ចិន៖ ទីក្រុងប៉េកាំងបានបង្កើតប៉ុស្តិ៍ប៉ូលីសនៅក្រៅប្រទេសជាង ១០០កន្លែងនៅទូទាំងពិភពលោក ដើម្បីត្រួតពិនិត្យ ការយាយី និងក្នុងករណីខ្លះដែលមានការធ្វើមាតុភូមិនិវត្តន៍ពលរដ្ឋចិន ដែលកំពុង និរទេសខ្លួន ដោយប្រើការរៀបចំសន្តិសុខទ្វេភាគី ជាមួយបណ្តាប្រទេសនៅអឺរ៉ុប និងអាហ្រ្វិក ដើម្បីទទួល បានវត្តមានយ៉ាងទូលំទូលាយជាអន្តរជាតិ។ នេះបើយោងតាមការចុះផ្សាយរបស់សារព័ត៌មាន CNN នៅថ្ងៃទី ០៥ ខែធ្នូ ឆ្នាំ២០២២។

អ្នកធ្វើយុទ្ធនាការសិទ្ធិមនុស្សដែលមានមូលដ្ឋាននៅទីក្រុងម៉ាឌ្រីដ បាននិយាយថា ខ្លួនបានរកឃើញភ័ស្តុតាងថា ប្រទេសចិនកំពុងប្រតិបត្តិការប៉ុស្តិ៍ប៉ូលីសចំនួន ៤៨ បន្ថែមទៀតនៅ បរទេស ចាប់តាំងពីក្រុមនេះបានបង្ហាញពីវត្តមាននៃស្ថានីយ៍ចំនួន ៥៤កន្លែងនៅក្នុងខែកញ្ញា។

ការចេញផ្សាយថ្មី ដែលផ្តោតលើទំហំនៃបណ្តាញ និងពិនិត្យមើលតួនាទីដែលគំនិតផ្តួចផ្តើមប៉ូលីសរួមគ្នា រវាងប្រទេសចិន និងបណ្តាប្រទេសអឺរ៉ុបមួយចំនួន រួមទាំងប្រទេសអ៊ីតាលី ក្រូអាស៊ី ស៊ែប៊ី និងរូម៉ានី បានដើរតួក្នុងការសាកល្បងការពង្រីកខ្លួនរបស់ចិនកាន់តែទូលំទូលាយ។

ក្នុងចំណោមការអះអាងថ្មីៗដែលត្រូវបានចាត់ថ្នាក់ដោយក្រុមនេះ បង្ហាញថា ជនជាតិចិនម្នាក់ ត្រូវបានបង្ខិតបង្ខំឱ្យត្រឡប់ទៅផ្ទះវិញ ដោយប្រតិបត្តិករដែលធ្វើការលាក់កំបាំង នៅក្នុងប៉ុស្តិ៍ប៉ូលីសនៅ ក្រៅប្រទេសរបស់ចិន នៅជាយក្រុងប៉ារីស ដែលត្រូវបានជ្រើសរើសយ៉ាងច្បាស់លាស់ សម្រាប់គោល បំណងនោះ បន្ថែមពីលើការបង្ហាញមុនថា ជនជាតិចិនពីរនាក់ទៀត ត្រូវ​បាន​បញ្ជូន​ត្រឡប់​មក​វិញ​ដោយ​បង្ខំ​ពី​អឺរ៉ុប មួយ​នៅ​ស៊ែប៊ី មួយ​ទៀត​នៅ​អេស្ប៉ាញ៕

រដ្ឋធានីកៀវ៖ កងទ័ពអ៊ុយក្រែន បានអះអាងថា ការវាយប្រយុទ្ធគ្នា នៅក្នុងរយៈពេល២៤ម៉ោងកន្លងមកនេះ ទាហានរុស្ស៊ី បានបាត់បង់ជីវិត ចំនួន៥៤០នាក់ ហើយជាមួយនឹងតួលេខថ្មីនេះ បានធ្វើឲ្យក្រុងមូស្គូ បាត់បង់ទាហាន កើនឡើង ជិតដល់៩២ ០០០នាក់។

សារព័ត៌មាន Ukrinform បានចេញផ្សាយ កាលពីថ្ងៃចន្ទ ទី៥ ខែធ្នូ ថា អគ្គសេនាធិការកងទ័ពអ៊ុយក្រែន បានបង្ហោះ នៅលើបណ្ដាញសង្គមហ្វេសប៊ុក ថា រុស្ស៊ី បានបាត់បង់កងទ័ព កើនឡើង រហូតដល់ ៩១ ៦៩០នាក់ ចាប់តាំងពីការផ្ទុះសង្គ្រាម នៅថ្ងៃទី២៤ ខែកុម្ភៈ រហូតមកដល់ថ្ងៃទី៥ ខែធ្នូ ឆ្នាំ២០២២។ រីឯទាហានរុស្ស៊ី បានរងគ្រោះថ្នាក់ខ្លាំង នៅលើសមរភូមិលីម៉ាន់ (Lyman) និង បាខ្មូត (Bakhmut)។

ប្រភពព័ត៌មានដដែល បានបន្ដ ថា ក្រៅពីការបាត់បង់កម្លាំងទាហានប្រយុទ្ធនោះ រុស្ស៊ី ក៏បានរងការខូចខាតគ្រឿងយុទ្ធោបករណ៍ មានតម្លៃរាប់ពាន់លានដុល្លារសហរដ្ឋអាមេរិក ដោយសារកងទ័ពអ៊ុយក្រែន បាញ់កម្ទេច រួមមាន យន្ដហោះចម្បាំង ចំនួន២៨១គ្រឿង, ឧទ្ធម្ភាគចក្រ ចំនួន ២៦៤គ្រឿង, នាវាចម្បាំងតូចធំ ចំនួន១៦គ្រឿង, រថក្រោះ ចំនួន២ ៩២៤គ្រឿង, រថពាសដែក ចំនួន ៥ ៩០០គ្រឿង, ប្រព័ន្ធកាំភ្លើងផ្លោង ចំនួន ១ ៩១៤គ្រឿង, ប្រព័ន្ធបាញ់គ្រាប់រ៉ុក្កែតចម្រុះ ចំនួន ៣៩៥គ្រឿង, ប្រព័ន្ធប្រឆាំងនឹងយន្ដហោះចម្បាំង ចំនួន២១១គ្រឿង, ដ្រូន ចំនួន១ ៥៨២គ្រឿង, រថយន្ដយោធា និង រថយន្ដដឹកប្រេងឥន្ធនៈ ចំនួន ៤ ៤៩៧គ្រឿង ព្រមទាំងគ្រឿងសឹកជាច្រើនទៀត…។

ទោះជាយ៉ាងណា គេនៅមិនទាន់មានរបាយការណ៍ជាក់លាក់ណាមួយ បញ្ជាក់អំពីតួលេខពិតប្រាកដ ពីប្រភពឯករាជ្យណាមួយនៅឡើយ។ តួលេខខាងលើនេះ គ្រាន់តែបានចេញផ្សាយ ដោយភាគីអ៊ុយក្រែន តែប៉ុណ្ណោះ។

ដោយឡែក ភាគីរុស្ស៊ី វិញ មិនបានបញ្ជាក់នោះទេ ជុំវិញការបាត់បង់ទាហានរបស់ខ្លួន នៅលើសមរភូមិ ក្រោមហេតុផល ជាការងារសម្ងាត់របស់ជាតិ។ លើសពីនេះ ក្រុងមូស្គូ ថែមទាំងបានហាមឃាត់ដល់ប្រជាជនរបស់ខ្លួន និយាយជាសាធារណៈ ជុំវិញសកម្មភាពពាក់ព័ន្ធនឹងកងទ័ព រួមទាំង ការកេណ្ឌទ័ព សីលធម៌របស់កងទ័ព ស្ថានភាពកងទ័ព …ជាដើម សូម្បីតែសមាជិករបស់កងទ័ពណាម្នាក់ប្រព្រឹត្ដខុស ក៏មិនអនុញ្ញាតឲ្យនិយាយនោះដែរ ដោយរុស្ស៊ី ចាត់ទុកជាកិច្ចការសម្ងាត់របស់ជាតិ។

ដោយឡែក លោក ឡយ អូស្ទីន (Lloyd Austin) រដ្ឋមន្រ្ដីក្រសួងការពារជាតិ សហរដ្ឋអាមេរិក បានអះអាង កាលពីខែមុន ថា ទាហានរុស្ស៊ី ប្រហែល១០ម៉ឺននាក់ បានស្លាប់ និង រងរបួស នៅលើសមរភូមិរបស់អ៊ុយក្រែន។ ចំណែកកងទ័ពការពារទឹកដីរបស់អ៊ុយក្រែន ក៏បានរងគ្រោះថ្នាក់ ប្រហាក់ប្រហែលគ្នានេះដែរ។

លោក មីខៃឡូ ប៉ូដូលយ៉ាក់ (Mykhailo Podolyak) ទីប្រឹក្សារបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) បានបង្ហាញ អំពីការធ្វើបច្ចុប្បន្នភាព នៃចំនួនកងទ័ពរបស់ក្រុងកៀវ បាត់បង់ជីវិតជាលើកទី១ ចាប់តាំងពីចុងខែសីហា ខណៈនោះ មេទ័ពកំពូលអ៊ុយក្រែន បានអះអាង ថា កងទ័ពរបស់ខ្លួន ជិត៩ ០០០នាក់ បានបាត់បង់ជីវិត។

លោកទីប្រឹក្សារបស់ប្រធានាធិបតីអ៊ុយក្រែន រូបនេះ កាលពីថ្ងៃព្រហស្បតិ៍ ទី២ ខែធ្នូ បានប្រាប់ដល់បណ្ដាញទូរទស្សន៍របស់អ៊ុយក្រែន Channel 24 ថា «យើងមានតួលេខជាផ្លូវការ ពីអគ្គសេនាធិការកងទ័ពអ៊ុយក្រែន និង តួលេខពីមេទ័ពកំពូល អំពីចំនួនកម្លាំងការពារទឹកដី ចន្លោះពី ១២ ៥០០០ ទៅ១៣ ០០០ បានបាត់បង់ជីវិត ចាប់តាំងពីការផ្ទុះសង្គ្រាមរបស់រុស្ស៊ី រហូតមកដល់ពេលនេះ។ យើងនិយាយជាចំហ អំពីចំនួនកងទ័ពរបស់យើងបានស្លាប់ ប៉ុន្ដែចំនួនកងទ័ពរងរបួស ពិតជាច្រើន ជាងកងទ័ពដែលបានស្លាប់»។

លោក Podolyak បានបន្ថែម ថា លោកប្រធានាធិបតី ហ្សេឡែនស្គី នឹងប្រកាសតួលេខផ្លូវការជាសាធារណៈ ខណៈពេលវេលាត្រឹមត្រូវណាមួយចូលមកដល់។

កងទ័ពអ៊ុយក្រែន បានវាយបកយ៉ាងខ្លាំង ទៅលើកម្លាំងទាហានរុស្ស៊ី វិញ ចាប់តាំងពីដើមខែកញ្ញា រហូតរំដោះបានទឹកដីរបស់ពួកគេ ជាបន្តបន្ទាប់ នៅតំបន់ភាគឦសាន និង ភាគខាងត្បូងប្រទេស រួមទាំង ទីក្រុងខឺរសុន (Kherson) ដែលជាទីក្រុងយុទ្ធសាស្រ្ដដ៏សំខាន់ បានធ្លាក់ទៅក្រោមការគ្រប់គ្រងរបស់រុស្ស៊ី ក្រោយការចាប់ផ្ដើមសង្គ្រាម កាលពីថ្ងៃទី២៤ ខែកុម្ភៈ។

ការិយាល័យឧត្ដមស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិ (OHCHR) បានធ្វើកំណត់ត្រា អំពីជនស៊ីវិលរងគ្រោះថ្នាក់ នៅក្នុងសង្គ្រាមអ៊ុយក្រែន មាន ចំនួន ១៧ ១៨១នាក់ ដោយរាប់បញ្ចូលទាំងអ្នកស្លាប់ ចំនួន ៦ ៧០២នាក់ និង រងរបួស ចំនួន ១០ ៤៧៩នាក់៕

រដ្ឋធានីមូស្គូ៖ រហូតមកដល់ពេលនេះ ក្រុងមូស្គូ បានចោទប្រកាន់កងទ័ពអ៊ុយក្រែន បានឆ្លងកាត់ព្រំដែន មានចម្ងាយរាប់រយគីឡូម៉ែត្រ វាយប្រហារទៅលើមូលដ្ឋានកងទ័ពអាកាសយុទ្ធសាស្រ្ដរបស់រុស្ស៊ី ចំនួន២កន្លែងផ្សេងគ្នា នៅកណ្ដាលប្រទេស ធ្វើឲ្យខូចខាតដល់យន្ដហោះទម្លាក់គ្រាប់បែក ចំនួន២គ្រឿង។

សារព័ត៌មាន Politico បានចេញផ្សាយ កាលពីព្រឹក ថ្ងៃអង្គារ ទី៦ ខែធ្នូ ថា អាកាសយានដ្ឋានរបស់រុស្ស៊ី ចំនួន២កន្លែង ដែលប្រើប្រាស់ សម្រាប់ការវាយប្រហារ នៅក្នុងសង្គ្រាមអ៊ុយក្រែន ក៏មានសេចក្ដីរាយការណ៍ អំពីការវាយប្រហារ។

លោក អេនតូ ហ្គេរ៉ាសឆែនកូ (Anton Gerashchenko) ទីប្រឹក្សា ក្រសួងមហាផ្ទៃអ៊ុយក្រែន បានបញ្ជាក់ ថា រុស្ស៊ី បានប្រើប្រាសមូលដ្ឋានទ័ពអាកាសទាំងនេះ សម្រាប់ការវាយប្រហារ ដោយមីស៊ីល ប្រឆាំងនឹងអ៊ុយក្រែន ចាប់តាំងពីការចាប់ផ្ដើមសង្គ្រាមទ្រង់ទ្រាយធំ កាលពីថ្ងៃទី២៤ ខែកុម្ភៈ រហូតមក។

ក្រុងមូស្គូ បានបញ្ជាក់ កាលពីថ្ងៃចន្ទ ថា ប្រព័ន្ធការពារដែនអាកាសរបស់រុស្ស៊ី បានស្ទាក់ចាប់យន្ដហោះគ្មានមនុស្សបើក ឬ ដ្រូន របស់អ៊ុយក្រែន នៅលើអាកាសយានដ្ឋានយោធា ចំនួន២កន្លែង ស្ថិតនៅលើទឹកដីរុស្ស៊ី ដែលមានចម្ងាយ រាប់រយគីឡូម៉ែត្រ ពីព្រំដែន រវាងប្រទេសទាំង២។

ក្រសួងការពារជាតិរុស្ស៊ី បានបញ្ជាក់ នៅក្នុងសេចក្ដីថ្លែងការណ៍មួយ ថា កម្ទេចកម្ទី នៃដ្រូន ចំនួន២គ្រឿង ដែលខូចខាតតិចតួច បានធ្លាក់មកលើដី។ ចំណែកទីភ្នាក់ងាររុស្ស៊ី ចំនួន៣ បានបាត់បង់ជីវិត និង ៤នាក់ផ្សេងទៀត បានរងរបួស នៅក្នុងឧបទ្ទវហេតុ វាយប្រហារទៅលើអាកាសយានដ្ឋានយោធា ឌីយ៉ាហ្គីឡែវ៉ូ (Dyagilevo) នៅជិតទីក្រុង Ryanzan និង អាកាសយានដ្ឋានយោធា អេនហ្គែលស៍ (Engels) នៅតំបន់សារ៉ាតូវ (Saratov) ដែលមានចម្ងាយប្រហែល ៧៥០គីឡូម៉ែត្រ ពីរដ្ឋធានីមូស្គូ។

យន្ដហោះទម្លាក់គ្រាប់បែកយុទ្ធសាស្រ្ដហោះហើរ រយៈចម្ងាយឆ្ងាយ ដូចជា ប្រភេទ Tu-160 និង Tu-95 ត្រូវគេជឿ ថា ស្ថិតក្នុងមូលដ្ឋានកងទ័ពអាកាស ឌីយ៉ាហ្គីឡែវ៉ូ (Dyagilevo) និង Engels ។ អាកាសយានដ្ឋានយោធាទាំង២នេះ ត្រូវបានគេរាយការណ៍ ថា បានផ្ទុះយ៉ាងខ្លាំង ទាំងព្រឹកព្រលឹមតែម្ដង ប៉ុន្ដែមិនមានសេចក្ដីរាយការណ៍ភ្លាមៗ អំពីការខូចខាតយន្ដហោះទម្លាក់គ្រាប់បែករបស់រុស្ស៊ី ទាំងនោះឡើយ។

ត្រឹមតែរយៈពេលប៉ុន្មានម៉ោង ក្រោយការវាយប្រហារទៅលើអាកាសយានដ្ឋានយោធា នៅក្នុងប្រទេសរុស្ស៊ី នោះមក ក្រុងមូស្គូ បានបាញ់ស្រោចគ្រាប់មីស៊ីល ទៅលើគោលដៅនានា នៅពាសពេញ ប្រទេសអ៊ុយក្រែន។ ប៉ុន្ដែប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី បានអះអាង ថា ប្រព័ន្ធការពារដែនអាកាសរបស់ក្រុងកៀវ បានបាញ់ទម្លាក់ ស្ទើរតែទាំងអស់។

ទោះជាយ៉ាងណា ក្រុមមន្រ្ដីរដ្ឋាភិបាលក្រុងកៀវ មិនបានធ្វើការអត្ថាធិប្បាយ ជាផ្លូវការណាមួយ ជុំវិញការវាយប្រហារទៅលើមូលដ្ឋានទ័ពអាកាសរបស់ក្រុងមូស្គូ ស្ថិតក្នុងប្រទេសរុស្ស៊ី ដែលមានចម្ងាយរាប់រយគីឡូម៉ែត្រ ពីព្រំដែនជាប់ជាមួយនឹងអ៊ុយក្រែន នោះឡើយ។ ប៉ុន្ដែកងទ័ពអាកាសរបស់អ៊ុយក្រែន គ្រាន់តែសរសេរ នៅលើបណ្ដាញសង្គមធ្វីធើរ ថា «តើមានអ្វីកើតឡើង?» ដោយរួមជាមួយនឹងរូប Emoji និង រូបភាពពីអ្វីដែលមើលទៅដូចជាយន្ដហោះទម្លាក់គ្រាប់បែក រងនូវការខូចខាតយ៉ាងដំណំ។

ក្រុងមូស្គូ បានចោទប្រកាន់អ៊ុយក្រែន ថា បានវាយលុកចូលទៅក្នុងទឹកដីរបស់ខ្លួន លើសពីពេលមុន។ ការវាយប្រហារនេះ បានចូលយ៉ាងជ្រៅទៅក្នុងប្រទេសរុស្ស៊ី ដោយចម្ងាយឆ្ងាយជាងការវាយប្រហារ នាពេលមុនៗ ហើយក៏ជាលើកដំបូងផងដែរ។

ដោយឡែក លោក ស្ដែវ រ៉ូសេនប៊ឺក (Steve Rosenberg) និពន្ធនាយកជាភាសារុស្ស៊ីរបស់ BBC បាននិយាយថា ការវាយប្រហាររបស់អ៊ុយក្រែន ទៅចូលជ្រៅ ទៅក្នុងប្រទេសរុស្ស៊ី នឹងធ្វើឱ្យវិមានក្រឹមឡាំង កាន់តែអាម៉ាស់ខ្លាំងឡើងបន្ថែមទៀត។

ទោះជាយ៉ាងណា លោក មីខៃឡូ ប៉ូដូលយ៉ាក់ (Mykhylo Podolyak) ទីប្រឹក្សា ប្រធានាធិបតីអ៊ុយក្រែន ហាក់ដូចជានិយាយសំដៅ ទៅលើឧបទ្ទវហេតុ ដែលបានរាយការណ៍ នៅក្នុងបណ្ដាញសង្គម Tweet ដោយសរសេរ ថា «ប្រសិនបើអ្វីមួយត្រូវបានបាញ់ចូលទៅក្នុងដែនអាកាសរបស់ប្រទេសផ្សេង មិនយូរ មិនឆាប់ វត្ថុហោះហើរដែលគេមិនស្គាល់ នឹងត្រឡប់ទៅចំណុចចេញដំណើរវិញ»។

ដោយឡែក រូបភាពពីផ្កាយរណប បានថត កាលពីថ្ងៃអាទិត្យ បង្ហាញពីកងយន្ដហោះទម្លាក់គ្រាប់បែកធុនធ្ងន់របស់រុស្ស៊ី មានចំនួនយ៉ាងច្រើន កំពុងតែស្ថិតក្នុងមូលដ្ឋានកងទ័ពអាកាស Engels តំបន់សារ៉ាតូវ ។ រូបភាពនោះ បានបង្ហាញ ពីយន្ដហោះទម្លាក់គ្រាប់បែកយុទ្ធសាស្រ្ដរបស់រុស្ស៊ី ជាច្រើនគ្រឿង រួមមាន ប្រភេទ Tu-160 និង Tu-95 មានសមត្ថភាពអាចបាញ់មីស៊ីលគ្រូស ដែលជាអាវុធប្រើប្រាស់ វាយប្រហារ នៅក្នុងប្រទេសអ៊ុយក្រែន។

មូលដ្ឋានកងទ័ពអាកាសសាគី (Saky) របស់កងទ័ពជើងទឹករុស្ស៊ី ប្រចាំសមុទ្រខ្មៅ នៅភាគខាងលិចឧបទ្វីគ្រីមៀ (Crimea) និង មូលដ្ឋានយោធាមួយកន្លែងទៀត នៅភាគខាងជើងឧបទ្វីបនេះ ដែលក្រុងមូស្គូ បានរឹបអូសពីអ៊ុយក្រែន កាលពីអំឡុងឆ្នាំ២០១៤ បានរងការបំផ្ទុះ កាលពីដើមខែសីហាកន្លងទៅ ដោយបានបំផ្លាញយន្ដហោះចម្បាំង អស់ជាច្រើនគ្រឿង និង ខូចខាតហេដ្ឋារចនាសម្ព័ន្ធអាកាសយានដ្ឋាន។

ទោះជាយ៉ាងណា ក្រោយការវាយប្រហារភា្លមៗនោះ អ៊ុយក្រែន មិនបានធ្វើដឹងឮ ឬធ្វើអត្ថាធិប្បាយអ្វីឡើយ។ លុះក្រោយមក ទើបក្រុងកៀវ បានប្រកាសទទួលស្គាល់ អំពីសកម្មភាពរបស់ខ្លួន។ ចំណែកការបំផ្ទុះ នៅក្នុងព្រលានយន្ដហោះយោធារបស់រុស្ស៊ី ចំនួន២កន្លែងផ្សេងគ្នា ចុងក្រោយនេះ នឹងធ្វើឲ្យគេនឹកស្រមៃ ថា អាចជាសកម្មភាពរបស់ក្រុងកៀវ៕

បរទេស៖ ប៉ូលិសជប៉ុនបានធ្វើការចាប់ខ្លួនគ្រូស្រីមួយក្រុមដែលធ្វើការក្នុងសាលាមត្តេយ្យមួយកន្លែងនៅក្នុងខេត្ត Shizuoka ក្នុងប្រទេសជប៉ុនដើម្បីកាត់ទោសពីបទទារុណកម្មលើកុមាររាប់សិបនាក់។

ទីភ្នាក់ងារស៊ីនហួរបានរាយការណ៍ពីទីក្រុងតូក្យូ ប្រទេសជប៉ុនកាលពីថ្ងៃទី ៤ ខែធ្នូ ឆ្នាំ២០២២ កន្លងទៅនេះ ដោយមានរយៈប្រព័ន្ធផ្សព្វផ្សាយក្នុងស្រុកជាច្រើននៅក្នុងប្រទេសជប៉ុនបានរាយការណ៍ថា ប៉ូលិសបានធ្វើការចាប់ខ្លួនគ្រូស្រីបីនាក់ដែលធ្លាប់ធ្វើការនៅសាលាមត្តេយ្យ Sakura Hoikuen ក្នុង ក្រុង Susono ខេត្ត Shizuoka ភាគកណ្តាលនៃប្រទេសជប៉ុន។

ការចាប់ខ្លួននេះធ្វើឡើងក្រោយពីមានការចោទប្រកាន់ពីបទរំលោភបំពានលើកុមារ ដែលស្ថិតនៅក្រោមការថែទាំរបស់ពួកគេ។ ដោយគេបានដឹងថា នៅចន្លោះខែមិថុនា និងខែសីហា កុមារតូចៗជាច្រើននៅអាយុត្រឹម១ឆ្នាំស្ថិតនៅក្រោមការគ្រប់គ្រោងរបស់គ្រូទាំងនោះ ហើយពួកគេបានរំលោភបំពាន់លើកុមារ ដោយការបង្ខំកុមារឱ្យដោះខោគំរាមក្មេងដោយកាំបិត និងទម្រង់នៃការធ្វើបាបជាច្រើនផ្សេងទៀត។

យ៉ាងណាមិញគ្រូបង្រៀនទាំងនោះបានទទួលស្គាល់ពីអាកប្បកិរិយាបំពានរបស់ពួកគេ ប៉ុន្តែគេបានលើកឡើងពីហេតុផលថាវាជាការព្យាយាមបង្រៀនវិន័យដល់កុមារ។

ទោះជាយ៉ាងណាក្រុមអ្នកស៊ើបអង្កេតកំពុងពិនិត្យដោយប្រុងប្រយ័ត្ននូវកំណត់ត្រាដែលទទួលបាន ព្រោះគេជឿថា ការរំលោភបំពាននៅតែបន្តនៅក្នុងសាលានេះ ដែលបង្ខំឱ្យបុគ្គលិកទាំងអស់ចុះកិច្ចសន្យានោះ នឹងមិនបង្ហាញពីអ្វីដែលបានកើតឡើងនៅក្នុងសាលានោះទេ ឬអាចដោយសារតែការភ័យខ្លាច ទើបភស្តុតាងអាចនឹងត្រូវបំផ្លាញ។

យ៉ាងណាមិញក្រុមមន្ត្រីប៉ូលិសបានធ្វើការសាកសួរលម្អិតទៅកាន់នាយកសាល ប៉ុន្តែ មកទល់ពេលនេះនៅមិនទាន់មានការឆ្លើយបកណាមួយមកកាន់ប៉ូលិសនៅឡើយទេ៕ ប្រភព៖ Dailynews