានការវិភាគដេញដោលយ៉ាងក្តៅគគុក ពីព្រោះបើក្រឡេកទៅមើលទំព័រប្រវត្តិសាស្ត្រ បារាំងគឺជាប្រទេសដែលបានបន្សល់ទុកនូវ «ស្នាមរបួសដ៏ជ្រៅបំផុត» នៅក្នុងចិត្តរបស់ជនជាតិថៃ។

អស់រយៈពេលជាងមួយសតវត្សរ៍មកហើយដែលប្រវត្តិសាស្ត្រនៃវិបត្តិឆ្នាំ ១៨៩៣ និងសន្ធិសញ្ញាឆ្នាំ ១៩០៧ ត្រូវបានកត់ត្រានិងដក់ជាប់ក្នុងផ្នត់គំនិតកូនចៅថៃជំនាន់ក្រោយថាជា «ការបាត់បង់ទឹកដីដ៏អាម៉ាស់បំផុត»។ កាលនោះ ក្រោមឥទ្ធិពលនៃកាំភ្លើងធំនិងនាវាចម្បាំងបារាំង ប្រទេសសៀម (ថៃ) ត្រូវបានបង្ខំចិត្តកាត់ទឹកដីដែលខ្លួនធ្លាប់វាយដណ្តើមបានពីខ្មែរ រួមមាន ខេត្តសៀមរាប បាត់ដំបង និងសិរីសោភ័ណ ប្រគល់មកឲ្យកម្ពុជាវិញ ដើម្បីប្តូរនឹងឯករាជ្យភាពរបស់ខ្លួន។

មិនត្រឹមតែប៉ុណ្ណោះ ផែនទីព្រំដែនដែលគូរឡើងដោយមន្ត្រីបារាំងនាពេលនោះ (ផែនទីឧបសម្ព័ន្ធទី១) គឺជាអាវុធដ៏មុតស្រួចដែលជួយឲ្យកម្ពុជាឈ្នះក្តីប្រាសាទព្រះវិហារនៅលើឆាកអន្តរជាតិទាំងនៅក្នុងឆ្នាំ ១៩៦២ និងឆ្នាំ ២០១៣។ ភាពឈឺចាប់ដែលបារាំងបានបង្កនេះ ធ្លាប់បានធ្វើឲ្យថ្នាក់ដឹកនាំ និងក្រុមអ្នកជាតិនិយមថៃស្អប់ខ្ពើម និងគុំកួននឹងបារាំងយ៉ាងខ្លាំង រហូតដល់បង្កើតជាសង្គ្រាមទាមទារទឹកដីវិញកាលពីសម័យសង្គ្រាមលោកលើកទីពីរ។

ដោយឡែក ចំពោះសំណួរដ៏ធំមួយដែលចោទសួរថា ហេតុអ្វីបានជាពេលនេះ ថៃសុខចិត្តលេបទឹកភ្នែកជូតក្បាលជង្គង់ មករឹតបន្តឹងចំណងសម្ព័ន្ធមិត្តជាមួយបារាំងបែបនេះទៅវិញ? អ្នកវិភាគការបរទេសបានមើលឃើញថា គឺជាការទាញចិត្តបារាំងឲ្យមកឈរខាងខ្លួនវិញ ឬយ៉ាងហោចណាស់ ក៏សុំឲ្យបារាំងផ្តល់ទិន្នន័យ និងសក្ខីកម្មថ្មីៗដើម្បីជួយសម្រួលដល់ការចរចាព្រំដែន ទាំងដីគោក និងតំបន់សមុទ្រត្រួតស៊ីគ្នា (OCA) ជាមួយកម្ពុជា។

ម្យ៉ាងទៀតការលើកឡើងអំពីបញ្ហាព្រំដែន និងបញ្ជាក់ពីគោលជំហររបស់ថៃជាបន្តបន្ទាប់នៅចំពោះប្រធានាធិបតីបារាំង និងអន្តរជាតិហាក់ឆ្លុះបញ្ចាំងពីការទប់ស្កាត់ឥទ្ធិពលការទូតរបស់កម្ពុជានៅ UNESCO ឬវេទិការរបស់អង្គការសហប្រជាជាតិ ដើម្បីកុំឲ្យអន្តរជាតិលម្អៀងទៅខាងកម្ពុជា។ ដូចគ្នានេះដែរ នៅក្នុងពិភពលោកសម័យទំនើប ការឱបក្រសោបការឈឺចាប់ក្នុងប្រវត្តិសាស្ត្រមិនអាចជួយឲ្យសេដ្ឋកិច្ចដើរទៅមុខបានឡើយ ដូចនេះថៃត្រូវបង្ខំចិត្តបោះបង់ភាពកម្សត់ពាក្យសម្តីពីអតីតកាល ដើម្បីយកផលប្រយោជន៍ជាក់ស្តែងនៅចំពោះមុខ។ ហេតុនេះក្រៅពីបញ្ហាព្រំដែន ថៃកំពុងត្រូវការបារាំងជាខ្នងបង្អែកផ្នែកបច្ចេកវិទ្យាយោធា និងពាណិជ្ជកម្មជាមួយសហភាពអឺរ៉ុប។

សរុបមកការបង្វែរទិសដៅការទូតរបស់ថៃទៅរកបារាំងនាពេលនេះ មិនមែនកើតឡើងដោយសារតែក្តីស្រឡាញ់នោះទេ ប៉ុន្តែវាគឺជា «ល្បែងអុកនយោបាយដ៏ចាស់ទុំ» មួយ ដែលថៃកំពុងព្យាយាមប្រើប្រាស់ដៃគូប្រវត្តិសាស្ត្ររបស់កម្ពុជា ឲ្យមកក្លាយជាខ្នងបង្អែករបស់ខ្លួនវិញ ដើម្បីទប់ទល់នឹងឥទ្ធិពលការទូតរបស់កម្ពុជានៅលើឆាកអន្តរជាតិ។ ដូចនេះ កម្ពុជាត្រូវពង្រឹងជំហរច្បាប់អន្តរជាតិឱ្យកាន់តែរឹងមាំ តាមរយៈការរក្សាទំនាក់ទំនងការទូតកម្រិតខ្ពស់ជាមួយបារាំង និងការផ្តល់ភស្តុតាងប្រវត្តិសាស្ត្រច្បាស់លាស់ទៅកាន់អង្គការ UNESCO ដើម្បីធានាថាផែនទីព្រំដែនផ្លូវការ និងការការពារប្រាសាទមរដកពិភពលោកត្រូវបានគោរពយ៉ាងតម្លាភាព។ ទន្ទឹមនឹងនេះ កម្ពុជាគួរតែបន្តប្រើប្រាស់វេទិកាពហុភាគីដូចជាអង្គការសហប្រជាជាតិ (UN) ដើម្បីបង្ហាញពីឆន្ទៈសន្តិភាព និងតម្លាភាពរបស់ខ្លួន ខណៈពេលដែលរក្សាទ្វារចរចាទ្វេភាគីបើកចំហ ដើម្បីការពារអធិបតេយ្យភាពទឹកដី និងរក្សាផលប្រយោជន៍សេដ្ឋកិច្ចរវាងប្រទេសទាំងពីរ៕

លទ្ធផលធ្វើទីផ្សារដោយមិនគិតមុខក្រោយ! ត្រឹមរយៈពេលដ៏ខ្លី ក្រុមហ៊ុនកាហ្វេយក្សដ៏ល្បីល្បាញរបស់សហរដ្ឋអាមេរិក Starbucks កំពុងតែប្រឈមនឹងការដួលរលំកេរ្តិ៍ឈ្មោះស្ទើរទាំងស្រុងនៅកូរ៉េខាងត្បូង ព្រោះតែរលកនៃការធ្វើពហិការយ៉ាងចាស់ដៃពីសាធារណជន បន្ទាប់ពីការធ្វើទីផ្សារខុសឆ្គងដែលជាន់ឈ្លីលើរបួសប្រវត្តិសាស្ត្រជាតិនៃប្រទេសកូរ៉េ ធ្វើដូចជារឿងលេងសើច។

យោងតាមរបាយការណ៍ស៊ើបអង្កេតច្បាស់ការណ៍ពីសារព័ត៌មានអន្តរជាតិល្បីឈ្មោះ The Korea Times និងទីភ្នាក់ងារសារព័ត៌មានជាតិកូរ៉េ Yonhap News Agency ក្រុមហ៊ុនកាហ្វេយក្សរបស់អាមេរិក Starbucks កំពុងតែប្រឈមមុខនឹងមហន្តរាយពាណិជ្ជកម្មដ៏ធំបំផុតមិនធ្លាប់មាននៅក្នុងប្រទេសកូរ៉េខាងត្បូង បន្ទាប់ពីឡូហ្គោរបស់ក្រុមហ៊ុនត្រូវបានដុតបំផ្លាញ ហើយហាងកាហ្វេនានាប្រែជាស្ងាត់ជ្រងំត្រឹមមួយប៉ព្រិចភ្នែក។ វិបត្តិដ៏ធ្ងន់ធ្ងរនេះបានផ្ទុះឡើងកាលពីថ្ងៃទី១៨ ខែឧសភា ឆ្នាំ២០២៦ នៅពេលដែលក្រុមការងារផ្នែកទីផ្សាររបស់ Starbucks Korea បានបើកយុទ្ធនាការលក់ដបទឹកកែវជជុះទំហំធំ ដោយដាក់ឈ្មោះព្រឹត្តិការណ៍ថា «Tank Day» ឬ «ថ្ងៃនៃរថក្រោះ»។

ការជ្រើសរើសពាក្យពេចន៍ និងពេលវេលានេះ បានបង្កជាកំហឹងទូទាំងប្រទេសកូរ៉េ ព្រោះថ្ងៃទី១៨ ខែឧសភា គឺជាថ្ងៃកាន់ទុក្ខដ៏ក្រៀមក្រំរបស់ជាតិ ដើម្បីរំលឹកខួបនៃចលនាប្រជាធិបតេយ្យក្រុងក្វាងជូ ឆ្នាំ១៩៨០ ដែលកាលនោះរបបយោធាផ្តាច់ការបានបញ្ជូនរថក្រោះ (Tanks) ទៅបង្ក្រាប និងបាញ់សម្លាប់ប្រជាពលរដ្ឋស្លូតត្រង់យ៉ាងព្រៃផ្សៃ។ សម្រាប់ពលរដ្ឋកូរ៉េ ទង្វើនេះគឺជាការយកទុក្ខសោក និងឈាមស្រស់របស់វីរជនមកធ្វើជាឧបករណ៍អាជីវកម្មរកលុយដែលមិនអាចអត់ឱនឱ្យបានឡើយ។

យោងតាមប្រភពព័ត៌មានដដែល ស្ថានការណ៍កាន់តែឆេះសន្ធោសន្ធោថែមទៀត នៅពេលដែលសាធារណជនបានរកឃើញថាយុទ្ធនាការដដែលនេះ បានប្រើប្រាស់ពាក្យស្លោកផ្សព្វផ្សាយមួយឃ្លាទៀតគឺ «Tak! on the desk» ឬប្រែថាការវាយតុផាំង។ នៅក្នុងប្រវត្តិសាស្ត្រកូរ៉េខាងត្បូង ឃ្លានេះគឺជាពាក្យកុហកភូតភរដ៏ឃោរឃៅរបស់ប៉ូលិសសម្ងាត់កាលពីឆ្នាំ១៩៨៧ ដើម្បីបិទបាំងការពិតជុំវិញការធ្វើទារុណកម្មនិស្សិតសកម្មជនម្នាក់រហូតដល់បាត់បង់ជីវិត ដោយកាលនោះអាជ្ញាធរបានដោះសារថា សមត្ថកិច្ចគ្រាន់តែទះតុផាំង យុវជននោះក៏ភ័យគាំងបេះដូងស្លាប់តែម្តង។ ការយកឃ្លាដ៏មានភាពរសើប និងពោរពេញដោយភាពឈឺចាប់ទាំងនេះមកលេងសើចក្នុងន័យពាណិជ្ជកម្ម បានដុតបញ្ឆេះស្មារតីជាតិនិយមរបស់ប្រជាពលរដ្ឋឱ្យផ្ទុះឡើងយ៉ាងខ្លាំងក្លា រហូតឈានដល់មានចលនាប្រមូលផ្តុំគ្នាយកញញួរមកវាយកម្ទេចដបកែវ Starbucks ចោលនៅខាងមុខហាង និងនាំគ្នាលុបកម្មវិធីរបស់ក្រុមហ៊ុនចោលពីទូរស័ព្ទដៃរាប់លានគ្រឿង។

របាយការណ៍ការទូតពី The Korea Herald បានបង្ហាញថា មហន្តរាយទីផ្សារមួយនេះបានរុញច្រានឱ្យរដ្ឋាភិបាលកូរ៉េខាងត្បូង ចេញមុខមកដាក់ទណ្ឌកម្មយ៉ាងចាស់ដៃ ដោយប្រធានាធិបតី លោក លី ជេម្យុង បានចេញមុខថ្កោលទោសចំៗ ដោយហៅទង្វើនេះថាជាការលោភលន់ដ៏អមនុស្សធម៌របស់សាជីវកម្មបរទេស។ ភ្លាមៗនោះ ក្រសួងមហាផ្ទៃកូរ៉េបានចេញបញ្ជាហាមឃាត់មិនឱ្យប្រើប្រាស់ ឬទិញផលិតផល Starbucks នៅក្នុងគ្រប់កម្មវិធីផ្លូវការរបស់រដ្ឋទាំងអស់ ដែលធ្វើឱ្យក្រុមហ៊ុនខាតបង់ចំណូលផ្នែកសាជីវកម្មយ៉ាងធ្ងន់ធ្ងរ។ ក្នុងស្ថានភាពដ៏ទាល់ច្រកដើម្បីស្រោចស្រង់ស្ថានការណ៍ ក្រុមហ៊ុនមេ Shinsegae Group បានសម្រេចបណ្តេញនាយកប្រតិបត្តិ (CEO) របស់ Starbucks Korea លោក Sohn Jeong-hyun ចេញពីតំណែងភ្លាមៗ ខណៈដែលមហាសេដ្ឋីប្រធានក្រុមហ៊ុន លោក Chung Yong-jin ក៏បានចេញមុខឱនក្បាលសុំទោសជាសាធារណៈតាមទូរទស្សន៍ជាតិចំនួន ៣ ដងផងដែរ ប៉ុន្តែហាងកាហ្វេដែលនៅតែបន្តស្ងាត់ជ្រងំបានបង្ហាញថា អំណាចអ្នកប្រើប្រាស់របស់ពលរដ្ឋកូរ៉េនៅមិនទាន់ព្រមអត់ឱនឱ្យឡើយ៕