មេដឹកនាំគណបក្សប្រឆាំងថៃ លោក Natthaphong Ruengpanyawut កាលពីថ្ងៃទី២៧ ខែឧសភា ឆ្នាំ២០២៦ បានប្រកាន់ជំហរមិនសុំទោសសមាជិកព្រឹទ្ធសភាដាច់ខាត និងត្រៀមឡើងតុលាការរកភាពយុត្តិធម៌ ដោយលោកថា ការលើកឡើងនោះសំដៅជារួម មិនមែនរិះគ.ន់បុគ្គលណាម្នាក់ទេ ។ ក្រុមសមាជិកព្រឹទ្ធសភាចំនួន៨៩រូប គំរា.មចាត់វិធានការតាមច្បាប់ និងទុកឱសានវាទ៣ថ្ងៃ ដើម្បីឱ្យមេបក្សប្រឆាំងសុំទោសជាសាធារណៈរឿងរិះគ.ន់ព្រឹទ្ធសភាធ្វើការក្រោមបញ្ជាគណបក្សភូមិចៃថៃរបស់លោកនាយករដ្ឋមន្ត្រី Anutin និងបន្តពីរបបរដ្ឋប្រ.ហារ ។

លោក Natthaphong ថា លោកព្យាយាមប្រាប់ឱ្យមហាជនដឹងពីរបបដឹកនាំដោយគណបក្សកាន់អំណាចសព្វថ្ងៃនេះ មិនគោរពប្រជាធិបតេយ្យ និងជារបបប្រកាន់បក្ខពួកគ្រប់គ្រងប្រទេសទាំងផ្នែកនយោបាយ និងសេដ្ឋកិច្ច ។ លោកនាយករដ្ឋមន្ត្រី Anutin គ្មានចំណាត់ការលើមន្ត្រីរដ្ឋាភិបាលពុករលួយ បណ្តោយឱ្យអំពើពុករលួយក្នុងសង្គមកើនឡើង ក្រុមហ៊ុនឯកជនត្រូវបង់ប្រាក់សំណូកច្រើនដល់រដ្ឋាភិបាល ។

លោកមិនសុំទោសសមាជិកព្រឹទ្ធសភាទេ ពីព្រោះអ្វីដែលលើកឡើងជាការពិតទាំងអស់ និងមិនសំដៅលើបុគ្គលណាម្នាក់ឡើយ បើសមាជិកសភាចាត់វិធានការតាមច្បាប់ លោកនឹងឡើងតុលាការដើម្បីយុត្តិធម៌ ។ លោកមានសិទ្ធិរិះគន់ក្នុងនាមជាពលរដ្ឋសាមញ្ញម្នាក់ដែលចង់មានរបបដឹកនាំល្អជាងនេះ ប៉ុន្តែសមាជិកព្រឹទ្ធសភាបែរជាគំរាមប្តឹងឱ្យបិទមាត់ ។ គោលជំហររបស់គណបក្សប្រឆាំងមិនថយក្រោយឡើយ គឺនៅតែបន្តជំរុញឱ្យធ្វើវិសោធនកម្មរដ្ឋធម្មនុញ្ញ ដែលមិនមែនកើតឡើងពីការរដ្ឋប្រហារ និងគោរពសំឡេងពលរដ្ឋ ។

កាលពីថ្ងៃទី២៥ ខែឧសភា ក្រុមសមាជិកព្រឹទ្ធសភាថៃ ចំនួន៨៩រូប ដឹកនាំដោយលោក Phisit Apivatanapong បានបដិសេធនឹងការរិះគន់ ដោយចាត់ទុកជាការបង្ខូចកេរ្តិ៍ឈ្មោះយ៉ាងធ្ងន់ធ្ងរ និងចេញសេចក្តីថ្លែងការណ៍រួមមួយ ថ្កោលទោសលោក Natthaphong មេគណបក្សប្រឆាំង ដោយទុកឱសានវាទរយៈពេល៣ថ្ងៃ ដើម្បីឱ្យលោកចេញមុខសុំទោសជាសាធារណៈ ក្រោយពីមេដឹកនាំគណបក្សប្រឆាំងបង្ហោះសារនៅលើបណ្តាញសង្គមហ្វេសប៊ុករិះគន់ចំៗថា ព្រឹទ្ធសភាបច្ចុប្បន្នកំពុងបំពេញការងារនៅក្រោមបញ្ជារបស់គណបក្សភូមិចៃថៃ និងអំពាវនាវឱ្យពលរដ្ឋរួមគ្នាបញ្ចប់របបដឹកនាំនេះ ពីព្រោះជារបបបន្តវេនពីការធ្វើរដ្ឋប្រហារ ។

គួរបញ្ជាក់ថា បច្ចុប្បន្ន គណបក្សប្រឆាំងកំពុងប្រឈមនឹងការប៉ុនបំងរំលាយ ដោយសារលោក Natthaphong បានបង្ហោះសាររិះគន់រដ្ឋាភិបាលអនុញ្ញាតឱ្យសមាជិកក្រុមប្រឹក្សាព្រះមហាក្សត្រចូលរួមក្នុងកិច្ចប្រជុំស្តីពី «ការគ្រប់គ្រងគ្រោះរាំងស្ងួត» ថា ការធ្វើបែបនេះនឹងទាញឱ្យស្ថាប័នព្រះមហាក្សត្រប្រឡូកក្នុងនយោបាយ ។ កាលពីថ្ងៃទី២១ ខែឧសភា គណៈកម្មាធិការរៀបចំការបោះឆ្នោតថៃបានទទួលពាក្យបណ្តឹងពីអ្នកគាំទ្ររបបរាជានិយម ស្នើរំលាយគណបក្សប្រឆាំង ដោយចោទប្រកាន់ពីបទទាញស្ថាប័នព្រះមហាក្សត្រពាក់ព័ន្ធនយោបាយ ៕

រដ្ឋធានីឡុងដ៍៖ ក្រុមគ្រូពេទ្យជំនាញនៅក្នុងប្រទេសអង់គ្លេស បានចេញមុខព្រមានជាសាធារណៈថា ការញៀនបណ្តាញសង្គមរបស់យុវជនបច្ចុប្បន្ន មានកម្រិតគ្រោះថ្នា.ក់ខ្លាំងប្រហាក់ប្រហែលនឹងការជក់បារីដែរ។ ការព្រមាននេះធ្វើឡើងដោយសារតែស្ថាប័នបច្ចេកវិទ្យាបានរចនាបណ្តាញសង្គមឡើង ក្នុងគោលបំណងទាក់ទាញឱ្យអ្នកប្រើប្រាស់ដកចិត្តមិនរួច ដែលមិនខុសអ្វីពីសារធាតុនីកូទីននៅក្នុងបារីនោះឡើយ។ ក្រុមគ្រូពេទ្យបានសំណូមពរឱ្យរដ្ឋាភិបាលចាត់វិធានការជាបន្ទាន់ ដើម្បីកាត់បន្ថយការចំណាយពេលច្រើនហួសហេតុរបស់យុវជនជាមួយឧបករណ៍អេឡិចត្រូនិក។

កាលពីថ្ងៃទី២៦ ខែឧសភា ឆ្នាំ២០២៦ កន្លងទៅនេះ ស្ថាប័នសាកលវិទ្យាល័យអង់គ្លេស និងអៀរឡង់ (តំណាងឱ្យសាកលវិទ្យាល័យវេជ្ជសាស្ត្រចំនួន ២៣) បានបញ្ជូនឯកសារស្រាវជ្រាវស្តីពី «ផលប៉ះពាល់លើយុវជនដោយសារការប្រើប្រាស់បណ្តាញសង្គម» ទៅកាន់រដ្ឋាភិបាលអង់គ្លេស។ ក្នុងឯកសារនោះ ក្រុមគ្រូពេទ្យបានសង្កត់ធ្ងន់ថា ការចំណាយពេលយូរពេកនៅលើបណ្តាញសង្គម បង្កផលប៉ះពាល់អវិជ្ជមានធ្ងន់ធ្ងរ មិនខុសពីការជក់បារី ឬការបើកបរដោយមិនពាក់ខ្សែក្រវ៉ាត់សុវត្ថិភាពនោះឡើយ។

យោងតាមរបាយការណ៍ដដែល ផលប៉ះពាល់ទាំងនោះរួមមាន៖ យុវជនងាយរងការអូសទាញ និងយកគំរូតាមទង្វើមិនល្អពីការបង្ហោះនានា ព្រមទាំងបំផ្លាញសុខភាពផ្លូវចិត្តយ៉ាងធ្ងន់ធ្ងរតាមរយៈការមើលឃើញរូបភាពហិង្សា ជាពិសេស ចំពោះយុវជនដែលប្រើប្រាស់លើសពី ៣ម៉ោងក្នុងមួយថ្ងៃ។ លើសពីនេះ ពួកគេត្រូវបាត់បង់ពេលវេលាសម្រាកដោយសារការលួចលេងទូរស័ព្ទកណ្តាលយប់ ដែលជាហេតុធ្វើឱ្យលទ្ធផលសិក្សាធ្លាក់ចុះយ៉ាងគំហុក។

បច្ចុប្បន្ន ក្រុមគ្រូពេទ្យអង់គ្លេសកំពុងពិភាក្សាលើការកំណត់ពេលវេលាច្បាស់លាស់សម្រាប់ការប្រើប្រាស់បណ្តាញសង្គម និងបានណែនាំឱ្យអាណាព្យាបាលគ្រប់រូបកំណត់ពេលលេងទូរស័ព្ទរបស់កូនៗ ព្រមទាំងតាមដានការសិក្សាឱ្យបានដិតដល់។
ទោះបីជាច្បាប់សុវត្ថិភាពអនឡាញរបស់អង់គ្លេស តម្រូវឱ្យក្រុមហ៊ុនបណ្តាញសង្គមមានវិធានការការពារយុវជនពីខ្លឹមសារខុសច្បាប់ និងគ្រោះថ្នាក់ក៏ដោយ ប៉ុន្តែអ្នកជំនាញយល់ឃើញថា វាមិនអាចហាមឃាត់បានទាំងស្រុង ឬមានប្រសិទ្ធភាព ១០០% នោះឡើយ។

សូមរំឭកថា រដ្ឋាភិបាលអង់គ្លេសធ្លាប់បានអនុវត្តច្បាប់តឹងរ៉ឹង ដោយហាមឃាត់ ឬរឹតបន្តឹងការប្រើប្រាស់បណ្តាញសង្គមចំពោះយុវជនអាយុក្រោម ១៦ឆ្នាំ។ ទោះជាយ៉ាងណា យុវជននៅតែបន្តញៀនខ្លាំង ជាពិសេស លើកម្មវិធី TikTok ដោយសារពួកគេខ្លាចបាត់បង់ការប្រកួតប្រជែងព័ត៌មានក្នុងចំណោមមិត្តភក្តិ ចង់ដឹងរឿងរ៉ាវឯកជនរបស់អ្នកដទៃ និងប្រើប្រាស់វាដើម្បីកាត់បន្ថយភាពតានតឹងក្នុងការសិក្សា ក៏ដូចជាការដោះស្រាយភាពឯកោរបស់ខ្លួន៕

ស្របពេលរងការគំរា.មកំហែងដោយការបា.ញ់មីស៊ីលជាបន្តបន្ទាប់ពីកូរ៉េខាងជើង ក្រសួងការពារជាតិកូរ៉េខាងត្បូងកាលពីថ្ងៃទី២៦ ខែឧសភា ឆ្នាំ២០២៦ បានប្រកាសជាផ្លូវការពីគោលដៅផលិត និងដំណើរការនាវាមុជទឹកដើរដោយថាមពលនុយក្លេអ៊ែរជាលើកដំបូងនាពាក់កណ្តាលឆ្នាំ២០៣០ និងប្រតិបត្តិការជាផ្លូវការនាពេលបន្ទាប់ ក្រោមកិច្ចសហការជាមួយអាមេរិកលើផ្នែកបច្ចេកវិទ្យា និងការផលិត ។ នេះជាជំហានឆ្ពោះទៅមុខរបស់វិស័យឧស្សាហកម្មនាវាកូរ៉េខាងត្បូង ដើម្បីពង្រឹងសមត្ថភាពការពារជាតិ និងទប់ទល់ជាមួយការគំរាមនុយក្លេអ៊ែរពីកូរ៉េខាងជើង ។

ក្រសួងការពារជាតិកូរ៉េខាងត្បូងបញ្ជាក់ថា នាវាមុជទឹកដើរដោយថាមពលនុយក្លេអ៊ែររបស់ខ្លួននឹងមានសមត្ថភាពប្រតិបត្តិការល្អជាងនាវាមុជទឹកធម្មតាៗដើរដោយប្រេងឥន្ធនៈដែលកូរ៉េខាងត្បូងកំពុងតែប្រើប្រាស់សព្វថ្ងៃ ដោយវាអាចនៅក្នុងទឹកបានយូរ និងចល័តឆាប់រហ័ស ។

បើតាមរដ្ឋមន្ត្រីក្រសួងការពារជាតិ លោក Ahn Gyu-back នាវានេះនឹងប្រើប្រាស់ឥន្ធនៈអ៊ុយរ៉ាញ៉ូមកម្រិតទាបបំផុត ហើយកូរ៉េខាងត្បូងនឹងសហការយ៉ាងជិតស្និទ្ធជាមួយសហរដ្ឋអាមេរិកក្នុងពេលដំណើរការ ដើម្បីបង្ការការរីកសាយអាវុធនុយក្លេអ៊ែរ ។ វានឹងបង្កើនសមត្ថភាពកងទ័ពកូរ៉េខាងត្បូង ពីព្រោះអាចនៅក្នុងទឹកបានជាច្រើនខែ និងតាមដាននាវាមុជទឹកកូរ៉ខាងជើង ហើយធ្វើឱ្យកូរ៉េខាងត្បូងក្លាយជាប្រទេសមួយក្នុងចំណោមប្រទេសផលិតនាវា ដូចជា ៖ សហរដ្ឋអាមេរិក ចិន អង់គ្លេស បារាំង រុស្ស៊ី និងឥណ្ឌា ។

ប្រធានាធិបតីកូរ៉េខាងត្បូង លោក Lee Jae Myung បានចូលរួមក្នុងប្រជុំគណៈរដ្ឋមន្ត្រីកាលពីថ្ងៃទី២៦ ខែឧសភា ឱ្យដឹងថា នឹងពន្លឿនការផលិតនាវាមុជទឹកថាមពលនុយក្លេអ៊ែរ ព្រមទាំងប្រើប្រាស់បច្ចេកវិទ្យាសិប្បនិម្មិត (AI) និងដ្រូន ដើម្បីបង្កើនសមត្ថភាពការពារប្រទេសដោយខ្លូនឯងនាថ្ងៃអនាគត ។ នេះជាឆន្ទៈរបស់យើងក្នុងការទទួលខុសត្រូវចំពោះសន្តិភាព និងសន្តិសុខនៅឧបទ្វីបកូរ៉េ ។

គោលដៅនេះ បន្ទាប់ពីប្រធានាធិបតីកូរ៉េខាងត្បូង លោក Lee សម្រេចបាននូវកិច្ចព្រមព្រៀងក្នុងកិច្ចប្រជុំកំពូលជាមួយប្រធានាធិបតីអាមេរិក លោក Donald Trump កាលពីខែតុលា ឆ្នាំ២០២៥ ដែលអនុញ្ញាតឱ្យមានកិច្ចសហការកាន់តែជិតស្និទ្ធលើគម្រោងផលិតនាវាមុជទឹកថាមពលនុយក្លេអ៊ែរ រួមទាំងពិភាក្សាពីប្រភពប្រេងឥន្ធនៈ និងតម្រូវការបច្ចេកទេស ៕

នាយកដ្ឋានបង្ការ និងកាត់បន្ថយគ្រោះមហន្តរា.យថៃបានប្រកាសអាសន្នទៅកាន់ពលរដ្ឋនៅទូទាំងប្រទេស ជាពិសេស អ្នករស់នៅក្នុងខេត្តចំនួន៧១ (ភាគខាងជើង ខាងត្បូង ឦសាន កណ្តាល និងទីក្រុងបាងកក) ឱ្យបង្កើនការប្រុងប្រយ័ត្នខ្ពស់ដើម្បីចៀសវាងគ្រោះថ្នា.ក់ដោយសារភ្លៀងធ្លាក់ខ្លាំង ទឹកហូរពីព្រៃភ្នំ ទឹកជំនន់ភ្លាមៗ បាក់ដី និងខ្យល់កន្ត្រាក់ ចាប់ពីថ្ងៃទី២៨ ខែឧសភា ដល់ថ្ងៃទី១ ខែមិថុនា ឆ្នាំ២០២៦ ។ គ្រោះធម្មជាតិនេះកើតឡើងដោយសារឥទ្ធិពលខ្យល់មូសុងនិរតីបក់បោកយ៉ាងខ្លាំងគ្របដណ្តប់លើសមុទ្រអាន់ដាម៉ាន់ ឈូងសមុទ្រថៃ និងសម្ពាធទាប ។

នាយកដ្ឋានបង្ការ និងកាត់បន្ថយគ្រោះមហន្តរាយបានតាមដានអាកាសធាតុ និងគ្រោះថ្នាក់ដែលនឹងកើតឡើងនៅប្រទេសថៃ ស្របពេលនាយកដ្ឋានឧតុនិយមប្រកាសពីភ្លៀងធ្លាក់ខ្លាំង និងខ្យល់កន្ត្រាក់ ចំនួន៥ថ្ងៃ (ចាប់ពីថ្ងៃទី២៨ ខែឧសភា ដល់ថ្ងៃទី១ ខែមិថុនា) ថា ភាគខាងជើង ខាងត្បូង ឦសាន កណ្តាល និងទីក្រុងបាងកក នឹងមានភ្លៀងធ្លាក់ខ្លាំងនាំឱ្យមានទឹកជំនន់ភ្លាមៗ ទឹកហូរពីព្រៃភ្នំ បាក់ដី និងខ្យល់កន្ត្រាក់ ។

អាជ្ញាធរទាំង៧១ខេត្ត មានតួនាទីតាមដានអាកាសធាតុ បរិមាណទឹកភ្លៀង និងស្ថានការណ៍ទឹកជំនន់ ២៤ម៉ោងលើ២៤ម៉ោង រួមទាំងត្រៀមក្រុមជួយសង្គ្រោះ ឧបករណ៍សង្គ្រោះ និងទូក នៅតំបន់រងផលប៉ះពាល់ ឬតំបន់មានទឹកជំនន់ញឹកញាប់ ដោយជម្លៀសពលរដ្ឋទៅទួលសុវត្ថិភាព ។ រីឯតំបន់ទេសចរណ៍ទឹកជ្រោះ ឬល្អាង ប្រសិនបើមានគ្រោះធម្មជាតិកើតឡើង ត្រូវជូនដំណឹង និងបិទច្រកចូលបណ្តោះអាសន្ន ។ អំឡុងពេលនេះដែរ ក៏មានរលកសមុទ្រធំៗនៅតំបន់ឆ្នេរ ដោយហាមឃាត់ភ្ញៀវទេសចរកុំឱ្យលេងទឹក និងហាមការនេសាទតាមទូកតូចៗ ។

គ្រោះធម្មជាតិនៅប្រទេសថៃនឹងជះឥទ្ធិពលដល់ប្រទេសជិតខាងផងដែរ ដែលពលរដ្ឋប្រទេសជិតខាងគួរតែបង្កើនការប្រុងប្រយ័ត្នឱ្យបានខ្ពស់ក្នុងអំឡុងពេលថៃប្រកាសអាសន្នរយៈពេល៥ថ្ងៃនេះ ។

គួរបញ្ជាក់ថា ប្រទេសថៃតែងតែជួបប្រទះគ្រោះមហន្តរាយធម្មជាតិញឹកញាប់ដោយសារកត្តាភូមិសាស្ត្រ និងបម្រែបម្រួលអាកាសធាតុ ខណៈការកាប់ព្រៃឈើធ្វើឱ្យដីបាត់បង់សមត្ថភាពស្រូបទឹក ដូច្នេះ ពេលមានភ្លៀងធ្លាក់ខ្លាំងបណ្តាលឱ្យទឹកហូរពីតំបន់ព្រៃភ្នំ និងបាក់ដី ។ ក្រៅពីគ្រោះធម្មជាតិ ប្រទេសថៃបានរងឥទ្ធិពលគ្រោះរញ្ជួយដីដែលកើតឡើងជាបន្តបន្ទាប់នៅប្រទេសមីយ៉ាន់យ៉ា ៕

លេងក្បាច់ធ្វើល្ងង់ទៀតហើយ! នាយករដ្ឋមន្ត្រី អានុទីន ឆាន់វីរ៉ាគុល របស់ថៃបាននិយាយច្បាស់ៗនៅចំពោះមុខអ្នកកាសែតថា ផែនទីខ្នាត ១:២០០,០០០ ដែលមានច្បាប់អន្តរជាតិ និងតុលាការពិភពលោកទទួលស្គាល់ត្រឹមត្រូវ​ លែងមានអត្ថិភាពសម្រាប់ថៃហើយ! ដោយថៃកំពុងដុតដៃដុតជើងរត់ទៅរកបារាំង និង UNESCO ដើម្បីស្វែងរកមធ្យោបាយប្រើប្រាស់ប្រព័ន្ធបច្ចេកទេស និងផែនទីផ្ទាល់ខ្លួនវិញ។ នេះបើយោងតាមការចុះផ្សាយផ្សាយរបស់កាសែត​The Nation Thailand របស់ថៃ។
 
នៅក្នុងកិច្ចសម្ភាសន៍ដ៏គួរឱ្យចាប់អារម្មណ៍មួយ ក្នុងអំឡុងពេលបំពេញទស្សនកិច្ចនៅពិព័រណ៍ Thaifex Anuga Asia 2026 កាលពីយប់ថ្ងៃទី២៧ ខែឧសភា ឆ្នាំ២០២៦ ប្រមុខរដ្ឋាភិបាលថៃរូបនេះ បានទម្លាយពីលទ្ធផលនៃបេសកកម្មការទូតរបស់លោកទៅកាន់ប្រទេសបារាំង និងទីស្នាក់ការកណ្តាលរបស់អង្គការ UNESCO នាទីក្រុងប៉ារីស ដើម្បីបំភ្លឺនូវអ្វីដែលលោកហៅថាជាការយល់ច្រឡំជាអន្តរជាតិជុំវិញខ្សែបន្ទាត់ព្រំដែន។
 
នៅក្នុងជំនួបកម្រិតកំពូលនោះ លោក អានុទិន បានបង្ហាញជំហររឹងត្អូសដោយបដិសេធមិនយកខ្សែបន្ទាត់ខណ្ឌសីមាដែលគូរដោយបារាំងកាលពីអតីតកាល មកធ្វើជាបន្ទាត់គោលក្នុងការចរចាជាមួយកម្ពុជានោះឡើយ ទោះបីជាផែនទីខ្នាត ១:២០០,០០០ នេះ ធ្លាប់ជាអាវុធផ្លូវច្បាប់ដ៏សំខាន់ជួយឱ្យកម្ពុជាឈ្នះក្តីប្រាសាទព្រះវិហារនៅលើឆាកអន្តរជាតិក៏ដោយ។
 
អ្វីដែលធ្វើឱ្យសហគមន៍អន្តរជាតិស្រឡាំងកាំងនោះគឺ ​នាយករដ្ឋមន្ត្រីថៃបានថ្លែងសង្កត់ធ្ងន់ចំៗថា៖ «សម្រាប់ប្រទេសថៃ ខ្នាត ១:២០០,០០០ គឺលែងមានទៀតហើយ។ ប្រសិនបើមាននរណាម្នាក់ចង់មកបង្ខំឱ្យប្រើខ្នាតមួយនោះ គឺពួកគេកំពុងតែមើលទៅរកប្រទេសផ្សេងស្រឡះទៅហើយ»។ ផ្ទុយទៅវិញ លោក អានុទីន បានទទូច និងបង្ហាញមហិច្ឆតាយ៉ាងច្បាស់ក្នុងការបង្ខំឱ្យមានការប្រើប្រាស់ប្រព័ន្ធបច្ចេកទេសវាស់វែងផ្ទាល់ខ្លួនរបស់រដ្ឋាភិបាលថៃ គឺផែនទីខ្នាត ១:៥០,០០០ ដែលថៃខ្លួនឯងជាអ្នកគូរឡើងវិញ ដែលប្រព័ន្ធថ្មីនេះត្រូវបានគេមើលឃើញថា អាចនឹងផ្តល់ផលចំណេញផ្នែកទឹកដីទៅខាងភាគីថៃយ៉ាងច្រើនក្នុងការចរចាព្រំដែនដីគោក និងតំបន់សមុទ្រត្រួតស៊ីគ្នា (OCA)។
 
សូមជម្រាបថា តាមទំព័រប្រវត្តិសាស្ត្រ ផែនទីខ្នាត ១:២០០,០០០ នេះ ត្រូវបានគូរឡើងដោយគណៈកម្មការចម្រុះបារាំង-សៀម ចន្លោះឆ្នាំ១៩០៤ ដល់ឆ្នាំ១៩០៧ យោងតាមសន្ធិសញ្ញាព្រំដែនផ្លូវការរវាងប្រទេសទាំងពីរ ហើយផែនទីឧបសម្ព័ន្ធទី១ នៃឯកសារនេះហើយ ដែលជាភស្តុតាងច្បាប់ដ៏រឹងមាំបំផុតជួយឱ្យកម្ពុជាឈ្នះក្តីវិវាទប្រាសាទព្រះវិហារ នៅតុលាការយុត្តិធម៌អន្តរជាតិ (ICJ) ទាំងនៅក្នុងឆ្នាំ១៩៦២ និងការបកស្រាយដីកាឡើងវិញក្នុងឆ្នាំ២០១៣។

ដូច្នេះការចេញមកប្រកាសមិនទទួលស្គាល់ផែនទីអន្តរជាតិពីសំណាក់មេដឹកនាំថៃនាពេលនេះ​ អ្នកវិភាគការបរទេសបានយល់ឃើញថា គឺជាយុទ្ធសាស្ត្រការទូតវាយលុកមួយ ដើម្បីដកហូតអាវុធផ្លូវច្បាប់ក្នុងដៃរបស់កម្ពុជា និងព្យាយាមលុបបំបាត់ឥទ្ធិពលនៃសាលដីកាប្រវត្តិសាស្ត្រ។ ទោះជាយ៉ាងណាក៏ដោយ ការព្យាយាមទាត់ចោលឯកសារច្បាប់អន្តរជាតិ ហើយងាកមកបង្ខំឱ្យប្រើប្រាស់ប្រព័ន្ធផ្ទាល់ខ្លួនរបស់ថៃបែបនេះ អាចនឹងធ្វើឱ្យការចរចាព្រំដែនរវាងប្រទេសជិតខាងទាំងពីរជួបភាពទាល់ច្រក និងបង្កជាភាពតានតឹងផ្នែកយោធាជាថ្មីនៅតាមបណ្តោយព្រំដែន៕