ប្រទេសថៃ ៖ កាលពីថ្ងៃទី៤ ខែកក្កដា ឆ្នាំ២០២៥ សារព័ត៌មានថៃរាយការណ៍ថា លោក ភូមិថាំ វីឆាយ៉ាឆៃ ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ត្រូវបានចាត់ឱ្យកាន់តំណែងជានាយករដ្ឋមន្ត្រីស្តីទីបំពេញភារកិច្ចជំនួសលោកស្រី ផេថងថាន ស៊ីណាវ៉ាត់ ដែលតុលាការសម្រេចព្យួរ និយាយថា ភ្នាក់ងារសន្តិសុខជាតិនៅតែកំណត់យកវិធានការបិទព្រំដែនកម្ពុជា-ថៃដដែល គ្មានការបន្ធូរបន្ថយការឆ្លងដែនចេញ-ចូលទេ ដោយសារស្ថានការណ៍នៅតែតានតឹង ។

លោក ភូមិថាំ ឧបនាយករដ្ឋមន្ត្រីទទួលបន្ទុកសន្តិសុខ និងជារដ្ឋមន្ត្រីក្រសួងមហាផ្ទៃបានធ្វើជាប្រធានកិច្ចប្រជុំភ្នាក់ងារសន្តិសុខជាតិឱ្យដឹងថា អនុរដ្ឋមន្ត្រីក្រសួងការពារជាតិ លោក ណាតថាផុន ណាកផានិត មានតួនាទីជាប្រធានមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃបានសរុបស្ថានការណ៍ព្រំដែននៅតែមានភាពតានតឹង ។ ហេតុនេះ ថៃនឹងអនុវត្តវិធានការបិទព្រំដែនទាំងអស់ជាមួយកម្ពុជាបន្តទៀត ។

ភ្នាក់ងារសន្តិសុខជាតិបានទទួលសេចក្តីរាយការណ៍ពីស្ថានការណ៍ព្រំដែន និងក៏អរគុណមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដែលបំពេញការងារជាបន្តបន្ទាប់ ហើយប្រគល់អំណាចឱ្យលោក ណាតថាផុន អនុរដ្ឋមន្ត្រីក្រសួងការពារជាតិ មានតួនាទីទទួលខុសត្រូវជជែកជាមួយកងទ័ព រួមទាំងចាត់វិធានការរកវិធីដោះស្រាយបញ្ហាព្រំដែន ។

ការជជែកពីការបន្ធូរបន្ថយវិធានការឆ្លងព្រំដែនកម្ពុជា-ថៃឬអត់នោះ លោក ភូមិថាំ បញ្ជាក់ថា គ្មានការជជែកគ្នាពីរឿងការបើកព្រំដែនឡើយ ថៃនៅតែអនុវត្តវិធានការបិទព្រំដែនដូចមុន គ្រាន់តែប្រគល់អំណាចឱ្យលោក ណាតថាផុន ហើយពុំចាំបាច់រាយការណ៍លម្អិតទេ លោកនឹងធ្វើជាអ្នកតំណាងរដ្ឋាភិបាលថៃ ។ រីឯការសម្រេចចិត្តបើក ឬបិទព្រំដែនកម្ពុជា-ថៃ គឺត្រូវពិភាក្សាក្នុងប្រជុំភ្នាក់ងារសន្តិសុខជាតិ ពីព្រោះភ្នាក់ងារនេះមានអំណាចពិចារណាដោយផ្ទាល់ ។

ក្រៅពីនេះ លោក ភូមិថាំ ក៏បាននិយាយពីហ្វេសប៊ុកផេកកងទ័ពថៃឈ្មោះ «Army Military Force» ចោទប្រកាន់ថា កងទ័ពខ្មែរព្យាយាមចូលមកក្នុងទឹកដីថៃម្តងទៀត ហើយត្រូវបានទាហានឈុតខ្មៅថៃរារាំងរហូតដល់មានការប្រកែក ហើយក៏បំបែកផ្លូវគ្នា ដោយលោកថា លោកពុំជ្រាបពីព័ត៌មាននេះទេ ពីព្រោះពុំទទួលបានសេចក្តីរាយការណ៍ ។

គួរបញ្ជាក់ថា ក្រោយពីលោកស្រី ផេថងថាន ប្រគល់អំណាចឱ្យកងទ័ពមានសិទ្ធិសម្រេចបិទព្រំដែនកម្ពុជា-ថៃ កងទ័ពថៃក៏បានបិទព្រំដែនជាមួយកម្ពុជាទាំងអស់ជាឯកតោភាគីក្រោមមូលហេតុការពារសន្តិសុខពលរដ្ឋខ្លួន និងចោទប្រកាន់ថា កម្ពុជា គឺជាទីតាំងឧក្រិដ្ឋកម្មឆ្លងដែន និងការឆបោកអនឡាញ ។ ប៉ុន្តែគោលបំណងពិតប្រាកដដែលថៃបិទព្រំដែន គឺចង់ដាក់សម្ពាធឱ្យកម្ពុជាយល់ព្រមទទួលយកយន្តការចរចាទ្វេភាគីបញ្ចប់ជម្លោះ ៕

សហរដ្ឋអាមេរិក៖ មហាសេដ្ឋី Elon Musk ដែលជាម្ចាស់ជំនួយដ៏ធំបំផុតដល់យុទ្ធនាការឃោសនារបស់ប្រធានាធិបតី Trump ឆ្នាំ 2024 និងធ្លាប់ជាទីប្រឹក្សាជិតស្និទ្ធរបស់ប្រធានាធិបតីរូបនេះ បានប្រកាសចូលខ្លួនពេញលេញនៅក្នុងផ្នែកនយោបាយ ដោយបង្កើតគណបក្សផ្ទាល់ខ្លួន បន្ទាប់ពីចែកផ្លូវគ្នាជាមួយលោក Donald Trump។ នេះបើយោងតាមការចុះផ្សាយរបស់សាព័ត៌មាន CNN នៅថ្ងៃទី៧ ខែកក្កដា។

មហាសេដ្ឋី Elon Musk កាលពីថ្ងៃសៅរ៍បានបង្ហោះនៅលើបណ្ដាញសង្គម X កាលពីថ្ងៃទី៤ ខែកក្កដាថា ៖ លោកកំពុងបង្កើតគណបក្សនយោបាយមួយ បន្ទាប់ពីមានភាពចម្រូងចម្រាស់យ៉ាងខ្លាំងជាមួយលោក Trump ។ Elon Musk បានឲ្យដឹងថា ការបង្កើតបក្សថ្មីដើម្បីក្លាយជាគូរប្រជែងជាមួយបក្សកាន់អំណាច ដែលដឹកនាំដោយលោក Trumpនេះ គឺដោយសារតែលោកខឹ.ងសម្បានឹងប្រធានាធិបតីរូបនេះ រួមទាំងសមាជិកសភារបស់គណបក្សសាធារណរដ្ឋ ដែលគាំទ្រច្បាប់ស្តីពីការចំណាយ និងការយកពន្ធដែលហៅថា «One Big Beautiful Bill» ដែលបានទើបបង្កើតថ្មី។

គណបក្សថ្មីដែលបង្កើតឡើងដោយលោក Elon Musk មានឈ្មោះថា «America Party» មានចេតនាចង់ប្រកួតប្រជែងនឹងអតីតសម្ព័ន្ធមិត្តដ៏ជិតស្និតរបស់ខ្លួន គឺលោក Donald Trump។ ហើយគណបក្សថ្មីរបស់អាមេរិចនេះ គ្រោងនឹងផ្តោតលើលទ្ធិប្រជាធិបតេយ្យ ដែលជំរុញឲ្យមានការគាំទ្រពីសំណាក់ប្រជាជនដែលកំពុងមានការមិនពេញចិត្តនឹងលោក Donald Trump។

ជុំវិញការប្រកាសបង្កើតគណបក្សថ្មីរបស់លោកElon Muskនេះ នៅមិនទាន់មានការឆ្លើយតបណាមួយពីសំណាក់លោក Trump ឬ មន្រ្តីនៅសេតវិមាននៅឡើយទេ។ តែទោះជាយ៉ាងណាក៏ដោយ ការចូលទៅក្នុងនយោបាយរបស់ Musk គឺជាជំហានដ៏ក្លាហាន និងមិនធ្លាប់មានពីមុនមក ដែលបង្ហាញពីចេតនារបស់គាត់ក្នុងការជះឥទ្ធិពលលើគោលនយោបាយរបស់សហរដ្ឋអាមេរិក លើសពីបន្ទប់ប្រជុំ។

រហូតមកទល់នឹងថ្ងៃអាទិត្យ ទី៦ ខែកក្កដា លោក Trump បាននិយាយមុនពេលឡើងយន្តហោះ Air Force One នៅរដ្ឋ New Jersey ថា “ខ្ញុំគិតថាវាគួរឱ្យអស់សំណើចណាស់ក្នុងការចាប់ផ្តើមគណបក្សទីបីនៅសហរដ្ឋអាមេរិក។ យើងមានភាពជោគជ័យយ៉ាងខ្លាំងជាមួយគណបក្សសាធារណរដ្ឋ” ។ “គណបក្សប្រជាធិបតេយ្យបានវង្វេងផ្លូវ ប៉ុន្តែវាតែងតែជាប្រព័ន្ធគណបក្សពីរ ហើយខ្ញុំគិតថាការចាប់ផ្តើមគណបក្សទីបីគ្រាន់តែយល់ច្រលំ និងគិតមិនដល់ប៉ុណ្ណោះ”។

ជាមួយគ្នានេះ គេមិនច្បាស់ទេថាតើ Musk នឹងចាត់វិធានការបែបណាបន្តទៀត ដើម្បីបង្កើតគណបក្សនេះដោយស្របច្បាប់ ជាមួយនឹងគណៈកម្មការរៀបចំការបោះឆ្នោតសហព័ន្ធនៅឡើយទេ។

គួរឲ្យដឹងថា ជម្លោះរវាងមហាសេដ្ឋី Elon Musk និង ប្រធានាធិបតីអាមេរិក លោក Donald Trump បានចាប់ផ្ដើមផ្ទុះឡើងខ្លាំង បន្ទាប់ពីលោក Musk ប្រកាសដើរចេញពីក្រសួងប្រសិទ្ធភាពរដ្ឋាភិបាល (DOGE) នៅថ្ងៃទី២៤ខែឧសភា ឆ្នាំ២០២៥។ ហើយជម្លោះចេះតែកើនឡើងកម្ដៅឥតឈប់ឈរជាហូរហែរ នៅពេលដែលរដ្ឋាភិបាលអាមេរិក ដែលដឹកនាំដោយលោក Trump បានបង្កើតច្បាប់ «One Big Beautiful Bill» ដែលជាការយកពន្ធដ៏មានតម្លៃថ្លៃ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon កាលពីថ្ងៃទី៥ ខែកក្កដា ឆ្នាំ២០២៥ ឱ្យដឹងថា នាយកដ្ឋានការងារថៃនឹងអនុញ្ញាតឱ្យពលករខ្មែរ ចំនួន៤ម៉ឺន៧ពាន់នាក់ ដែលមានលិខិតធ្វើការអស់សុពលភាពអាចធ្វើការនៅប្រទេសថៃបន្តទៀតជាបណ្តោះអាសន្នរហូតដល់ព្រំដែនបើកឡើងវិញ ។ នាយកដ្ឋានការងារត្រៀមស្នើទៅគណៈរដ្ឋមន្ត្រីពិចារណាឱ្យពលរដ្ឋខ្មែរស្នាក់នៅបន្ត ហើយពេលព្រំដែនកម្ពុជា-ថៃបើកដំណើរការប្រក្រតី គឺពលករខ្មែរត្រូវធ្វើដំណើរចាកចេញពីប្រទេសថៃក្នុងរយៈពេល៧ថ្ងៃដើម្បីធ្វើឯកសារ ។

កាលពីថ្ងៃទី៥ ខែកក្កដា អគ្គនាយកនៃនាយកដ្ឋានការងារ លោក ស៊ុមឆាយ មរកតស៊ីវ៉ាន់ ឱ្យដឹងថា ក្រោយពីបានប្រជុំពិភាក្សាជាមួយអ្នកតំណាងភ្នាក់ងារសន្តិសុខ រួមមាន ៖ កងទ័ពជើងគោក កងទ័ពជើងទឹក ក្រសួងការពារជាតិ ក្រសួងមហាផ្ទៃ ភ្នាក់ងាររក្សាសន្តិសុខផ្ទៃក្នុង និងការិយាល័យក្រុមប្រឹក្សាសន្តិសុខជាតិ ស្តីពីពលករខ្មែរនៅតាមព្រំដែនដែលកាន់ប័ណ្ណព្រំដែន (Border Pass) ពួកគេជួបការលំបាកយ៉ាងខ្លាំងពុំអាចឆ្លងដែនដោយសារវិធានការបិទព្រំដែន ។ នាយកដ្ឋានការងារបានទទួលដំណឹងពីខេត្តជាប់ព្រំដែនកម្ពុជាថា ពលករខ្មែរលំបាករឿងធ្វើឯកសារ ហើយសំណូមពរឱ្យប្រញាប់ដោះស្រាយបញ្ហានេះ ។

កិច្ចប្រជុំក៏សម្រេចឯកភាពឱ្យពលករខ្មែរអាចស្នាក់នៅ និងធ្វើការនៅប្រទេសថៃបន្តទៀត ប៉ុន្តែពលករត្រូវតែទៅបង្ហាញខ្លួននៅការិយាល័យអន្តោប្រវេសន៍ថៃ រៀងរាល់៣០ថ្ងៃ ។ នេះគ្រាន់តែជាវិធានការបណ្តោះអាសន្នដែលនាយកដ្ឋានការងារអនុញ្ញាតឱ្យពលករខ្មែរស្នាក់នៅថៃក្នុងករណីពិសេស រហូតដល់ព្រំដែនបើកឡើងវិញ ហើយពេលព្រំដែនបើកប្រក្រតី គឺពលករខ្មែរត្រូវធ្វើដំណើរចាកចេញពីប្រទេសថៃក្នុងរយៈពេល៧ថ្ងៃដើម្បីធ្វើឯកសារ ។

នាយកដ្ឋានការងារនឹងបញ្ជូនសំណើនេះទៅគណៈកម្មការគោលនយោបាយគ្រប់គ្រងពលករបរទេសដើម្បីពិចារណាអនុម័ត រួចហើយបញ្ជូនទៅគណៈរដ្ឋមន្ត្រីពិចារណាយ៉ាងឆាប់បំផុត បច្ចុប្បន្ន ភ្នាក់ងារសន្តិសុខនឹងគ្រប់គ្រង រួមទាំងរក្សាសណ្តាប់ធ្នាប់ ។ នេះបើតាមការលើកឡើងរបស់លោក ស៊ុមឆាយ អគ្គនាយកនៃនាយកដ្ឋានការងារ ។

លោក ស៊ុមឆាយ បន្តថា ថៅកែថៃនៅតែត្រូវការពលករខ្មែរឱ្យធ្វើការក្នុងផ្នែកកសិកម្ម រហូតដល់ដំណាច់ឆ្នាំ២០២៥ ជាពិសេស ការងារបេះផ្លែឈើតាមរដូវកាល ដូចជា ៖ បេះផ្លែមៀន ទុរេន និងមង្ឃុត ។ តាមធម្មតា លិខិតអនុញ្ញាតការងាររបស់ពលករខ្មែរមានរយៈពេល៩០ថ្ងៃ ហើយពលករក្រុមនេះមានចំនួនប្រមាណ៤ម៉ឺន៧ពាន់នាក់ ក្នុងនោះពលករចាប់ពី៧ពាន់នាក់ ទៅ៨ពាន់នាក់ នឹងជិតអស់សុពលភាពលិខិតអនុញ្ញាតការងារ ។ យើងនឹងមានវិធានការបន្ធូរបន្ថយដើម្បីឱ្យពួកគេអាចស្នាក់នៅ និងធ្វើការនៅថៃបណ្តោះអាសន្នរយៈពេលខ្លីៗ រហូតដល់ព្រំដែនកម្ពុជា-ថៃបើកឡើងវិញ ៕

ប្រទេសថៃ ៖ សារព័ត៌មានថៃរាយការណ៍ថា នៅថ្ងៃទី៧ ខែកក្កដា ឆ្នាំ២០២៥ ក្រុមអាជីវករថៃលក់ដូរនៅផ្សាររុងក្លឿ ព្រំដែនបានឃ្លងលឹក ស្រុកអារញ្ញប្រាថេត ខេត្តស្រះកែវ (ទល់មុខច្រកព្រំដែនអន្តរជាតិប៉ោយប៉ែត ខេត្តបន្ទាយមានជ័យ) បានប្រមូលផ្តុំគ្នាតវ៉ាឱ្យរដ្ឋាភិបាល និងកងទ័ពបើកព្រំដែនជាមួយកម្ពុជាជាបន្ទាន់ ពីព្រោះការបិទព្រំដែនធ្វើឱ្យប៉ះពាល់ចំណូលរបស់អាជីវករធ្ងន់ធ្ងរ ជាពិសេស ចំណូលពីវិស័យទេសចរណ៍ ។ មុនពេលបិទព្រំដែន អាជីវករថៃទទួលបានចំណូលរហូតដល់រាប់ម៉ឺនបាតក្នុង១ខែ ប៉ុន្តែបច្ចុប្បន្ន រកចំណូលបានត្រឹម១០០បាត ឬ២០០បាតក្នុង១ថ្ងៃ ។

ការបិទព្រំដែនជាឯកតោភាគីពីសំណាក់កងទ័ពថៃក្រោមការបញ្ជាពីលោក ប៊ុនស៊ីន ផាកក្លាង មេបញ្ជាការកងទ័ពភូមិភាគ២ ធ្វើឱ្យព្រំដែនបានឃ្លងលឹក មានសភាពស្ងាត់ជ្រងំ ។ អាជីវករថៃនៅព្រំដែនពុំអាចអត់ធ្មត់នឹងស្ថានការណ៍បែបនេះទៀតទេ និងតវ៉ាទៅរដ្ឋាភិបាលប្រញាប់បើកព្រំដែនជាបន្ទាន់ ។ អាជីវករថៃថៃលើកស្លាកសញ្ញាសរសេរអក្សរធំៗថា ៖ «យើងយល់ពីកិត្តិយសរបស់ពួកអ្នក ប៉ុន្តែពលរដ្ឋរស់នៅព្រំដែនកំពុងដាច់ពោះស្លាប់ សូមយល់ពីពួកយើងខ្លះផង ។ ជម្លោះកើតឡើងនៅកន្លែងណា ហេតុអ្វីពុំដោះស្រាយនៅកន្លែងនោះ ពួកយើងលក់ដូរជាមួយពលរដ្ឋវៀតណាម និងខ្មែរ តើនឹងបណ្តោយបែបនេះឱ្យខូចខាត មែនទេ?» ។

ការតវ៉ាឱ្យបើកព្រំដែនកម្ពុជា-ថៃឡើងវិញធ្វើឡើងស្របពេលលោក រ៉ាំងស៊ិម៉ាន់ រ៉ូម សមាជិកសភា និងជាអនុប្រធានគណបក្សប្រជាជន មានតួនាទីជាគណៈកម្មកការសន្តិសុខរដ្ឋកិច្ចការព្រំដែនថៃ យុទ្ធសាស្ត្រជាតិ និងកំណែទម្រង់ បានចុះមកពិនិត្យមើលវិធានការបើក-បិទព្រំដែនកម្ពុជា-ថៃ នៅព្រំដែនបានឃ្លងលឹក-ច្រកព្រំដែនអន្តរជាតិប៉ោយប៉ែត ។

លោក រ៉ាំងស៊ិម៉ាន់ រ៉ូម សមាជិកសភា និយាយថា ព្រំដែនបានឃ្លងលឹក មានការលក់ដូរទំនិញ និងការធ្វើដំណើរឆ្លងដែនចេញ-ចូលរបស់ពលរដ្ឋប្រទេសទាំងពីរ ។ បច្ចុប្បន្ន ភាគីថៃបានបើកទ្វារព្រំដែន ប៉ុន្តែទ្វារព្រំដែនកម្ពុជាបិទ ហើយនៅថ្ងៃទី៧ ខែកក្កដា ពលរដ្ឋថៃបានមកតវ៉ាឱ្យកងទ័ពបើកព្រំដែនឡើងវិញដើម្បីឱ្យការលក់ដូរត្រឡប់មកធម្មតា ដោយសារការបិទព្រំដែនធ្វើឱ្យពលរដ្ឋថៃបាត់បង់ការងារ និងបារម្ភពីការលក់ដូររបស់ប្រទេសទាំងពីរនឹងដំណើរការដូចម្តេច?

កម្ពុជា និងថៃមានបញ្ហាច្រើន ក្នុងនោះក៏មានបញ្ហារវាងរដ្ឋាភិបាលនិងរដ្ឋាភិបាល រួមទាំងការបង្ក្រាបឧក្រិដ្ឋកម្មឆ្លងដែន ។ បើប្រទេសទាំងពីរគ្មានការលក់ដូរ គឺមិនត្រឹមតែប៉ះពាល់ពលរដ្ឋនៅស្រុកអារញ្ញប្រាថេត ខេត្តស្រះកែវប៉ុណ្ណោះទេ ប៉ុន្តែវានឹងប៉ះពាល់គ្រប់ផ្នែកទាំងអស់ ។ បើមានដំណោះស្រាយបញ្ហា វានឹងក្លាយជាប្រយោជន៍សម្រាប់ពលរដ្ឋខ្មែរ-ថៃ ។ កម្ពុជាប្រាប់ឱ្យថៃបើកព្រំដែនមុន ប៉ុន្តែការពិត ថៃពុំបានបិទព្រំដែន រដ្ឋាភិបាលថៃកំពុងអនុវត្តវិធានការទប់ស្កាត់កុំឱ្យពលរដ្ឋទៅធ្វើជាក្រុមឆបោកអនឡាញ ឬចូលកាស៊ីណូ ។

គួរបញ្ជាក់ថា ការតវ៉ារបស់អាជីវករថៃ គឺដឹកនាំដោយលោក ស៊ុឃួន ភួនស៊ីខាំ ជាឈ្មួញនាំចេញទំនិញថៃ ដោយលោកបានប្រគល់លិខិតឱ្យលោក រ៉ាំងស៊ិម៉ាន់ រ៉ូម សមាជិកសភា ដែលមានខ្លឹមសារ៧ចំណុច សូមឱ្យរដ្ឋាភិបាលពិនិត្យមើលវិធានការបិទព្រំដែន ពីព្រោះអាជីវកររងផលប៉ះពាល់ពុំអាចលក់ដូរបាន ខណៈអាជីវករនៅខេត្តឧប៊ុនរ៉ាជថានី និង៥ខេត្តទៀត ក៏លក់ដូរមិនដាច់ដែរ ។ ការបិទព្រំដែនពុំអាចជួយដោះស្រាយបញ្ហាទេ ប៉ុន្តែពលរដ្ឋថៃដែលរកស៊ីស្មោះត្រង់ប៉ះពាល់ធ្ងន់ ។ បើមានសង្គ្រាម ចាំគិតទៀត ពេលនេះ ពលរដ្ឋត្រូវចិញ្ចឹមគ្រួសារ បើចង់បិទព្រំដែន ត្រូវប្រាប់ពលរដ្ឋឱ្យត្រៀមខ្លួនជាមុន ។

ម្យ៉ាងទៀត ទំនិញថៃដែលនាំចេញតាមព្រំដែនបានឃ្លងលឹក គឺផលិតនៅទូទាំងប្រទេសថៃ ប៉ុន្តែការបិទច្រកនឹងធ្វើឱ្យប៉ះពាល់សេដ្ឋកិច្ច និងពលរដ្ឋថៃខ្លួនឯង ។ សូមអ្នកមានអំណាចពិនិត្យឡើងវិញ និងដោះស្រាយបញ្ហាឱ្យពលរដ្ឋ បើពុំដោះស្រាយទេ ផលប៉ះពាល់នឹងកើតឡើងថែមទៀត ។ ចុងក្រោយ លោក រ៉ាំងស៊ិម៉ាន់ សន្យាយកលិខិតតវ៉ារបស់អាជីវករថៃដាក់ជូនរដ្ឋាភិបាល ៕

ប្រទេសថៃ ៖ ពលរដ្ឋថៃរស់នៅខេត្តផាំងង៉ា បានរៀបចំសម្ភារៈ និងប្រមូលទ្រព្យសម្បត្តិមានតម្លៃជម្លៀសចេញពីលំនៅឋានទៅស្នាក់នៅកន្លែងមានសុវត្ថិភាព ដោយសារបារម្ភពីសុវត្ថិភាពក្រោយមានការផ្សព្វផ្សាយព័ត៌មានជាបន្តបន្ទាប់ថា ប្រទេសថៃនឹងកើតរលកយក្សស៊ូណាមិ ។ ក្រុមគ្រួសារខ្លះបាននាំកូនចៅ និងមនុស្សចាស់ទៅស្នាក់នៅក្នុងជម្រកបណ្តោះអាសន្ន ខណៈអ្នកខ្លះទៀតយករថយន្តទៅចតនៅទីខ្ពស់ ។ នេះបើតាមការផ្សព្វផ្សាយរបស់សារព័ត៌មាន Thairath កាលពីថ្ងៃទី៥ ខែកក្កដា ឆ្នាំ២០២៥ ។

ពលរដ្ឋរស់នៅភូមិណាមឃេម ឃុំបាងមួង ស្រុកតាក់គួប៉ា ខេត្តផាំងង៉ា បានភ័យជ្រួលច្របល់ខ្លាំងក្រោយមានពាក្យចចាមអារ៉ាមថា នឹងមានរលកយក្សស៊ូណាមិកើតឡើងនៅដើមខែកក្កដា ។ ពលរដ្ឋនៅទីនេះតាមដានស្ថានការណ៍គ្រោះធម្មជាតិជានិច្ច ព្រមទាំងត្រៀមខ្លួនជម្លៀសចាកចេញពីលំនៅឋានជាមុន ខណៈពលរដ្ឋខ្លះទៀតរៀបចំសម្ភារៈ និងជម្លៀសទ្រព្យសម្បត្តិមានតម្លៃ ដូចជា ៖ យករថយន្តទៅចតនៅកន្លែងមានសុវត្ថិភាព ។

កាលពីយប់ថ្ងៃទី៤ ខែកក្កដា កន្លងមក ពលរដ្ឋជាច្រើនដែលមានសមាជិកគ្រួសារជាមនុស្សចាស់ និងកុមារតូចៗបាននាំគ្នាជម្លៀសចេញពីភូមិណាមឃេម មកស្នាក់នៅជម្រកបណ្តោះអាសន្ន ។ នាព្រឹកថ្ងៃទី៥ ខែកក្កដា ពលរដ្ឋថៃជាច្រើននាក់ទៀតបានចេញមកសម្រាកនៅទីធ្លាក្រៅលំនៅឋាន ដោយសារបារម្ភបើមានរលកយក្សស៊ូណាមិកើតឡើង ខ្លាចពុំឮសំឡេងប្រកាសអាសន្នដែលអាជ្ញាធរដាក់នៅទីតាំងចំនួន២កន្លែង ។

ពលរដ្ឋបារម្ភថា បើមានរលកយក្សស៊ូណាមិកើតឡើ់ងពេលយប់ ពួកគេសម្រាកលក់ពុំឮសំឡេងប្រកាសអាសន្ន ទើបនាំគ្នាមកសម្រាកនៅក្រៅលំនៅឋាន ។ ការភ័យខ្លាចរបស់ពលរដ្ឋធ្វើឱ្យភូមិណាមឃេម ឃុំបាងមួង ស្រុកតាក់គួប៉ា ខេត្តផាំងង៉ា មានសភាពស្ងប់ស្ងាត់ខុសធម្មតា ដោយលំនៅឋាននីមួយៗបិទទ្វារ ក្រោយពីមានព័ត៌មានថា នឹងមានរលកយក្សស៊ូណាមិ និងគ្រោះរញ្ជួយដីកើតឡើង ជាពិសេស ពលរដ្ឋដែលធ្លាប់រងគ្រោះដោយសារគ្រោះធម្មជាតិកាលពីឆ្នាំ២០០៤ ពុំហ៊ានរស់នៅក្នុងលំនៅឋានឡើយ ។

អ្នកស្រី អាណុង សាយសុវណ្ណ អាយុ៦៨ឆ្នាំ និងកូនស្រី អាយុ៤៣ឆ្នាំ រស់នៅភូមិណាមឃេម ប្រាប់ថា នៅយប់ថ្ងៃទី៥ ខែកក្កដា អ្នកស្រីបានសម្រាកនៅក្រៅលំនៅឋានជាមួយកូន អ្នកស្រីបានត្រៀមឯកសារសំខាន់ៗក្នុងគ្រួសាររួចហើយ ។

ចំណែកអាជ្ញាធរឃុំបាងមួង បានរៀបចំផែនការទាំងការស្នាក់នៅ និងសុវត្ថិភាពពលរដ្ឋ ដោយបង្កើតជម្រកបណ្តោះអាសន្នដើម្បីឱ្យពលរដ្ឋមកស្នាក់នៅ ចាប់ពីយប់ថ្ងៃទី៤ ខែកក្កដា កន្លងមក ។ វាបានធ្វើបរិយាកាសនៅជម្រកបណ្តោះអាសន្នសម្បូរទៅដោយក្មេងៗ និងមនុស្សចាស់ ។

កាលពីថ្ងៃទី៧ ខែកក្កដា នៅនាយកដ្ឋានបង្ការ និងកាត់បន្ថយគ្រោះមហន្តរាយ លោកស្រី ធីរ៉ាត់ សាំរេចវ៉ានីត រដ្ឋមន្ត្រីក្រសួងមហាផ្ទៃ បានប្រាប់ទៅពលរដ្ឋឈប់បារម្ភពីរលកយក្សស៊ូណាមិ ក្រោយកើតគ្រោះរញ្ជួយដីនៅប្រទេសជប៉ុន និងឥណ្ឌា ។ សូមឱ្យពលរដ្ឋជឿជាក់លើប្រព័ន្ធប្រកាសអាសន្ន និងការផ្ញើសារទៅពលរដ្ឋតាមរយៈប្រព័ន្ធ Cell Broadcast ។ អ្នកស្រីថា មានការផ្សាយព័ត៌មានជាច្រើនពីរញ្ជួយដីនៅមហាសមុទ្រឥណ្ឌា និងមហាសមុទ្រប៉ាស៊ីហ្វិក ទើបធ្វើឱ្យពលរដ្ឋថៃបារម្ភ ៕