ក្រៅពីប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងប្រាសាទព្រះវិហារ ប្រទេសថៃកំពុងទាមទារយកប្រាសាទខ្មែរមួយទៀត នៅលើជួរភ្នំដងរ៉ែក។

ប្រាសាទខ្នារ ភូមិអូរទឹកចោល សង្កាត់កូនក្រៀល ក្រុងសំរោង ខេត្តឧត្តរមានជ័យ ទល់មុខនឹង ស្រុកកាបឈើង ខេត្តសុរិន្ទ ប្រទេសថៃ។

ប្រាសាទនេះ ឈរនៅលើកំពូលភ្នំកម្ពស់ប្រមាណជាង៨០០ម៉ែត្រ ដែលពលរដ្ឋកម្ពុជាអាចធ្វើដំណើរឡើងបានតាមរយៈជណ្ដើរឈើមួយដែលមានចំនួន១១៨១កាំ។

មេភូមិភាគ២ថៃថ្មី បានអះអាងថាប្រាសាទនេះមិនមែនជារបស់ប្រទេសណាម្នាក់កាន់កាប់នោះទេ ដោយកំពុងស្ថិតនៅតំបន់អង្កេតការណ៍រួមគ្នា។

គួរបញ្ជាក់ថា បច្ចុប្បន្នកងទ័ពកម្ពុជាកំពុងឈរជើងនៅទិសខាងត្បូង ពីតំបន់ប្រាសាទចុះទៅក្រោម ស្របពេលកងទ័ពថៃនៅទិសខាងជើង ក្បែរប្រាសាទដោយគ្រប់គ្រងស្រះទឹកចំនួន២៕

ខំចាក់បេតុងផង និងដាក់បាវខ្សាច់អស់រាប់ពាន់ម៉ែត្រគូបផង នៅតែមិនអាចទប់ទល់នឹងស្ថានភាពដីដែលបន្តបាក់ស្រុត ធ្វើឲ្យរណ្ដៅដីនៅផ្លូវ Samsen ទីក្រុងបាងកករីកធំទៅៗ អាជ្ញាធរថៃគ្មានជម្រើស មានតែបង្ខំចិត្តវា.យកម្ទេចអគារប៉ុស្តិ៍ប៉ូលីស Samsen ចោលឲ្យហើយ មុនពេលវាបាក់រលំចូលក្នុងរណ្ដៅបង្កឲ្យមានបញ្ហាធំជាងនេះ។

យោងតាមការចុះផ្សាយរបស់សារព័ត៌មាន The Nation របស់ថៃកាលពីថ្ងៃទី5 ខែតុលា ឆ្នាំ2025 បានឲ្យដឹងថា ការងាររុះរើអគារថ្មីនៅប៉ូលីស Samsen ក្នុងទីក្រុងបាងកកបានចាប់ផ្តើមហើយ បន្ទាប់ពីមានភ្លៀងធ្លាក់ខ្លាំងដែលបង្កឱ្យមានការបាក់ដីកាន់តែខ្លាំងបន្ថែម ព្រមទាំងបានបំផ្លាញគ្រឹះនៃអគារយ៉ាងធ្ងន់ធ្ងរ។

បើតាមការបញ្ជាក់ពីអភិបាលក្រុងបាងកក លោក Chadchart Sittipunt បានបញ្ជាក់ថា៖ ដីនៅក្រោមអគារនេះបានបាក់ស្រុតជាបន្តបន្ទាប់ ដែលធ្វើឱ្យខូចខាតរចនាសម្ព័ន្ធក៏ដូចជាគ្រឹះអគារ មិនអាចទ្រទ្រង់អគារប៉ុស្តិ៍ប៉ូលិសទាំងមូលបានតទៅមុខទៀត។ ដូច្នេះ មន្រ្តីជំនាញមានតែសម្រេចចិត្តវាយកម្ទេចអគារប៉ុស្តិ៍ប៉ូលិសចោលតែម្ដងដើម្បីកាត់បន្ថយទម្ងន់ផ្ទុក ដោយការងារនេះបានចាប់ផ្តើមនៅយប់ថ្ងៃសៅរ៍។

មន្រ្តីជំនាញរបស់ថៃបានអះអាងថា ដំណើរការជួសជុលក្រហូងដីនេះត្រូវបានពន្យាពេលម្ដងហើយម្ដងទៀតដោយសារតែស្ថានភាពដីហូរច្រោះបន្ទាប់ពីមានភ្លៀងធ្លាក់ខ្លាំងជាប់ៗគ្នា។ បញ្ហានេះបានបង្កឲ្យការជួសជុលកាន់តែមានភាពស្មុគស្មាញនិងចំណាយពេលយូរ ខណៈការបាក់ចេះតែបន្តកើតមាននៅច្រើនផ្នែកក្នុងតំបន់។

ជាមួយគ្នានេះ ផ្ទះ និងអគារដែលនៅក្បែរនោះ រួមទាំងមន្ទីរពេទ្យ Vajira ដែលមានអ្នកជំងឺស្នាក់នៅព្យាបាលពេញមន្ទីរពេទ្យនោះ កំពុងត្រូវបានមន្រ្តីជំនាញត្រួតពិនិត្យយ៉ាងដិតដល់ ហើយអាជ្ញាធរជំរុញឲ្យពលរដ្ឋធ្វើការផ្លាស់ទីលំនៅជាបណ្តោះអាសន្នអាសន្នផងដែរដើម្បីសុវត្ថិភាព។

ទន្ទឹមគ្នានេះ ការចាក់បំពេញខ្សាច់ចូលរណ្តៅដីដែលមានបណ្តោយ៣០ម៉ែត្រ ទទឹង៣០ម៉ែត្រ និងជម្រៅនៅ២០ម៉ែត្រគឺកំពុងបន្ត។ អាជ្ញាធរបានលើកឡើងថា មូលហេតុដែលបណ្តាលឱ្យមានការបាក់ស្រុតដីដ៏ធំនេះ ដោយសារតែដីបានផ្លាស់ប្តូរសណ្ឋានទៅជាទន់ជ្រាយ បើទោះបីជាទីតាំងនេះ កំពុងស្ថិតក្រោមការសាងសង់ស្ថានីយក្រោមដីក៏ដោយ៕

ប្រទេសវៀតណាម ៖ តាមការប្រកាសរបស់អាជ្ញាធរអាកាសចរណ៍ស៊ីវិលវៀតណាម គឺអាកាសយានដ្ឋានអន្តរជាតិចំនួន៣កន្លែង នៅទីក្រុងហាណូយ ទីក្រុងហៃហ្វង និងខេត្តក្វាងនីង នឹងរងផលប៉ះពាល់ដោយផ្ទាល់ពីខ្យល់ព្យុះទីហ្វុងមេតម៉ូ (Matmo) ដែលបោកបក់មកលើឆ្នេរសមុទ្រប្រទេសវៀតណាមថ្ងៃទី៦ ខែតុលា ឆ្នាំ២០២៥ ។ ក្រៅពី នេះ អាកាសយានដ្ឋានផ្សេងៗក៏ត្រូវត្រៀមលក្ខណៈផងដែរដើម្បីសុវត្ថិភាព និងកាត់បន្ថយផលប៉ះពាល់ ។

អាជ្ញាធរអាកាសចរណ៍ស៊ីវិលវៀតណាមបានប្រកាសឱ្យអាកាសយានដ្ឋានអន្តរជាតិ Noi Bai, អាកាសយានដ្ឋានអន្តរជាតិ Cat Bi និងអាកាសយានដ្ឋានអន្តរជាតិវ៉ាន់ដូន ត្រូវមានភ្នាក់ងារប្រចាំការ២៤ម៉ោង ព្រមទាំងត្រួតពិនិត្យអាកាសយានដ្ឋានតាមផែនការការពារខ្យល់ព្យុះ និងការពារសុវត្ថិភាពរបស់យន្តហោះ ។

ក្រៅពីនេះ អាកាសយានដ្ឋានថស់សួន អាកាសយានដ្ឋានវីង និងអាកាសយានដ្ឋានតៀនបៀន ក៏ត្រូវត្រៀមលក្ខណៈដូចគ្នាដែរ ខណៈអាកាសយានដ្ឋានកំពុងសាងសង់ ត្រូវផ្អាកការសាងសង់ពេលអាកាសធាតុមិនល្អដើម្បីសុវត្ថិភាព និងកាត់បន្ថយផលប៉ះពាល់ ។ ខ្យល់ព្យុះមេតម៉ូនឹងបោកបក់មកលើឆ្នេរសមុទ្រហាឡុងខេត្តក្វាងប៊ិង នៅថ្ងៃទី៦ ខែតុលា ក្នុងល្បឿនខ្យល់ចាប់ពី៧៥គីឡូម៉ែត្រ ទៅ៨៨គីឡូម៉ែត្រក្នុង១ម៉ោង ។ នេះបើតាមមជ្ឈមណ្ឌលជាតិព្យាករណ៍ឧតុនិយម ។

ទោះជាឧតុនិយមវៀតណាមរំពឹងថា ទីក្រុងហាណូយនឹងមិនរងផលប៉ះពាល់ខ្លាំងដោយសារខ្យល់ព្យុះនេះ ប៉ុន្តែទីក្រុងហាណូយនឹងមានភ្លៀងធ្លាក់ចាប់ពីបរិមាណ៧០មីលីម៉ែត្រ ទៅ១២០មីល្លីម៉ែត្រ និងតំបន់ខ្លះមានបរិមាណទឹកភ្លៀងរហូតដល់ជាង១៥០មីល្លីម៉ែត្រ ចាប់ពីព្រឹកថ្ងៃទី៦ ដល់ថ្ងៃទី៧ ខែតុលា ។ អាជ្ញាធរទីក្រុងហាណូយបានណែនាំឱ្យក្រុមហ៊ុននានាអនុញ្ញាតឱ្យបុគ្គលិកធ្វើការពីផ្ទះ (Work from Home) និងឱ្យស្ថាប័នអប់រំអនុញ្ញាតឱ្យកូនសិស្ស និស្សិត សម្រាកពីការរៀនសូត្រនៅថ្ងៃទី៦ ខែតុលា ។

ចំណែកអគ្គសេនាធិការកងទ័ពប្រជាជនវៀតណាមបានបង្កើតក្រុមត្រួតពិនិត្យអាកាសធាតុដើម្បីទប់ទល់ខ្យល់ព្យុះទីហ្វុងមេតម៉ូ ដែលក្រុមត្រួតពិនិត្យនេះនឹងទំនាក់ទំនងជាមួយទីបញ្ជាការយោធាខេត្តក្វាងនីង ដើម្បីតាមដានអាកាសធាតុ ចាត់វិធានការ និងវាយតម្លៃផលប៉ះពាល់ ដោយអនុវត្តតាមវិធានការទប់ទល់ខ្យល់ព្យុះ ៕

ប្រទេសថៃ ៖ អតីតមេបញ្ជាការយោធភូមិភាគ២ លោក ប៊ុនស៊ីន ផាកក្លាង ដែលបានចូលនិវត្តន៍ពីការងារកងទ័ពកាលពីថ្ងៃទី៣០ ខែកញ្ញា ឆ្នាំ២០២៥ និងត្រូវបានស្តេចថៃប្រគល់តំណែងថ្មីធ្វើជាអង្គរក្សពិសេស ពេលនេះ លោកបានទទួលតំណែងមួយទៀតហើយ គឺទីប្រឹក្សាមេបញ្ជាការកងទ័ពជើងគោក ដែលមានតួនាទីណែនាំពីយុទ្ធសាស្ត្រការពារប្រទេស និងផ្តល់នូវបទពិសោធន៍ពង្រឹងសន្តិសុខរបស់កងទ័ព ។ នេះបើតាមការចុះផ្សាយរបស់សារព័ត៌មាន TNN នៅថ្ងៃទី៣ ខែតុលា ឆ្នាំ២០២៥ ។

កាលពីថ្ងៃទី១ ខែតុលា កងទ័ពជើងគោកថៃបានចេញលិខិតតែងតាំងលោក ប៊ុនស៊ីន មន្ត្រីកងទ័ពចូលនិវត្តន៍ ឱ្យកាន់តំណែងជាទីប្រឹក្សាមេបញ្ជាការកងទ័ពជើងគោក ដែលលិខិតនេះចុះហត្ថលេខាដោយលោក ផាណា ឃ្លេវផ្លតថុក មេបញ្ជាការកងទ័ពជើងគោក ។ លោក ប៊ុនស៊ីន មានតួនាទីចម្បង គឺផ្តល់ការណែនាំពីយុទ្ធសាស្ត្រផ្នែកសន្តិសុខ និងយុទ្ធសាស្ត្រការពារប្រទេស ។

ការតែងតាំងនេះមានគោលបំណងប្រើប្រាស់ធនធានមនុស្សរបស់កងទ័ពឱ្យមានប្រយោជន៍បំផុត ដោយកងទ័ពជើងគោកថៃចាត់ទុកលោក ប៊ុនស៊ីន គឺជាមេដឹកនាំកងទ័ពដែលមានចំណេះដឹង សមត្ថភាព ការលះបង់ និងបទពិសោធន៍ក្នុងការបំពេញតួនាទី ជាពិសេស ពេលសង្គ្រាមនៅព្រំដែនកម្ពុជា-ថៃ ។ លោក ប៊ុនស៊ីន បានរក្សាអធិបតេយ្យភាព និងការពារសុវត្ថិភាពពលរដ្ឋ ។

ទីប្រឹក្សាមេបញ្ជាការកងទ័ពជើងគោកមានតួនាទីចម្បង គឺផ្តល់ការប្រឹក្សា ណែនាំ និងណែនាំពីយុទ្ធសាស្ត្រសន្តិសុខ យុទ្ធសាស្ត្រការពារជាតិ រួមទាំងគាំទ្រភារកិច្ចរបស់មេបញ្ជាការកងទ័ពជើងគោក ។ ការតែងតាំងនេះឆ្លុះបញ្ចាំងពីការប្តេជ្ញាចិត្តរបស់កងទ័ពជើងគោកក្នុងការយកបទពិសោធន៍របស់លោក ប៊ុនស៊ីន មកប្រើប្រាស់នាពេលបច្ចុប្បន្ន ។

គួរបញ្ជាក់ថា លោក ប៊ុនស៊ីន គឺជាបុគ្គលបង្កជម្លោះ និយាយមូលបង្កាច់ និងចោទប្រកាន់កម្ពុជា រហូតទទួលបានការលើកតម្កើងពីពលរដ្ឋថៃនៅទូទាំងប្រទេសចង់ឱ្យលោកធ្វើជានាយករដ្ឋមន្ត្រី ថែមទាំងធ្វើរូបសំណាកគោរពទៀតផង ។ ដូចគ្នានេះ ស្តេចថៃបានចេញព្រះរាជក្រឹត្យតែងតាំងមេទ័ពឈ្លានពានរូបនេះធ្វើជាអង្គរក្សពិសេស ដោយសារលោក ប៊ុនស៊ីន បានបំពេញភារកិច្ចតាមការបញ្ជារបស់ស្តេចថៃ ។

លោក ប៊ុនស៊ីន បានបង្កសង្គ្រាមជាមួយកម្ពុជាដើម្បីកសាងប្រជាប្រិយភាពរបស់ខ្លួន ដោយលោកនិយាយនាពេលកន្លងមកថា ស្តេចថៃបានយកព្រះទ័យទុកដាក់ខ្លាំងលើស្ថានការណ៍ព្រំដែនជាមួយកម្ពុជា រាល់ការវិវឌ្ឍន៍ស្ថានការណ៍ព្រំដែន លោកត្រូវតែរាយការណ៍ផ្ទាល់ថ្វាយឱ្យព្រះអង្គជ្រាប ៕

បងប្អូនខ្មែរយើងគិតយ៉ាងម៉េចដែរ? នាយករដ្ឋមន្រ្តីថៃ លោក Anutin Charnvirakul បានព្រមានថា ប្រទេសថៃបានត្រៀមខ្លួនរួចរាល់ក្នុងបិទព្រំដែនបន្តជាមួយកម្ពុជាដោយគ្មានការកំណត់ ប្រសិនបើភាពតានតឹងលើជម្លោះព្រំដែននៅតែបន្តកើនឡើង។ នេះបើតាមការចុះផ្សាយដោយសារព័ត៌មាន The Nation របស់ថៃ។

ថ្លែងទៅកាន់អ្នកសារព័ត៌មានកាលពីថ្ងៃទី2 ខែតុលា ឆ្នាំ2025 លោក Anutin Charnvirakul បាននិយាយថា រដ្ឋាភិបាលថៃនឹងផ្តល់អាទិភាពដល់សន្តិសុខជាតិ និងសុវត្ថិភាពរបស់ពលរដ្ឋថៃលើសពីអ្វីៗទាំងអស់។ លោកបានកត់សម្គាល់ថា ប្រទេសថៃនឹងមិនស្ទាក់ស្ទើរក្នុងការចាត់វិធានការតឹងរ៉ឹងណាមួយឡើយ ប្រសិនបើស្ថានការណ៍នៅតាមព្រំដែនកាន់តែមានភាពតានតឹង។

លោកបញ្ជាក់ថា បញ្ហាសំខាន់ចំនួនបីត្រូវបានពិចារណា ហើយជាគោលការណ៍ ក្របខណ្ឌនៃការសាងសង់របងព្រំដែនកម្ពុជា-ថៃ ត្រូវបានអនុម័ត។ ព័ត៌មានលម្អិតនៃគម្រោងនេះនឹងត្រូវគ្រប់គ្រងដោយកងទ័ពភូមិន្ទថៃ ដោយការសាងសង់របងនឹងប្រែប្រួលទៅតាមស្ថានភាពដី និងភាពងាយស្រួលរបស់ប្រជាជនក្នុងតំបន់។

នៅពេលសួរអំពីគោលនយោបាយស្តីពីការបណ្ដេញពលរដ្ឋខ្មែរ នៅតំបន់ភូមិជោគជ័យ និង ភូមិព្រៃចាន់ ដែលយោធាថៃបានកំណត់កាលបរិច្ឆេទឲ្យពលរដ្ឋខ្មែររើចេញនៅថ្ងៃទី 10 ខែតុលានោះ លោក Anutinបានបញ្ជាក់ថា នីតិវិធីច្បាប់នេះគឺត្រូវតែអនុវត្ត រដ្ឋាភិបាលនឹងបណ្តេញជនជាតិខ្មែរចេញពីតំបន់នេះឲ្យអស់នៅពេលដ៏សមស្រប ដែលមិនចាំបាច់ដល់ថ្ងៃទី 10 ខែតុលាទេ។

ការលើកឡើងនេះបានកើតឡើងចំពេលដែលកម្ពុជានិងថៃកំពុងមានការប៉ះទង្គិចគ្នាលើការគ្រប់គ្រងព្រំដែន និងសន្តិសុខ ដែលបង្កឱ្យមានការព្រួយបារម្ភក្នុងចំណោមសហគមន៍ដែលរស់នៅក្នុងតំបន់រងផលប៉ះពាល់។ លើសពីនេះ ពាណិជ្ជកម្មក្នុងស្រុក និងការធ្វើដំណើរចេញ-ចូលនានាត្រូវបានរំខានយ៉ាងដុនដាបនៅក្នុងខេត្តមួយចំនួន។

អ្នកវិភាគក្នុងតំបន់បានព្រមានថា ការបិទព្រំដែនរយៈពេលយូរអាចហុចផលវិបាកផ្នែកសេដ្ឋកិច្ចទៅកាន់ប្រទេសទាំងសងខាង ជាពិសេសសម្រាប់ពាណិជ្ជកម្មតាមព្រំដែន ដែលបម្រើជាខ្សែជីវិតដ៏សំខាន់សម្រាប់សហគមន៍ជាច្រើននៅភាគីទាំងពីរ។

ទោះជាយ៉ាងណាគេកត់សម្គាល់ឃើញថា កម្ពុជាពុំសូវទទួលរងផលប៉ះពាល់ខ្លាំងពីការបិទនេះទេ ដោយបើសម្លឹងទៅមើលទំហំទឹកប្រាក់នៃការនាំចូលទៅវិញទៅមករបស់ប្រទេសទាំងពីរ ថៃមានទំនិញនាំចូលមកកម្ពុជាមានចំនួនច្រើនជាងកម្ពុជារាប់សិបដង ដែលកត្តានេះឆ្លុះបញ្ចាំងថាថៃគឺជាអ្នកខាតបង់ខ្លាំងនៅពេលសកម្មភាពនាំចេញត្រូវបានកាត់ផ្ដាច់។

បន្ថែមពីនេះ ដើម្បីយកចិត្តពលរដ្ឋជ្រុលនិយមថៃ រដ្ឋាភិបាលថៃមាននាយករដ្ឋមន្រ្តីថ្មីគឺលោក Anutin នេះ សុខចិត្តប្ដេជ្ញាចិត្តបន្តបិទព្រំដែនជាមួយកម្ពុជា ទោះជាដឹងថាកម្ពុជានឹងមិនដាច់ពោះស្លា.ប់ដោយសារថៃបិទព្រំដែនឡើយ។ ផ្ទុយទៅវិញ ការអនុវត្តតាមការទាមទាររបស់ប្រជាជនដោយមិនគិតគូរពីផលប៉ះពាល់ជាក់ស្ដែងនេះ បន្តិចទៀតរដ្ឋាភិបាលថៃមុខជាត្រូវដោះស្រាយបញ្ហាបំណុលរបស់ពលរដ្ឋ បាត់បង់ទីផ្សារនាំចេញទំនិញ និងខាតបង់ផ្នែកសេដ្ឋកិច្ចធ្ងនធ្ងរជាក់ជាមិនខាន៕